യൂറോ 2012: കിനാവും കണ്ണീരും

Be Sociable, Share!

• 

പികെ ആനന്ദ്

ആരവങ്ങളൊടുങ്ങാന്‍ നേരമായി. കഴിഞ്ഞ ഏതാനും ആഴ്ചകളായി, കടുത്ത സാമ്പത്തിക പ്രതിസന്ധിക്കിടയില്‍ പോലും, യൂറോപ്പിനേയും, എന്തിനു ലോകം മുഴുവനേയും, ത്രസിപ്പിച്ചിരുന്ന കാല്പന്തുകളി കലാശകൊട്ടിലേക്കെത്തുന്നു. കപ്പെടുക്കുന്നതാരാണെന്നറിയാന്‍ ഇനി വെറും ഒരു കളി മാത്രം ബാക്കി. ജൂലൈ 1ന് ഉക്രൈനിലെ കീവില്‍ കളി കഴിയുമ്പോള്‍ തലയുയര്‍ത്തി പിടിച്ചു നില്‍ക്കുന്നത് ആരായിരിക്കും? തുടര്‍ച്ചയായി യൂറോ കപ്പും, ലോകകിരീടവും വെട്ടിപ്പിടിച്ച സ്പെയിനിന്റെ ചെമ്പടയോ, അതോ വാതുവെപ്പിന്റെ കറകളുമായി മൈതാനത്തെത്തി, കിതച്ചും, കുതിച്ചും,  തടുത്തും ഫൈനല്‍ വരെയെത്തിയ അസൂറിപ്പടയോ? പാസുകള്‍ കൊണ്ടൊരു നദിയൊഴുക്കി കളിയെ കുലംകുത്തിയൊഴുക്കുന്ന സ്പാനിഷ് ശൈലിയാണോ, അതോ പ്രതിരോധത്തിന്റെ നീലക്കോട്ടകളുയര്‍ത്തി എത്ര വലിയ ഒഴുക്കിനേയും തടയാനുറച്ചു വരുന്ന ഇറ്റാലിയന്‍ മുന്നേറ്റമാണോ വിജയം കാണുക? അതറിയാതെ ഇനി കളി ഭാന്തര്‍ക്കാര്‍ക്കും വിശ്രമമില്ല.

ഗ്രൂപ്പുമത്സരങ്ങളും, ക്വാര്‍ട്ടര്‍ ഫൈനലും കഴിഞ്ഞ് ഉയര്‍ന്നു വന്ന മികച്ച നാലു റ്റീമുകള്‍ തന്നെയാണ് സെമിയില്‍ എത്തപ്പെട്ടത്. കളിച്ച ഇരുപത്തിയെട്ടു കളികളും വിശകലനം ചെയ്താല്‍ ജര്‍മനി ഏറെ മുന്നിലായിരുന്നു എന്നു കാണാം. ജോകിം ലോയുടെ ചുണക്കുട്ടികള്‍ ഉശിരന്‍ ആക്രമണശൈലി പുറത്തെടുത്തപ്പോള്‍ പൂത്തുലഞ്ഞതു ഗോളുകളുടെ നിരവിസ്മയമായിരുന്നു. സെമി വരെ കളിച്ച എല്ലാ കളികളിലും പൂര്‍ണവിജയം. മരണ ഗ്രൂപ്പ് എന്ന് വിശേഷിപ്പിക്കപെട്ട ഗ്രൂപ്പ്-ബിയില്‍, പോര്‍ച്ചുഗലിനെയും ഹോളണ്ടിനെയും ഡെന്‍മാര്‍ക്കിനെയും അടിയറവ് പറയിച്ച ജര്‍മനി ക്വാര്‍ട്ടറില്‍ ഗ്രീസിനെ നാലു ഗോളുകള്‍ക്കാണ് തകര്‍ത്തുടച്ചത്. ആക്രമണത്തിന്റെ കുന്തമുനയായ മരിയോ ഗോമസിന്റെ മൂന്ന് ഗോളുകള്‍, നായകന്‍, ഫിലിപ് ലാമും, ഉപനായകന്‍ ബാസ്റിയന്‍ ശ്വൈന്‍സ്റൈഗറും, പ്ലേമേക്കറായ മേസുറ്റ് ഓസിലും കൂടാതെ സാമി ഖദീര, തോമസ്‌ മുള്ളര്‍, ജെറോം ബോട്ടംഗ്, ലുകാസ് പൊഡോള്‍സ്കി, ഹുംമെല്സ്, ബാഡ്സ്റ്റൂബര്‍ എന്നിവരും ചേര്‍ന്ന ആദ്യ ഇലവന്‍ റ്റൂര്‍ണമെന്റിലെമ്പാടും തകര്‍പ്പന്‍ ഫോമിലുമായിരുന്നു.

