ഒഞ്ചിയത്തുനിന്ന് നെയ്യാറ്റിന്‍കരയിലേക്കുള്ള ദൂരം

Be Sociable, Share!

• 

വിഎസ് സനോജ്

ജീവിച്ചിരുന്ന ടിപി ചന്ദ്രശേഖരനേക്കാള്‍ അപകടകാരിയാണ് മരിച്ച ചന്ദ്രശേഖരനെന്ന് സിപിഎം നേതൃത്വം തിരിച്ചറിഞ്ഞ (അതോ തിരിച്ചറിയാന്‍ ഇനിയും കാലങ്ങളെടുക്കുമോ എന്നറിയില്ല) ദിവസങ്ങളിലൂടെയാണ് കേരളം, വിവാദങ്ങളിലും ‘പോലീസ് മൊഴി’ വാര്‍ത്തകളിലും എംഎം മണിയുടെ വാമൊഴി വഴക്കങ്ങളിലും പെട്ട് നീങ്ങിക്കൊണ്ടിരിക്കുന്നത്. അതിനിടെയിതാ കൊലയ്ക്കും ആര്‍ത്തനാദത്തിനുമിടെ എന്ന് കവി പറഞ്ഞപോലെ ഒഞ്ചിയത്തിനും നെയ്യാറ്റിന്‍കരയ്ക്കുമിടെ ഇടതുമുന്നണിയ്ക്ക് രാഷ്ട്രീയമായ മറ്റൊരു തിരിച്ചടി സമ്മാനിക്കുന്ന ഉപതിരഞ്ഞെടുപ്പ് വിജയം യുഡിഎഫിന് സംഭവിച്ചിരിക്കുന്നു. കുലംകുത്തിയായ ആര്‍ സെല്‍വരാജ് നെയ്യാറ്റിന്‍കരയിലെ ഉപതിരഞ്ഞെടുപ്പില്‍ രാഷ്ട്രീയനിറം മാറ്റം തീണ്ടിയിട്ടും നിയമസഭയിലേക്ക് ജയിച്ചുകയറി പോയിരിക്കുന്നു. എന്ത് വ്യാഖ്യാനങ്ങള്‍ ചമച്ചാലും ഏതൊക്കെ സത്യങ്ങള്‍ വെള്ളം തൊടാതെ വിഴുങ്ങിയാലും സിപിഎം നേതൃത്വം നല്‍കുന്ന ഇടതുമുന്നണിയ്ക്ക് തിരിച്ചടി തന്നെയാണ് ഈ തിരഞ്ഞെടുപ്പ് ഫലം എന്ന കാര്യത്തില്‍ സംശയമില്ല. അതേസമയം യുഡിഎഫിന് അപ്രതീക്ഷിതമായി നേടാന്‍ കഴിഞ്ഞ ഈ വിജയത്തിലൂടെ ഉമ്മന്‍ ചാണ്ടിക്ക് ഇനി ക്ലിഫ്ഹൗസിലേക്ക് കുറച്ചുകാലത്തേക്കെങ്കിലും ഇടര്‍ച്ചയില്ലാതെ വാഴാം. അത്തരമൊരു വിരേചനസുഖമല്ലാതെ മറ്റൊന്നും കോണ്‍ഗ്രസിന് ഈ തിരഞ്ഞെടുപ്പ് സമ്മാനിക്കുന്നുമില്ല.

