പത്രാധിപരുടെ പോക്രിത്തരം

Be Sociable, Share!

• 

ആറേഴു കൊല്ലം മുന്‍പ്, ചെറുകഥാകൃത്ത് ഐസക്‍ ഈപ്പന്‍ സക്കറിയയുടെ ‘എന്തുണ്ട് വിഃശഷം പീലാത്തൊസെ’ എന്ന ചെറു നോവല്‍ അനാറ്റോളെ ഫ്രാന്‍സിന്റെ ഏതോ കഥയുടെ മോഷണമാണെന്ന് ‘മാധ്യമം’ ആഴ്ചപ്പതിപ്പില്‍ എഴുതിയിരുന്നു. ഇതു അന്നു വലിയ സാഹിത്യ വിവാദമാവുകയും പല നിരൂപകരും അഭിപ്രയം പറയുകയും ചെയ്തു. ഈ വിവാദത്തെ കുറിചു അന്ന് എം കൃഷ്ണന്‍ നായര്‍ ‘സമകാലിക മലയാളം വാരിക’യിലെ സാഹിത്യ വാരഫലം കോളത്തില്‍ എഴുതിയതു അനാറ്റോളെ ഫ്രാന്സ് എന്നല്ല അന അറ്റോളേ ഫ്രാങ്സ് എന്നാണു എഴുത്തുകരന്റെ പേരിന്റെ യഥാര്‍ഥ ഉച്ചാരണമെന്നും ഐസക്‍ ഈപ്പനു ഉച്ചാരണമറിയില്ലെന്നുമാണ്. അതിനെ പറ്റി ഈപ്പന്‍ മറുപടി പറഞതിങ്ങനെ: “എല്ലാവരും നെല്ലുണക്കുന്നു. കുരങ്ങന്‍ മാത്രം വാലുണക്കുന്നു”.

ദോഷം പറയരുതല്ലോ, ‘ദേശാഭിമാനി’ റസിഡന്റ് എഡിറ്ററും, കവിയുമായ പ്രഭാ വര്‍മയുടെ ‘ശ്യാമമാധവം’ എന്ന കാവ്യാഖ്യായികയുടെ പ്രസിദ്ധീകരണം നിര്‍ത്താനുള്ള മലയാളം പത്രാധിപര്‍ എസ് ജയചന്ദ്രന്‍ നായരുടെ തീരുമാനത്തെ കുറിച്ച് കേട്ടപ്പോള്‍ ആദ്യം ഓര്‍മയിലേക്കു വന്നത് ഐസക് ഈപ്പന്റെ മറുപടിയാണ്. മുഖ്യധാരാ മാധ്യമങ്ങളും, വലതുപക്ഷവും, പാര്‍ടി വിട്ടു പോയ ബുദ്ധിജീവികളുമെല്ലാം ചേര്‍ന്ന് ഒരേ സ്വരത്തില്‍ കേരളത്തിലെ സംഘടിത ഇടതുപക്ഷത്തെയാകെ ആക്രമിക്കുന്ന ഒരു സമയത്ത് തങ്ങളാലാവുന്നത് മലയാളം വാരികയും ചെയ്യുന്നു. അതിന്നപ്പുറത്തേക്ക് പത്രാധിപരുടെ തീരുമാനത്തിന്റെ യുക്തി എന്താണെന്ന് എത്ര ചിന്തിച്ചിട്ടും പിടികിട്ടിയില്ല.

