കുലവും, കുലപതിയും, പിന്നെ കുലംകുത്തികളും

Be Sociable, Share!

• 

സി ബഷീര്‍ അഹമ്മദ്

നിങ്ങള്‍ ഇത്തരം കാര്യങ്ങളില്‍ ഇടപെടരുത്, ഇതു ഞങ്ങളുടെകാര്യമാണ് എന്നു പറയുമ്പോള്‍ പാര്‍ടിയുടെ ജൈവഘടന, ജനാധിപത്യഘടന സങ്കോചിക്കുകയാണ്. പാര്‍ടി അതിന്റെ ഭരണഘടന മാത്രമായിത്തീരുകയാണ്. ആള്‍ അസ്ഥികൂടത്തിലേക്ക് ചുരുങ്ങുന്നത് പോലെയാണത്. പാര്‍ടി മിന്നാമിനുങ്ങിനെ ഊതുന്ന കുരങ്ങനല്ല. അത് ഭൗതികയാഥാര്‍ഥ്യം മറവു ചെയ്യുന്നതിനുള്ള സ്വര്‍ണപ്പാത്രവുമല്ല. പുറമേ എല്ലാം മനോഹരമാണ് എന്ന് സാക്ഷ്യപ്പെടുത്തലല്ല, അകമേയുള്ള ആശയസമരത്തിലൂടെ ജീവിക്കുകയാണ്പാര്‍ടിയുടെ ധര്‍മം. പാര്‍ടി നിലനില്‍ക്കുന്നത് പാര്‍ടിക്കു വേണ്ടിയല്ല. ജനങ്ങള്‍ക്കു വേണ്ടിയാണ്. പാര്‍ടിയെ രക്ഷിക്കലല്ല, ജനങ്ങളെ നിലനിര്‍ത്തുക എന്നതാണ് പാര്‍ടിയുടെ കടമ. ചോദ്യം ചോദിക്കുന്നത് അടഞ്ഞ വാതില്‍ തുറക്കാനാണ്. എപ്പോഴും ഉണര്‍ന്നിരിക്കുന്നു എന്ന് ഉറപ്പുവരുത്താനാണ്. എളുപ്പത്തില്‍ ഉത്തരം കിട്ടുവാന്‍ വേണ്ടിയല്ല.– എംഎന്‍ വിജയന്‍

Courtesy: Ouutlook

റെവലൂഷനറി മാര്‍ക്സിസ്റ്റ് പാര്‍ടി (ആര്‍എംപി) നേതാവ് ടിപി ചന്ദ്രശേഖരന്റെ ദാരുണമായ മരണം സിപിഎമ്മിനെ മുമ്പൊന്നുമുണ്ടായിട്ടില്ലാത്ത വന്‍ പ്രതിസന്ധിയിലേക്കാണ് കൊണ്ടു ചെന്നെത്തിച്ചിരിക്കുന്നത്. കേരളത്തില്‍ മുന്‍പും രാഷ്ട്രീയ കൊലപാതകങ്ങള്‍ നടന്നിട്ടുണ്ട്. പലതും സിപിഎമ്മിനെതിരെ ആരോപണങ്ങളായി ഉയര്‍ന്നിട്ടുമുണ്ട്. എന്നാല്‍ അന്നൊന്നും, പാര്‍ടി ഒരു പൊട്ടിത്തെറിയിലേക്ക് നീങ്ങിയിരുന്നില്ല. അന്നൊന്നും പാര്‍ടി നേതൃത്വത്തിന്റെ തീരുമാനങ്ങളേയും, വാക്കുകളേയും ഇന്നത്തെ പോലെ ജനം സംശയിച്ചിരുന്നില്ല. സിപിഎം ഇവിടെ നേരിടുന്ന ഏറ്റവും വലിയ വെല്ലുവിളി പാര്‍ടിയെ പ്രതിക്കൂട്ടില്‍ നിര്‍ത്തുന്നത് കേരളത്തിലെ വലതുപക്ഷം മാത്രമല്ലെന്നാണ്. രമേശ് ചെന്നിത്തലയും, തിര്വഞ്ചൂര്‍ രാധാകൃഷ്ണനും മറ്റുമാണ് ആരോപണങ്ങളുന്നയിക്കുന്നതെങ്കില്‍ അതിനെ എളുപ്പത്തില്‍ പ്രതിരോധിക്കാന്‍ പാര്‍ടിക്കാകുമായിരുന്നു. എന്നാല്‍ കാര്യങ്ങള്‍ അതീവ സങ്കീര്‍ണമാണ്.