വിഎസ് ടിപിയുടെ ഭാര്യ രമയെ ആശ്വസിപ്പിക്കുന്നതിന്റെ സ്കെച്ച്. വര: ജിപ്സന്‍ ജേക്കബ്

അപകടകരമായ രാഷ്ട്രീയാവസ്ഥയുടെ പുതുതുടക്കം
പക്ഷേ ചന്ദ്രശേഖരന്റെ കൊല കേവലമൊരു പ്രാദേശിക രാഷ്ട്രീയകൊല എന്നതിനുമപ്പുറത്തേക്ക് വളര്‍ന്ന് വികസിച്ച് മൂത്തുപഴുത്തതിന്റെ പരിണിതഫലം കൂടിയാണ് ഇടതുപക്ഷത്തിന്, വിശേഷിച്ച് സിപിഎമ്മിന്, സംഭവിച്ച ഈ തിരഞ്ഞെടുപ്പ് പരാജയം എന്ന കാര്യത്തില്‍ തര്‍ക്കമില്ല. വേണ്ടിവന്നാല്‍ സവര്‍ണ ഹിന്ദു വോട്ടുകള്‍ ഇടതുപക്ഷത്തേക്കും ചായും എന്ന ചിന്തകള്‍ക്ക് രാഷ്ട്രീയഗണിതത്തിന്റെ പച്ചക്കൊടി കണ്ട വോട്ടെടുപ്പായിരുന്നു കഴിഞ്ഞ നിയമസഭാ തിരഞ്ഞെടുപ്പ്. നെയ്യാറ്റിന്‍കരയിലും നായര്‍ വോട്ടുകളുടെ കേന്ദ്രീകരണം ഇടതിന് അനുകൂലമാകുമെന്ന് പ്രതീക്ഷിക്കപ്പെട്ടെങ്കിലും ഒ രാജഗോപാല്‍ എന്ന സ്ഥാനാര്‍ത്ഥിയുടെ മാത്രം മികവില്‍ അതില്‍ ഭൂരിഭാഗവും ബിജെപി കൊണ്ടുപോയി. അങ്ങനെ കഴിഞ്ഞ തവണത്തേതിന്റെ അഞ്ചിരട്ടി വോട്ട് ബിജെപി സമാഹരിക്കുകയും സിപിഎം സ്ഥാനാര്‍ത്ഥിക്ക് ലഭിക്കുമെന്ന് കരുതിയ നാടാര്‍ വോട്ടുകള്‍ യുഡിഎഫിന് അനുകൂലമായി വന്നുചേരുകയും ചെയ്തു. അതോടെ പ്രാദേശികമായി സ്ഥലത്തെ പ്രധാന പയ്യന്‍സാണെന്ന് കടകംപ്പള്ളിയും സംഘവും കണ്ടെത്തിയ ലോറന്‍സിന് വിജയത്തിന് പകരം തോല്‍വി അനായാസമായിത്തീര്‍ന്നു. എന്നാല്‍ നെയ്യാറ്റിന്‍കര അപകടകരമായ രാഷ്ട്രീയാവസ്ഥയുടെ പുതുതുടക്കവും കേരളത്തിന് കാണിച്ചുതരുന്നുണ്ട് എന്ന കാര്യം വിസ്മരിക്കപ്പെടരുത്. അത് ബിജെപിയുടെ വളര്‍ച്ചയാണ്.

