കേരളത്തിലെ സ്ഥിതി വേദനാജനകം: പട്നായിക്

Be Sociable, Share!

• 

പ്രഭാത് പട്നായിക് സിപിഎം ബുദ്ധിജീവി ആയതിനാല്‍ അദ്ദേഹത്തെ ചിന്ത രവി അനുസ്മരണ പ്രഭാഷണത്തിന് ക്ഷണിക്കരുതെന്നും, അത്തരം ക്ഷണം സിപിഎം പോലൊരു ‘കൊലയാളികളുടെ പാര്‍ടിയെ’ ന്യായീകരിക്കുന്നതിനു തുല്യമാകുമെന്നും അഭിപ്രായപ്പെട്ട കെടി റാം മോഹന് പ്രൊഫസര്‍ പട്നായിക് അയച്ച മറുപടി കത്തിന്റെ മലയാള പരിഭാഷയാണ് ചുവടെ. ഈ കത്തിനെ ഉദ്ധരിച്ചുകൊണ്ട് തീര്‍ത്തും തെറ്റിദ്ധാരണ ജനകമായ ഒരു വാര്‍ത്ത ഇന്ത്യാവിഷന്‍ ജൂണ്‍ 17 രാവിലെ പ്രക്ഷേപണം ചെയ്തിരുന്നു. (ഇന്ത്യാ വിഷന്‍ വാര്‍ത്ത ഇവിടെ). പ്രൊഫസര്‍ പട്നായിക്കിന്റെ അനുമതിയോടു കൂടി കത്തിന്റെ പൂര്‍ണരൂപം ദില്ലിപോസ്റ്റ് പ്രസിദ്ധീകരിക്കുന്നു.–എഡിറ്റര്‍         

പ്രഭാത് പട്നായിക്

പ്രിയപ്പെട്ട റാം

കഴിഞ്ഞ 37 വര്‍ഷമായി ഞാന്‍ പാര്‍ടിയോടൊപ്പമുണ്ട്. അടിയന്തിരാവസ്ഥയുടെ ആരംഭകാലത്താണ് പാര്‍ടിയില്‍ പ്രവേശിക്കുന്നത്. സ്വാതന്ത്ര്യ സമരസേനാനിയും ആദ്യകാല കമ്യൂണിസ്റ്റുമായിരുന്ന എന്റെ അച്ഛന്‍ 1936ല്‍ ഓറീസയില്‍ കമ്യൂണിസ്റ്റു പാര്‍ടി സ്ഥാപിച്ചവരില്‍ ഒരാള്‍ കൂടിയായിരുന്നു. ചെറുപ്പം മുതലേ കമ്യൂണിസ്റ്റുകാര്‍ അനുഭവിച്ചിട്ടുള്ള ത്യാഗങ്ങളും, അധ്വാനിക്കുന്ന ജനങ്ങളുടെ ആവശ്യങ്ങളോട് അവര്‍ കാണിച്ചിട്ടുള്ള സമര്‍പണ മനോഭാവവും നേരിട്ടു കണ്ടു വളര്‍ന്നിട്ടുള്ള എനിക്ക് പാര്‍ടിയില്‍ ചേരുക എന്നത് വലിയ ആഗ്രഹമായിരുന്നു. 1975ലാണ് അതു നടക്കുന്നത്. അതേ കാരണം കൊണ്ടു തന്നെ കേരളത്തില്‍ കഴിഞ്ഞ ഏതാനും ദിവസങ്ങളില്‍ നടന്നു കൊണ്ടിരിക്കുന്ന സംഭവങ്ങള്‍ എനിക്കു കഠിനമായ മനോവേദനയ്ക്ക് കാരണമായിരുന്നു. എന്നെ സംബന്ധിച്ചിടത്തോളം അവ ഉയര്‍ത്തുന്ന പ്രശ്‌നങ്ങള്‍ ധാര്‍മ്മികം മാത്രമല്ല, അസ്‌തിത്വപരം കൂടിയാണ്.

