പത്രപ്രവര്‍ത്തനം ആരോഗ്യത്തിനു ഹാനികരം

Be Sociable, Share!

• 

Journalism is injurious to health — Richard Keeble, acting head of journalism at Lincoln university

പ്രമുഖ ബിട്ടീഷ്‌ ജേര്‍ണലിസ്‌റ്റും മാഞ്ചസ്റ്റര്‍ ഗാര്‍ഡിയന്റെ പത്രാധിപരുമായിരുന്ന സി.പി.സ്‌കോട്ട്‌ എന്ന മഹാനായ മനുഷ്യന്റെ “Comment is free, but facts are sacred” എന്ന പ്രസിദ്ധമായ വാക്കുകള്‍ കാലങ്ങളായി ഉദ്ധരിക്കപ്പെടുന്ന ക്ലാസുമുറികളില്‍ നിന്നാണ്‌ ഓരോ വര്‍ഷവും കേരളത്തിലേയും ഇന്ത്യയിലേയും ജേര്‍ണലിസം വിദ്യാര്‍ത്ഥികള്‍ പുറത്തുവരുന്നത്‌. മാധ്യമപ്രവര്‍ത്തനത്തിന്റെ ചരിത്രപരമായ പ്രസക്തിയില്‍ ആര്‍ക്കും സംശയമൊന്നുമില്ലെങ്കിലും ഇന്ത്യയിലെ വിശേഷിച്ച്‌ കേരളത്തിലെ പല മാധ്യമ സ്ഥാപനങ്ങള്‍ക്കുള്ളില്‍ നടക്കുന്ന പല സംഭവങ്ങളും അമ്പരപ്പിക്കുന്നതും ലജ്ജാകരവുമാണ്‌. ഇവ പിന്നാമ്പുറക്കഥകളായി പലപ്പോഴായി പുറത്തുവരുകയും ചെയ്‌തുകൊണ്ടിരിക്കുന്നു.

മാധ്യമപ്രവര്‍ത്തകരുടെ 13 വര്‍ഷത്തോളം പഴക്കമുള്ള പ്രധാനപ്പെട്ട ആവശ്യമാണ്‌ വേജ്‌ ബോര്‍ഡ്‌ അടിസ്ഥാനത്തിലുള്ള ശമ്പളപരിഷ്‌കരണം. നേരത്തെ തൊഴിലാളികളുടെ പല ആവശ്യങ്ങളോടും കാലാകാലങ്ങളായി പത്രമുതലാളിമാര്‍ പ്രകടിപ്പിച്ച അതേ നിഷേധാത്മക സമീപനം തന്നെ കുറച്ചുകൂടി ശക്തമായി അവര്‍ ഇക്കാര്യത്തില്‍ സ്വീകരിക്കുകയും ചെയ്‌തു. സമരത്തെ അടിച്ചമര്‍ത്തുക എന്ന തന്ത്രം. സര്‍ക്കാര്‍ തീരുമാനപ്രകാരം ജസ്റ്റിസ്‌ ജി. ആര്‍ മജീദിയ കമ്മിറ്റി (Majithia Wage Board) നടത്തിയ പഠനവും തുടര്‍ന്ന്‌ സമര്‍പ്പിക്കപ്പെട്ട റിപ്പോര്‍ട്ടും അടിസ്ഥാനമാക്കി സുപ്രീംകോടതിയാണ്‌ വേജ്‌ ബോര്‍ഡ്‌ നടപ്പാക്കുന്നതിന്‌ അനുകൂലമായ വിധി പുറത്തിറക്കിയത്‌. രണ്ടായിരത്തി പതിനൊന്നു ഒകടോബര്‍ 25നു സര്‍ക്കാര്‍ അംഗീകരിക്കുകയും, 11 നവംബറില്‍  S.O. no. 2532 (E) ആയി ഗസറ്റില്‍ നോട്ടിഫൈ ചെയ്യുകയും ചെയ്ത വേജ്ബോഡ് ശുപാര്‍ശകള്‍ നടപ്പാക്കുന്ന കാര്യം ഉറപ്പുവരുത്താന്‍ സര്‍ക്കാരിന്‌ ബാധ്യതയുണ്ടെന്നും കോടതി വിധിച്ചു. അങ്ങനെ കേന്ദ്രസര്‍ക്കാരിന്റെ കൂടി അനുകൂല നിലപാടോടെയാണ്‌ വേജ്‌ ബോര്‍ഡ്‌ ശുപാര്‍ശകള്‍ നിലവില്‍ വന്നത്‌. ഇതിനായി ഏറെ സമരങ്ങളും പ്രതിഷേധങ്ങളും കേരളത്തില്‍ ഉള്‍പ്പെടെ സജീവമായി. വാര്‍ത്താ ഏജന്‍സികളായ പി.ടി.ഐയും യു.എന്‍.ഐയും ഒരു ദിവസം പണിമുടക്കി. ഈ സമരങ്ങളോടെല്ലാം മാനേജ്‌മെന്റുകള്‍ നിഷേധാത്മകമായ സമീപനമാണ്‌ സ്വീകരിച്ചത്‌ കേരളത്തില്‍ പ്രത്യേകിച്ചും.