ഇതിഹാസമായ  ഗെര്‍ഡ്‌ മുള്ളറുടെ എക്കാലത്തെയും ജര്‍മന്‍ ഗോള്‍ റെക്കോര്‍ഡ് തിരുത്താന്‍ ഇനി ക്ലോസേക്ക് വേണ്ടത് വെറും നാല് ഗോളുകള്‍ മാത്രം. കൂടാതെ, ലുകാസ് പൊഡോള്‍സ്കി ജര്‍മന്‍ ജഴ്സിയണിഞ്ഞ തന്റെ നൂറാമത്തെ കളിയില്‍ ഡെന്‍മാര്‍ക്കിനെതിരെ ആദ്യ ഗോള്‍ നേടിക്കൊണ്ട് ആ  മുഹൂര്‍ത്തം അവിസ്മരണീയമാക്കി. എന്നാല്‍ സെമി ഫൈനലില്‍ എല്ലാം പിഴച്ചു. തങ്ങളുടെ എക്കാലത്തേയും ശാപമായ ഇറ്റലി തന്നെ ജര്‍മനിയെ ഒരിക്കല്‍ കൂടി തോല്പിച്ചു.
തുടര്‍ച്ചയായി 15 മത്സരങ്ങള്‍ വിജയിച്ചു വന്ന ജര്‍മന്‍ റ്റീമിന്റെ ‘അക്കിലീസിന്റെ ഉപ്പൂറ്റി’ പ്രതിരോധ നിരയായിരുന്നെങ്കില്‍. ഇറ്റലി അവിടെ തന്നെ വെട്ടി. 2-1ന് ജര്‍മനി റ്റൂര്‍ണമെന്റിനു പുറത്ത്.

കഴിഞ്ഞ യൂറോ വിജയികളായ സ്പെയിന്‍ തങ്ങളുടെ പതിവ് കളിശൈലിയില്‍ എത്തിയിട്ടുണ്ട്. തുടക്കത്തില്‍ വിസെന്റെ ഡെല്‍ ബോസ്കെയുടെ റ്റീം കുറച്ചൊന്നു മുഷിപ്പിചെങ്കിലും, മെല്ലെ അവര്‍ പതിവുതാളം വീണ്ടെടുത്തു. ആദ്യ കളിയില്‍ ഇറ്റലിയോട് സമനില വഴങ്ങിയെങ്കില്‍, പിന്നീട് നാലു ഗോളുകള്‍ക്ക് അയര്‍ലണ്ടിനെ നിലം പരിശാക്കി മുന്നേറിയ  ചെമ്പട പക്ഷെ, ക്രോയേഷ്യയോടു അവസാന നിമിഷത്തിലാണ് ജയിച്ചു കയറിയത്. സാബി അലോന്‍സോയുടെ രണ്ടു ഗോളുകളുടെ സഹായത്തോടെ   ക്വാര്‍ട്ടറില്‍ ഫ്രാന്‍സിനെ പിന്തള്ളിക്കൊണ്ട് സെമിയില്‍ സ്ഥാനം നേടിയ സ്പെയിന്‍ പക്ഷേ തന്ത്രങ്ങളുടെ, താളപ്പിഴകളുടെ ഇരയാകുകയായിരുന്നു. ഇന്ന് ലോക ഫുട്ബോളിലെ ഏറ്റവും നല്ല മധ്യനിര സ്വന്തമായുള്ള സ്പെയിന്‍ പക്ഷെ തീര്‍ത്തും, അതിശയിപ്പിച്ചു കൊണ്ടാണ് ഒരു സ്ട്രൈക്കര്‍ പോലുമില്ലാതെ ഇറ്റലിയെ നേരിട്ടത്. മധ്യനിരയില്‍, ഇനിയെസ്ടക്കും, ഫാബ്രിഗാസിനും, സാവിക്കും കൂടുതല്‍ നിറഞ്ഞു കളിക്കേണ്ട ചുമതല നല്‍കിയ ഡെല്‍ ബോസ്കെയുടെ തന്ത്രങ്ങള്‍ മുന്നേറ്റനിരയെ ദുര്‍ബലമാക്കുകയാണ് ചെയ്തത്. എന്നിരുന്നാലും അനുഭവ സമ്പന്നത്തിലും, കഴിവിലും, അടവുകളിലും, നന്നേ മുന്നിലുള്ള ലോക ചാമ്പ്യന്മാര്‍ അത്ര പെട്ടെന്നൊന്നും റിവേസ് ഗിയറിടാറില്ല. പാസുകളുടെ പെരുമഴയാണ് സ്പാനിഷ് റ്റീമിറങ്ങുന്ന മൈതാനത്ത്. അതു തന്നെയാണ് ഇത്തവണയും കണ്ടത്. സെമി ഫൈനലില്‍ പെനാല്‍റ്റി ഷൂട്ട്-ഔട്ടില്‍ രണ്ടിനെതിരെ നാല് ഗോളുകള്‍ക്ക് പോര്‍ച്ചുഗലിനെ തകര്‍ത്ത്, ‘ലാ റോജ’ വലിയ  മാമാങ്കങ്ങളിലെ തുടര്‍ച്ചയായ മൂന്നാം ഫൈനലില്‍ കടന്നു.