ഒരുപക്ഷേ രാജഗോപാലിന്റെ പൊതുസമ്മതിയുടെ പേരുപറഞ്ഞാല്‍ പോലും ജാതിരാഷ്ട്രീയവും അതിന്റെ അപകടകരമായ കൂടിച്ചേരലും ഒട്ടും സ്വാഭാവികതയില്ലാതെ സംഭവിച്ച തിരഞ്ഞെടുപ്പ് കൂടിയാണിത്. അതിനര്‍ത്ഥം മറ്റ് തിരഞ്ഞെടുപ്പുകളിലൊന്നും ജാതിരാഷ്ട്രീയം അടിയൊഴുക്കുകള്‍ സൃഷ്ടിച്ചില്ല എന്നല്ല. രണ്ടാംസ്ഥാനം പ്രതീക്ഷിച്ച ബിജെപിക്ക് അതല്‍പം അതിമോഹമായെങ്കില്‍ പോലും 30,000ത്തോളം വോട്ടുകള്‍ സമാഹരിക്കാനായി എന്നത് അവരെ സംബന്ധിച്ച് മികച്ച നേട്ടം തന്നെയാണ്. പെരുന്നയിലെ നായര്‍ പ്രമാണികള്‍ കോണ്‍ഗ്രസിനോട് ഒരല്‍പം മുഖംചുളിച്ചതും വെള്ളാപ്പള്ളി ഒന്നും വിട്ടുപറയാതിരുന്നതും ബിജെപിയ്ക്ക് വോട്ടുകള്‍ അനുകൂലമാക്കിയെന്ന് വേണം കരുതാന്‍. മണ്ഡലത്തിലെ പതിനെട്ട് പോളിങ് ബൂത്തുകളുള്ള അതിയന്നൂര്‍ പഞ്ചായത്തില്‍ ഏഴിടത്ത് ബിജെപി ഒന്നാമതെത്തിയെന്നതും ഓര്‍ക്കേണ്ട വസ്തുതയാണ്. കാരോട്, കുളത്തൂര്‍, ചെങ്കല്‍ പഞ്ചായത്തുകളില്‍ ന്യൂനപക്ഷ വോട്ടുകളുടെ കേന്ദ്രീകരണം ഉണ്ടാകാനും ഈ പ്രചാരണത്തിലൂടെ യുഡിഎഫിന് കഴിഞ്ഞു. നെയ്യാറ്റിന്‍കര നഗരസഭയിലെ 47 പോളിങ് ബൂത്തുകളിലെ വോട്ടെണ്ണല്‍ തുടങ്ങിയപ്പോള്‍ ലോറന്‍സിന് ലഭിച്ച നേരിയ ലീഡ് പിന്നീട് ചെങ്കല്‍, തിരുപുറം, കുളത്തൂര്‍, കാരോട് പഞ്ചായത്തുകളിലെ വോട്ടെണ്ണിത്തുടങ്ങിയപ്പോള്‍ സെല്‍വരാജ് സ്വന്തമാക്കുന്ന കാഴ്ച്ചയാണ് കണ്ടത്. ഒരു രാഷ്ട്രീയ പാര്‍ടിയില്‍ കൂറുമാറി കളങ്കിതനായി തിരഞ്ഞെടുപ്പിനെ അഭിമുഖീകരിച്ച് വിജയം വരിക്കുക എന്നത് കേരള രാഷ്ട്രീയത്തിന്റെ അവസരവാദ ചാഞ്ചാട്ടങ്ങളുടെ പുതിയൊരു അധ്യായത്തെ കുറിക്കുന്നു.

കണ്ണൂരിലെ അത്ഭുതക്കുട്ടിയ്ക്ക് ശേഷം സെല്‍വരാജിനെ വിജയിപ്പിക്കുന്നതിലൂടെ ജനം പറഞ്ഞുവയ്ക്കുന്നതിന്റെ ഉള്ളറിവുകള്‍ പഠിക്കാന്‍ രാഷ്ട്രീയ  പാര്‍ടികള്‍ തയ്യാറാകേണ്ടതുമുണ്ട്. ചന്ദ്രശേഖരന്‍ സംഭവം പ്രതീക്ഷിച്ചിരുന്നില്ലെങ്കിലും സിപിഎമ്മിലെ ഒരു പൊതുസ്ഥാനാര്‍ത്ഥിയെ (കുറച്ചുകൂടി ജനകീയ അടിത്തറയുള്ള) മത്സരിപ്പിച്ചിരുന്നെങ്കില്‍ കളി മറ്റൊന്നായേനെ. അതിനുപകരം ജേക്കബ് ഗ്രൂപ്പിന്റെ ആളായി നടന്ന് അവസരവാദരാഷ്ട്രീയത്തില്‍ നന്നായി മുങ്ങിക്കുളിച്ച് പരിചയമുള്ള ഒരാളെ തന്നെ സിപിഎം പരീക്ഷിച്ചുവെന്നത് വിനാശകാലേ വിപരീതബുദ്ധിയായി മാറി. അതുകൊണ്ടാണ് വിഎസ് അച്യുതാനന്ദന്‍, വാക്കുകള്‍ കൊണ്ട് കൊളുത്തിട്ട് തിരുവനന്തപുരം ജില്ലാ നേതൃത്വത്തെ പരോക്ഷമായി കളിയാക്കി ”ലോറന്‍സ് കടകംപ്പള്ളിയും കൂട്ടരും നിശ്ചയിച്ച സ്ഥാനാര്‍ത്ഥിയാണ്” എന്ന് പറഞ്ഞത്. ലീഗിന്റെ അഞ്ചാംമന്ത്രിസ്ഥാനം, കോണ്‍ഗ്രസിനുള്ളിലെ മുറുമുറുപ്പുകള്‍ എന്നിവ പ്രചാരണയുധമാക്കി എന്‍എസ്എസിന്റെ അതൃപ്തി മുതലെടുത്ത് വിജയം നേടാം എന്ന ചിന്തയാണ് ഇടതുപക്ഷത്തിനുണ്ടായിരുന്നത്. പ്രത്യേകിച്ച് സംഭവങ്ങളൊന്നും കേരളത്തില്‍ സംഭവിച്ചില്ലായിരുന്നെങ്കില്‍ ഇതിനായിരുന്നു പ്രധാന സാധ്യതയും. പക്ഷേ പിറവത്ത് പട നയിച്ച് പിഴച്ച ഇപി ജയരാജനെ പോലെ ഇവിടെ കോടിയേരിയ്ക്കും സംഘത്തിനും പിഴച്ചു. കാര്യങ്ങള്‍ കൈവിട്ടുപോയി. പോരാത്തതിന് നാടാര്‍ വോട്ടുകളുടെ കൃത്യമായ സമാഹരണത്തില്‍ സെല്‍വരാജ് വിജയിക്കുകയും ചെയ്തു.

