ഇരുട്ടു കൊണ്ട് ഓട്ട അടയുമോ?

Be Sociable, Share!

• 

സിദ്ദിക്ക് റാബിയത്ത്

കഴിഞ്ഞ അഞ്ചുമാസം കൊണ്ട് രൂപയുടെ മൂല്യം ഏകദേശം എട്ട് ആറു രൂപയോളം താഴേപ്പോയി. അതായത് ശരാശരി 49 രൂപകൊടുത്താല്‍ ലഭിക്കുന്ന ഒരു യുഎസ്‌ ഡോളറിനു ഇന്ന് 55 രൂപ കൊടുക്കണമെന്ന് സാരം. ഇവയെല്ലാം കൂട്ടിവായിക്കുമ്പോള്‍ ഇന്ത്യന്‍ പണത്തിനു എന്തൊക്കെയോ പ്രശ്നങ്ങള്‍ നേരിടുന്നു എന്ന് ആരെങ്കിലും ആശങ്കപ്പെടുന്നുണ്ടെകില്‍ അതില്‍ തെറ്റ് പറയാനാകില്ല. കാരണം, ഇക്കഴിഞ്ഞ വര്‍ഷങ്ങളില്‍ തുടര്‍ച്ചയായി വിറച്ചുപൊട്ടിക്കൊണ്ടിരിക്കുന്ന ലോക സാമ്പത്തിക വ്യവസ്ഥയില്‍ ഇന്ത്യന്‍ സാമ്പത്തിക സ്ഥിതി ഭദ്രമാണെന്ന് പറയുന്ന അവസരത്തിലാണ് ഈ ഗതിയെന്നുള്ളതും ശ്രദ്ധേയമാണ്. ഈ അവസരത്തിലും നമ്മുടെ നവലിബറല്‍ പണമിടപാടുകാര്‍ (സര്‍ക്കാര്‍) ആണയിടുന്നത് ഇന്ത്യന്‍ സമ്പദ്‌വ്യവസ്ഥ ചെറിയ ചില പ്രശ്നങ്ങള്‍ മാത്രമേ നേരിടുന്നുള്ളൂ, അഥവാ വീരപ്പ മോയ്ലിയുടെ അഭിപ്രായത്തില്‍, സാമ്പത്തിക സുനാമി ഒന്നും ഇന്ത്യ അനുഭവിക്കുന്നില്ല എന്നാണു. എന്നാല്‍ ഇത് എത്രത്തോളം വസ്തുതാപരമാണ്?

പണവിനിമയ നിരക്കുകള്‍ നോക്കി നമുക്ക് എന്തെങ്കിലും തരത്തിലുള്ള സാമ്പത്തിക വായന സാധ്യമാക്കാന്‍ സാധിക്കുമോ എന്ന് പരിശോധിക്കാം. ഇത് പരിശോധിക്കുന്നതിന് പ്രധാനമായും ഉപയോഗിച്ചിരിക്കുന്നത് 2002 രണ്ടുമുതലുള്ള ഇന്ത്യന്‍ രൂപയുടെ യുഎസ്‌ ഡോളറുമായുള്ള വിനിമയനിരക്കുകളാണ്. ഇതിലേക്കായി തുടര്‍ച്ചയായി ഏകദേശം 2,450 ദിവസങ്ങളുടെ വിനിമയ നിരക്കുകളാണ് പരിശോധിക്കുന്നത്. കൂടാതെ യുഎസ്‌ ഡോളറും മറ്റു പ്രധാന കറന്‍സികളായ ജപ്പനീസ് യെന്‍, യൂറോ, പൗണ്ട് എന്നിവയോടുള്ള റുപ്പി വിനിമയവും സെപ്തംബര്‍ 1, 2008 മുതല്‍ ജനുവരി 11, 2012 വരെയുള്ള (808) ദിവസങ്ങളില്‍ പരിശോധിക്കുന്നുണ്ട്. ഇതിനായി അവലംബിച്ചിരിക്കുന്നത് 2002 മുതലുള്ള റിസര്‍വ്‌ ബാങ്കിന്റെ ഔദ്യോഗിക കണക്കുകളാണ്. ആദ്യമായി നമുക്ക് രൂപയുടെ യുഎസ്‌ ഡോളറുമായുള്ള പ്രധാന വിനിമയം നോക്കാം.