മരണ ഗ്രൂപിലെ രണ്ടാം റ്റീമായി ജയിച്ചു കയറിയ പോര്‍ച്ചുഗലിന്റെ ശക്തികേന്ദ്രം ലോകത്തെ ഏറ്റവും മികച്ച കളിക്കാരിലൊരാളായ ക്രിസ്ടിയാനോ റൊണാള്‍ഡോയായിരുന്നു. ആ തന്ത്രം തുടക്കത്തില്‍ ഫലം നല്‍കിയെങ്കിലും, പിന്നീടങ്ങോട്ട് വേണ്ട രീതിയില്‍ ഗുണം ചെയ്തില്ല. ഹോളണ്ടിനെതിരെ രണ്ടു ഗോളുകളും, ക്വാര്‍ട്ടറില്‍ ചെക്ക് റിപബ്ലിക്കിനെതിരെ ഒരു ഗോളും നേടാനായെങ്കിലും റൊണാള്‍ഡോക്ക് തന്റെ പരിമിതികള്‍ വൈകാതെ തന്നെ മനസിലാക്കേണ്ടി വന്നു. പ്രതിഭകളുടെയും താരങ്ങളുടേയും ഒറ്റയാള്‍ പട്ടാളങ്ങളല്ല കാല്‍പന്തു റ്റീമുകള്‍. റ്റീം വര്‍ക്കും കളിക്കാരുടെ പ്രതിഭാസംഗമവും ശൈലീ-തന്ത്ര സംയോജനവും എല്ലാം ചേരുമ്പോഴേ നല്ല പന്തുകളിയുണ്ടാകുന്നുള്ളൂ. ഒറ്റയാന്മാരുടെ മേല്ലുള്ള അമിതമായ ആശ്രയത്വത്തിന് അധികമായുസുണ്ടാകാറില്ല എന്നതിന്റെ കൂടി ഏറ്റു പറച്ചിലായിരുന്നു, പോര്‍ച്ചുഗലിന്റെ സെമിയിലെ പതനം. ഷൂട്ട്‌-ഔട്ടില്‍ അവസാനത്തെ കിക്ക് എടുക്കാനായി സ്വയം മാറ്റി നിര്‍ത്തിയ റൊണാള്‍ഡോയുടെയും, പൌളോ ബെന്റോ നയിക്കുന്ന, റ്റീം മാനേജ്മെന്റിന്റെയും പാളിച്ച കൂടി പ്രതിഫലിക്കപ്പെട്ടു. അവസാന കിക്കെടുക്കാന്‍, അവസരം പോലും വന്നില്ല, പോര്‍ച്ചുഗല്‍ ക്യാപ്റ്റന്.

സെമിയില്‍, ജര്‍മനിയെ തകര്‍ത്ത് ഫൈനലിലെത്തിയ ഇറ്റലിക്ക് ഇത് ചരിത്രത്തിന്റെ ആവര്‍ത്തനമായിരുന്നു. വാതുവെപ്പിന്റെ കരി നിഴല്‍ ഒരിക്കല്‍ കൂടി അവരുടെ ആഭ്യന്തര ഫുട്ബോളില്‍ വീഴുമ്പോള്‍, ‘ആസൂറി’ പട തിരിഞ്ഞു നോക്കുന്നത് സ്വന്തം ചരിത്രത്തിലേക്കാണ്. 1982ലും, 2006ലും ലോകകപ്പ്‌ നേടുമ്പോള്‍ ഇറ്റാലിയന്‍ റ്റീം അന്നും വാതു വെപ്പു കഥകളുടെ അമിതഭാരവുമായായിരുന്നു മൈതാനത്തേക്കെത്തിയത്. ഒരിക്കല്‍ കൂടി കപ്പുയര്‍ത്താനുള്ള സാധ്യത തള്ളിക്കളയാന്‍ പറ്റില്ല. ഗ്രൂപ്പിലെ ആദ്യ രണ്ടു കളിലും, സ്പെയിനെയും ക്രോയെഷ്യയെയും, സമനിലയില്‍, പിടിക്കുകയും, അയര്‍ലണ്ടിനെ, രണ്ടു ഗോളുകള്‍ക്ക് പരാജയപ്പെടുത്തിയും ചെയ്താണ് ഇറ്റലി ക്വാര്‍ട്ടറില്‍, കടന്നത്‌. അവിടെ, ഇംഗ്ലണ്ടിനെ പെനാല്‍റ്റി ഷൂട്ട്‌-ഔട്ടില്‍ 4-2നു തോല്‍പ്പിച്ചായിരുന്നു മുന്നേറ്റം. മരിയോ ബാലറ്റൊള്ളിയുടെ, ഉശിരന്‍ നീക്കങ്ങളും, പിര്ലോയുടെയും, ഡി നതാലി, കാസ്സാണോ, എന്നിവരുടെ മധ്യനിരയിലെ പ്രകടനവും, നായകനും ഗോളിയുമായ ജിയാന്‍ ലൂജി ബുഫ്ഫോണിന്റെ വലകാക്കലുമൊക്കെ ഇറ്റലിയെ മുന്നിലെത്തിക്കാന്‍ സഹായിച്ചു.

