രാവണപ്രഭുക്കളുടെ സ്പിരിറ്റ്

Be Sociable, Share!

• 

വിഎസ്‌ സനോജ്‌

രഞ്‌ജിത്തിന്റെ ‘സ്‌പിരിറ്റ്‌’ എന്ന പുതിയ ചിത്രം കാണാനെത്തുമ്പോള്‍ ‘പാലേരി മാണിക്യ’വും ‘കേരള കഫേ’യും ‘പ്രാഞ്ചിയേട്ടന്‍ ആന്‍ഡ് ദ സെയിന്റും’ ‘ഇന്ത്യന്‍ റുപ്പി’യുമെല്ലാമായിരുന്നു മനസില്‍. രഞ്‌ജിത്തിന്റെ കുറച്ചുകാലമായുള്ള വഴിമാറി നടത്തം നല്‍കിയ പ്രതീക്ഷ ഇത്തവണയും കൈവിട്ടുപോകില്ലെന്ന തോന്നല്‍ ശക്തമായിയുണ്ടായിരുന്നു. മാത്രമല്ല, നീണ്ട ഒരിടവേളയ്‌ക്ക്‌ ശേഷം പിണക്കം മാറി ലാലും രഞ്‌ജിത്തും ഒന്നിച്ച്‌ ചെയ്‌ത ചിത്രം കൂടിയാണിത്‌. പക്ഷേ പല രംഗങ്ങളിലും സമ്മിശ്ര പ്രതികരണം ജനിപ്പിക്കാന്‍ കഴിയുന്ന തരത്തിലുള്ള ആഖ്യാനമാണ്‌ ‘സ്‌പിരിറ്റ്‌’ എന്ന ചിത്രം സമ്മാനിച്ചത്‌. മലയാളിയുടെ മദ്യാസക്തിയുടെ പിന്നാമ്പുറങ്ങളും (അപരിചിതരമായവയൊന്നുമല്ലെങ്കിലും) അത്‌ വിതയ്‌ക്കുന്ന കെടുതികളും ദൃശ്യവത്‌ക്കരിക്കുന്ന ചിത്രമാണ്‌ ‘സ്‌പിരിറ്റ്‌’. ആ അര്‍ത്ഥത്തില്‍ രഞ്‌ജിത്ത്‌ സാമൂഹ്യപക്ഷത്ത്‌ നില്‍ക്കാനും കൈവിട്ടുപോകുന്ന മദ്യാസക്തിയെ ചോദ്യം ചെയ്യാനും മുതിരുന്നതാണ്‌ ചിത്രത്തിന്റെ ഏറ്റവും പ്രസക്തവും ശ്ലാഘനീയവുമായ ഘടകം.

ആല്‍ക്കഹോള്‍ അഡിക്‌റ്റ്‌ ആയ (ഒരു അഡിക്‌റ്റും താന്‍ അഡിക്‌റ്റാണെന്ന്‌ സമ്മതിച്ചുതരില്ല, രഘുനന്ദനനും അങ്ങനെ തന്നെ) രഘുനന്ദനന്‍ എന്ന കഥാപാത്രത്തിന്റെ ഓരോ ദിനത്തിലൂടെയുമാണ്‌ കഥ വികസിക്കുന്നത്‌. അതിനായി നല്ല കളര്‍ഫുള്‍ മദ്യപാനരംഗങ്ങള്‍ ചിത്രത്തിലൊരുക്കിയിട്ടുമുണ്ട്‌. ചിത്രത്തിലുടനീളം മദ്യപാനം, സിഗരറ്റ്‌ വലി എന്നിവ ആരോഗ്യത്തിന്‌ ഹാനികരം എന്ന്‌ എഴുതി കാണിക്കേണ്ടിവന്നിരിക്കുന്നു സംവിധായകന്‌. ഏഴ്‌ വര്‍ഷം മുമ്പ്‌ വിവാഹമോചനം നേടിയ രഘുനന്ദനന്‍ സമ്പന്നതയ്‌ക്കും ഗര്‍വിനും ഒട്ടും കുറവില്ലാതെ ഒരു ഫ്‌ളാറ്റില്‍ തനിച്ചു താമസിക്കുകയാണ്‌. സിഗരറ്റ്‌ വലിയും മദ്യപാനവും ഒരു ചാനലില്‍ നടത്തുന്ന ‘ഷോ ദ സ്‌പിരിറ്റ്‌’ എന്ന അഭിമുഖ പരിപാടിയുമാണ്‌ പ്രധാന ദിനചര്യകള്‍. ‘ഷോ ദ സ്‌പിരിറ്റി’ലൂടെ സമൂഹത്തിലെ അറിയപ്പെടുന്ന പ്രമുഖരേയും കുപ്രസിദ്ധരേയും നിര്‍ത്തിപ്പൊരിക്കുന്നതില്‍ രഘു ആനന്ദം കണ്ടെത്തുന്നുണ്ട്‌. മുന്‍ഭാര്യ മീര മകനുമായി സുഹൃത്ത്‌ അലക്‌സിയോടൊപ്പം താമസിക്കുകയാണ്‌. അലക്‌സിയും മീരയും തന്നെയാണ്‌ രഘുവിന്റെ ഏറ്റവും അടുത്ത സുഹൃത്തുക്കള്‍. അതിനിടെ നൈജാമലി എന്ന്‌ സ്വയം വിശേഷിപ്പിക്കുന്ന സുഹൃത്തായ കവി സമീറിനും വീട്ടിലെ വേലക്കാരിയായ സ്‌ത്രീയ്‌ക്കുമുണ്ടാകുന്ന ചില അനുഭവങ്ങള്‍ രഘുവിന്റെ ജീവിതത്തെ ഉലയ്‌ക്കുന്നു. അയാളുടെ കാഴ്‌ച്ചപ്പാടുകള്‍ മാറുന്നു. ഇതാണ്‌ ചിത്രം.

