കോന്‍ ബനേഗാ രാഷ്ട്രപതി?

Be Sociable, Share!

• 

1969ല്‍ പ്രധാന മന്ത്രി ഇന്ദിരാ ഗാന്ധിയും കാമരാജിന്റെ ഔദ്യോഗിക കോണ്‍ഗ്രസ് നേതൃത്വവും തമ്മിലുള്ള മല്‍‌പിടുത്തത്തിനിടയില്‍ നടന്ന പ്രസിഡന്റു തെരഞ്ഞെടുപ്പിനു ശേഷം ഒരു പക്ഷേ ഏറ്റവും പ്രമാദമായ രാഷ്ട്രപതി തെരഞ്ഞെടുപ്പാണ് വരുന്ന ജൂലൈ 19ന് നടക്കാനിരിക്കുന്നത്. ഔദ്യോഗിക കോണ്‍ഗ്രസിന്റെ പിന്തുണയുണ്ടായിട്ടും നീലം സഞീവ റെഡ്ഡിയെ തോത്പിച്ച് പ്രസിഡന്റാവാന്‍ ഇന്ദിരാ ഗാന്ധിയുടെ സഹായിയായിരുന്ന വിവി ഗിരിക്ക് 1969ല്‍ സാധിച്ചു. ഇന്ന് സഖ്യകക്ഷിയായ മമതാ ബാനര്‍ജിയുടെ എതിര്‍പ്പിനെ മറികടന്നു കൊണ്ട് സ്വന്തം സ്ഥാനാര്‍ത്ഥിയായ പ്രണബ് മുഖര്‍ജിയെ ജയിപ്പിച്ചെടുക്കാന്‍ സോണിയാ ഗാന്ധിക്കു കഴിയുമോ എന്നതാണ് ചോദ്യം. പ്രണബിനെ പിന്തുണയ്ക്കില്ലെന്ന് മമത വ്യക്തമാക്കിയിട്ടുണ്ട്. സോണിയയുമായി ഈ വിഷയത്തില്‍ ചര്‍ച്ച നടത്തിയതിനു ശേഷം, കോണ്‍ഗ്രസിന്റെ സ്ഥാനാര്‍ത്ഥി പ്രണബ് മുഖര്‍ജി ആണെന്ന വിവരം വെളിയില്‍ വിടുന്നതും മമതയാണ്. പകരം മന്‍‌മോഹന്‍ സിംഗിനെ സ്ഥാനാര്‍ത്ഥിയാക്കണം എന്ന മമതയുടെ ആവശ്യം കോണ്‍ഗ്രസിനേയും പ്രധാനമന്ത്രിയേയും അപമാനിക്കാനുദ്ദേശിച്ചുള്ളതായിരുന്നു താനും.

മമതയുടെ എതിര്‍പ്പിനെ അവഗണിച്ചു കൊണ്ടും സ്വന്തം ലിസ്റ്റുമായി മുന്നോട്ടു പോകും എന്ന സൂചനയാണ് കോണ്‍ഗ്രസ് ഇതുവരെ നല്‍കിയിരിക്കുന്നത്. ഔദ്യോഗിക പ്രഖ്യാപനം മേയ് 15ന് കൂടാനിരിക്കുന്ന യുപിഎ യോഗത്തിനു ശേഷമുണ്ടാകും. യോഗത്തില്‍ മമത പങ്കെടുക്കാന്‍ സാധ്യതയില്ല. സ്വന്തം സ്ഥാനാര്‍ത്ഥിയെ ജയിപ്പിച്ചെടുക്കണമെങ്കില്‍ കോണ്‍ഗ്രസിന് മുലായത്തിന്റേയും മമതയുടേയും പിന്തുണ വേണം. സ്ഥാനാര്‍ത്ഥി പ്രണബ് മുഖര്‍ജിയാണെങ്കിലും മുലായം പിന്തുണയ്ക്കുമെന്ന് കോണ്‍ഗ്രസ് നേതാക്കള്‍ പറയുന്നു. പക്ഷേ, മമത പ്രണബിനെ പിന്തുണയ്ക്കാന്‍ യാതൊരു സാധ്യതയുമില്ല. ബിജെപി മുന്‍ പ്രസിഡന്റ് എപിജെ അബ്ദുള്‍ കലാമിനെ സ്ഥാനാര്‍ത്ഥിയാക്കുകയും, മമത പിന്തുണയ്ക്കുകയും ചെയ്താല്‍ മത്സരം മുറുകും. ഇപ്പോഴത്തെ സാഹചര്യത്തില്‍ ജയലളിതയും, ഒറീസയിലെ നവീന്‍ പട്‌നായിക്കും ബിജെപി സ്ഥാനാര്‍ത്ഥിയെ പിന്തുണച്ചേക്കാം. അതു, വരുന്ന പൊതുതെരഞ്ഞെടുപ്പിനു മുന്നേയുള്ള ഒരു വിശാല യുപിഎ-വിരുദ്ധ മുന്നണിയുടെ രൂപീകരണത്തിന്റെ ആദ്യ പടിയായേക്കാം. മമത മന്‍‌മോഹന്‍ സിംഗ് സര്‍ക്കാരിനുള്ള പിന്തുണ പിന്‍വലിക്കുകയും ചെയ്തേക്കാം.