ടിപിയുടെ ഭാര്യ രമയുള്‍പെടെ ഒഞ്ചിയത്തെ ആര്‍എംപി പ്രവര്‍ത്തകര്‍ ഉറച്ചു വിശ്വസിക്കുന്നു, കൊലയ്ക്കു പുറകില്‍ പാര്‍ടിയാണെന്ന്. സിപിഎം പ്രവര്‍ത്തകന്‍ കൂടിയായ രമയുടെ അച്ഛന്‍ മാധവന്‍ പറയുന്നു, കൊലപാതകത്തിനു സിപിഎമ്മിനെ സംശയിക്കുന്നതില്‍ തെറ്റില്ലെന്ന്. ഒഞ്ചിയത്തെ ജീവിക്കുന്ന രക്തസാക്ഷി പുറവില്‍ കണ്ണനും പാര്‍ടിയെ സംശയത്തിന്റെ നിഴലില്‍ നിര്‍ത്തുന്നു. ഇതു കൂടാതെ, ടിപിയുടെ വീട്ടിലേക്ക് സിപിഎം പ്രവര്‍ത്തകരുടെ ഒഴുക്കാണ് കഴിഞ്ഞ ഏതാനും ദിവസമായി നാം കണ്ടുകൊണ്ടിരിക്കുന്നത്. പലരും പാര്‍ടി വിടുന്നു. നേതൃത്വത്തെ പരസ്യമായി ധിക്കരിച്ചു കൊണ്ട് ടീപിക്കായി കോഴിക്കോട് ഒരു അനുശോചന യോഗം സംഘടിപ്പിക്കാനും സിപിഎം പ്രവര്‍ത്തകര്‍ക്കു പദ്ധതിയുണ്ട്.

ഒരു കമ്യൂണിസ്റ്റ് പാര്‍ടി എന്ന നിലയില്‍ ഇന്ന് സിപിഎം നേരിടുന്ന പ്രതിസന്ധിയുടെ ദാരുണമായ ചിത്രം ഈ സംഭവവികാസങ്ങളിലുണ്ട്. തെരുവില്‍ ചോദ്യം ചെയ്യപ്പെടുന്നത് പ്രസ്ഥാനത്തിന്റെ വിശ്വാസ്യതയാണ്. ചോദ്യം ചെയ്യുന്നവര്‍ ഇടതുപക്ഷത്തുള്ളവര്‍ തന്നെയാണ് എന്നത് ചോദ്യങ്ങളുടെ ഗൗരവം വര്‍ധിപ്പിക്കുന്നു. പാര്‍ടിക്കെതിരെ കടന്നാക്രമണത്തിന്റെ സൂചന ലഭിക്കുന്നുണ്ടെന്നാണ് സംസ്ഥാന സെക്രട്ടറി പിണറായി വിജയന്‍ പറയുന്നത്. ആരാണ് ആക്രമിക്കുന്നത് എന്നാണ് വിജയനോട് തിരിച്ചു ചോദിക്കേണ്ടത്. ബ്രിട്ടീഷ് പട്ടാളം മുതല്‍, ഇന്ത്യന്‍ സ്റ്റേറ്റും, ബൂര്‍ഷ്വാസിയും, നാടുവാഴികളും, എന്നുവേണ്ട രാജ്യത്തെ മത-ജാതി സ്ഥാപനങ്ങള്‍ വരെ വലതുപക്ഷത്തിന്റെ എല്ലാ ഏജന്‍സികളും കാലങ്ങളായി ഈ പാര്‍ടിയെ കടന്നാക്രമിച്ചിട്ടേയുള്ളൂ. അതുകൊണ്ട് സിപിഎമ്മിന് ‘കടന്നാക്രമണം’ പുത്തരിയല്ല. ഇത്തരം ആക്രമണങ്ങളെയൊക്കെ ചെറുത്തു കൊണ്ടാണ് മുപ്പത്തി രണ്ടു ആളുകളില്‍ നിന്നും പത്തു ലക്ഷം അംഗങ്ങളുള്ള ഒരു പാര്‍ടിയായി സിപിഎം വളര്‍ന്നതും. എന്നാല്‍ ഇന്ന് ആരുടെ കടന്നാക്രമണമാണ് വിജയന്‍ ഭയക്കുന്നത്?