ആദ്യപകുതിയില്‍ മദ്യപിച്ച്‌ അര്‍മാദിക്കുന്ന രഘുനന്ദനന്‍ രണ്ടാംപകുതിയില്‍ മദ്യാസക്തി സമൂഹത്തില്‍ വരുത്തിവെക്കുന്ന വിപത്തുക്കളിലേക്ക്‌ ക്യാമറയും ചാനല്‍ ഷോയുമായി ഇറങ്ങുന്നു. ഇത്തരത്തില്‍ അമിത മദ്യപാനാസക്തിയും അതിന്റെ ഭാഗമായി കുടുംബങ്ങളിലുണ്ടാകുന്ന ജീവിതപ്രശ്‌നങ്ങളുമാണ്‌ രഞ്‌ജിത്തിന്റെ സ്‌പിരിറ്റ്‌. മുഴുക്കുടിയന്‍മാരായ പ്ലംബര്‍ മണി എന്ന നന്ദുവിന്റെ കഥാപാത്രവും തിലകന്‍ ചെയ്‌ത പഴയൊരു മേസ്‌തിരിയുടെ കഥാപാത്രവും ഇതില്‍ മദ്യത്തിന്റെ ദൂഷ്യവശങ്ങളുടെ കറുത്തമുഖമായി ചിത്രത്തിലുണ്ട്‌. ഇവരിലൂടെയാണ്‌ രഘു മദ്യപാനത്തിന്റെ സാമൂഹ്യയാഥാര്‍ത്ഥ്യം ചിത്രീകരിക്കുന്നത്‌. എന്നാല്‍ ചിത്രത്തിലുടനീളം രഘുവിന്റെ മനോനിലകള്‍, നിലപാടുകള്‍ ഇവയിലെല്ലാം രഞ്‌ജിത്തിലെ തിരക്കഥാകൃത്ത്‌ ചില പൊരുത്തക്കേടുകള്‍ സമ്മാനിക്കുന്നുണ്ട്‌ എന്നതാണ്‌ യാഥാര്‍ത്ഥ്യം. പോരാത്തതിന്‌ പല രഞ്‌ജിത്ത്‌ ബ്രഹ്മാണ്ഡചിത്രങ്ങളിലും കണ്ടിട്ടുള്ള (‘രാവണപ്രഭു’, ‘ആറാം തമ്പുരാന്‍’, ‘ചന്ദ്രോത്സവം’, ‘റോക്ക്‌ ആന്റ്‌ റോള്‍’) മദ്യപാനക്കൂട്ടുകള്‍, ടൈപ്പ്‌ ചെയ്യപ്പെട്ട ചിത്രണം ചെയ്‌ത്‌ പോളീഷ്‌ഡാക്കിയ വാചകങ്ങള്‍, അത്തരം നിറങ്ങള്‍ വച്ചുചാര്‍ത്തിയ രംഗങ്ങള്‍ എന്നിവ ‘സ്‌പിരിറ്റി’ലും ചിലപ്പോഴൊക്കെ കാണാം. അരി പ്രാഞ്ചിയുള്ള തികച്ചും റിയിലിസ്റ്റിക്‌ ആയ ഗ്രാസ്‌റൂട്ട്‌ ആയ കഥ പറഞ്ഞ, ‘ഇന്ത്യന്‍ റുപ്പി’യിലൂടെ റിയല്‍ എസ്റ്റേറ്റ്‌ തന്ത്രങ്ങള്‍ കൗതുകരമായി അവതരിപ്പിച്ച രഞ്‌ജിത്ത്‌ മോഹന്‍ലാലിനെ കയ്യില്‍ കിട്ടിയപ്പോള്‍ തന്റെ പഴയ സ്‌റ്റൈലിഷ്‌ ഭ്രമങ്ങളിലേക്ക്‌ ചിലപ്പൊഴെങ്കിലും ചിത്രത്തില്‍ വഴുതി വീഴുന്നു എന്ന്‌ പറയാതെ വയ്യ. കേട്ടുമടുത്ത വിഎസ്‌. നയ്‌പോളിനേയും മറ്റും ഉദ്ധരിക്കുന്ന ടൈപ്പ്‌ സാഹിത്യനിരൂപണവും ഇടയ്‌ക്കിടെ ‘എഫ്‌’ വെച്ച്‌ ഇംഗ്ലീഷില്‍ ആവര്‍ത്തിക്കപ്പെടുന്ന തെറിയും ചില ഗാനരംഗങ്ങളില്‍ കുപ്പിയും ഗ്ലാസുമായി പുരുഷന്‍മാരും സ്‌ത്രീകളും ക്യൂ പോലെ പാട്ടുകേട്ട്‌ നില്‍ക്കുന്നതും റിയാലിറ്റി ഷോയിലെ രഘു എന്ന കഥാപാത്രത്തിന്റെ അമിത പ്രകടനവും കഥാപാത്ര സൃഷ്ടിയേയും ചില രംഗങ്ങളേയും കല്ലുകടിക്കുന്നതാക്കി മാറ്റി.