2002 ജൂണ്‍ ആദ്യവാരത്തില്‍ ഏകദേശം 49 രൂപയായിരുന്നു ഒരു ഡോളറിനു വേണ്ട വിനിമയ നിരക്ക്. ഈ കൂടിയ വിനിമയനിരക്കിന് (രൂപയുടെ കുറഞ്ഞ മൂല്യത്തിന്) കാരണം 2000-01ലുണ്ടായ ആഗോള സാമ്പത്തിക തകര്‍ച്ചയാണ് (ഡോട്കോം ബസ്റ്റ്‌ എന്നാണിതിനെ വിളിച്ചുപോരുന്നത്). ഇതിനെത്തുടര്‍ന്ന്‍ ക്രമമായ മൂല്യശോഷണം പണത്തിനുണ്ടായി. ഇതിനു തടയിടുന്നതിലേക്കുള്ള പല സ്ഥൂലസാമ്പത്തിക ശ്രമങ്ങള്‍ക്കും, റിസര്‍വ്‌ ബാങ്കിന്റെ ഇടപെടലുകള്‍ക്കും ഒടുവിലാണ് ഒന്നാമത്തെ ഗ്രാഫില്‍ കാണിക്കുന്ന മൂല്യ വര്‍ധനവ്‌ സാധ്യമായത്. പണത്തിന്റെ ഈ ക്രമമായ ശക്തിപ്പെടലാണ് ഇന്ത്യന്‍ സ്റ്റോക്ക്‌ മാര്‍ക്കറ്റിനെ 2003നു ശേഷം ശക്തിപ്പെടുത്തുന്നത് (ഇതിലേക്കായി പ്രതിസന്ധിയുടെ സാമ്പത്തിക ശാസ്ത്രം എന്നലേഖനത്തിന്റെ ഒന്നാമത്തെ ഗ്രാഫ്‌ കാണുക). അതായത്, ഇന്ത്യയില്‍ ഊഹമുതലാളിത്തം വന്‍തോതില്‍ ചേക്കേറാന്‍ തുടങ്ങിയത് എന്നുസാരം. ഈ പ്രവര്‍ത്തനം ശക്തിപ്പെടുന്നത് ഒന്നാം യുപിഎയുടെ കാലത്താണെന്നതും ശ്രദ്ധേയമാണ്. മറ്റൊരുതരത്തില്‍ പറഞ്ഞാല്‍ നവലിബറല്‍ സാമ്പത്തികശാസ്ത്രത്തിന്റെ രണ്ടാം വരവ്. എന്നാല്‍, ഈ കാലയളവിലുണ്ടായ പണത്തിന്റെ വിനിമയത്തിലുള്ള ഏറ്റക്കുറച്ചിലുകളും ഊഹക്കബോളത്തിലെ ഏറ്റക്കുറച്ചിലുകളും നമുക്ക് ഒരുമിച്ചു വായിക്കാവുന്നതാണ് (എന്നാല്‍ അത്തരം സങ്കീര്‍ണമായ വിശദീകരണം ലേഖനത്തിന്റെ സ്വഭാവം കണക്കിലെടുത്ത് ഇവിടെ നടത്തുന്നില്ല).

ആഗോളവിപണിയില്‍ 2007 അവസാന പാദത്തില്‍ കണ്ടു തുടങ്ങിയ സാമ്പത്തിക പരാധീനതകളും മാന്ദ്യത്തിലേക്കുള്ള ആരംഭ ലക്ഷണങ്ങളും ഇന്ത്യന്‍ പണത്തിന്റെ മൂല്യം ഈ കാലയളവില്‍ തന്നെ കുറയ്ക്കുകയാണുണ്ടായത്. അതായത്, ഇന്ത്യന്‍ പണത്തിനു വിദേശ ചോദനം കുറയുന്നതിന്റെ ലക്ഷണങ്ങള്‍ ഈ കാലയളവില്‍ തന്നെ കാണിച്ചു തുടങ്ങി. അത് 2008 ഫെബ്രുവരിയായപ്പോഴേക്കും പ്രകടമായ രീതിയില്‍ ഇന്ത്യന്‍ പണത്തിന്റെ മൂല്യശോഷണം സാധ്യമാക്കിത്തുടങ്ങുന്നതും ഗ്രാഫില്‍ നിന്നു മനസ്സിലാക്കാവുന്നതാണ്. ഇതിന്റെ മൂര്‍ധന്യത 2009 ഏപ്രില്‍ വരെ തുടര്‍ന്നു. എന്നാല്‍ സര്‍ക്കാര്‍ നേരിട്ട് ഇടപെട്ടു നല്‍കിയ സാമ്പത്തിക ഉത്തേജന പ്രവര്‍ത്തനത്തിന്റെ ഭാഗമായി വീണ്ടും നഷ്ട്ടപ്പെട്ട ഇന്ത്യന്‍ രൂപ അതിന്റെ മൂല്യശോഷണം തടഞ്ഞു മെല്ലെ കരകയറാന്‍ തുടങ്ങി. ഈ കാലത്താണ് വീണ്ടും ഇന്ത്യന്‍ ഊഹാകമ്പോളവും തിരിച്ചുവരുന്നതായി മനസിലാക്കാന്‍ സാധിക്കുന്നത് (പ്രതിസന്ധിയുടെ സാമ്പത്തിക ശാസ്ത്രം എന്നലേഖനത്തിന്റെ ഒന്നാമത്തെ ഗ്രാഫ്‌ കാണുക).