വര്‍ഷങ്ങളായി സിപിഎമ്മില്‍ പുകഞ്ഞു കൊണ്ടിരിക്കുന്ന ചോദ്യങ്ങളെയും, സംശയങ്ങളേയും, ധിക്കാരങ്ങളേയും മറ്റും വെറും സംഘടനാ പ്രശ്നമെന്ന് ഇകഴ്ത്തിക്കാട്ടി ചോദിക്കുന്നവര്‍ക്കെതിരെ ലെനിനിസ്റ്റ് സദാചാരത്തിന്റെ ഖഡ്ഗം വീശലായിരുന്നു നേതൃത്വത്തിന്റെ നയം. എല്ലാ പ്രശ്നങ്ങള്‍ക്കുമുള്ള ഒരേയൊരു പരിഹാരം അച്ചടക്ക നടപടിയായിരുന്നു. പാര്‍ടിക്കുള്ളില്‍ നിന്നുകൊണ്ട് നേതൃത്വത്തെ ചോദ്യം ചെയ്തവര്‍ ശിക്ഷയര്‍ഹിക്കുന്ന വിഎസ് ഗ്രൂപ്പുകാരും, അഭിപ്രായ വ്യത്യാസങ്ങളെ തുടര്‍ന്ന് പാര്‍ടി വിട്ടു പോയവര്‍ പാര്‍ടി ശത്രുക്കളും എന്ന ദ്വന്ദബോധം വളരെ ശ്രദ്ധയോടെ നിര്‍മിച്ചെടുക്കുന്നതില്‍ നേതൃത്വം വിജയിച്ചിട്ടുമുണ്ട്. ഇന്ന് പാര്‍ടി നേതൃത്വത്തെ പിന്തുണച്ചു കൊണ്ട് മാധ്യമങ്ങളിലും, സോഷ്യല്‍ നെറ്റ്വര്‍കിംഗ് സൈറ്റുകളിലും മറ്റും വരുന്നവരേയും നയിക്കുന്നത് ഈ ദ്വന്ദബോധമാണെന്നു കാണാം. ഇതിനപ്പുറത്തേക്ക് സാധ്യതകളെ കാണാന്‍ ഇവര്‍ക്കു ശേഷിയില്ല. ഉദാഹരണത്തിന്, ടിപിയുടെ വധത്തിനു ഉത്തരവാദി വിഎസ് അച്യുതാനന്ദനാണെന്നു പറയുന്നവര്‍ വരെയുണ്ട്. ഇവരുടെ ബോധനിര്‍മിതിയനുസരിച്ച് സിപിഎം അടുത്ത കാലത്തു നേരിടുന്ന എല്ലാ പ്രശ്നങ്ങള്‍ക്കും ഉത്തരവാദി വിഎസാണ്. അല്ലെങ്കില്‍, കുറച്ചു കൂടി വിശാലമായ അര്‍ത്ഥത്തില്‍ വിഭാഗീയതയാണ്. വിഎസ് അച്യുതാനന്ദന്‍ വിഭാഗീയ പ്രവര്‍ത്തനം നടത്തിയതു കൊണ്ടാണ് ടിപിയും സംഘവും പാര്‍ടി വിട്ടു പോയത്. പാര്‍ടി വിട്ടു പോയതു കൊണ്ടാണ് ടിപി ഇപ്പോള്‍ കൊല്ലപ്പെട്ടിരിക്കുന്നത്. അപ്പോള്‍ ടിപിയുടെ മരണത്തിനു യഥാര്‍ത്ഥ ഉത്തരവാദി വിഎസാണ് എന്നതാണ് വാദം. പട്ടികള്‍ക്കു നാലു കാലുണ്ട്, പശുക്കള്‍ക്കും നാലു കാലുണ്ട്; അതുകൊണ്ട് പട്ടികളെല്ലാം പശുക്കളാണ് എന്ന ഫിലോസഫിക്കല്‍ യുക്തി ഈ വാദത്തിലുണ്ട്. എന്നാല്‍ ആ യുക്തി തന്നെയാണ് ഈ വാദക്കാരുടെ ഏറ്റവും വലിയ ദൗര്‍ബല്യവും.