സമ്പന്നരുടെ റിസോര്‍ട്ട്‌ മാളികകളിലെ മദ്യപാന സദസുകളും രഘുവിന്റെ ജീവിതത്തിലെ മദ്യപാനരംഗങ്ങളും അങ്ങേയറ്റം ആഘോഷത്തോടെയും സൗന്ദര്യാത്മകമായും ആണ്‌ രഞ്‌ജിത്ത്‌ ദൃശ്യവത്‌ക്കരിച്ചിരിക്കുന്നത്‌. എന്നാല്‍ ബിവറേജസ്‌ ഷോപ്പില്‍ ക്യൂ നില്‍ക്കുന്നതാണ്‌ ഏറ്റവും വലിയ അപരാധം എന്ന മട്ടില്‍ കൂലിപ്പണിക്കാരന്റെ കുടിയുടെ അവസ്ഥയെ ഭീകരമായ സാമൂഹ്യവിപത്തായി ചിത്രീകരിക്കുന്ന ചിത്രം മധ്യവര്‍ഗ മദ്യജീവിതത്തെ വിമര്‍ശന വിധേയമാക്കാന്‍ ഒരുമ്പെടുന്നതുമില്ല. റിയാലിറ്റി ഷോയില്‍ സമൂഹത്തിലെ വിപത്തുകളെക്കുറിച്ച്‌ ഗിരിപ്രഭാഷണം നടത്തുന്ന നായകന്‍ തന്നെ മദ്യപിച്ച്‌ വണ്ടിയോടിക്കുകയും അത്‌ ചോദ്യം ചെയ്യുന്ന പോലീസുകാരെ പരിഹസിക്കുകയും ചെയ്യുന്നു. തന്നെ കയറിപിടിച്ച ഒരു വിദ്യാര്‍ത്ഥിയെ തല്ലിയ വനിതാ പോലീസുദ്യോഗസ്ഥയെ ചാനല്‍ ചര്‍ച്ചയില്‍ നിര്‍ത്തിപ്പൊരിച്ച്‌ തന്റെ നായകത്വം സ്‌ത്രീ കഥാപാത്രത്തിന്‌ മുകളില്‍ പതിവുപോലെ പ്രതിഷ്‌ഠിക്കാനും രഞ്‌ജിത്ത്‌ മറന്നില്ല. ഇത്തരത്തില്‍ ലാല്‍ നായകനാകുകയും ആന്റണി പെരുമ്പാവൂര്‍ നിര്‍മാതാവുകയും ചെയ്യുന്നതോടെ രഞ്‌ജിത്ത്‌ എത്ര നിയന്ത്രിച്ചിട്ടും കഴിയാതെ പോകുന്ന ചില ഏച്ചുകെട്ടലുകള്‍ ‘സ്‌പിരിറ്റി’ന്റെ ടോട്ടല്‍ സ്‌പിരിറ്റിനെ കുറച്ചൊക്കെ ബാധിക്കുന്നു എന്നതാണ്‌ സത്യം.