ഗ്രൂപ്പ് എ-യില്‍ ആദ്യത്തെ കളിയില്‍ റഷയോട് ഏറ്റ ‘ഷോക്കില്‍’ കരകയറാന്‍ പരിശ്രമിച്ച ചെക്ക് റിപബ്ലിക്, പക്ഷേ, മറ്റു രണ്ടു കളികളിലും ഗ്രീസിനെയും, പോളണ്ടിനെയും ഒറ്റ ഗോളുകള്‍ക്ക് പരാജയപ്പെടുത്തി ക്വാര്‍ട്ടറില്‍ ഇടം നേടി. പടക്കുതിരകളായ സ്ട്രൈക്കര്‍ മിലാന്‍ ബാരോസും, ഗോളി പീറ്റര്‍ ചെക്കും, ക്യാപ്റ്റന്‍ ടോമസ് റോസിസ്കിയും അടങ്ങിയ റ്റീമിന് പക്ഷെ പോര്‍ച്ചുഗലിന്റെ മുന്‍പില്‍ അടിപതറി. റോസിസ്കിക്ക് അസമയത്ത് നേരിട്ട പരിക്കും റ്റീമിന് വേദനാജനകമായി. ഇതേ ഗ്രൂപ്പില്‍, നിന്നും ക്വാര്‍ട്ടര്‍ യോഗ്യത നേടിയ രണ്ടാമത്തെ റ്റീമായിരുന്നു ഗ്രീസ്. നാട്ടില്‍, ആഭ്യന്തര-സാമ്പത്തിക  പ്രതിസന്ധികള്‍ കൊടുമ്പിരി കൊള്ളുമ്പോള്‍, യവന പട നേടിയ ക്വാര്‍ട്ടര്‍ ഫൈനലിലേക്കുള്ള മുന്നേറ്റം രാജ്യം മുഴുവന്‍ ആവേശത്തോടെയാണ് വരവേറ്റിയത്. ജര്‍മനിയോട്  അടിയറവു പറയും വരെ, 2004നു ശേഷം മറ്റൊരു യൂറോപ്യന്‍ കിരീടമെന്ന സ്വപ്നം യവനര്‍ പ്രതീക്ഷിച്ചിരുന്നു. കാരഗൂണിസ് എന്ന പരിചയ സമ്പന്നനായ നായകനു കീഴില്‍ കളിച്ച ഗ്രീസിന് ഫെര്‍ണാണ്ടോ സാന്റോസ് എന്ന പോര്‍ച്ചുഗീസുകാരന്റെ, പരിശീലനവും നന്നായി ഗുണം ചെയ്തു.