അതായത്, നേതൃത്വത്തിന്റെ നിലപാടുകള്‍ മാത്രമാണ് ശരി. നേതൃത്വമാണ് പാര്‍ടി. നേതൃത്വത്തെ എതിര്‍ക്കുന്നവര്‍ പാര്‍ടിയെ എതിര്‍ക്കുന്നു. നേതൃത്വത്തെ വിമര്‍ശിക്കുന്നവര്‍ പാര്‍ടിയെ വിമര്‍ശിക്കുന്നു. അങ്ങിനെ വിമര്‍ശിക്കുന്നവര്‍ ഒന്നുകില്‍ വിഭാഗീയ പ്രവര്‍ത്തകരോ അല്ലെങ്കില്‍ ‘കുലംകുത്തി’കളോ ആയിരിക്കും. ഇതിനെയാണ് നാം സെക്ടേറിയനിസം എന്നു പറയുന്നത്. ഇതിനെയാണ് എംഎന്‍ വിജയന്‍ ആള്‍ അസ്ഥികൂടത്തിലേക്കു ചുരുങ്ങുന്നു എന്നു പറഞ്ഞത്. ഇവിടെയാണ് ‘ഞങ്ങളും’ ‘നിങ്ങളു’മുണ്ടാകുന്നത്. അങ്ങിനെയൊരു ബൈനറി സൃഷ്ടിക്കപ്പെട്ടു കഴിഞ്ഞാല്‍ പിന്നെ ഞങ്ങളെ കുറിച്ച് നിങ്ങള്‍ക്കൊന്നുമറിയില്ലെന്നു പറയാം.

അതായത്, സിപിഎം സംഘടനാ തലത്തില്‍ അതിന്റെ ചരിത്രത്തിലെ തന്നെ ഏറ്റവും രൂക്ഷമായ പ്രതിസന്ധി നേരിടുന്ന ഒരു സമയത്ത്, അതിനെ പരിഹരിച്ച് പാര്‍ടിയെ ശക്തമായി മുന്നോട്ടു നയിക്കാന്‍ ബാധ്യതപ്പെട്ട നേതൃത്വം കൂടുതല്‍, കൂടുതല്‍ സെക്റ്റേറിയനായി മാറുന്നതാണ് നാം കാണുന്നത്. ഇതാകട്ടെ സിപിഎമ്മിന്റെ പ്രതിസന്ധി കൂടൂതല്‍ രൂക്ഷമാക്കിയിട്ടേയുള്ളൂ. വിഎസിനോട് അടുത്ത് പ്രവര്‍ത്തിച്ചിരുന്ന തൃശൂര്‍ ജില്ലയില്‍ നിന്നുള്ള ഒരു പാര്‍ടി പ്രവര്‍ത്തകന്റെ അഭിപ്രായത്തില്‍ ഇത്രയും സെക്റ്റേറിയനായിട്ടുള്ള ഒരു നേതൃത്വം കേരളാ സിപിഎമ്മിന്റെ ചരിത്രത്തിലുണ്ടായിട്ടില്ല. അതാണ് കാര്യങ്ങള്‍ ഇത്രയും വഷളാക്കിയത്.