അതേസമയം അമിത മദ്യാപാനാസക്തി തകര്‍ത്തുകളയുന്ന ലക്ഷക്കണക്കിന്‌ മലയാളീ ജീവിതങ്ങളിലേക്ക്‌ ഒരു തിരിഞ്ഞുനോട്ടമാണ്‌ ചിത്രത്തിന്റെ കഥ എന്നത്‌ രഞ്‌ജിത്തിന്റെ പ്രമേയപരമായ ഉത്തരവാദിത്വമായി അംഗീകരിക്കുകയും വേണം. പ്ലംബര്‍ മണിയന്റെ ജീവിതത്തിലെ അവസ്ഥകള്‍, കുടിച്ചുകഴിഞ്ഞാല്‍ അയാള്‍ വീട്ടുകാര്‍ക്ക്‌ നേരെ നടത്തുന്ന കയ്യേറ്റങ്ങള്‍ ഇവയിലൂടെയാണ്‌ മദ്യാസക്തിയുടെ ദോഷവശത്തെ ചാനല്‍ ഷോ തുറന്നുകാണിക്കുന്നത്‌.

എന്നാല്‍ ഇതേ ഷോ കണ്ട ശേഷം ഒരു ഫൈവ്‌സ്റ്റാര്‍ റിസോര്‍ട്ടില്‍ നായകനൊപ്പമുള്ള സുഹൃത്തുക്കള്‍ ചേര്‍ന്ന്‌ മദ്യസല്‍ക്കാരം നടത്തി ഷോയുടെ വിജയം ആഘോഷിക്കുകയും ചെയ്യുന്നു. ഇതില്‍ രഘുവിന്റെ കഥാപാത്രം മദ്യവിരോധം പ്രകടിപ്പിക്കുന്നുണ്ടെങ്കിലും മദ്യം ഒരൂ രൂപകമോ മുഖ്യകഥാപാത്രമോ ആയി അവിടെ നിലനില്‍ക്കുകയും മദ്യപാനിയായ സാധാരണക്കാരന്‍ മോശം സാമൂഹ്യജീവിയുമാകുന്ന ആഖ്യാനവൈരുധ്യം രഞ്‌ജിത്തിലെ തിരക്കഥാകൃത്തിന്‌ സംഭവിക്കുന്നുണ്ട്‌. ഇത്‌ മനപ്പൂര്‍വമല്ലായിരിക്കാമെങ്കിലും ഭാര്യ-ഭര്‍തൃബന്ധത്തിലെ പൊരുത്തങ്ങളും താളംതെറ്റലുകളും ലിബറേഷന്‍ കൗതുകങ്ങളും രഞ്‌ജിത്ത്‌ പതിവുപോലെ ഈ ചിത്രത്തിലും അവതരിപ്പിക്കാന്‍ മറന്നിട്ടില്ല. മദ്യപിക്കുന്ന സ്‌ത്രീ സുഹൃത്തുക്കളേയും ഭാര്യയേയും അവരുടെ ലിബറേഷന്‍ വാചകങ്ങളും പൗലോ കെയ്‌ലോ സാഹിത്യവും മറ്റ്‌ പല ചിത്രങ്ങളിലേയും പോലെ അവതരിപ്പിക്കുന്നു.