രാഷ്ട്രീയ പാളിച്ചകള്‍
പക്ഷേ സിപിഎമ്മിനുണ്ടായ രാഷ്ട്രീയ പാളിച്ചകളുടെ ദയനീയമുഖം വെളിപ്പെടുത്തിയ തിരഞ്ഞെടുപ്പ് എന്ന അര്‍ത്ഥത്തില്‍ അവരുടെ പിഴവുകളും രാഷ്ട്രീയാസംബന്ധങ്ങളും കാണാതെ പോയാല്‍ അത് വസ്തുതാപരമാവില്ല. അതിന് കാരണം സിപിഎം നേതാക്കള്‍ തന്നെ സമ്മതിച്ചതുപോലെ ഒഞ്ചിയവും മലനാടന്‍ തമാശയും മുഖ്യപങ്കുവഹിച്ചിട്ടുണ്ട്. കഴിഞ്ഞ മെയ് നാലിനാണ് ഒഞ്ചിയത്തെ റെവല്യൂഷണറി മാര്‍ക്‌സിസ്റ്റ് പാര്‍ടി നേതാവ് ചന്ദ്രശേഖരന്‍ ക്രൂരമായി കൊല ചെയ്യപ്പെടുന്നത്. ചന്ദ്രശേഖരന്റെ കൊല കേരളത്തിലെ ജനങ്ങളെ ഞെട്ടിപ്പിക്കുക മാത്രമല്ല, അതിന്റെ അലയും പ്രതിഷേധവും മറികടക്കാന്‍ കഴിയാത്ത രീതിയില്‍ ഉയര്‍ന്നത് സിപിഎമ്മിന്റെ കണക്കുകൂട്ടലുകളാണ് തെറ്റിച്ചത്. സിപിഎമ്മിലെ ഒരു വിഭാഗം അണികളോ ഭൂരിപക്ഷം വരുന്ന നേതൃത്വമോ എന്ത് തന്നെ പ്രചരിപ്പിച്ചാലും വാദിച്ചാലും ശരി ചന്ദ്രശേഖരന്റെ കൊല നടന്ന് തൊട്ടടുത്ത നിമിഷം മുതല്‍ സംശയത്തിന്റെ മുന നീളുന്നത് സിപിഎമ്മിലേക്ക് തന്നെയായിരുന്നു.