ഫ്രാന്‍സും, ഇംഗ്ലണ്ടും ഗ്രൂപ്പ്-ഡിയില്‍ നിന്നും ക്വാര്‍ട്ടറില്‍ ഇടം നേടിയ റ്റീമുകളായിരുന്നു. ഇവര്‍ തമ്മിലെ ആദ്യകളി സമനിലയില്‍ പിരിഞ്ഞപ്പോള്‍, ഇംഗ്ലണ്ട് അടുത്ത രണ്ടു കളികളിലും സ്വീഡനെയും, ആതിഥേയരായ ഉക്രൈനിനെയും തോല്‍പ്പിച്ച് ഗ്രൂപ്പ് ജേതാക്കളായി. അച്ചടക്ക നടപടി നേരിട്ട് ആദ്യ രണ്ടു കളികളിലും പുറത്തിരിക്കേണ്ടി വന്ന വൈന്‍ റൂണി ഉക്രൈനിനെതിരെ അനായാസ ഹെഡറിലൂടെ ഒറ്റ ഗോള്‍ നേടി. പക്ഷെ, കടലാസ് പുലികളായി എന്നും അറിയപ്പെടുന്ന ഇംഗ്ലണ്ടിനു ഒരിക്കല്‍ കൂടി പെനാല്‍റ്റി ഷൂട്ട്‌-ഔട്ടിന്റെ കയ്പ്പേറിയ പരാജയം ഇറ്റലിയില്‍ നിന്നും ഏറ്റുവാങ്ങേണ്ടി വന്നു. ലോങ്ങ്‌ ബോളുകള്‍ നീട്ടി കൊടുത്തു ഉയരം കൂടിയ ആന്‍ഡി കാരളിനു ഗോളടിക്കാനുള്ള അവസരങ്ങള്‍ സൃഷ്ടിച്ചതും, സെറ്റ്-പീസുകള്‍ മുതലാക്കാനുമുള്ള നീക്കങ്ങളും ഒഴിച്ചാല്‍ ഇംഗ്ലണ്ടിനു കാര്യമായ തന്ത്രങ്ങളൊന്നും തന്നെയുണ്ടായിരുന്നില്ല. റോയ് ഹോഡ്ജ്സണിന്റെ ആദ്യത്തെ വലിയ ചുമതലയായിരുന്നു ഈ യൂറോ. കുറേക്കൂടി ക്രിയാത്മകമായി ചിന്തിക്കുകയും പുതിയ തന്ത്രങ്ങള്‍ മെനയുകയും, പ്രതിരോധത്തില്‍ ഊന്നിനില്‍ക്കുന്ന മനോഭാവത്തില്‍ കാര്യമായ മാറ്റങ്ങള്‍ വരുത്തുകയും ചെയ്യാതെ ഇംഗ്ലിഷ് റ്റീമിനു മുന്നോട്ടുള്ള പാത ദുഷ്കരം പിടിച്ചതാണെന്നുള്ളതിനു യാതൊരു സംശയവുമില്ല. മറു ഭാഗത്ത്, ഫ്രാന്‍സും പ്രതിഭകളുടെ ഒരു മികച്ച  നിരയുമായാണ് ഈ യൂറോക്കെത്തിയത്. ഫ്രാങ്ക് റിബറിയും, സമീര്‍ നാസ്രിയും, കരീം ബെന്സിമയും, യോഹന്‍ കബായിയും ഒക്കെ കഴിവുള്ള താരങ്ങളാണെങ്കിലും ഒത്തൊരുമിച്ചു പ്രവര്‍ത്തിക്കുന്നതില്‍ തീര്‍ത്തും പരാജിതരായി. റ്റീമില്‍ ഉരുത്തിരിഞ്ഞ പടല പിണക്കങ്ങള്‍ അങ്ങാടി പാട്ടാകുകയും, അത് റ്റീമിനെ തന്നെ ബാധിക്കുകയും ചെയ്തു. കോച്ച് ലോരന്റ്റ് ബ്ലാങ്ക് ആവതും ശ്രമിച്ചെങ്കിലും ഫലമുണ്ടായില്ല. അതിന്റെ പ്രതിഫലനമാണ് സ്വീഡനെതിരെ അവസാന ഗ്രൂപ്പ് മത്സരത്തില്‍ നേരിട്ട പരാജയം. പ്രശ്നങ്ങള്‍ വേണ്ട രീതിയില്‍, കാര്യക്ഷമമില്ലാതെ, പരിഹരിക്കാതെ വന്നതാണ് സ്പെയിനിനെതിരെ ക്വാര്‍ട്ടറില്‍ തോല്‍ക്കാനുള്ള പ്രധാന കാരണങ്ങളില്‍ ഒന്ന്.

ഗ്രൂപിനപ്പുറം കാണാതെ മടങ്ങിയവര്‍
ഓറഞ്ചു പടയുടെ കൂപ്പുകുത്തല്‍ തന്നെയാണ് ഈ യൂറോയുടെ സംസാര വിഷയങ്ങളില്‍ ഒന്ന്. മരണ ഗ്രൂപ്പില്‍ കളിച്ച മൂന്നു കളിയും തോറ്റിട്ടാണ് ബെര്‍ട്ട് വാന്‍ മാര്‍വ്യിക്കിന്റെ വമ്പന്‍ പട ഉക്രൈനില്‍ നിന്നും വിട പറഞ്ഞത്. വെസ്ലി സ്നൈഡര്‍, മാര്‍ക്ക്‌ വാന്‍ ബോമ്മല്‍, ആര്യന്‍ റോബ്ബന്‍, റോബിന്‍ വാന്‍ പേഴ്സി, ഹുണ്‍റ്റലാര്‍ എന്നിവരടങ്ങുന്ന  വന്‍നിര ഡെന്‍മാര്‍ക്കിനോട് ഒറ്റ ഗോള്‍ പരാജയം ഏറ്റുവാങ്ങിയ ശേഷം, പിന്നീട് രണ്ടു തോല്‍വി കൂടെ ഇരന്നു വാങ്ങുകയായിരുന്നു. റ്റൂര്‍ണമെന്റിന്റെ തുടക്കത്തില്‍, തന്നെ സ്പെയിനിനും, ജര്‍മനിക്കും ശേഷം, ഏറ്റവും കൂടുതല്‍ വിജയസാധ്യത കല്‍പിക്കപ്പെട്ട റ്റീമായിരുന്നു ഡച് പട. കഴിഞ്ഞ ലോക കപ്പില്‍ സ്പെയിനിനോട് കാലിടറിയ അതെ റ്റീമിനെ തന്നെ ഇറക്കിയായിരുന്നു, മാര്‍വ്യിക്ക്  യൂറോപ്പിലെ  കിരീടം ലക്ഷ്യമിട്ടത്. വാന്‍ ബോമ്മലും, മാര്‍വ്യിക്കും സ്ഥാനങ്ങള്‍ രാജി വച്ച് കഴിഞ്ഞു. ഇതേ ഗ്രൂപ്പില്‍ കളിച്ചു അവസാനം വരെ പോരാടിയ ഡെന്മാര്‍ക്കും റ്റൂര്‍ണമെന്റിനെ ത്രില്ലടിപ്പിച്ചു. ക്രോണ്‍ഡെല്ലി, നികോളാസ് ബെന്റ്നര്‍ എന്നിവരുടെ ഗോളുകള്‍ ഡാനിഷ്‌ സേനയെ തിളക്കമുള്ളവരാക്കി.