വാര്‍ത്തയും വയറ്റിപ്പിഴപ്പും
എന്നാല്‍ 2012 ജനുവരിമുതല്‍ ആസാം ട്രിബ്യൂണ്‍ എന്ന പത്രം ഇന്ത്യയില്‍ ആദ്യമായി വേജ്‌ ബോര്‍ഡ്‌ നടപ്പാക്കിക്കൊണ്ട്‌ മാതൃകാപരമായ നടപടി സ്വീകരിച്ചു. കഴിഞ്ഞ മാര്‍‌ച്ചില്‍ വേജ്‌ ബോര്‍ഡ്‌ ശുപാര്‍ശകള്‍ ഉപാധികളോടെ അംഗീകരിച്ച് കേരളത്തിലെ മാധ്യമം പത്രം ചരിത്രത്തിലിടം നേടുകയും ചെയ്‌തു. മാസങ്ങള്‍ക്കു ശേഷം ജൂണില്‍ സി.പി.എം. മുഖപത്രമായ ദേശാഭിമാനിയും ഉപാധികള്‍ക്കും നിയന്ത്രണങ്ങള്‍ക്കും വിധേയമായി വേജ്‌ ബോര്‍ഡ്‌ അംഗീകരിച്ച്‌ നടപ്പാക്കി. ഇതോടെ ഇന്ത്യയില്‍ വേജ്‌ ബോര്‍ഡ്‌ അംഗീകരിച്ച ആദ്യ മൂന്നുപത്രങ്ങളായി ഇവ മാറി. ദേശാഭിമാനിയില്‍ തൊഴിലാളി യൂണിയന്‍ ആവശ്യപ്പെട്ടതുപ്രകാരമുള്ള സ്റ്റേജില്‍ നിന്നുകൊണ്ടല്ലെങ്കില്‍ പോലും തൊഴില്‍സുരക്ഷാ പാക്കേജ്‌ എന്ന പൂര്‍ണമായ അര്‍ത്ഥത്തെ ഉള്‍ക്കൊള്ളാനുള്ള ഉത്തരവാദിത്തം തൊഴിലാളിപ്രസ്ഥാനത്തിന്റെ മുഖപത്രം എന്ന വിളിപ്പേരുള്ള ദേശാഭിമാനി ആര്‍ജ്ജവത്തോടെ പ്രകടിപ്പിച്ചുവെന്നതാണ്‌ സത്യം. എന്നാല്‍ ഇതുകൊണ്ടൊന്നും മറ്റ്‌ പത്രമാനേജ്‌മെന്റുകള്‍ കുലുങ്ങിയില്ല. വേജ്‌ ബോര്‍ഡ്‌ നടപ്പാക്കാന്‍ ശേഷിയുള്ള വമ്പന്‍ പത്രങ്ങളിലോ ബദല്‍ സംവിധാനം നടപ്പാക്കാനെങ്കിലും ബാധ്യതയുള്ള മറ്റ്‌ ചെറിയ പത്രങ്ങളിലെ നിയതമായ ഒരു വേതന സമ്പ്രദായവും നടപ്പാക്കപ്പെട്ടിട്ടില്ല. മാത്രമല്ല പല പത്രങ്ങളിലേയും വേതനസമ്പ്രദായം അതീവഗൗരവതരമായ ചര്‍ച്ചകള്‍ പ്രസക്തമാക്കുന്നതും അതിദയനീയവുമാണെന്ന്‌ അവിടെ ജോലി ചെയ്യുന്നവര്‍ തന്നെ വ്യക്തമാക്കുന്നു.

ഇവിടെയാണ്‌ ലണ്ടന്‍ യൂണിവേഴ്‌സിറ്റിയിലെ മുന്‍ ജേര്‍ണലിസം അധ്യാപകനും ശ്രദ്ദേയമായ മാധ്യമപഠനങ്ങളുടെ രചയിതാവുമായ റിച്ചാര്‍ഡ്‌ കീബിള്‍ തന്റെ പുസ്‌തകത്തിന്റെ തുടക്കത്തില്‍ പറയുന്ന മേലുദ്ധരിച്ച വാചകം പ്രസക്തമാകുന്നത്‌. ജേര്‍ണലിസം ആരോഗ്യത്തിന്‌ മാത്രമല്ല മനസിനും ഹാനികരമാകുന്ന അവസ്ഥാ വിശേഷമാണ്‌ കേരളത്തിലെ പല പത്രചാനല്‍ സ്ഥാപനങ്ങളിലും നിലനില്‍ക്കുന്നത്‌. ജേര്‍ണലിസം ആരോഗ്യത്തിന്‌ ഹാനികരമെന്ന്‌ കീബിള്‍ യുദ്ധരംഗത്തെ റിപ്പോര്‍ട്ടിങ്ങിനെക്കുറിച്ചാണ്‌ വിശേഷിപ്പിച്ചതെങ്കില്‍ വേതനം കൂടുതല്‍ ചോദിച്ചാല്‍ മാനസികശാരീരിക പ്രശ്‌നങ്ങള്‍ നിങ്ങള്‍ക്ക്‌ ഉണ്ടാക്കിത്തരാന്‍ ഞങ്ങള്‍ക്ക്‌ കഴിയുമെന്ന മുന്നറിയിപ്പാണ്‌ പല സ്ഥാപനങ്ങളും നല്‍കുന്നത്‌.

വേജ്‌ ബോര്‍ഡ്‌ കോടതിയും സര്‍ക്കാരും അംഗീകരിക്കുമെന്ന്‌ ഉറപ്പായതോടെ ഒരു പ്രമുഖ വലതുപക്ഷ മുത്തശ്ശിപ്പത്രം ആദ്യം ചെയ്‌തത്‌ അതിന്‌ ബദലായി ഒരു ശമ്പളവര്‍ധന സ്വന്തം നിലയ്‌ക്ക്‌ നടപ്പാക്കുകയാണ്‌. ഇത്‌ അവിടത്തെ പ്രവര്‍ത്തകരെ കുറച്ചെല്ലാം നിശബ്ദരാക്കിയെങ്കിലും എഡിറ്റോറിയല്‍ തീരുമാനങ്ങള്‍ക്കായുള്ള പല യോഗങ്ങളിലും പലരും ശക്തമായ പ്രതിഷേധങ്ങള്‍ പുറപ്പെടുവിച്ചതായാണ്‌ വിവരം. കൊച്ചിയില്‍ നടന്ന ഒരു യോഗത്തില്‍ ഇതിനെ തുടര്‍ന്ന്‌ പത്രത്തിന്റെ തലപ്പത്തുള്ള ഒരു പ്രമുഖ മാധ്യമപ്രവര്‍ത്തകന്‍ ഇറങ്ങിപ്പോയെന്നുവരെ വാര്‍ത്ത പ്രചരിച്ചിരുന്നു. ഇത്‌ ശരിയായാലും തെറ്റായാലും വേജ്‌ ബോര്‍ഡ്‌ എന്ന ആവശ്യം ജീവനക്കാരില്‍ ശക്തമാണ്‌. മാത്രമല്ല ഈ പത്രത്തില്‍ ഒരേ തസ്‌തികയിലുള്ള പലര്‍ക്കും പല രീതിയിലുള്ള വര്‍ധനയാണ്‌ നടപ്പാക്കിയെന്നും ആരോപണമുണ്ട്‌. ഇതിന്‌ കാരണമായി മാനേജ്‌മെന്റ്‌ തന്നെ വിശദീകരിക്കുന്നത്‌ ഒരേ തസ്‌തികയിലുള്ളവരായാലും സീനിയോറിറ്റി അടിസ്ഥാനമാക്കിയാണ്‌ വര്‍ധന നടപ്പാക്കിയത്‌ എന്നാണ്‌. അതുകൊണ്ട്‌ സീനിയര്‍ തസ്‌തികയിലുള്ളവര്‍ തരക്കേടില്ലാത്ത വേതനവര്‍ധന ലഭിച്ചതോടെ സംതൃപ്‌തരും, സാധാരണ സബ്‌ എഡിറ്റര്‍മാര്‍ ഉള്‍പ്പെടെയുള്ളവര്‍ അസംതൃപ്‌തരുമായി. ഏതായാലും ഭിന്നിപ്പിക്കലിന്റേയും പ്രീണനത്തിന്റേയും മുതലാളിത്തതന്ത്രം ഈ പത്രത്തെ ആരും പഠിപ്പിക്കേണ്ടതില്ലെന്ന്‌ അവര്‍ ഒരിക്കല്‍ കൂടി തെളിയിച്ചു.