ഇടതുപക്ഷത്തിന്റെ മൗനമാണ് മറ്റൊരു പ്രധാനപ്പെട്ട ഘടകം. കോണ്‍ഗ്രസ് സ്ഥാനാര്‍ത്ഥിയെ പിന്തുണയ്ക്കില്ലെന്നു പറഞ്ഞിട്ടുണ്ടെങ്കിലും പുതിയതായി രൂപപ്പെട്ടു വരുന്ന രാഷ്ട്രീയ സാഹചര്യങ്ങള്‍ക്കനുസരിച്ച് എന്തു തീരുമാനമെടുക്കും എന്നതാണ് ശ്രദ്ധിക്കേണ്ടത്. ഉദാഹരണത്തിന്, ഒരുഭാഗത്ത് യുപിഎയും, മറുഭാഗത്ത് ത്രിണമൂല്‍ കോണ്‍ഗ്രസടക്കമുള്ള പാര്‍ടികള്‍ എന്‍ഡിഎ സ്ഥാനാര്‍ത്ഥിക്ക് അനുകൂലമായും നിലയുറപ്പിച്ചാല്‍ ഇടതുപക്ഷത്തിന്റെ നിലപാട് അതീവ നിര്‍ണായകമായിരിക്കും. ഒരു മൂന്നാം സ്ഥാനാര്‍ത്ഥിയെ നിര്‍ത്താനുള്ള സാധ്യത വിരളമാണ്. അത്തരമൊരു സൂചനയൊന്നും ഇതുവരെ ഇടതുപാര്‍ടികള്‍ നല്‍കിയിട്ടില്ല. ബിജെപി, കോണ്‍ഗ്രസിതര പാര്‍ടികളെ അണിനിരത്താനുള്ള ഒരവസരമാണ് പ്രസിഡന്റ് തെരഞ്ഞെടുപ്പെന്നിരിക്കലും, ആ വഴിക്കുള്ള രാഷ്ട്രീയ നീക്കമൊന്നും നടത്താനുള്ള ശ്രമം ഇടതുപാര്‍ടികള്‍ കൈക്കൊണ്ടിട്ടില്ല എന്നതും ശ്രദ്ധേയമാണ്. പ്രണബ് മുഖര്‍ജി മേയ് 14ന് മുന്‍ പശ്ചിമ ബംഗാള്‍ മുഖ്യമന്ത്രിയും സിപിഎം പോളിറ്റ്ബ്യൂറോ അംഗവുമായ ബുദ്ധദേവ് ബട്ടാചര്‍ജിയുമായി ചര്‍ച്ച നടത്തി എന്നു റിപോര്‍ട്ടുകളുണ്ട്. മമതയെ ഒതുക്കാന്‍ ഇടതുപക്ഷം യുപിഎ സ്ഥാനാര്‍ത്ഥിയെ പിന്തുണയ്ക്കുമോ?

അതായത്, ഈ വര്‍ഷത്തെ രാഷ്ട്രപതി തെരഞ്ഞെടുപ്പ് വെറും രാഷ്ട്രപതി തെരഞ്ഞെടുപ്പ് മാത്രമല്ലെന്നു സാരം. രണ്ടു വര്‍ഷത്തിനുള്ളില്‍ നടക്കാനിരിക്കുന്ന പൊതുതെരഞ്ഞെടുപ്പിനു മുന്നോടിയായി നിര്‍ണായകമായ പല രാഷ്ട്രീയഗതിമാറ്റങ്ങളുടേയും സൂചന വരുന്ന രണ്ടാഴ്ചയ്ക്കുളില്‍ ലഭിക്കും. വീട്ടില്‍ ആരു വന്നാലും കോഴിക്കു കിടക്കപ്പൊറുതിയില്ലെന്നു പറയുന്ന പോലെ രാഷ്ട്രപതി ആരായാലും വരുന്ന ദിനങ്ങള്‍ കോണ്‍ഗ്രസിനു കുശാലാണ്. സര്‍ക്കാരിനെ രക്ഷിക്കാനും, യുപിഎ ശിഥിലീകരണത്തിനു തടയിടാനുമായി കോണ്‍ഗ്രസ് പാടുപെടും.

–വര: സജിത് കുമാര്‍ 

Be Sociable, Share!

• 

Tags: Congress, CPM, Daily Edit, mamata banerjee, Pranab Mukherjee, Presidential election, Sajith Kumar, UPA