ക്വാര്‍ട്ടര്‍ കാണാതെ പുറത്തായ, മറ്റൊരു പ്രധാന റ്റീം റഷയായിരുന്നു. ഡിക് അഡ്വോക്കാറ്റ് എന്ന  ഡച്  ഇതിഹാസത്തിന്റെ പരിശീലനത്തില്‍ യൂറോക്കെത്തിയ റഷന്‍ റ്റീം, പക്ഷെ ആദ്യകളിയില്‍ ചെക്ക്  റിപബ്ലിക്കിനെ തൂത്തെറിഞ്ഞ ആരംഭശൂരത്വം പിന്നീടങ്ങോട്ട് കാണിച്ചതേയില്ല. ആന്ദ്രെ അര്‍ഷവിന്നും പാവ്ല്യുചെങ്കോയും ഒക്കെ ഉണ്ടായിട്ടും റഷയുടെ പതനം ദയനീയമായിരുന്നു. ഫ്രാന്‍സിനെ പോലെ റ്റീമില്‍ നിലനിന്നിരുന്ന കുഴപ്പങ്ങളും തോല്‍വിക്ക് ശേഷം പുറത്തു വന്നു. ഇബ്രാഹിമോവിചിന്റെ നിറ  സാന്നിധ്യമുണ്ടായിട്ടും കപ്പിലിനെ കരയ്ക്കടിപ്പിക്കാന്‍ സ്വീഡനായില്ല. ഇംഗ്ലണ്ടിനെ വെള്ളം കുടിപ്പിച്ചതും, ഫ്രാന്‍സിനെ അവസാന കളിയില്‍ തുരത്തിയതുമാണ് എടുത്തു പറയാവുന്ന നേട്ടങ്ങള്‍.

ക്രോയേഷ്യയും, ഉഗ്രന്‍ കളി പുറത്തെടുത്തെങ്കിലും, അയര്‍ലണ്ടിനെ മാത്രമേ അവര്‍ക്ക് തോല്പ്പിക്കാനയുള്ളു. ഇവിക ഒളിച്ചിന്റെ അസാന്നിധ്യത്തില്‍, മാറിയോ മന്സുകിച്ചും, ലുക മോഡ്രിച്ചുമാണ് കളി അവര്‍ക്കായി നിയന്ത്രിച്ചത്. മന്സുകിച് ഗോമസിനും റൊണാള്‍ഡോക്കുമൊപ്പം മൂന്ന് ഗോള്‍ നേടി റ്റൂര്‍ണമെന്റിന്റെ ഏറ്റവും ഉയര്‍ന്ന സ്കോററാണ്. ഹോളണ്ടിനെ പോലെ തന്ന ഒരു കളി പോലും ജയിക്കാതെ പുറത്തേക്ക് പോയ റ്റീമാണ് അയര്‍ലണ്ട്. ഡേമിയന്‍ ഡഫ്, റോബി കീന്‍ എന്നിങ്ങനെയുള്ള പടക്കുതിരകള്‍ ഉള്‍പ്പെട്ട റ്റീം. ജിയോവാനി ട്രാപ്പടോണിയുടെ പരിശീലം. പക്ഷേ, മൊത്തത്തില്‍ അവര്‍ തകരുകയാണ് ഉണ്ടായത്. ആതിഥേയത്വം വഹിച്ച പോളണ്ടും, ഉക്രൈനും കാര്യമായ പുരോഗതി ഒന്നും നടത്തിയില്ല. ലെവണ്ടോവ്സ്കി തൊടുത്ത ഗോളില്‍ നിന്നാണ് ഈ യൂറോ തുടങ്ങിയതെങ്കിലും പോളണ്ടിന് രണ്ടു സമനിലകള്‍ കൊണ്ട് തൃപ്തിപ്പെടെണ്ടി വന്നു.