പണ്ടത്തെ മലയാളസിനിമയില്‍ പ്രേംനസീറിന്റെയും അടൂര്‍ ഭാസിയുടേയും മുഖത്ത് ഒരു പൊട്ടും ഓടിച്ചുവെച്ച് സിഐഡി വേഷത്തില്‍ ഭാവപകര്‍ച്ച നടത്തിയാല്‍ അത് വില്ലന് മാത്രമേ തിരിച്ചറിയാന്‍ പറ്റാത്തതായിരുന്നുള്ളൂ. ഇതേ യുക്തിയാണ് വടകരയിലും നടന്നത്. സിപിഎം പ്രവര്‍ത്തകര്‍ക്ക് സംഭവത്തിലുള്ള പങ്ക് സുവ്യക്തമായിട്ടും അനാവശ്യപ്രതിരോധത്തിന്റെ അശ്ലീലവ്യവഹാരങ്ങളിലേക്ക് ഒരു പ്രസ്ഥാനത്തെ മൊത്തത്തില്‍ കൊണ്ട് ആഴ്ത്തുകയാണ് ചില നേതാക്കള്‍ ചെയ്തത്. അതുപോലെ വെറുതെ ന്യായീകരിച്ച് സ്വയം കൂടുതല്‍ വെറുപ്പിക്കുക മാത്രമാണ് വധത്തെ തുടര്‍ന്ന് ഒരു വിഭാഗം നേതാക്കള്‍ ചെയ്തത്. അതിപ്പോഴും തുടരുകയാണ്. അതിനിടെയാണ് കൊലയുടെ പൂര്‍വകാല കത്തിവേഷങ്ങള്‍ സ്വയം അവതരിപ്പിച്ച് ഇടുക്കി ജില്ലാ സെക്രട്ടറി എംഎം മണി പുതിയൊരു പ്രതിസന്ധിയിലേക്ക് സിപിഎമ്മിനെ എത്തിച്ചുകൊടുത്തത്. ഈ സംഭവങ്ങളിലെല്ലാം വ്യക്തമാകുന്ന അഹന്തയുടെ ഒരു ബുദ്ധിശൂന്യമുഖമുണ്ട്. അധികാരം ദുഷിപ്പിക്കുമെന്ന ആപ്തവാക്യം സത്യമെന്ന് ഒരുപരിധിവരെ ജനങ്ങളെ ബോധ്യപ്പെടുത്തിയ ചില പരാമര്‍ശങ്ങളാണ് ഇതുമായി ബന്ധപ്പെട്ട് പുറത്തുവന്നത്.

ടിപിയെ കൊന്നിട്ടില്ലെന്നും കൊന്നാല്‍ അത് വിളിച്ചുപറയാന്‍ ധൈര്യമുള്ളവരാണ് കമ്യൂണിസ്റ്റുകാര്‍ എന്നും ഊറ്റം കൊണ്ടതിലൂടെ കൊലപാതക പരമ്പരയുടെ കഥകളാണ് അമിതാവേശം കൊണ്ട് മണി വെളിപ്പെടുത്തിയത്. കുലത്തിന് വിരുദ്ധമായി പ്രവര്‍ത്തിക്കുന്നവന്‍ കുലംകുത്തിയും ഒറ്റുകാരനുമാകുന്ന ഗോത്രഹിംസയുടെ കാട്ടുഭാഷ്യമാണ് അതിലെല്ലാം ഒളിഞ്ഞിരിക്കുന്നത്. ടിപി വധത്തില്‍ ചില സാമാന്യയുക്തി മാത്രം ഉപയോഗപ്പെടുത്തേണ്ട ചോദ്യങ്ങള്‍ക്ക് മറുപടി നല്‍കാന്‍ നേതൃത്വത്തിനായില്ല. കോഴിക്കോട് ജില്ലയുടെ പരിധിയില്‍ വരുന്ന ഒരു സംഘടനാ വിഷയത്തിന് (ചന്ദ്രശേഖരന്റെ പിണങ്ങിപ്പോക്കും, തിരിച്ചുവരവിനുള്ള ചര്‍ച്ചകളും) എന്തിനാണ് കണ്ണൂര്‍ ജില്ലാ സെക്രട്ടറി ഇത്രയും ഉത്സാഹം കാണിച്ചത്, കണ്ണൂരിലെ ഏരിയാ കമ്മിറ്റിയംഗമായ കുഞ്ഞനന്തന്‍ ഇപ്പോഴും ഒളിവില്‍  പോയിരിക്കുന്നത് എന്തിന് (കേരളത്തില്‍ നൂറുകണക്കിന് ഏരിയാ സെക്രട്ടറിമാരുണ്ടല്ലോ. അവരാരും ഒളിവില്‍ പോയില്ലല്ലോ), എന്തുകൊണ്ട് തുടര്‍ച്ചയായി പാര്‍ടിക്കാരെ പോലീസ് അറസ്റ്റു ചെയ്തിട്ടും പൊതുപ്രസംഗം നടത്തി എടാ പോടാ വിളിക്കുകയല്ലാതെ നിയമപരമായ നടപടികളുമായി സിപിഎം നേതൃത്വം മുന്നോട്ടുപോയില്ല, എളമരം കരീം നടത്തിയ വാര്‍ത്താസമ്മേളനത്തില്‍ കുഞ്ഞനന്തന്റെ കാര്യം അത് വേറെ ജില്ലയിലെ കാര്യമാണ് അവിടത്തെ ജില്ലാ സെക്രട്ടറിയോട് ചോദിക്കണം എന്ന് പറഞ്ഞ് കൈകഴുകിയത് എന്തിന്… ഇത്തരം നിരവധി ചോദ്യങ്ങള്‍ പ്രസക്തമാണ് എന്ന് ഈ വിഫല പ്രതിരോധക്കാര്‍ മറക്കാന്‍ പാടില്ലായിരുന്നു.