അതസമയം വേജ്‌ ബോര്‍ഡ്‌ സമരത്തിന്‌ ശക്തിപകരുകയും അത്‌ നയിക്കുകയും ചെയ്യുന്ന കേരള പത്രപ്രവര്‍ത്തക യൂണിയന്റെ മെല്ലെപ്പോക്കിനെതിരെ വിമര്‍ശനം ശക്തമാണ്‌. യൂണിയന്റെ ഒരു മുന്‍ സംസ്ഥാന നേതാവ്‌ അയച്ച കത്ത്‌ ഈയിടെ വ്യാപകമായി ചര്‍ച്ച ചെയ്യപ്പെട്ടിരുന്നു. കേരള പത്രപ്രവര്‍ത്തക യൂണിയന്റെ വേജ്‌ ബോര്‍ഡ്‌ സമരം സംബന്ധിച്ച ഒരു വാര്‍ത്തയും നല്‍കേണ്ടതില്ലെന്ന്‌ കേരളത്തിലെ ഏറ്റവും വലിയ രണ്ടു പത്രങ്ങള്‍ അനൗദ്യോഗികമായി തീരുമാനിച്ചതിന്റെ ഫലമായി അടുത്തിടെ നടന്ന ഒരു സമരപരിപാടിയും വാര്‍ത്തയായി വരാറില്ല. ഇതിനെതിരെ ഒരു പ്രതിഷേധപ്രതികരണം പോലും കെ.യു.ഡബ്ല്യു.ജെ. നടത്തിയില്ല എന്നതും ശ്രദ്ധേയമാണ്‌. ഏറ്റവും ഒടുവില്‍ പത്രപ്രവര്‍ത്തകയൂണിയന്റെ നേതൃത്വത്തില്‍ നടന്ന നിയമസഭാ മാര്‍ച്ചും പ്രമുഖ പത്രങ്ങളില്‍ വാര്‍ത്തയായില്ല. പ്രതിപക്ഷ നേതാവ്‌ വി.എസ്‌ ഉദ്‌ഘാടനം ചെയ്‌ത സമരത്തിന്‌ മുഴുവന്‍ രാഷ്ട്രീയ കക്ഷികളുടെ നേതാക്കള്‍ എത്തിയെങ്കിലും വാര്‍ത്ത വന്നത്‌ വിരലില്ലെണ്ണാവുന്ന പത്രങ്ങളില്‍ മാത്രം. അതില്‍ തന്നെ വേജ്‌ ബോര്‍ഡ്‌ നടപ്പാക്കിയ മാധ്യമവും ദേശാഭിമാനിയും ഒഴിച്ചാല്‍ ജനയുഗം മാത്രമാണ്‌ വാര്‍ത്ത നല്‍കിയത്‌.

എന്നാല്‍ വേജ്‌ ബോര്‍ഡ്‌ സമരവാര്‍ത്ത നല്‍കിയെങ്കിലും സാധാരണ ശമ്പളത്തിന്റെ കാര്യത്തിലുള്‍പ്പെട ജനയുഗത്തിലെ കാര്യവും അതീവഗുരുതരമാണ്‌ എന്നാണ്‌ കേള്‍ക്കുന്നത്‌. ബിനോയ്‌ വിശ്വം ഉള്‍പ്പെടെയുളള പുതിയ സാരഥികള്‍ അവിടത്തെ പ്രശ്‌നങ്ങള്‍ കൂടുതല്‍ വഷളാക്കുകയാണ്‌ ചെയ്‌തതെന്ന്‌ പുറത്തുപോയ ചിലര്‍ പറയുന്നു. കഴിഞ്ഞ ഒരു വര്‍ഷത്തിഌള്ളില്‍ ജനയുഗത്തില്‍ നിന്ന്‌ പുറത്തുപോയത്‌ 15 ഓളം പേരാണ്‌, ഇതില്‍ തന്നെ ഭൂരിഭാഗവും അവിടത്തെ ആഭ്യന്തരപ്രശ്‌നങ്ങളെ തുടര്‍ന്നാണ്‌ രാജിവെച്ചുപോയതെന്നാണു ആരോപണം.

മലബാറീന്റെ സ്വന്തം മുത്തശിപ്പത്രം തൊഴിലാളി വിരുദ്ധതയുടെ പുത്തന്‍ അധ്യായങ്ങളാണ്‌ രചിച്ചുകൊണ്ടിരിക്കുന്നത്‌ എന്ന്‌ അവിടത്തെ സമരത്തില്‍ സജീവമായ പലരും സാക്ഷ്യപ്പെടുത്തുന്നു. പുറമേയ്‌ക്ക്‌ തത്വാധിഷ്‌ഠിത സോഷ്യലിസ്‌റ്റ്‌ഗാന്ധിയന്‍ സിദ്ധാന്തങ്ങള്‍ പടച്ചുവിടുന്ന മാനേജ്‌മെന്റ്‌ തങ്ങളുടെ സ്ഥാപനത്തിനകത്ത്‌ ഏകാധിപത്യത്തിന്റെ സാധ്യമായ എല്ലാ അധികാരസ്വരൂപങ്ങളേയും കാണിച്ചുതരുന്നുണ്ട്‌ എന്നാണ്‌ ഇതുമായി ബന്ധപ്പെട്ട വിവരങ്ങള്‍ക്കായി ഈ പത്രത്തിലെ ജീവനക്കാരുമായി സംസാരിച്ചപ്പോള്‍ അറിയാന്‍ കഴിഞ്ഞത്‌. വേജ്‌ ബോര്‍ഡ്‌ സമരത്തെ ശക്തമായി പിന്തുണയ്‌ക്കുകയും മാനേജ്‌മെന്റിനെതിരെ തൊഴിലാളികളുടെ മാത്രമായ യോഗത്തില്‍ വിമര്‍ശിക്കുകയും ചെയ്‌തതിനെ അഞ്ചോളം പേരെ ഇതിനകം മനേജ്മെന്റ് ട്രാന്‍സ്‌ഫര്‍ ചെയ്‌തുകഴിഞ്ഞു. ഇതില്‍ സമരത്തിന്‌ നേതൃത്വം നല്‍കിയവരില്‍ പ്രമുഖരായ മൂന്നുപേരെ നാടുകടത്തിയത്‌ കേരളത്തിന്‌ പുറത്തേക്കാണത്ര. പ്രതിഷേധപരിപാടികളുടെ മുഖ്യ ആസൂത്രകരായ നിരവധി പേരുടെ ട്രാന്‍സ്‌ഫര്‍ പട്ടിക തയ്യാറായി കഴിഞ്ഞിട്ടുണ്ടെന്നാണ്‌ ലഭ്യമായ വിവരം.