ഉക്രൈനാണ്  കൂടുതല്‍ പ്രതീക്ഷ നല്‍കിയത്. ആന്ദ്രെ ഷെവ്ചെങ്കോ എന്ന പ്രതിഭാസത്തിന്റെ ചിറകിലേറി സഞ്ചരിച്ച ഉക്രൈന്‍ ആദ്യ കളിയില്‍ സ്വീഡനെതിരെ ഒരു ഗോള്‍ തുടക്കത്തില്‍ വഴങ്ങിയെങ്കിലും ഷെവ്ചെങ്കോയുടെ രണ്ടു മനോഹര ഹെഡഡറുകളിലൂടെ മുന്നിലെത്തുകയായിരുന്നു. ഒലെഹ് ബ്ലോഖിന്‍ പരിശീലിപ്പിച്ച ഉക്രൈന്‍ അടുത്ത കളി ഫ്രാന്‍സിനോട് തോറ്റെങ്കിലും ഇംഗ്ലണ്ടിനോട് തോറ്റത് ലൈന്‍സ്മാന്റെ തെറ്റായ തീരുമാനം കൊണ്ട് കൂടിയാണ്. ഇംഗ്ലണ്ടിന്റെ ഗോള്‍മുഖം കടന്നു വരയുടെ അപ്പുറത്തേക്ക് പോയ പന്തിനെ ഗോളായി കണക്കാക്കാന്‍ റഫറി കൂട്ടാക്കിയില്ല. അന്തരാഷ്ട്ര ഫുട്ബോളില്‍, മറ്റു കളികളെ പോലെ സാങ്കേതിക വിദ്യയുടെ ആവശ്യകതയും ഇതിലൂടെ ചൂണ്ടി കാണിക്കപ്പെട്ടു. ‘ഗോള്‍ ലൈന്‍ ടെക്നോളജി’ സ്വീകരിക്കാന്‍, സമയമായതിന്റെ വ്യക്തമായ സൂചന. ഈ റ്റൂര്‍ണമെന്റോടെ ഷെവ്ചെങ്കോയുടെ നീണ്ട  അന്തരാഷ്ട്ര കരിയറിന് മേല്‍ തിരശ്ശീല വീണു. ഉക്രൈനിനെ ലോകകപ്പില്‍ ആദ്യമായി 2006ല്‍ എത്തിച്ചതിന്റെ സാരഥ്യവും ഷെവ്ചെങ്കോക്ക് സ്വന്തം. ഇത് കൂടാതെ, ഉക്രൈനിന്റെ ഫുട്ബോള്‍ ചരിത്രത്തില്‍ ഏറ്റവും പ്രായം കുറഞ്ഞതും പ്രായം കൂടുതലുമുള്ള ഗോള്‍ സ്കോറര്‍ എന്ന രണ്ടു റെക്കോര്‍ഡും ഷെവ്ചെങ്കോയുടെ പേരിലുണ്ട്.

പതിനാറു റ്റീമുകള്‍ വീറോടും വാശിയോടും മത്സരിച്ച ഈ യൂറോയില്‍ സെമി ഫൈനല്‍ വരെ ഒരു കളിയും ഗോള്‍ രഹിത സമനിലയില്‍ അവസാനിച്ചില്ലെന്നു മാത്രമല്ല, അവസാന റൗണ്ട് കളികള്‍ വരെയും നാല് ഗ്രൂപ്പില്‍ നിന്നും ക്വാര്‍ട്ടറിലേക്ക് കടക്കുന്ന റ്റീമുകളെ കുറിച്ച് ഒരു ധാരണയുമുണ്ടായിരുന്നില്ല. അത്രയ്ക്കും ആകാംക്ഷ നിറഞ്ഞതായിരുന്നു എല്ലാ മത്സരങ്ങളും. പക്ഷെ 2016ല്‍ ഫ്രാന്‍സ് ആതിഥേയത്വം വഹിക്കുന്ന യൂറോ മുതലങ്ങോട്ട്‌, എട്ടു റ്റീമുകള്‍ കൂടി ചേര്‍ത്തു 24 ആക്കി കൂട്ടാന്‍ മിഷെല്‍ പ്ലാറ്റിനിയുടെ നേതൃത്വത്തില്‍ യുവേഫ തീരുമാനിച്ചു കഴിഞ്ഞു. ഇതിന്റെ ബാക്കിപത്രം, ആവേശവും അര്‍ഹതയുമുള്ള റ്റീമുകള്‍ക്കും പകരം, കുത്തിനിറയ്ക്കപ്പെട്ട റ്റീമുകളുടെ കളിയായി റ്റൂര്‍ണമെന്റ് മാറുമെന്നാണ് മിക്ക ഫുട്ബോള്‍ പ്രേമികളുടെയും ആശങ്ക. ചുരുക്കത്തില്‍, ക്വാളിറ്റിക്ക് പകരം ക്വാണ്ടിറ്റിക്കു പ്രാധാന്യം നല്‍കുക. പക്ഷേ, യൂറോപ്യന്‍ രാജ്യങ്ങളുടെ വികസനവും യൂറോപ്യന്‍ യൂണിയന്റെ വിസ്തീര്‍ണവും കണക്കിലെടുത്താണ് തീരുമാനം എന്നാണ് യുവേഫയുടെ വിശദീകരണം. എന്തായാലും ഇപ്പോഴുത്തെ പോലെയാകില്ല യൂറോയുടെ സ്ഥിതി എന്നത് സാരം.