വിഭാഗീയതയ്ക്കു മറുപടി സെക്റ്റേറിയനിസമല്ല. പാര്‍ടി, പ്രതികാരത്തിനും കണക്കുവീട്ടലുകള്‍ക്കുമുള്ള പ്ലാറ്റ്ഫോമുമല്ല. നേതൃത്വം സെക്റ്റേറിയനായാല്‍ അണികള്‍ നേതൃത്വത്തില്‍ നിന്നും അകലുകയേ ഉള്ളൂ. അത്തരം ഒരു അകല്‍ചയെ ഭയക്കുമ്പോഴാണ് രാഷ്ട്രീയപരവും, പ്രത്യയശാസ്ത്രപരവുമായ കൂറിനു പകരം നേതൃത്വത്തിന് ഫ്യൂഡല്‍ കൂറ് അണികളില്‍ നിന്നും ആവശ്യപ്പെടേണ്ടി വരുന്നത്. അങ്ങിനെ ആവശ്യപ്പെടണമെങ്കില്‍ പാര്‍ടി പാര്‍ടിയല്ലാതായി മാറണം. പാര്‍ടി കുലമായി തീരണം. നേതാക്കള്‍ കുലപതികളും. അപ്പോള്‍ പാര്‍ടിയെ വിമര്‍ശിച്ചു പുറത്തു പോകുന്നവര്‍ കുലംകുത്തികളുമാവും. അങ്ങിനെ പുറത്തു പോകുന്നവര്‍ പ്രതിനിധാനം ചെയ്യുന്ന രാഷ്ട്രീയം എന്താണെന്ന് ചര്‍ച്ച ചെയ്യേണ്ട ആവശ്യം പോലുമില്ല. അവര്‍ ഉന്നയിക്കുന്ന വിഷയങ്ങള്‍ ശ്രദ്ധിക്കേണ്ടതില്ല എന്ന കാര്യത്തില്‍ സംശയം പോലുമില്ല. കാരണം, അവര്‍ കുലത്തെ ദ്രോഹിച്ചവരാണ്. കൂറ് ഭഞ്ജിച്ചവരാണ്. കുലത്തെ ദ്രോഹിക്കുക എന്നു പറഞ്ഞാല്‍ കുലത്തിന്റെ മാനം കെടുത്തുക എന്നു കൂടി അര്‍ത്ഥമുണ്ട്. ഒരു കുലത്തിന്റെ മാനം ഒരു സമൂഹത്തിന്റെ പുരോഗതിക്കായുള്ള പ്രത്യയശാസ്ത്രമാവണമെന്നില്ല. മാനം കെടുത്തുന്നവരെ കൊല്ലുന്നതിനെയാണ് നാം അഭിമാന ഹത്യ (honour killing) എന്നു വിളിക്കുന്നത്. ഫ്യൂഡല്‍ മൂല്യങ്ങള്‍ വളരേ ശക്തമായി നിലനില്‍ക്കുന്ന വടക്കേ ഇന്ത്യയിലും മറ്റും അഭിമാന ഹത്യകള്‍ ഇന്നു പതിവാണ്. അങ്ങിനെ കൊല്ലപ്പെടുന്നവരും കുലപതികള്‍ക്കും, തറവാട്ടു കാരണവര്‍മാര്‍ക്കും കുലംകുത്തികളാണ്. അതായത്, ഇരകളാണ് പൊതുവേ കുലംകുത്തികളാക്കപ്പെടുന്നത് എന്നര്‍ത്ഥം.