വേജ്‌ ബോര്‍ഡ്‌ നടപ്പാക്കാനുള്ള നിര്‍ദേശം പുറത്തുവന്ന സമയത്ത്‌ അതിനെതിരെ നിലപാടെടുത്ത ഇന്ത്യന്‍ ന്യൂസ്‌പേപ്പര്‍ സൊസൈറ്റിയുടെ നിലപാടിനൊപ്പമാണ്‌ ഈ പത്രം നിലകൊണ്ടതു. തൊഴിലാളി യൂണിയനുകളോട്‌ വേജ്‌ ബോര്‍ഡ്‌ ചര്‍ച്ചയേ വേണ്ട എന്ന്‌ പറഞ്ഞ അവര്‍ പിന്നീട്‌ താല്‍ക്കാലിക വര്‍ധന നടപ്പാക്കിയെങ്കിലും ഇത്‌ നാമമാത്രമാണെന്ന്‌ തൊഴിലാളികള്‍ പറയുന്നു. നോണ്‍ജേര്‍ണലിസ്‌റ്റുകള്‍ക്ക്‌ തുച്ഛമായ വര്‍ധനയാണ്‌ നടപ്പാക്കിയതെങ്കിലും (1,000 രൂപ മുതല്‍ 2000 വരെ) സ്ഥാപനത്തിനകത്ത്‌ നടക്കുന്ന ജേര്‍ണലിസ്റ്റ്‌ യൂണിയന്റെ പ്രതിഷേധങ്ങളോട്‌ നേരിട്ട്‌ അഌഭാവം കാണിക്കാത്തത്‌ പ്രതികാര നടപടി പേടിച്ചിട്ടാണെന്ന്‌ അവര്‍ തന്നെ സമ്മതിക്കുന്നുമുണ്ട്‌. വര്‍ധിപ്പിച്ച ശമ്പളം രണ്ട്‌ ഗഡുവായാണ്‌ ജീവനക്കാര്‍ക്ക്‌ നല്‍കിയത്‌. ഇതില്‍ ആദ്യഗഡു ലഭിച്ച ഉടനെ തന്നെ അത്‌ തിരിച്ചുനല്‍കാന്‍ ഈ പത്രത്തിലെ ജേര്‍ണലിസ്റ്റ്‌ യൂണിയന്‍ തീരുമാനിച്ചിരുന്നു. ഇത്‌ ചരിത്രത്തിലുണ്ടാകാത്ത ഒരു സമരമായതിനാല്‍ കടുത്ത അസഹിഷ്‌ണുതയോടെയാണ്‌ ഈ നടപടിയെ മാനേജ്‌മെന്റ്‌ നോക്കിക്കണ്ടത്‌. ഒരു ചെറിയ ശതമാനം അംഗങ്ങള്‍ ഈ സമരത്തില്‍ നിന്ന്‌ പിന്നാക്കം പോയെങ്കിലും 250 ഓളം പേരുള്ള സ്ഥാപനത്തില്‍ 200 ല്‍ കൂടുതല്‍ പേര്‍ പങ്കെടുത്ത പ്രതിഷേധസമരം എന്ന നിലയ്‌ക്ക്‌ മലബാര്‍ മുത്തശ്ശിയുടെ ചരിത്രത്തിലെ തന്നെ സുപ്രധാന സംഭവമായി ഈ സമരം മാറിയിട്ടുണ്ട്‌.