‘വാക്കിന്റെ സദാചാരം കൊണ്ട് കൊലപാതകത്തെ ന്യായീകരിച്ച പ്രഭാവര്‍മയുടെ കവിത പ്രസിദ്ധീകരിക്കുന്നത് മലയാളം വാരിക നിര്‍ത്തിവയ്ക്കുന്നതായി പത്രാധിപര്‍ എസ് ജയചന്ദ്രന്‍ നായര്‍ അറിയിച്ചു’ എന്ന റ്റെലിവിഷന്‍ സ്ക്രോള്‍ കണ്ടപ്പോള്‍ ആദ്യമുണ്ടായത് ആശയക്കുഴപ്പമായിരുന്നു. സമീപകാലത്തൊന്നും മലയാളം വാരിക വായിക്കാനിട വന്നിട്ടില്ല. അതുകൊണ്ട് ‘ശ്യാമമാധവം’ ഖണ്ഡങ്ങളായി വാരികയില്‍ പ്രസിദ്ധീകരിച്ചു വരികയായിരുന്നു എന്നും അറിയുമായിരുന്നില്ല. വാര്‍ത്ത കണ്ടപ്പോള്‍ ആദ്യം കരുതിയത് ഒരു കവിത പത്രാധിപര്‍ തിരസ്കരിച്ചു എന്നാണ്. ഒരു കൃതി പ്രസിദ്ധീകരിക്കണമോ, വേണ്ടയോ എന്നു തീരുമാനിക്കേണ്ട അധികാരം പ്രത്രാധിപര്‍ക്കു തന്നെ; പക്ഷേ ഒരു കവിതയുടെ തിരസ്കാരം വാര്‍ത്താക്കുറിപ്പും, പിന്നീട് വാര്‍ത്തയുമാകുന്നതെങ്ങിനെ എന്നായിരുന്നു ആദ്യസംശയം.

പിന്നീടാണ് ‘ശ്യാമമാധവം’ കഴിഞ്ഞ ഏതാനും ലക്കങ്ങളായി വാരികയില്‍ പ്രസിദ്ധീകരിച്ചു വരികയാണെന്നും അതിന്റെ തുടര്‍ പ്രസിദ്ധീകരണമാണ് പത്രാധിപര്‍ ഇടപെട്ട് നിര്‍ത്തി വച്ചതെന്നും മനസിലായത്. പക്ഷേ, അപ്പോഴും ചിത്രം പൂര്‍ത്തിയായിരുന്നില്ല. ഈയുള്ളവന്‍ കരുതിയത്, മലയാളത്തിലേക്കയച്ചു കൊടുത്ത കവിതയില്‍ കൊലപാതകത്തെ ന്യായീകരിച്ചതു കൊണ്ട് അതിന്റെ പ്രസിദ്ധീകരണം തടയപ്പെട്ടുവെന്നാണ്. പക്ഷേ, കഴിഞ്ഞ ഏതാനും ആഴ്ചകളായി ഖണ്ഡശ പ്രസിദ്ധീകരിക്കപ്പെട്ടു വരുന്ന കവിതാഖ്യായികയുടെ ഒരു ലക്കത്തില്‍ പെട്ടെന്ന് ഈയടുത്തു നടന്ന കൊലപാതകത്തെ പറ്റി പരാമര്‍ശം വരുന്നതെങ്ങിനെ എന്നായി അടൂത്ത സംശയം. പിന്നേയും സമയമെടുത്താണ് കാര്യം പൂര്‍ണമായും മനസിലാക്കുന്നത. ദേശാഭിമാനിയില്‍ എഴുതിയ ഒരു ലേഖനത്തില്‍ പ്രഭാ വര്‍മ ‘വാക്കിന്റെ സദാചാരം’ കൊണ്ട് സഖാവ് ടിപി ചന്ദ്രശേഖരന്റെ കൊലപാതകത്തെ ന്യായീകരിക്കുന്നുവെന്നും, അതിനാല്‍ അദ്ദേഹത്തിന്റെ കവിതയുടെ തുടര്‍പ്രസിദ്ധീകരണം, ടിപിയുടെ മരണവുമായി കവിതയുടെ വിഷയത്തിന് യാതൊരു ബന്ധവുമില്ലെങ്കില്‍ കൂടി, മലയാളം വാരിക നിര്‍ത്തി വയ്ക്കുന്നുവെന്നുമാണ് പത്രാധിപര്‍ അറിയിച്ചത്. കൂട്ടത്തില്‍ ‘ഇത്രയെങ്കിലും ചെയ്തില്ലെങ്കില്‍ താന്‍ സ്വയം ഇല്ലാതാവും’ എന്നൊരു ഏറ്റുപറച്ചില്‍ കൂടിയുണ്ട്, പത്രാധിപരുടെ വക. സംഗതി എന്തായാലും ഏറ്റു. “ധീരമായ നിലപാട്” എടുത്ത പത്രാധിപര്‍ അര്‍ധരാത്രി കൊണ്ട് ‘അഭിനവ ചുല്യാറ്റായി’ മാറി. സിപിഎമ്മിന്റെ ‘ഫാഷിസത്തിനെതിരെ’ പ്രതികരിച്ച ധീരോദാത്തനായ ജയചന്ദ്രന്‍ നായരെ പുകഴ്ത്താന്‍ ആര്‍എസ്എസുകാര്‍ മുതല്‍ ഉത്തരാധുനിക ബുദ്ധിജീവികള്‍ വരെ മത്സരിച്ചു. അങ്ങിനെ, ജയചന്ദ്രന്‍ നായര്‍ക്കായത് ജയചന്ദ്രന്‍ നായരും ചെയ്തു.