ഇന്ന് ഇന്ത്യയിലെ കമ്യൂണിസം രണ്ടു വലിയ വെല്ലുവിളികള്‍ നേരിടുന്നുവെന്നാണ് എന്റെ അഭിപ്രായം. ഒരു ഭാഗത്ത് ബൂര്‍ഷ്വാ ലിബറലിസത്തിന്റെ മേല്‍ക്കോയ്മ, മറുഭാഗത്ത് ഫ്യൂഡല്‍-സ്റ്റാലിനിസത്തിന്റെ ശക്തമായിക്കൊണ്ടിരിക്കുന്ന പിടി. ഈ രണ്ടു പ്രശ്നങ്ങള്‍ക്കും പൊതുവായുള്ള ചില കാര്യങ്ങളുണ്ട്–സോഷ്യലിസത്തോടുള്ള വ്യംഗ്യമായ പ്രതിബദ്ധതാ കുറവ്, നവലിബറല്‍ വികസന അജന്‍ഡയോടുള്ള  വ്യംഗ്യമായ സ്വീകാര്യത, ജനശാക്തീകരണത്തോടുള്ള തിരസ്കാര മനോഭാവം.

ഇതില്‍ ഏതെങ്കിലും ഒന്നിനോടോ, അതോ രണ്ടു വെല്ലുവിളികളോടുമോ കീഴടങ്ങുന്നത് ദുരന്തത്തിലേക്കാണ് വഴിവയ്ക്കുക. അത് പൂര്‍ണമായും ജനങ്ങളുടെ താത്പര്യങ്ങള്‍ക്കെതിരുമായിരിക്കും. സോഷ്യലിസം അജന്‍ഡയിലേക്ക് തിരിച്ചുകൊണ്ടു വരണമെങ്കില്‍, സ്റ്റാലിനിസത്തില്‍ നിന്നും മുക്തമായ ഒരു ബദല്‍  മാര്‍ക്സിസം പ്രയോഗത്തില്‍ വരുത്തേണ്ടതുണ്ട്. ഈ വിഷയങ്ങള്‍ ചര്‍ച്ച ചെയ്യാനും, കേരളത്തിലും മറ്റിടങ്ങളിലും നാം നേരിടുന്ന ഫ്യൂഡല്‍-സ്റ്റാലിനിസ്റ്റ് രീതിയെ വിമര്‍ശിക്കാനുമുള്ള ഒരു അവസരം കൂടിയായാണ് ഞാന്‍ ചിന്ത രവി അനുസ്മരണ പ്രഭാഷണത്തെ കണ്ടിരുന്നത്. മാര്‍ക്സിസത്തില്‍ ഗൗരവമായ താത്പര്യമുള്ള ബുദ്ധിജീവികള്‍ പങ്കെടുക്കുന്ന ഒരു പരിപാടിയായിരിക്കും ആ അനുസ്മരണം എന്നതിനാലാണ് ഈ വിഷയങ്ങള്‍ അവിടെ ചര്‍ച്ച ചെയ്യാമെന്നു കരുതിയതും. അത്തരത്തിലുള്ള സംഘങ്ങളുമായി ഇടപഴകാന്‍ എനിക്കെപ്പോഴും അവസരം കിട്ടാറുമില്ല.

ഒരു അവസാന കാര്യം കൂടി. കേരളത്തിലെ കഴിഞ്ഞ ഇടതുപക്ഷ സര്‍ക്കാരിന്റെ കാലത്ത് ഞാന്‍ ഒരു ഔദ്യോഗിക സ്ഥാനം ഏറ്റെടുത്തത് (പ്ലാനിംഗ് ബോര്‍ഡ് ഉപാധ്യക്ഷന്‍) പാര്‍ടിയുടെ ഏതെങ്കിലും തീരുമാനപ്രകാരമായിരുന്നില്ല. സഖാവ് വിഎസ് അച്യുതാനന്ദന്റെ വ്യക്തിപരമായ അഭ്യര്‍ത്ഥനയെ തുടര്‍ന്നായിരുന്നു. എന്റെ മിക്കവാറും സുഹൃത്തുക്കള്‍, പാര്‍ടിക്കുള്ളിലുള്ളവരുള്‍പെടെ, ആ തീരുമാനത്തിനെതിരായാണ് എനിക്കുപദേശം നല്‍കിയത്. എന്നിരുന്നാലും, ആ സ്ഥാനം ഞാന്‍ ഏറ്റെടുക്കുകയായിരുന്നു. അതില്‍ ഇതുവരെ ദുഖിച്ചിട്ടുമില്ല.

ആശംസകളോടെ
പ്രഭാത് പട്നായിക് 

വ്യംഗ്യമായ

Be Sociable, Share!

• 

Tags: CPIM, Marxism, Prabhat Patnaik, Stalinism