‘മരിച്ചു പോയവരെ മാന്യമായാദരിക്കുന്ന നാടാണ്’ കേരളം എന്നാണ് കവി പറഞ്ഞത്. എന്നാല്‍ ടിപിയുടെ മരണത്തിനു ശേഷവും എന്തുകൊണ്ടാണ് വിജയന്‍ തന്റെ വിവാദ കുലംകുത്തി പ്രയോഗം ആവര്‍ത്തിച്ചത്? പൈശാചികമായാണ് ടിപി വധിക്കപ്പെട്ടത്. കേരളജനതയെ ഒന്നടങ്കം ഞെട്ടിച്ച കൊലപാതകമാണത്. പാര്‍ടി സംശയത്തിന്റെ നിഴലില്‍ നില്‍ക്കുന്നു. പാര്‍ടി പ്രവര്‍ത്തകര്‍ക്കിടയില്‍ തന്നെ ടിപിക്കനുകൂലമായ വികാരവും ശക്തം. കാര്‍ണം പാര്‍ടി വിട്ടു പോയിട്ടും ഇടതുപക്ഷത്ത് ശക്തമായി നിലയുറപ്പിച്ചവനാണ് ടിപി. വലതുമുന്നണിയുമായി യാതൊരു ബന്ധവുമില്ലെന്ന് ആവര്‍ത്തിച്ചു പറഞ്ഞിട്ടുള്ളവരാണ് ഒഞ്ചിയം സഖാക്കള്‍. പുതിയ പാര്‍ടി രൂപീകരിച്ച് അതിന്റെ കീഴില്‍ ഒഞ്ചിയത്തും സമീപ പ്രദേശങ്ങളിലുമുള്ള ഇടതുപക്ഷ മനസുകളെ സംഘടിപ്പിക്കാനാണ് ടിപിയും സംഘവും ശ്രമിച്ചു കൊണ്ടിരുന്നത്. ഈ ശ്രമത്തിന് ഇവര്‍ക്കു നേരെ ഏറ്റവും ശക്തമായ വെല്ലുവിളി ഉയര്‍ന്നിരുന്നതും സിപിഎമ്മില്‍ നിന്നായിരുന്നു. മരിക്കുന്നതിനു മുന്‍പ് എഴുതിയ ഒരു ലേഖനത്തില്‍ ടിപി അതു വിശദമായി പ്രതിപാദിച്ചിരുന്നു. ടിപി പാര്‍ടി വിട്ടു പോയിട്ടും സിപിഎമ്മിന്റെ സാധാരണ പ്രവര്‍ത്തകര്‍ക്കിടയില്‍ അദ്ദേഹത്തിനുള്ള സ്വാധീനത്തിനും പിന്തുണയ്ക്കും ഒരു കുറവുമുണ്ടായിരുന്നില്ല എന്നതാണ് യാഥാര്‍ത്ഥ്യം.

വടകരയിലുള്ള ഒരു സംഘടം എസ്എഫ്ഐക്കാര്‍ ഒരിക്കല്‍ കൊയിലാണ്ടിയില്‍ വച്ച് ടിപിയെ കണ്ട കാര്യം ഈയടുത്ത് കേള്‍ക്കുകയുണ്ടായി. രാത്രി ഒന്‍പതരയോടെയായിരുന്നു. സഖാക്കള്‍ ചെന്ന് ടിപിയോട് അങ്ങോട്ടു സംസാരിക്കുകയായിരുന്നു. ‘ടിപി, നിങ്ങക്ക് ഞങ്ങടെയൊക്കെ പിന്തുണയുണ്ട്, പക്ഷേ ഞാക്കൊന്നും പാര്‍ടി വിട്ടു വരാന്‍ പറ്റില്ല’ എന്നു പറഞ്ഞ ചെറുപ്പക്കാരായ സഖാക്കളോട് ടിപി പറഞ്ഞത്, ‘പാര്‍ടിയൊന്നും വിട്ടു വരണ്ടപ്പാ’ എന്നായിരുന്നുവത്രേ. അല്ലാതെ തന്നെ സമരങ്ങള്‍ നമുക്കൊന്നിച്ചു നയിക്കാം എന്നതായിരുന്നു അദ്ദേഹത്തിന്റെ നിലപാട്. അതായിരുന്നു സഖാവ് ടിപി. അങ്ങിനെയൊരു മനുഷ്യന്‍ പൈശാചികമായി തെരുവില്‍ കൊല്ലപ്പെട്ട് അതിനെ തീ കെട്ടടങ്ങുന്നതിനു മുന്‍പേ അദ്ദേഹത്തേയും, സഹസഖാക്കളേയും ‘കുലംകുത്തികള്‍’ എന്ന് വിജയന്‍ ആവര്‍ത്തിച്ചു വിളിക്കുന്നതിനു പിന്നിലെ രാഷ്ട്രീയമെന്താണ്? ടിപിക്ക് അനുശോചനമര്‍പിക്കാനോ, അഭിവാദ്യമര്‍പിക്കാനോ പാര്‍ടി തെയ്യാറായില്ല. കൊലപാതകത്തെ അപലപിക്കുക മാത്രമാണ് ചെയ്തത്.