ഇനി കാര്യത്തിലേക്കു വരാം. ജയചന്ദ്രന്‍ നായരുടെ തീരുമാനം ശുദ്ധപോക്രിത്തരമാണെന്നു പറയാതെ വയ്യ. ഒരു കവി മറ്റൊരു മാധ്യമത്തില്‍ എഴുതിയ ലേഖനം ഒരു പത്രാധിപര്‍ക്കിഷ്ടപ്പെട്ടില്ല എന്ന കാരണത്താല്‍ അയാളുടെ കവിത ഇനി താന്റെ വാരികയില്‍ പ്രസിദ്ധീകരിക്കേണ്ടതില്ല എന്ന തീരുമാനിക്കുന്ന പത്രാധിപരല്ലേ ഇവിടെ അസഹിഷ്ണു. കുറ്റപത്രം പോലും തെയ്യാറായിട്ടില്ലാത്ത ഒരു കൊലപാതക കേസില്‍ കൊലയാളികള്‍ ആരാണെന്നു പത്രാധിപര്‍ക്കു ബോധ്യമുണ്ടാകുകയും, ആ ബോധ്യം പങ്കിടാത്തവരാരും ഇനി തന്റെ പത്രത്തില്‍ എഴുതേണ്ടതില്ല എന്നു കല്പിക്കുകയും ചെയ്യുന്ന പത്രാധിപത്യത്തിന്റെ ധാര്‍ഷ്ട്യം ജനാധിപത്യത്തിന്റേയും, മാധ്യമധര്‍മത്തിന്റേയും ഏതു അളവു വച്ചാണ് നാം തൂക്കി നോക്കേണ്ടത്? അതോ അടി കിട്ടിയത് ദേശാഭിമാനിക്കാരനായതു കൊണ്ട് ജനാധിപത്യ ബോധത്തിന് അല്പം അവധി കൊടുക്കാമെന്നാണോ?

കൊലപാതകത്തെ ന്യായീകരിച്ചു എന്ന് ജയചന്ദ്രന്‍ നായര്‍ ആരോപിക്കുന്ന പ്രഭാ വര്‍മയുടെ ലേഖനം വര്‍ക്കേഴ്സ് ഫോറം ബ്ലോഗ് പുനപ്രസിദ്ധീകരിച്ചത് ഇവിടെ വായിക്കാം. പ്രസ്തുത ലേഖനം ഒരു കൊലപാതകത്തേയും ന്യായീകരിക്കുന്നില്ലെന്ന് മനസിലാക്കാന്‍ ആരും പത്രാധിപരാവേണ്ട കാര്യമൊന്നുമില്ല. പിണറായി വിജയന്റെ ‘കുലംകുത്തി’ പ്രയോഗത്തെ കുറിച്ച് ഉയര്‍ന്ന വിമര്‍ശനങ്ങളേ തന്റേതായ നിലപാടില്‍ നിന്നുകൊണ്ട് പരിശോധിക്കുകയാണ് പ്രഭാ വര്‍മ ചെയ്യുന്നത്. ഇതത്ര വലിയ അപരാധമാകുന്നതെങ്ങിനെ? പിണറായി വിജയനേയും, പ്രഭാ വര്‍മയേയുമെന്നല്ല ആരേയും വിമര്‍ശിക്കാനുള്ള അവകാശം ഇന്ത്യാ മഹാരാജ്യത്ത് ആര്‍ക്കുമുണ്ട്. (കുലംകുത്തി പ്രയോഗത്തെ കുറിച്ച് പ്രഭാവര്‍മയുടേതില്‍ നിന്നും വ്യത്യസ്തമായ അഭിപ്രായം സി ബഷീര്‍ അഹമ്മദ് ദില്ലിപോസ്റ്റിലെഴുതിയത് ഇവിടെ കാണുക). ജയചന്ദ്രന്‍ നായര്‍ക്കും വിയോജിക്കാം. പ്രഭാ വര്‍മയുടെ ലേഖനം വന്ന ദേശാഭിമാനിയിലേക്ക് വിയോജിപ്പു രേഖപ്പെടുത്തി കൊണ്ട് അദ്ദേഹത്തിനു കത്തയയ്ക്കാമായിരുന്നു. മലയാളം വാരികയില്‍ കത്തു പ്രസിദ്ധീകരിക്കാമായിരുന്നു. ഇനി അതുമല്ലെങ്കില്‍ മുഖപ്രസംഗം വരെ എഴുതാമായിരുന്നു. എസ് ജയചന്ദ്രന്‍ നായരെ പോലൊരാള്‍ക്ക് എതിര്‍പ്പ് രേഖപ്പെടുത്താനാണോ അവസരങ്ങളില്ലാത്തത്!