ഇടയ്‌ക്കിടെ സമൂഹത്തിലെ പൊള്ളത്തരങ്ങളെ ചോദ്യം ചെയ്‌ത്‌ ചാനല്‍ ഷോയിലും മറ്റും മറ്റുള്ളവരുടെ ഇരട്ടത്താപ്പുകളെ ചോദ്യം ചെയ്യുന്ന രഘു തന്നെ തന്റെ അയല്‍വാസിയായ റിട്ടയേര്‍ഡ് പട്ടാളക്കാരന്‌ ഭാര്യ വീട്ടിലില്ലാത്തപ്പോള്‍ മറ്റൊരു സ്‌ത്രീയുമായി നടത്താനുള്ള ലൈംഗികബന്ധത്തിന്‌ എല്ലാ സഹായം ചെയ്‌തുകൊടുക്കുന്നുമുണ്ട്‌. മദ്യപിച്ച്‌ വണ്ടിയോടിച്ച്‌ പിടിക്കുമ്പോള്‍ മെഷീനിലേക്ക്‌ ഊതാന്‍ പറയുന്ന പോലീസുകാരനോട്‌ ഇതും ഒരു തരം ഊതലല്ലേ സാറെ, രക്തം പരിശോധിക്കുമ്പോള്‍ കൊളസ്‌ട്രോളും ചെക്ക്‌ ചെയ്യണേ എന്ന്‌ ലാല്‍ കഥാപാത്രം ചോദിക്കുന്നു. ഭാര്യയായിരുന്ന മീരയോട്‌ അലക്‌സി വീട്ടിലില്ലാത്ത നേരത്ത്‌ ഇപ്പോള്‍ മദ്യപിച്ചിരുന്നെങ്കില്‍ നിന്നെ ഞാന്‍ ബലാത്സംഗം ചെയ്‌തേനെ എന്ന്‌ പറയുന്ന രഘു, സുന്ദരിയായ അസിസ്റ്റന്റ് പോലീസ്‌ കമ്മിഷണറെ യാതൊരു യുക്തിയുമില്ലാത്ത തരത്തില്‍ ചാനല്‍ ഷോയില്‍ പരിഹസിക്കുന്ന രഘു, ഇവയില്ലെല്ലാം രഞ്‌ജിത്ത്‌-ലാല്‍ കൂട്ടുകെട്ടിന്റെ ഒരു ‘രാവണപ്രഭു ശൈലി’ യാണ്‌ പ്രേക്ഷകന്‌ വെളിപ്പെടുക. കൊണ്യാക്‌ മദ്യം കട്ടന്‍ചായയില്‍ ഒഴിച്ചുകഴിക്കുന്ന രഘു രാവണപ്രഭുവിലെ ബെക്കാഡി വൈറ്റ്‌ റം ഇളനീരില്‍ ഒഴിച്ചുകഴിക്കുന്ന ലാലിനെ ഓര്‍മിപ്പിക്കുന്നുമുണ്ട്‌.

ചിത്രത്തിന്‌ ക്യാമറ ചലിപ്പിച്ചത്‌ വിശേഷങ്ങള്‍ ഒട്ടും ആവശ്യമില്ലാത്ത പ്രമുഖ ഛായാഗ്രാഹകന്‍ വേണുവാണ്‌. ഷഹബാസ്‌ അമന്‍ ‘ഇന്ത്യന്‍ റുപ്പി’ക്ക്‌ ശേഷം സംഗീതസംവിധാനം നിര്‍വഹിക്കുന്ന ചിത്രവും കൂടിയാണ്‌ ‘സ്‌പിരിറ്റ്‌’. കുടിയന്‍ കവിയായ രഘുവിന്റെ സുഹൃത്ത്‌ സമീറിനെ അവതരിപ്പിച്ച സിദ്ധാര്‍ത്ഥ്‌ ഭരതന്‍, നന്ദുവിന്റെ പ്ലംബര്‍ മണിയന്‍ എന്നിവരുടെ വേഷങ്ങള്‍ അവരവര്‍ മികവുറ്റതാക്കിയിട്ടുമുണ്ട്‌. അലക്‌സിയുടെ വേഷം ചെയ്‌ത അഭിനയത്തില്‍ പുതുമുഖമായ രഞ്‌ജിത്ത്‌ ശിഷ്യന്‍ ശങ്കര്‍ രാമകൃഷ്‌ണന്‍ കയ്യടക്കത്തോടെ ആ വേഷം ചെയ്‌തിട്ടുണ്ട്‌.