അറിയാനുള്ള അവകാശം എന്ന ‘നുണ’
ഇതിനിടെയാണ്‌ ട്രാന്‍സ്‌ഫര്‍ നടപടികള്‍ വ്യാപിപ്പിച്ചത്‌. മാനേജ്‌മെന്റിലെ ചില പ്രബലര്‍ തന്നെ നേരിട്ട്‌ ഫോണ്‍ ചെയ്‌ത്‌ ചില ജേര്‍ണലിസ്‌റ്റുകളെ ട്രാന്‍സ്‌ഫര്‍ വേണോ എന്ന്‌ ഭീഷണിപ്പെടുത്തിയെന്നും ഇവര്‍ പറയുന്നു. പത്രത്തിലെ ജേര്‍ണലിസ്റ്റ്‌ യൂണിയന്റ സംസ്ഥാന സമ്മേളനത്തില്‍ 13 വര്‍ഷം മുമ്പുള്ള പത്രത്തിലെ ഓഹരിമൂല്യവും ഇപ്പോഴത്തെ ഷെയര്‍വാല്യുവും താരതമ്യം ചെയ്‌ത്‌ വേജ്‌ ബോര്‍ഡ്‌ നടപ്പിലാക്കണം എന്നു ആവശ്യപ്പെട്ട്‌ പ്രസംഗിച്ചതിന്റെ പേരില്‍ ഒരു മുതിര്‍ന്ന പത്രപ്രവര്‍‌ത്തകനെ തത്സ്ഥാനത്തു നിന്നും മാറ്റിയതും പ്രതികാരനടപടിയുടെ ഭാഗമാണെന്ന്‌ ഇവര്‍ പറയുന്നു. സമ്മേളനത്തില്‍ മുതലാളി പ്രസംഗിക്കാന്‍ വരുകയും ജീവനക്കാരനെ മുഴുവന്‍ അതിരൂക്ഷമായ ഭാഷയില്‍ അപഹസിക്കുകയും ചെയ്യുന്ന ഏര്‍പ്പാടും ഇവിടത്തെ പ്രത്യേകതയാണത്ര. ഇത്തവണ ജേര്‍ണലിസ്റ്റുകള്‍ ആ കീഴ്‌വഴക്കത്തെ ഇല്ലാതാക്കിയത്‌ കൂടുതല്‍ ശത്രുത വരുത്തിവെച്ചെന്നും ഇവര്‍ പറയുന്നു. സമീപകാലത്തുണ്ടായ പത്രവിതരണക്കാരുടെ സമരത്തെ ഈ മാനേജ്‌മെന്റ്‌ ഉള്‍പ്പെടെ നേരിട്ടത്‌ അറിയാനുള്ള അവകാശത്തെ നിഷേധിക്കുന്ന സമരം എന്ന രീതിയിലാണ്‌. അതിനെ ഇല്ലാതാക്കുന്നതില്‍ ഒരുവിഭാഗം ജേര്‍ണലിസ്‌റ്റുകള്‍ ഉള്‍പ്പെടെയുള്ളവരുടെ പിന്തുണയും അവര്‍ നേടി. എന്നാല്‍ നിയമസഭാ മാര്‍ച്ച്‌ ഉള്‍പ്പെടെയുള്ള പ്രധാന സമരങ്ങളുടെ ഒരു കോളം വാര്‍ത്ത പോലും നല്‍കാതിരുന്ന അവര്‍ തന്നെ ഒരേസമയം അറിയാനുള്ള അവകാശത്തിന്‌ തടസ്സം നില്‍ക്കുകയും ചെയ്‌തു.

ഇവിടെയാണ്‌ മുതലാളിമാരുടെ ഇരട്ടത്താപ്പ്‌ വ്യക്തമാകുന്നത്‌. ഈ പത്രത്തിന്റെ ഉടന്‍ വരാന്‍ പോകുന്ന ചാനലിലേക്ക്‌ പത്രത്തിലെ സീനിയര്‍ ജേര്‍ണലിസ്റ്റുകളുടെ പകുതിപോലും പ്രവര്‍ത്തന പരിചയമില്ലാത്തവര്‍ ഇവരേക്കാള്‍ ഇരട്ടിശമ്പളത്തില്‍ വരാനിരിക്കുകയാണ്‌. ഇതോടെ ഇവിടത്തെ അസമത്വവും അതുവഴി ആഭ്യന്തര പ്രശ്‌നങ്ങളും കൂട്ടുമെന്ന്‌ ഇവര്‍ പറയുന്നു. മുതലാളിമാരെ വിമര്‍ശിച്ചതിന്റെ പേരില്‍ അപ്രീതിക്ക്‌ പാത്രമായി മുംബൈയിലേക്ക്‌ ട്രാന്‍സ്‌ഫര്‍ ചെയ്യപ്പെട്ട കൊല്ലം ജില്ലയിലെ ഒരു സീനിയര്‍ റിപ്പോര്‍ട്ടറാണ്‌ തന്റെ ഒരു സഹപ്രവര്‍‌ത്തകനെ വധിക്കാന്‍ ശ്രമിച്ച കേസിലെ ഏറ്റവും നല്ല സ്‌കൂപ്പുകള്‍ പുറത്തുകൊണ്ടുവന്നത്. ആ റിപ്പോര്‍ട്ടറെയാണ്‌ ഈ കേസ്‌ നിലനില്‍ക്കുന്ന അതേ വേളയില്‍ തിരക്കിട്ട്‌ മുംബൈയ്‌ക്ക്‌ സ്ഥലം മാറ്റിയത്‌.

ഇത്തരം അശ്ലീലസംഭവങ്ങളുടെ ചുടലപ്പറമ്പുകളാണ്‌ മറ്റു പല പത്രങ്ങളും. പത്രം വില്‍ക്കാന്‍ മാധ്യമപ്രവര്‍ത്തകരെ ഏല്‍പ്പിക്കുന്നതിലും വാര്‍ത്തകള്‍ വ്യാജമായി നിര്‍മ്മിക്കുന്നതിലും വളച്ചൊടിക്കുന്നതിലും ഒരുപാട്‌ വിമര്‍ശനങ്ങള്‍ പരസ്യമായും രഹസ്യമായും ജീവനക്കാര്‍ തന്നെ ഉന്നയിക്കുന്ന ഒരു പത്രമാണ്‌ തിരുവനന്തപുരത്തുള്ളതു. ബിസിനസ്‌ മീറ്റുകള്‍ എന്ന പേരില്‍ നടത്തിവരുന്ന പരിപാടികളുടെ വാര്‍ത്തകള്‍ ഉള്‍പ്പെടെ പെയ്ഡ്‌ ന്യൂസിന്റെ കാണാക്കാഴ്‌ച്ചകള്‍ ഈ പത്രത്തിന്റെ മാനേജ്‌മെന്റ്‌ തന്നെ കേരളത്തിന്‌ കാണിച്ചുതന്നിട്ടുണ്ട്‌. ഇവിടെ ഇപ്പോഴും ജേര്‍ണലിസ്‌റ്റുകള്‍ക്ക്‌ യൂണിയനില്ല. മുതലാളിമാര്‍ നിശ്ചയിക്കുന്ന വിശ്വസ്‌തരായ ചില ജീവനക്കാര്‍ നയിക്കുന്ന ഒരു വെല്‍ഫെയര്‍ അസോസിയേഷനാണ്‌ അവിടെയുള്ളത്‌. മാത്രമല്ല വര്‍ഷങ്ങള്‍ക്ക്‌ മുമ്പ്‌ ശമ്പളവര്‍ധനവ്‌ നടപ്പാക്കിയപ്പോള്‍ പത്രപ്രവര്‍ത്തകരെ രണ്ട്‌ കാറ്റഗറിയായി തരംതിരിക്കുകയും കൂടുതല്‍ പേരെയും താഴെത്തട്ടിലുള്ളവരാക്കി അവരുടെ വേതനവര്‍ധന ഇല്ലാതാക്കിയും ഈ പത്രം കുപ്രസിദ്ധി നേടിയിട്ടുണ്ട്‌. അതായത്‌ സിദ്ധിഖ്‌ലാലിന്റെ ഫ്രണ്ട്‌സ്‌ എന്ന സിനിമയില്‍ ജഗതിയുടെ കഥാപാത്രം പറയുന്നതുപോല “എല്ലാവരും അപ്രന്റീസുകള്‍”.