പക്ഷേ, പത്രാധിപര്‍ക്ക് അതൊന്നും പോരാ. കവിയുടെ കഴുത്തിനു തന്നെ കുത്തിപ്പിടിക്കണം. കവിതയുടെ പ്രസിദ്ധീകരണം തടയണം. അതും കവി കൊലപാതകത്തെ മറ്റൊരു മാധ്യമത്തില്‍ ന്യായീകരിച്ചു എന്ന കള്ളം പറഞ്ഞു കൊണ്ട്. ഇതിലെ കാപട്യത്തേയും കറുത്ത സെന്‍സറിംഗിനേയും എങ്ങിനെയാണ് കണ്ടില്ലെന്നു നടിക്കാനാകുക? കൊലപാതകത്തെ പ്രഭാ വര്‍മ ന്യായീകരിച്ചു എന്നതാണ് കവിത നിര്‍ത്താനുള്ള പ്രധാന കാരണമായി ജയചന്ദ്രന്‍ നായര്‍ ഉയര്‍ത്തി കാണിക്കുന്നത്. പക്ഷേ, പ്രഭാ വര്‍മയുടെ ലേഖനം അങ്ങിനെ ചെയ്യുന്നില്ല. വേണമെങ്കില്‍ പ്രഭാ വര്‍മ പിണറായി വിജയനെ കുലംകുത്തി വിവാദത്തിന്റെ പശ്ചാത്തലത്തില്‍ അനുകൂലിക്കുകയാണ് എന്നു പറയാം. അപ്പോള്‍ അതാണോ ജയചന്ദ്രന്‍ നായരുടെ പ്രശ്നം? പിണറായി വിജയനെ അനുകൂലിച്ചാല്‍ അതിനര്‍ത്ഥം ‘കൊലപാതകങ്ങളെ അനുകൂലിക്കുന്നുവെന്നാണോ’? അതോ പിണറായി വിജയനെയോ, സിപിഎമ്മിനേയോ എവിടെയെങ്കിലും, ഏതെങ്കിലും രീതിയില്‍ അനുകൂലിക്കുന്നവര്‍ എഴുതുന്നത് ഒരുകാലത്തും മലയാളം വാരികയില്‍ പ്രസിദ്ധീകരിക്കില്ലെന്നാണോ? ഇതാണോ അഭിനവ ചുല്യാറ്റിസം? സാമാന്യ ബുദ്ധി വച്ചു ചിന്തിക്കുമ്പോള്‍ തോന്നുന്നത് ഇതു പോക്രിത്തരമാണെന്നാണ്. ഇത്തരം പോക്രിത്തരങ്ങളെ ഊട്ടിവളര്‍ത്തുന്നത് അന്ധമായ ഇടതുപക്ഷ വിരുദ്ധതയാണെന്നതും കാണാതിരിക്കാനാവില്ല.