ഈ കുലംകുത്തി പ്രയോഗത്തെ ന്യായീകരിച്ചു കൊണ്ട് രംഗത്തു വന്ന ചിലര്‍ പറഞ്ഞത് വിജയന് പൊതുബോധത്തെ ന്യായീകരിക്കേണ്ട ബാധ്യതയില്ലെന്നാണ്. തീര്‍ച്ചയായും പിന്തിരിപ്പന്‍ പൊതുബോധത്തെ ന്യായീകരിക്കേണ്ട ബാധ്യത കമ്യൂണിസ്റ്റുകാര്‍ക്കില്ല. മാത്രമല്ല, അതിനെ ആക്രമിച്ചു തോത്പിക്കേണ്ട ഉത്തരവാദിത്വമുണ്ട് താനും. എന്നാല്‍, പാര്‍ടി വിട്ടു പോയി വേറെ ഇടതുപക്ഷ പാര്‍ടിയുണ്ടാക്കി കോഴിക്കോട് ജില്ലയിലെ ഏതാനും ഗ്രാമങ്ങളില്‍ മാത്രം കേന്ദ്രീകരിച്ചു പ്രവര്‍ത്തിച്ചു വരുന്ന ഒരു പറ്റം സഖാക്കളെ കുലംകുത്തികളെന്ന് ആവര്‍ത്തിച്ചു വിളിക്കുന്നതിലൂടെ ഏതു പൊതുബോധത്തെയാണ് കേരളത്തിലെ ഏറ്റവും വലിയ ഇടതുപാര്‍ടിയുടെ സെക്രട്ടറി ആക്രമിക്കുന്നത്? അതില്‍ എന്തു വിപ്ലവ സന്ദേശമാണ് പതിയിരിക്കുന്നത്?

പൊതുബോധത്തെ തൃപ്തിപ്പെടുത്തേണ്ടതില്ലാത്ത കമ്യൂണിസ്റ്റുകാരന്റെ ധീരതയല്ല, മറിച്ച് ഇനിയും കൂറുമാറ്റങ്ങളുണ്ടായേക്കാം എന്നു ഭയക്കുന്ന ഒരു സെക്റ്റേറിയന്‍ നേതൃത്വത്തിന്റെ മുന്നറിയിപ്പാണ് രണ്ടാം കുലംകുത്തി വിളിയില്‍ കാണാനാകുന്നത്. എന്നാല്‍ ആ മുന്നറിയിപ്പ് പ്രശ്നങ്ങളെ ഊതിക്കെടുത്തുകയല്ല, ഊതിക്കാച്ചുകയാണ് ചെയ്തതെന്ന് അതിനു പിന്നാലെയുണ്ടായ സംഭവവികാസങ്ങള്‍ സൂചിപ്പിക്കുന്നു. പാര്‍ടി ഒരു കുലമല്ലെന്ന് ആദ്യം തിരിച്ചറിയേണ്ടത് നേതൃത്വം തന്നെയാണ്. ഫ്യൂഡല്‍ ലോയല്‍റ്റിക്കും ഒരു കമ്യൂണിസ്റ്റു പാര്‍ടിക്കും തമ്മില്‍ പൊതുവായൊന്നുമില്ല. പാര്‍ടി പ്രവര്‍ത്തകര്‍ ജനങ്ങളുടെ വിമോചന പോരാട്ടത്തിന്റെ പതാകവാഹകരാണ്. അവരെ ആ ലക്ഷ്യത്തിലേക്ക്ക് നയിക്കേണ്ടയാളാണ് സെക്രട്ടറി. താന്‍ സ്വയം ഒരു കുലപതിയാണെന്നും തന്നെ എതിര്‍ക്കുന്നവര്‍ കുലംകുത്തികളാണെന്നും, അവര്‍ക്കു സ്ഥാനം കുലത്തിനു പുറത്താണെന്നും വലതുപക്ഷ ഫ്യൂഡല്‍ പാര്‍ടികളിലെ നേതാക്കള്‍ക്ക് അവകാശപ്പെടാം. എന്നാല്‍ ഒരു കമ്യൂണിസ്റ്റ് പാര്‍ടി നേതാവിന് അതൊട്ടും ഭൂഷണമല്ല തന്നെ.