അനുഷ്ഠാനകല
ഇത്തരം ഗോത്രഹിംസയുടെ കറകള്‍ ഏതെങ്കിലും പാര്‍ടിയുടെ മാത്രം രീതിയല്ല, മറിച്ച് കാലങ്ങളായി പല പാര്‍ടികളും ചെയ്തുപോരുന്ന അനുഷ്ഠാനകല തന്നെയാണെന്ന് പല കൊലപാതകങ്ങളും തെളിയിക്കുന്നുണ്ട്. പക്ഷേ മാറിയ സാഹചര്യങ്ങളെ, ജനങ്ങള്‍ ഓരോ വിഷയവും കൈകാര്യം ചെയ്യുന്ന രീതിയെ, മാധ്യമങ്ങളുടെ പുതിയ കാലത്തെ ആവിഷ്‌കാര സാധ്യതകളെ ഉള്‍പ്പെടെ പരിഗണിച്ചുകൊണ്ട് വേണം ഇനിയുള്ള കാലത്ത് സാമൂഹ്യപ്രവര്‍ത്തനങ്ങളെ നിര്‍വചിക്കാന്‍ എന്നത് ഒരു സത്യമാണ്. അതിനര്‍ത്ഥം മാധ്യമങ്ങള്‍ തീരുമാനിക്കുന്നതിനനുസരിച്ച് നയം രൂപപ്പെടുത്തണം എന്നല്ല, കരുണാകരന്റെ കാലത്തെ ”ആര് പറഞ്ഞു, എന്തുപറഞ്ഞു” എന്ന മട്ടിലുള്ള പൊടിക്കൈകള്‍ ഫലിക്കാതെ പോകുന്നു എന്ന തിരിച്ചറിവുണ്ടാകണം എന്നേയുള്ളൂ. അല്ലെങ്കില്‍ വീഡിയോ ക്ലിപ്പുകളായി കുറച്ചുനാള്‍ മുമ്പത്തെ പ്രസംഗം, ഇപ്പോഴത്തെ പ്രസംഗത്തിലെ വൈരുധ്യം ഇവയിങ്ങനെ ചാനലുകള്‍ കാണിച്ചുകൊണ്ടേയിരിക്കും. കാരായി രാജന്‍ കൊല്ലപ്പെട്ട ഫസലിന്റെ വീട്ടില്‍ പോയി നടത്തിയ അനുശോചനവാക്കുകള്‍ മീഡിയയില്‍ പ്രചരിക്കുന്നത് ഒരു ഷാജി കൈലാസ്-രഞ്ജിപണിക്കര്‍ സിനിമ പോലെ കണ്ട് ജനം അതിശയിക്കും.