അമിത മദ്യപാനാസക്തിക്കെതിരായ സന്ദേശത്തോടെയാണ്‌ ചിത്രം അവസാനിക്കുന്നതെങ്കിലും ഭംഗിയുള്ള മദ്യക്കുപ്പികള്‍ ഓരോന്നായി എടുത്ത്‌ മോഹന്‍ലാല്‍ മദ്യപിക്കുന്ന ആദ്യ രംഗങ്ങള്‍ കണ്ട്‌ പ്രേക്ഷകന്‍ കൊതിച്ചുപോകാനുള്ള സാധ്യത തള്ളിക്കളയാനാകില്ല. കൊണ്യാക്ക്‌ വാങ്ങാനുള്ള അവസ്ഥയില്ലെങ്കില്‍ പകരം കട്ടന്‍ചായയും സെലിബ്രേഷന്‍ റമ്മുമായിരിക്കും അവര്‍ക്ക്‌ സ്വീകാര്യമാകുക എന്നുമാത്രം. താന്‍ ഒരു മെയില്‍ ഷോവനിസ്‌റ്റല്ല എന്ന്‌ ഒരിടത്ത്‌ രഘുനന്ദനന്‍ പറയുന്നുണ്ടെങ്കിലും കഥയില്‍ പലയിടത്തും അത്‌ ശരീരഭാഷയിലും വാചകങ്ങളിലും പ്രകടമാകുന്നത്‌ രഞ്‌ജിത്തിന്റെ പുതിയ ശൈലിയിലുള്ള റിയലിസ്റ്റിക്‌ ചിത്രരൂപങ്ങളോട്‌ ഒരിക്കലും ചേര്‍ന്നുനില്‍ക്കാത്തവയാണ്‌. ഇത്തരം ചില പൊരുത്തക്കേടുകളിലൂടെയാകും സ്‌പിരിറ്റ്‌ എന്ന ചിത്രത്തെ സൂക്ഷ്‌മാര്‍ത്ഥത്തില്‍ വിലയിരുത്താന്‍ പ്രേക്ഷകരെ പ്രേരിപ്പിക്കുക. അതേസമയം പൊതുവായ അര്‍ത്ഥത്തില്‍ മദ്യപാനാസക്തിയുടെ ദുരിതങ്ങളെ അവതരിപ്പിക്കുന്ന ചിത്രം എന്ന തരത്തില്‍ ഈ ചിത്രത്തിലും രഞ്‌ജിത്ത്‌ മിനിമം ഗ്യാരന്റി നല്‍കാന്‍ സംവിധായകന്‍ പരിശ്രമിക്കുന്നുണ്ട്‌.

പക്ഷേ വേണമെങ്കില്‍ രണ്ട്‌ സ്‌മോളടിച്ചോളൂ സമൂഹത്തിലോ വീട്ടിലോ അലമ്പുണ്ടാക്കരുത്‌ എന്നതാണ്‌ ഈ ചിത്രം പറഞ്ഞുവയ്ക്കുന്ന പൊതുവായ സന്ദേശം. അല്ലാതെ മദ്യപിക്കരുത്‌ എന്നല്ല. അത്രമേല്‍ ദുര്‍ബലമാണ്‌ സംവിധായകന്‍ അവതരിപ്പിക്കുന്ന മദ്യവിരുദ്ധസമീപനം. ഇതെല്ലാമാണ്‌ ‘സ്‌പിരിറ്റ്‌’ എന്ന പുതിയ രഞ്‌ജിത്ത്‌-മോഹന്‍ലാല്‍ ചിത്രത്തെ പ്രേക്ഷകരില്‍ സമ്മിശ്രപ്രതികരണം സമ്മാനിക്കാവുന്ന ചിത്രമാക്കി മാറ്റുന്നത്‌. സാമൂഹ്യപ്രധാന്യത്തെ പൂര്‍ണമായി ചിത്രം കൈവിടുന്നില്ലെങ്കിലും ആഖ്യാനത്തിലും ദൃശ്യഭാഷയിലും തിരക്കഥയുടെ കാര്യത്തിലും എല്ലാം ‘പ്രാഞ്ചിയേട്ട’നും ‘ഇന്ത്യന്‍ റുപ്പി’യ്‌ക്കും താഴെ മാത്രം നില്‍ക്കുന്ന ഒരു ചിത്രമായി ‘സ്‌പിരിറ്റ്‌’ മാറുന്നത്‌ ആ അര്‍ത്ഥത്തിലാണ്‌.

Be Sociable, Share!

• 

Tags: Cinema, Malayalam mov ie, Spirit, VS Sanoj