സോവിയറ്റ് യൂണിയന്‍ നില നിന്നിരുന്ന കാലത്ത് ആ രാഷ്ട്രം മുതലാളിത്തത്തിലേക്കു തിരിച്ചു പോകുമോ എന്ന ചോദ്യത്തിന് മറുപടിയായി ഇഎംഎസ് പറഞ്ഞത് മനുഷ്യന് കുരങ്ങിലേക്ക്  തിരിച്ചു പോകാന്‍ പറ്റില്ലെന്നാണ്. പക്ഷേ, സോവിയറ്റ് യൂണിയന്റെ തകര്‍ച്ച ജനങ്ങളില്‍ നിന്നും, പ്രത്യയശാസ്ത്രത്തില്‍ നിന്നും അകന്നു പോയി ജീര്‍ണിച്ച ഒരു കമ്യൂണിസ്റ്റ് പാര്‍ടി നേരിട്ട ചരിത്രപരമായ അനിവാര്യതയായിരുന്നു. ഉണര്‍ന്നിരുന്നില്ലെങ്കില്‍ മനുഷ്യന്‍ കുരങ്ങിലേക്ക് തിരിച്ചു പോയേക്കാം. പാര്‍ടി കുലമായി മാറിയേക്കാം എന്ന പേടിപ്പെടുത്ത സന്ദേശം കൂടി ഇതിലുണ്ട്.

അടിക്കുറുപ്പ്: സംസ്ഥാന പാര്‍ടിയില്‍ കാര്യങ്ങള്‍ ഇത്രയും വഷളായിട്ടും എന്തുകൊണ്ടാണ് കേന്ദ്ര നേതൃത്വം കാര്യമായ ഇടപെടലൊന്നും നടത്താത്തത് എന്നു ചോദിച്ചപ്പോള്‍ കോഴിക്കോട് ജില്ലയിലെ ഒരു മുതിര്‍ന്ന പാര്‍ടി നേതാവ് (ഇദ്ദേഹം ഇപ്പോള്‍ നേതൃസ്ഥാനങ്ങളിലൊന്നുമില്ല) മറുപടിയായി പറഞ്ഞത് പഴയ മടിയന്റെ കഥയാണ്. ഒരു പണിയും ചെയ്യാത്തതിനാല്‍ മടിയനെ കഴുവേറ്റി കൊല്ലാന്‍ വിധിയുണ്ടായി. കഴുമരത്തിലേക്ക് മടിയനെ പല്ലക്കില്‍ കയറ്റി കൊണ്ടുപോകുന്നതിനിടയില്‍ അയാളുടെ ജീവന്‍ രക്ഷിക്കാന്‍ ഒരു നിര്‍ദേശം കൂടി വന്നു. രാജാവ് മടിയന് ഒരു പുതിയ വീടു വച്ചു കൊടുക്കും. എല്ലാ സൗകര്യങ്ങളും നല്‍കും. പക്ഷേ, മടിയന്‍ സ്വയം ഭക്ഷണം പാചകം ചെയ്തു കഴിക്കണം. “സ്വയം പാചകം ചെയ്യണമെന്നോ…!! എന്നാല്‍ പല്ലക്കു നീങ്ങട്ടെ, കഴുമരത്തിലേക്ക്,’” എന്നായിരുന്നുവത്രേ മടിയന്റെ മറുപടി.

Be Sociable, Share!

• 

Tags: C Basheer Ahamed, CPM, Kerala, Pinarayi Vijayan, Politics, TP Chandrasekharan