ചരിത്രത്തിലെ വലിയ രാഷ്ട്രീയ പ്രതിസന്ധികളിലൊന്നില്‍ (പ്രത്യയശാസ്ത്രപരമായ പ്രതിസന്ധിയല്ല, ഒരു സംഭവം എന്ന നിലയില്‍) ടിപി വധം എത്തിച്ചേര്‍ന്നതിന്റെ വ്യാപ്തിയാണ് കടുത്ത അച്ചടക്കലംഘനം വിഎസ് അച്യുതാനന്ദന്‍ നടത്തിയിട്ടും ഇത്തവണ നടപടിയെടുക്കാന്‍ കഴിയാതെ പോയതിന് പിന്നിലുള്ളത്. മറ്റൊരു സാഹചര്യത്തിലായിരുന്നെങ്കില്‍ പാര്‍ടിയില്‍ നിന്ന് തന്നെ പുറത്തുപോകാന്‍ തക്ക തരത്തിലുള്ള അച്ചടക്കലംഘനമാണ് വിഎസ് നടത്തിയത് എന്ന് സിപിഎമ്മിന്റെ സംഘടനാസംവിധാനം അറിയാവുന്ന ആരും സമ്മതിക്കും. എന്നിട്ടും അത് അപ്രസക്തമായി പോയത് (കുറഞ്ഞകാലത്തേങ്കിലും) ടിപി വധവും മണിയുടെ പ്രസംഗവും കണ്ണൂരില്‍ നിന്നുള്ള മറ്റ് കൊലക്കേസുകളുടെ പുനരന്വേഷണവും സൃഷ്ടിച്ച അങ്കലാപ്പിന്റെ ബലത്തില്‍ മാത്രമാണ്. ഇത്തരത്തില്‍ ജനകീയ പ്രശ്‌നങ്ങളെ കൈകാര്യം ചെയ്യുന്നതില്‍ നേതൃത്വം കാണിച്ചുകൊണ്ടിരിക്കുന്ന ജാഗ്രതക്കുറവും അതിന്റെ മറികടക്കാനായി ചില നേതാക്കള്‍ പ്രകടിപ്പിക്കുന്ന ധാര്‍ഷ്ട്യവും ഒരു പ്രസ്ഥാനത്തെ കൂടുതല്‍ കൂടുതല്‍ പേര്‍ വിരല്‍ ചൂണ്ടുന്ന അവസ്ഥയിലേക്ക് എത്തിക്കുന്നുണ്ട്. അതിന് ലോകത്ത് പല ജനകീയ പ്രസ്ഥാനങ്ങളും സാക്ഷിയാകേണ്ടി വന്നിട്ടുമുണ്ട്. അതുകൊണ്ടാണ് നെയ്യാറ്റിന്‍കരയിലെ അസംബന്ധ രാഷ്ട്രീയത്തിന് പോലും മറുപടി നല്‍കാന്‍ കഴിയാത്ത വിധത്തില്‍ ഒട്ടും ആശാസ്യമല്ലാത്ത ഒരു തിരഞ്ഞെടുപ്പ് ഫലമായി സെല്‍വരാജിന്റെ വിജയം മാറുന്നത്.

രക്തസാക്ഷിത്വത്തിന്റെ പ്രസക്തി
ഈ സാഹചര്യത്തില്‍ പ്രശ്‌നങ്ങളെ പ്രശ്‌നങ്ങളായി കാണാനും പിഴവുകളെ തുറന്നുപറഞ്ഞ് തിരുത്താനും കാണിക്കേണ്ട ഔചിത്യമാണ് കേരളത്തില്‍ ഇടതുമുന്നണിയില്‍ നിന്നും, വിശേഷിച്ച് ഏറ്റവും വലിയ ജനകീയ അടിത്തറയുള്ള പാര്‍ടിയായ സിപിഎമ്മില്‍ നിന്നും, ജനം പ്രതീക്ഷിക്കുന്നത്. അതിന് പകരം വാഗ്വാദങ്ങളും ഗോഗ്വാ വിളികളും ഭീഷണിപ്പെടുത്തലുകളും പകരം വച്ച് ഒരു പ്രസ്ഥാനത്തെ കൊണ്ടുപോകാന്‍ ശ്രമിച്ചാല്‍ എംഎന്‍ വിജയന്റെ ഭാഷയില്‍ പറഞ്ഞാല്‍ ‘പാര്‍ടിയുണ്ടാകും പിന്നില്‍ ജനങ്ങളുണ്ടാകില്ല’ എന്ന മുന്നറിയിപ്പ് അനിവാര്യമാകും. ചോദ്യം ചെയ്യുന്നവരോടും വിമര്‍ശിക്കുന്നവരോടും ചില നേതാക്കളെങ്കിലും പ്രകടിപ്പിക്കുന്ന അസഹിഷ്ണുതയും വൈരാഗ്യബുദ്ധിയുമാണ് തിരിച്ചടിയാകുന്നത്. അമിതശക്തി പ്രകടനങ്ങളും വീരസ്യങ്ങളും ബലഹീനതയെയാണ് യഥാര്‍ത്ഥത്തില്‍ വെളിവാക്കുന്നത്. അവിടെയും വിജയന്‍ മാഷ് പറഞ്ഞ നിരീക്ഷണം പ്രസക്തമാണ്. ഇഷ്ടമില്ലാത്ത ചോദ്യം ചോദിക്കുന്ന കുട്ടിയെ അധ്യാപകന് ക്ലാസില്‍ നിന്ന് പുറത്താക്കാം. പക്ഷേ അപ്പോഴും കുട്ടി മാത്രമേ പുറത്താകുന്നുള്ളൂ, ചോദ്യം അവിടെ നിലനില്‍ക്കുകയാണ്.