ജനയുഗത്തിന്റെ തലപ്പത്ത്‌ അടുത്തകാലത്ത്‌ അഴിച്ചുപണി നടന്നതിന്‌ ശേഷം അവിടത്തെ ജീവനക്കാരുടെ ലീവെടുക്കാഌള്ള അവകാശം, സമയക്രമം എന്നിവ സംബന്ധിച്ച്‌ ചില പുതുക്കിയ ആജ്ഞകള്‍ വന്നിരുന്നു. ഇത്‌ തൊഴിലാളികളെ കൂടുതല്‍ ദുരിതത്തിലാക്കിയെന്നാണു ആരോപണം. ഈ പരിഷ്‌കാരം ശമ്പളക്കാര്യത്തില്‍ മാത്രം ഉണ്ടായില്ലെന്നും അവിടത്തെ ചിലര്‍ പറയുന്നു. അടുത്തിടെ ജനയുഗത്തില്‍ നിന്ന്‌ രാജിവെച്ച്‌ മറ്റൊരിടത്ത്‌ പോയ ഒരു സബ്‌ എഡിറ്റര്‍ ഒരു സര്‍ക്കാര്‍ ജോലിയ്‌ക്കുള്ള അഭിമുഖത്തിന്‌ രേഖകള്‍ ഹാജരാക്കാനായി എക്‌സ്‌പീരിയന്‍സ്‌ സര്‍ട്ടിഫിക്കറ്റിനായി അവിടെ ചെന്നപ്പോള്‍ രേഖകള്‍ തരാന്‍ കഴിയില്ലെന്ന നിലപാടാണ്‌ മാനേജ്‌മെന്റിലുള്ളവര്‍ ഉന്നയിച്ചത്‌. കാരണം രേഖകള്‍ പ്രകാരമുള്ള ശമ്പളം, പി.എഫ്‌. ഡോക്യുമെന്റ്‌സ്‌ എന്നിവ വെളിപ്പെടുത്തിയാല്‍ ലേബര്‍ കമ്മീഷന്‍ പ്രശ്‌നമുണ്ടാകുമെന്നും ലേബര്‍ ഓഫീസര്‍ അവിടെ പരിശോധന നടത്തുന്നതിനും അവര്‍ തടസ്സവാദം ഉന്നയിച്ചു. തത്വത്തില്‍ രേഖ ഹാജരാക്കാഌം കഴിഞ്ഞില്ല, അഭിമുഖം നഷ്ടമാകുകയും ചെയ്‌തു.

ദേശാഭിമാനിയില്‍ ഉള്ളതിന്റെ പകുതിപോലും തൊഴില്‍ സുരക്ഷ മറ്റൊരു കമ്യൂണിസ്‌റ്റ്‌ പാര്‍ട്ടിപത്രമായ ജനയുഗത്തില്‍ ജീവനക്കാര്‍ക്കില്ലെന്നാണു കേള്‍ക്കുന്നതു. ഈയിടെ രാജിവെച്ച്‌ കത്ത്‌ പ്രസിദ്ധപ്പെടുത്തിയ ജനയുഗത്തിലെ സീനിയര്‍ റിപ്പോര്‍ട്ടര്‍ ഇ.പി.കാര്‍ത്തികേയന്റെ കഥ പല ഓണ്‍ലൈന്‍ മാധ്യമങ്ങളിലും വന്നതാണ്‌. അതില്‍ വിവരിക്കുന്ന പല കാര്യങ്ങളും തൊഴിലാളിവിരുദ്ധതയുടെ പുതിയ കാഴ്‌ച്ചകളാണ്‌ സമ്മാനിക്കുന്നത്‌. വര്‍ത്തമാനത്തിലും ഇന്ത്യന്‍ എക്‌സ്‌പ്രസിലും നടന്ന സമരങ്ങളും തൊഴിലാളി വിരുദ്ധ നടപടികളും കുപ്രസിദ്ധങ്ങളാണ്‌. വര്‍ഷങ്ങളോളം ശമ്പളമില്ലാതെ വര്‍ത്തമാനം പത്രത്തില്‍ ജോലി ചെയ്‌ത്‌ ഒടുവില്‍ മറ്റ്‌ സ്ഥാപനങ്ങളിലേക്ക്‌ പോയ കുറച്ചുപേരെ കുറച്ചുപേര്‍ക്ക്‌ പിന്നീട്‌ ഒരു ബാങ്ക്‌ നോട്ടീസ്‌ വന്നു. ശമ്പളം നല്‍കാനായി ഇവരുടെ പേരില്‍ ലോണെടുത്ത കമ്പനി ആ പണവും നല്‍കിയില്ല ശമ്പളവും നല്‍കിയില്ല എടുത്ത ലോണ്‍ തിരിച്ചടച്ചതുമില്ല. ലോണില്‍ വീഴ്‌ച്ചവരുത്തിയ ജീവനക്കാരുടെ പേരില്‍ ബാങ്ക്‌ നോട്ടീസ്‌ വന്നപ്പോഴാണ്‌ കമ്പനിയുടെ ചതി മനസ്സിലായതും അവര്‍ ഹൈക്കോടതിയില്‍ പോയതും. ഈയടുത്ത കാലത്താണ്‌ ഈ പ്രശ്‌നം കമ്പനി പരിഹരിച്ചത്‌. ഇത്രയും വിചിത്രമായ ഒരു സംഭവം മറ്റെവിടെയും ഉണ്ടായിട്ടുണ്ടാകില്ല.