ജയചന്ദ്രന്‍ നായരേയും, മലയാളം വാരികയേയും അറിയാവുന്നവര്‍ക്ക് ഇതില്‍ അത്ഭുതപ്പെടാനൊന്നുമില്ല. ആദര്‍ശ ഇടതുപക്ഷത്തിന്റെ മേമ്പൊടി വേണ്ടുവോളം ചേര്‍ത്ത് സംഘടിത ഇടതുപക്ഷത്തെ ആക്രമിക്കാന്‍ കിട്ടുന്ന ഒരവസരവും ഈ വാരിക പാഴാക്കാറില്ല. ഇതിന്റെ ഏറ്റവും നല്ല ഉദാഹരണമായിരുന്നു കഴിഞ്ഞ സംസ്ഥാന തെരഞ്ഞെടുപ്പു കാലത്തിറങ്ങിയ ലക്കങ്ങള്‍. 2011 ഏപ്രില്‍ 8ന്റെ തെരഞ്ഞെടുപ്പു പ്രത്യേക പതിപ്പിനു ജയചന്ദ്രന്‍ നായരെഴുതിയ മുഖപ്രസംഗം മാത്രം വായിച്ചാല്‍ മതിയാകും അദ്ദേഹത്തിന്റെ രാഷ്ട്രീയം എന്താണെന്നു പിടികിട്ടാന്‍. മുഖ്യധാരാ മാധ്യമങ്ങള്‍ പോലും ഒരു പക്ഷേ നിക്ഷ്പക്ഷത അഭിനയിച്ചേക്കാവുന്ന ഒരു നിര്‍ണായ തെരഞ്ഞെടുപ്പു സമയത്ത്, വാരികയുടെ പ്രത്യേക പതിപ്പിന്റെ മുഖപ്രസംഗം മുഴുവനും സിപിഎമ്മിനെതിരെയുള്ള ആദര്‍ശ പ്രസംഗമാണ്. തെരഞ്ഞെടുപ്പിനും മുന്‍പേ, ഇടതുപക്ഷത്തിന്റെ പരാജയം പ്രവചിച്ച്, “കാലം അതിന്റെ കര്‍മം നിര്‍‌വഹിക്കുന്നു” എന്നു വാചാലനായ പത്രാധിപരില്‍ നിന്ന് ഇതില്‍ കൂടുതലെന്തെങ്കിലുമൊക്കെ പ്രതീക്ഷിക്കേണ്ടതുണ്ടോ?

അടിക്കുറുപ്പ്: ജോഷി സംവിധാനം ചെയ്ത ‘ലേലം’ എന്ന ചിത്രത്തില്‍ കള്ളുക്കച്ചവടക്കാരെ അനുരഞ്ജന സംഭാഷണത്തിനായി വിളിക്കുന്ന മെത്രാനച്ചനോട് (ജഗനാഥവര്‍മ) ആനക്കാട്ടില്‍ ഈപ്പച്ചന്‍ (സോമന്‍) പറയുന്ന ഡയലോഗ് ഏതാണ്ടിങ്ങനെയാണ്. “ഒറ്റപ്ലാമൂട്ടില്‍ ശോശ. അതായത് ഈ നില്‍ക്കുന്ന കുന്നേല്‍ ഔതക്കുട്ടിയുടെ കെട്ട്യോള്‍ടെ തള്ള. തിരുമേനി ഈ കുപ്പായമിട്ടുപോയെങ്കിലും അവരിപ്പോളും അവിടുത്തെ കൂടെപ്പിറന്ന പെങ്ങളു തന്ന്യാ അല്യോ..?” അതുപോലെ ജയചന്ദ്രന്‍ നായര്‍ പത്രാധിപിക്കുന്ന മലയാളം വാരിക ഇപ്പോഴും ഗോയെങ്ക കുടുംബം നിയന്ത്രിക്കുന്ന ന്യൂ ഇന്ത്യന്‍ എക്സ്പ്രസ് ഗ്രൂപ്പിന്റെ തന്ന്യാ അല്യോ എന്നാരെങ്കിലും തിരിച്ചു ചോദിക്കേണ്ടതായിരുന്നു.

Be Sociable, Share!

•