മൂന്നാറില്‍ കഴിഞ്ഞ വിഎസ് സര്‍ക്കാര്‍ നടത്തിയ കയ്യേറ്റവിരുദ്ധ നടപടികള്‍ ജനങ്ങളുടെ കണ്ണില്‍ ശ്ലാഘിക്കപ്പെട്ടപ്പോഴും പാര്‍ടി തലത്തില്‍ വിമര്‍ശിക്കപ്പെടുകയും, ജില്ലാ സെക്രട്ടറിയുടെ കാലുവെട്ടല്‍ ഭീഷണി വരെയെത്തുകയുമാണ് ചെയ്തത്. തുടര്‍ന്നുള്ള ഓരോ ഘട്ടത്തിലും പൊതുപ്രശ്‌നങ്ങളെ ജനങ്ങളുടെ പക്ഷത്തുനിന്ന് സമീപിക്കുന്നില്ല സിപിഎം നേതൃത്വം എന്ന പരാതിയാണ് പാര്‍ടി അണികള്‍ക്കുള്ളില്‍ പോലും ഒരു നീരസമായി നിലനിന്നത്. ഇതില്‍ എത്ര ശതമാനം വസ്തുതയുണ്ടായാല്‍ പോലും മാധ്യമങ്ങള്‍ അവയെ പൊടിപ്പും തൊങ്ങളും വെച്ച് അവതരിപ്പിച്ചാലും ഒരുപാട് കാലം ആരെയും ആര്‍ക്കും കബളിപ്പിക്കാന്‍ കഴിയില്ല എന്ന സത്യം മാധ്യമങ്ങള്‍ മാത്രമല്ല രാഷ്ട്രീയ പാര്‍ടികളും ഓര്‍ക്കേണ്ടതുണ്ട്. അറുംകൊലകളുടെ വീരസ്യങ്ങള്‍ക്ക് പകരം വയ്ക്കേണ്ട നിരവധി ജനകീയ പ്രശ്‌നങ്ങള്‍ നാട്ടിലുണ്ട് എന്ന തിരിച്ചറിവിലേക്ക് പാര്‍ടികള്‍ക്കൊപ്പം മാധ്യമങ്ങളും വളരേണ്ടതുണ്ട്.  ന്യൂസ് നൈറ്റ് ചര്‍ച്ച എന്ന അന്നന്നത്തേക്കുള്ള അപ്പം മാത്രമായി രാഷ്ട്രീയവിഷയങ്ങള്‍ മാറാതിരിക്കേണ്ടതും അനിവാര്യമാണ്. ഒഞ്ചിയത്തുനിന്ന് നെയ്യാറ്റിന്‍കരയിലേക്കുള്ള ദൂരം നീണ്ടുപോകുന്നത് സാങ്കേതികാര്‍ത്ഥത്തില്‍ മാത്രമല്ല. അതിന് കനമുള്ള ചില രാഷ്ട്രീയാര്‍ത്ഥങ്ങള്‍ കൂടിയുണ്ടാകുന്നത് അതുകൊണ്ടാണ്. ഈ സാഹചര്യത്തിലാണ് മരിച്ച ചന്ദ്രശേഖരന്‍ ജീവിച്ചിരുന്ന ചന്ദ്രശേഖരനേക്കാള്‍ പ്രസക്തമാകുന്നത്.

–ലേഖകന്‍ മാധ്യമപ്രവര്‍ത്തകനാണ്  

Be Sociable, Share!

• 

Tags: CPM, Election, jipson jacob, Onchiyam, TP Chandrasekharan, VS Achuthanandan, VS Sanoj