കളിക്കളത്തിനു പുറത്തെ കളികള്‍
പുല്‍മൈതാനികളില്‍ വസന്തം വിരിയുമ്പോള്‍ ഗാലറികള്‍ക്ക് പുറത്തും കളികള്‍ നടക്കുന്നുണ്ട്. വംശീയ  വിദ്വേഷം നിഴലാടിയ സാഹചര്യത്തിലാണ്  ഈ യൂറോ ഉക്രൈനിലും പോളണ്ടിലും അരങ്ങേറുന്നത്. അത് കൊണ്ട് തന്നെ, യുവേഫയുടെ കാതലായ പ്രഖ്യാപനവും ഈ റ്റൂര്‍ണമെന്റിനിറെ മുദ്രാവാക്യവും ‘പരസ്പരം ബഹുമാനിക്കുക’ എന്നതാണ്. അങ്ങനെ, മത്സരങ്ങള്‍ക്ക് ശേഷം പൊതുവായ ഒരു കീഴ്വഴക്കമായ പരസ്പരം ജേഴ്സി കൈമാറ്റത്തെയും, ആവതും, പ്രോത്സാഹിപ്പിക്കുക എന്ന നയമാണ് യുവേഫ സ്വീകരിച്ചിരിക്കുന്നത്.

എന്നാല്‍, യുവേഫയെ അലട്ടുന്ന മറ്റൊരു പ്രധാന തലവേദനയാണ്, കാണികളുടെയും ആരാധകരുടെയും അതിരുകടക്കുന്ന ഉന്മാദം. അത് പലപ്പോഴും ലഹളയായും തെരുവുയുദ്ധങ്ങളായും മാറി. സ്റ്റേഡിയത്തിനുള്ളിലെ പടക്കം പൊട്ടിക്കലും ഗ്രൌണ്ടിലേക്ക് ചവറുവാരിയെറിയുകയും മറ്റുമുള്ള സംഭവങ്ങള്‍ ധാരാളമായിരുന്നു. ഇതിന്റെ ഫലമായി യുവേഫ പല രാജ്യങ്ങളുടെയും ഫുട്ബോള്‍ ഫെഡറേഷനുകള്‍ക്കെതിരെ വന്‍ തുകകള്‍ നഷ്ടപരിഹാരമായി ചുമത്തുകയുമുണ്ടായി. ഇതില്‍ റഷ, ജര്‍മനി, സ്പെയിന്‍ എന്നീ രാജ്യങ്ങള്‍ മുന്‍നിരയില്‍ വരും.

റ്റൂര്‍ണമെന്റിന്റെ നടത്തിപ്പ് സംബന്ധമായും, അഴിമതിയുടെ കഥകളും ഇതിനോടകം പുറത്തു വന്നിട്ടുണ്ട്. ഉക്രൈനില്‍ സ്റ്റേഡിയങ്ങള്‍ പണിഞ്ഞതിന്റെയും നവീകരിച്ചതിന്റേയും പേരി വന്‍അഴിമതി ആരോപണങ്ങളാണ് അവിടത്തെ ഭരണകൂടവും ഫുട്ബോള്‍ ഫെഡറേഷനും നേരിടുന്നത്. ഈ ആരോപണങ്ങളെ യുവേഫ അന്വേഷിക്കണമെന്നാണ് ഉക്രൈനിലെ പ്രതിപക്ഷം ആവശ്യപ്പെടുന്നത്. ഇതിനെല്ലാം പുറമെ ഉക്രൈനില്‍ പ്രസിഡന്റ് വിക്ടര്‍ യാനുകോവിചിന്റെ ഭരണത്തില്‍, സ്വേച്ഛാധിപത്യ രീതികളാണ് നടപ്പാക്കുന്നതെന്നും, പ്രതിപക്ഷത്തെ പ്രധാന നേതാവായ യൂലിയ ടിമോഷെങ്കോയെ ജയിലില്‍ തള്ളി ജനാധിപത്യ ശബ്ദങ്ങളെ അടിച്ചമര്‍ത്തുകയാണെന്നുള്ള വാര്‍ത്തകളും പുറത്തു വന്നിട്ടുണ്ട്. ഇതിന്റെ ഫലമായി ഉക്രൈനിലെ ഒരു കളിയും നേരിട്ട് കാണാന്‍ എത്തില്ല എന്ന്  ഒട്ടുമിക്ക എല്ലാ യൂറോപ്യന്‍ രാഷ്ട്രതലവരും തീരുമാനമെടുത്തിട്ടുണ്ട്.

ഇതെല്ലാം, ഒരു വശത്തുണ്ടെകിലും, യൂറോപ്പിലെ വസന്തത്തിനു ഒരു കോട്ടവും സംഭവിച്ചിട്ടില്ല. ഇനി ഒരു കളി കൂടി ബാക്കി നില്‍ക്കെ, കിരീട ധാരണത്തിനായി ലോകം ആകാംക്ഷയോടെ കാത്തിരിക്കുകയാണ്.

Be Sociable, Share!

• 

Tags: Euro 2010, Football, Panthezhuthu, PK Anand, sports