ഈ തിരിച്ചുവരലിനെയാണ് ചില സാമ്പത്തിക ശാസ്ത്രഞ്ജര്‍ മുതലാളിത്തത്തിന്റെ W ആകൃതിയിലുള്ള തിരിച്ചുവരല്‍ എന്ന് വിശേഷിപ്പിച്ചത്. എന്നാല്‍ ഇത് ശരിയല്ല എന്നാണു അടുത്തകാലത്തെ പണത്തിന്റെ മൂല്യശോഷണം തെളിയിക്കുന്നത്. എന്നു വച്ചാല്‍ മുതലാളിത്തത്തിന് സംഭവിച്ച 2008ലെ സാമ്പത്തിക പ്രതിസന്ധി വീണ്ടും ശക്തമായി തിരിച്ചു വന്നെന്നും അത് ഇന്ത്യന്‍ രൂപയുടെ മൂല്യം കുറച്ചുവെന്നും ആഗോളീകൃത ഇന്ത്യയിലെ പണവിനിമയ നിരക്ക് നോക്കിയാല്‍ തന്നെ മനസിലാക്കാന്‍ കഴിയുന്നതാണ് എന്ന് ചുരുക്കം. അതായത്, 2008ലുണ്ടായ പ്രതിസന്ധി ഇന്ത്യന്‍ പണത്തിന്റെ മൂല്യം ശോഷിപ്പിച്ചുവെന്നോ അല്ലെങ്കില്‍ പണത്തിന്റെ മൂല്യശോഷണം സാമ്പത്തിക പ്രതിസന്ധിയുടെ ഏറ്റവും വലിയ പ്രതിഫലനമോ ആയി കാണാം എന്നുള്ളതാണ് ഈ വസ്തുതകള്‍ നമ്മെ പഠിപ്പിക്കുന്നത്‌. ഇപ്പോള്‍ ഉണ്ടായിക്കൊണ്ടിരിക്കുന്ന രൂപയുടെ തകര്‍ച്ച സൂചിപ്പിക്കുന്നത് ലോകസാമ്പത്തിക അവസ്ഥയുടെ (മുതലാളിത്തത്തിന്റെ) കടുത്ത പ്രതിസന്ധിയും അത് ഇന്ത്യന്‍ സാമ്പത്തിക അവസ്ഥയെ എത്ര ഗുരുതരമായാണ് ബാധിക്കുന്നതെന്നുമുള്ള വസ്തുതയുമാണ്. ഇവിടെയാണ്‌ നവലിബറലിസത്തിന്റെ ഇന്ത്യന്‍ അധരസേവകര്‍ ജനത്തിനെ കബളിപ്പിക്കാന്‍ പുതിയ നുണകഥകള്‍ക്ക് തിരക്കഥ രചിക്കുന്നത്, മോയ്ലിയുടെത് അതിലേറ്റവും പുതിയത് മാത്രം!

ഈ വാദം കുറച്ചുകൂടി സൂക്ഷ്മമായി മനസിലാക്കണമെങ്കില്‍ നമുക്ക് അവസാനത്തെ അഞ്ചുവര്‍ഷങ്ങള്‍ (2008 ലെ സാമ്പത്തിക പ്രതിസന്ധിമുതലിങ്ങോട്ട്) പരിശോധിക്കാവുന്നതാണ്. ഇതാണ് ഗ്രാഫ്‌ രണ്ടില്‍ പ്രതിപാദിക്കുന്നത്.