കേരളമാധ്യമരംഗത്തെ വിശുദ്ധപത്രത്തിന്റെ തലപ്പത്തുള്ള പിതാക്കന്‍മാരെ ഉപയോഗിച്ച്‌  പ്രമുഖവ്യവസായിയും സംഘവും നടത്തിയിരുന്ന നടപടികള്‍ കുറച്ചുനാള്‍ മുമ്പുവരെ കുപ്രസിദ്ധമായ മറ്റൊരു പത്രപ്രവര്‍ത്തനലോകത്തെ കാട്ടിത്തരുന്നിരുന്നു. പിന്നീട്‌ ഈ പ്രൊമൊട്ടര്‍ മറ്റൊരു പത്രം സ്വന്തമായി തുടങ്ങി. ഇത്തരം ഇരുണ്ട ലോകങ്ങള്‍ കേരളത്തിലെ മാധ്യമമേഖലയ്‌ക്ക്‌ അകത്തുണ്ട്‌. പക്ഷേ എന്നിട്ടും ഇവരുടെയെല്ലാം മാനേജ്‌മെന്റുകള്‍, അല്ലെങ്കില്‍ അതിലെ പ്രമുഖരായി വിലസുന്ന മുതലാളിമാര്‍ പൊതുസമൂഹത്തിന്റെ മുന്നില്‍ മാധ്യമസ്വാതന്ത്ര്യം, അറിയാഌള്ള അവകാശം, മനുഷ്യാവകാശം എന്നിവയ്‌ക്കായി നിലകൊള്ളുന്ന ആദര്‍ശധീരന്‍മാരുമാണ്‌ എന്നതാണ്‌ വൈരുദ്ധ്യം. ഇവരുടെ ഗീര്‍വ്വാണങ്ങള്‍ കേട്ട്‌ കേരളത്തിലെ രാഷ്ട്രീയപ്രമുഖരുള്‍പ്പെടെയുള്ളവരും ഒരു വിഭാഗം എഴുത്തുകാരും വാര്‍ത്തയുടെ പേരില്‍ ഇവരെ പിണക്കാതിരിക്കാന്‍ ഇവരുടെ കണ്ണിലുണ്ണികളായി നടക്കുന്നു.

പുതിയ ചാതുര്‍വര്‍ണ്ണ്യം 
പത്രവിതരണക്കാരുടെ സമരമുണ്ടായപ്പോള്‍ എഴുത്തുകാരഌം സിനിമാക്കാരുമെല്ലാം മാനേജ്‌മെന്റിന്‌ അനുകൂലമായി ഇറങ്ങിയതും ഇതേ കാരണം കൊണ്ടുതന്നെയാണ്‌. അതേസമയം അവിടത്തെ തൊഴിലാളികള്‍ പണിയെടുക്കുന്നതോ സമൂഹത്തിലെ സമാനമായ ഇത്തരം പ്രശ്‌നങ്ങള്‍ വെളിച്ചത്തുകൊണ്ടുവരാന്‍ വേണ്ടിയും ഈ വൈരുദ്ധ്യമാണ്‌ ഇത്തത്തെ പത്രലോകത്തിന്റെ യഥാര്‍ത്ഥ ഒസ്യത്ത്‌. കേട്ടാല്‍ വിശ്വസിക്കില്ല, പക്ഷേ കേരളത്തിലെ ഒന്നാംനിരയിലുള്ള ഒരു പ്രമുഖ പത്രസ്ഥാപനത്തില്‍ കാന്റീനില്‍ ഉച്ചഭക്ഷണം വിതരണം ചെയ്യുമ്പോള്‍ കറിയെടുക്കാഌള്ള ചെറിയ പാത്രം (കോപ്പ) സീനിയര്‍ പോസ്‌റ്റിലുള്ളവര്‍ക്ക്‌ മാത്രമേ ലഭിക്കൂ. അതിന്‌ താഴെയുള്ളവര്‍ക്ക്‌ ചോറില്‍ തന്നെ കറിയൊഴിച്ചുകൊടുക്കും. കീഴാളന്‌ ജന്‍മി മേലാള വര്‍ഗം കുഴിയില്‍ കഞ്ഞിയൊഴിച്ച്‌ കൊടുക്കുന്നതുപോലെ ഉച്ചനീചത്വത്തിന്റെ അശ്ലീലകാഴ്‌ച്ചയായി വിലയിരുത്തപ്പെടാന്‍ ഈ ഉദാഹരണം ധാരാളമെങ്കിലും ആ സ്ഥാപനത്തിലെ പലര്‍ക്കും അത്‌ കീഴ്‌വഴക്കവും ശീലവും മാത്രമായി മാറിക്കഴിഞ്ഞിരിക്കുന്നു. അവര്‍ വാക്കുകള്‍ കൊണ്ട്‌ ഇവയെയെല്ലാം നിസ്സാരവല്‍ക്കരിച്ച്‌ തങ്ങളുടെ യജമാനമനോഭാവം അരക്കിട്ടുറപ്പിക്കുന്നു. പാത്രത്തിലുള്ള കറി എഡിറ്റോറിയല്‍ വിഭാഗത്തില്‍ ന്യൂസ്‌ എഡിറ്റര്‍ക്ക്‌ മുകളിലുള്ളവര്‍ക്ക്‌ മാത്രമേ ലഭിക്കൂ. പരസ്യമാര്‍ക്കറ്റിങ്‌ വിഭാഗക്കാര്‍ക്ക്‌ ഇവിടെയും മുന്‍ഗണനയുണ്ട്‌.

മറ്റൊരു ഒന്നാംനിര സ്ഥാപനത്തില്‍ മുതലാളി കോണി കയറി വരുമ്പോള്‍ സാധാരണ സബ്‌ എഡിറ്റര്‍ മുതല്‍ അറ്റന്റര്‍ തസ്‌തിക വരെയുള്ളവര്‍ എതിരെ കയറി വരാന്‍ പാടില്ലെന്നൊരു അലിഖിത നിയമമുണ്ട്‌. ഇത്‌ പരസ്യമായി പ്രഖ്യാപിച്ചിട്ടില്ലെങ്കിലും അവിടത്തെ സെക്യൂരിറ്റി ജീവനക്കാര്‍ക്ക്‌ ഈ അവസ്ഥയറിയാവുന്നതുകൊണ്ട്‌ മുതലാളി ഓഫീസില്‍ കയറിവരുമ്പോള്‍ എതിരെ ആരും കയറിവരാതിരിക്കാന്‍ അവര്‍ ശ്രദ്ധ പുലര്‍ത്തുന്നു. ഇത്തരത്തില്‍ നീതിനിഷേധത്തിന്റേയും അഭിപ്രായ സ്വാതന്ത്ര്യലംഘനത്തിന്റേയും പതിനെട്ടര കളരികളാണ്‌ മിക്കവാറും പത്രചാനല്‍ സ്ഥാപനങ്ങള്‍.

