സ്വപ്നം

Be Sociable, Share!

• 

രാത്രിയുടെ രണ്ടോ, മൂന്നോ, നാലോ യാമാങ്ങളിലാവില്ല
പകലിന്റെ നിസംഗ്ഗമായ ഇടവേളകളിലല്ല
രാത്രിയുടെയോ പകലിന്റെയോ തിരിച്ചറിവുകളില്ലാത്ത
ഏതോ ഭ്രാന്തന്‍ യാമങ്ങളിലായിരുന്നു
തുടക്കം

ഇല്ലായിരുന്നു, എന്റെ സ്വപ്നത്തിനു ചിറകുകള്‍
ഇല്ലായിരുന്നിതളുകള്‍, നിറം‌, മണം‌
എങ്കിലും, നിശബ്ദതയുടെ ആകാശത്ത്
ചിറകുകളില്ലാതെ അതു പറന്നു നിന്നിരുന്നു
വരണ്ട ഭൂമിയുടെ മാറില്‍ പൂത്തുലഞ്ഞിരുന്നു
നിറമായ് മധുരമായ് ആത്മാവിന്‍ സുഗന്ധമായ്
എന്നുണ്മയില്‍ കത്തിപ്പടര്‍ന്നിരുന്നു

ഇരുളിനും വെളിച്ചത്തിനും സ്വബോധം നഷ്ടപ്പെട്ട
ഏതോ ഭ്രാന്തന്‍ യാമങ്ങളില്‍, പക്ഷെ, എനിക്കതു
കളഞ്ഞുപോയി; വെളുത്ത ആകാശത്തിന്റെ
നിശബ്ദതയില്‍, വീണു ചിതറി കിടക്കുന്ന,
കറുത്ത തേങ്ങലായി മാറിയെന്‍ സ്വപ്നം.
ആ തേങ്ങലുകളെ കൈവെള്ളയില്‍
വാരിയെടുത്ത്, കണ്ണുകളിലുമ്മ പാകി
കവിളുകളില്‍ തലോടി,
നിധി തേടി പോയ ഭ്രാന്തന്‍ ആട്ടിടയന്റെ
കഥ പറഞ്ഞു, നിലാവുള്ള രാത്രികളില്‍ മുലപ്പാല്‍
നല്‍കി ഉറക്കിക്കിടത്തി ഞാന്‍

എന്റെ കുഞ്ഞു വളരുകയാണ്
വാ വോ വാ വാ വോ

– ഷെറിന്‍ മോള്‍ തോമസ്‌
ഗവേഷണ വിദ്യാര്‍ത്ഥി, ഹൈദരാബാദ് സര്‍വ്വകലാശാല

Be Sociable, Share!

•