പണത്തിന്റെ മൂല്യശോഷണം സാമ്പത്തിക പ്രതിസന്ധിയുടെ ആക്കത്തില്‍ വളരെ ശക്തമായാണ് 2008ന്റെ ആരംഭത്തില്‍ നിന്നും 2009 മാര്‍ച്ച്‌-ഏപ്രിലോടെ ചെന്ന് നില്‍ക്കുന്നത്. എന്നാല്‍ ഈ കൂപ്പുകുത്തളുകള്‍ക്ക് സര്‍ക്കാര്‍ നല്‍കേണ്ടി വന്ന വില വലുതാണ്‌ (ഇത് നവലിബറല്‍ വ്യവസ്ഥയിലെ മുതലാളിത്തത്തില്‍ അനിവാര്യമായത്). ഈ വിലയുടെ അടിസ്ഥാനത്തില്‍ സമ്പദ്‌വ്യവസ്ഥ കരകയറാന്‍ എടുത്തത് അതിന്റെ ഇരട്ടിയിലധികം സമയവും. എന്നാല്‍ ഇന്ത്യന്‍ കാര്യത്തില്‍ കരകയറല്‍ പൂര്‍ണമാകുന്നതിനു മുന്‍പു തന്നെ അടുത്ത പ്രതിസന്ധിയിലേക്ക് കൂപ്പുകുത്തുകയാണ്. അവസാനത്തെ രണ്ടു സാമ്പത്തിക പാദങ്ങളുടെ വളര്‍ച്ചാ റിപോര്‍ട്ടും ഇത് തന്നെയാണ് സൂചിപ്പിക്കുന്നത്. എന്നാല്‍ ഈ വീഴ്ച കൂടുതല്‍ ആഴത്തിലുള്ളതാണ് എന്നാണു മനസിലാക്കേണ്ടത്. പണത്തിന്റെ മൂല്യം തന്നെ പരിശോധിക്കുമ്പോള്‍ ഇതി 40 രൂപ നല്‍കിയാല്‍ ലഭിക്കുന്ന ഡോളറിനു (2008) ഇന്ന് ഏകദേശം 55 രൂപ നല്‍കണം!

ഇനി രൂപയ്ക്കു ആരെങ്കിലും മറ്റേതെങ്കിലും നാണയത്തില്‍ ഏതെങ്കിലും തരത്തിലുള്ള വിനിമയ മെച്ചം എന്ന സാധ്യത ഉയര്‍ത്തിയാല്‍ ആ വാദങ്ങളും പൊളിയുന്നതായി പരിശോധനയില്‍ കാണാം. താഴെ ഈ സാധ്യതയാണ് പരിശോധിക്കുന്നത്.

മുകളിലത്തെ ഗ്രാഫ്‌ പരിശോധിച്ചാല്‍ 2011ന്റെ രണ്ടാം പകുതിമുതല്‍ ഇന്ത്യന്‍ രൂപയുടെ മൂല്യം മറ്റെല്ലാ നാണയങ്ങളുടെ മൂല്യത്തെ അപേക്ഷിച്ചു വളരെ കൂടിയ തോതില്‍ ഇടിവ് സംഭാവിക്കുന്നതായി കാണാം. എന്നാല്‍ ഇതില്‍ അല്പമെങ്കിലും കുറവുള്ളത് ഡോളര്‍ വിനിമയത്തിലാണ്. ഇത് സൂചിപ്പിക്കുന്നത് ഇന്ത്യന്‍ ഉലപന്നങ്ങള്‍ക്ക് വിദേശകമ്പോളങ്ങളില്‍ ചോദനം വളരെ വേഗത്തില്‍ കുറയുന്നു എന്നാണു. ഇതിനാലാണ് നമ്മുടെ പണത്തിന്റെ ചോദനവും കുറയുന്നത്. ഇത് നമ്മുടെ കയറ്റുമതിയില്‍ വന്‍ ഇടിവുണ്ടാക്കി എന്ന അവസാന രണ്ടു പാദത്തിലെ റിപോര്‍ട്ടുകളും ശരിവയ്ക്കുമ്പോള്‍ നാം ചോദിക്കേണ്ടത് ഇന്ത്യന്‍ രൂപ താഴുന്നത് ഇന്ത്യന്‍ സാമ്പത്തിക രംഗത്തിന്റെ താഴ്ചയായി കാണാമോ എന്ന വസ്തുതാപരമായ ചോദ്യമാണ്. അപ്പോള്‍ എവിടെയാണ് നമ്മുടെ സാമ്പത്തിക കരകയറലും, അഭിന മുതലാളിത്തത്തിന്റെ ‘W’ പ്രത്യാശയും!? ഇവിടെയാണ്‌ മുതലാളിത്തവും അതിന്റെ അധരസേവകരും ഇരുട്ടുകൊണ്ട് ഓട്ട അടയ്ക്കുകയാനെന്നു പറയേണ്ടിവരുന്നത്.

Be Sociable, Share!

• 

Tags: exchange rates, inflation, rupee dollar, ഇന്ത്യന്‍ ഇക്കോണമി, ഇന്ത്യന്‍ സമ്പദ് വ്യവസ്ഥ, ദില്ലിപോസ്റ്റ്, പണപ്പെരുപ്പം, രൂപ, രൂപയുടെ മൂല്യം, സിദ്ദിക്ക് റാബിയത്ത്