തിരുവായ്‌ക്ക്‌ എതിര്‍വായില്ലാത്തവന്റെ ഉയിരും വാഴ്‌വും. എഡിറ്റര്‍ സ്ഥാനം പത്രത്തിനെന്തിന്‌, മാര്‍ക്കറ്റിങ്‌ മാനേജര്‍ പോരെയെന്ന്‌ ടൈംസ്‌ ഓഫ്‌ ഇന്ത്യ പത്രത്തിന്റെ മുതലാളിമാര്‍ ചോദിച്ച അതേ ചോദ്യം ഇനി ഉയരാന്‍ പോകുന്നത്‌ ഇന്ത്യയിലെ മെട്രാ നഗരങ്ങളിലെ ഇംഗ്ലീഷ്‌ പത്രങ്ങളില്‍ മാത്രമല്ല കേരളത്തിലായിരിക്കും. അതും വൈകാതെ ശീലമായിക്കോളു . പത്രം വെറും കച്ചവടത്തിനായുള്ള ഉല്‍പ്പന്നം മാത്രമാണെന്നും ഒരു പത്രമുതലാളിക്കും സമൂഹത്തെ ഉദ്ധരിക്കാന്‍ ഉദ്ദേശമില്ലെന്നും നിരന്തരം പത്രമേഖലയില്‍ നടക്കുന്ന ഇവിടെ പറഞ്ഞതും പറയാത്തതുമായ അറിയുന്നതും അറിയാത്തതുമായ നൂറുകണക്കിന്‌ സംഭവങ്ങള്‍ തെളിയിക്കുന്നുണ്ട്‌. എഡിറ്റര്‍മാരെ നോക്കുകുത്തികളാക്കുകയോ ആ തസ്‌തിക തന്നെ ഇല്ലാതാക്കി പകരം ബിസിനസ്‌ ഡെവലപ്‌മെന്റ്‌ മാനേജര്‍മാരെ നിയമിക്കാനുള്ള മുതലാളിത്ത തന്ത്രങ്ങളുടെ കാലമാണിത്‌. കേരളത്തിലും ഇനി ജോലി സ്ഥിരപ്പെടുത്താത്ത കരാര്‍ തൊഴിലാളികളായ പത്രപ്രവര്‍ത്തകര്‍ മാത്രമുള്ള പത്രസ്ഥാപനങ്ങളാകും നാളെയുടെ സൃഷ്ടി. അത്‌ ഇപ്പോള്‍ തന്നെ വ്യാപകമായിക്കഴിഞ്ഞിരിക്കുന്നു. പകരം കരാറുകാര്‍ ലൈനര്‍മാര്‍ എന്നുതുടങ്ങി പല പേരുകളിലും അവര്‍ ജീവിക്കും.

ചാനലുകളിലെ സ്ഥിതിയും വ്യത്യസ്‌തമല്ല. അവിടെ പിന്നെ അടുത്ത ചാനലിലേക്കുള്ള ചാട്ടം എളുപ്പത്തില്‍ നടക്കുമെന്നതുകൊണ്ട്‌ ആര്‍ക്കും ഒരുപാട്‌ കാലം ഒരു സ്ഥലത്ത്‌ ദുരിതമനുഭവിക്കേണ്ടിവരാറില്ല. പകരം മറ്റൊരിടത്ത്‌ പോയി സമാന ദുരിതം അനുഭവിക്കാം. പല ചാനലുകളും കോക്കസ്സ്- ഗ്രൂപ്പിസം പ്രവര്‍ത്തനങ്ങളുടെ വിളനിലമാണ്‌. തലപ്പത്തുള്ള ആളുടെ ഇഷ്ടക്കാരുടെ ഭരണം തന്നെയാണ്‌ പല ചാനലുകളിലും നടക്കുക. അപ്രീതിയ്‌ക്ക്‌ പാത്രമാകുന്നവനെ വാര്‍ത്തയുടെ പേരില്‍ നടന്നില്ലെങ്കില്‍ സദാചാരപോലീസായി മാറി ആരോപണം ഉന്നയിച്ച്‌ പുറത്താക്കുന്നതും കുറവല്ല. ചാനല്‍ കഥകള്‍ ഒരുപാടൂണ്ട്. അത്‌ പിന്നീട്‌.

ഈ സാഹചര്യത്തിലാണ്‌ അറിയാഌള്ള അവകാശം എന്നത്‌ കല്ലുവെച്ച ഒന്നാംതരം നുണയും വാര്‍ത്ത എന്നത്‌ അജണ്ടകള്‍ക്കായി സത്യത്തെ വക്രീകരിക്കുന്ന ഒരു നിര്‍മ്മിതിയുമായി അധപ്പതിക്കുന്നത്‌. ഇത്‌ പുറത്തുപറഞ്ഞാല്‍ പിന്നെയവന്‍ അല്ലെങ്കില്‍ അവള്‍ ആ സ്ഥാപനത്തിലുണ്ടാകില്ല. മാത്രമല്ല മാനേജ്‌മെന്റ്‌ വിചാരിച്ചാല്‍ മറ്റൊരിടത്തും ജോലി കിട്ടാതിരിക്കാഌം കഴിയുകയും ചെയ്യും. അങ്ങനെ വരുമ്പോള്‍ സ്വാഭാവികമായും പത്രപ്രവര്‍ത്തകന്റെ മനസ്സിനും ശരീരത്തിനും ജേര്‍ണലിസം ഹാനികരമാകുന്നു. കീബിളിന്റെ വാക്കുകള്‍ മറ്റൊരു സാഹചര്യത്തില്‍ സി.പി.സ്‌കോട്ടിനേക്കാള്‍ ഉന്നതമായ സത്യപ്രസ്‌താവമായി മാറുന്നു. പ്രസക്തമായ ഒരു മാധ്യമ തമാശയാണ്‌ ഇപ്പോള്‍ ഓര്‍മ്മ വരുന്നത്‌. പത്രത്തിന്‌ പുതിയ കാലത്ത്‌ ചാനലുകളില്‍ നിന്ന്‌ വ്യത്യസ്‌തമായുള്ള പ്രസക്തിയെന്തെന്ന ചോദ്യത്തിന്‌ മറുപടി ഇങ്ങനെ: “ചാനല്‍ കൊണ്ട്‌ പഴംപൊരിയോ വടയോ പൊതിയാന്‍ കഴിയില്ലല്ലോ!”

Be Sociable, Share!

• 

Tags: Corruption, journalists' union, Kerala, kerala journalists, KUWJ, malayalam newspapers, media, media ethics, wage board