ആരാണ് ഇതു ചെയ്തത്?

Be Sociable, Share!

• 

എഡിറ്റോറിയല്‍

റെവലൂഷനറി മാര്‍ക്സിസ്റ്റ് പാര്‍ടി നേതാവ് ടിപി ചന്ദ്രശേഖരന്റെ കൊലപാതകം രാഷ്ട്രീയ കേരളത്തിന് താങ്ങാവുന്നതിനപ്പുറത്തെ ദുരന്തമാണ്. കഴിഞ്ഞ പതിനാലു മണിക്കൂറിലേറെയായി കേരളക്കരയാകെ  ഏറ്റവും ശക്തമായി മുഴങ്ങിക്കേട്ട ചോദ്യം ആരാണ് ഈ പൈശാചിക കൃത്യത്തിനു നേതൃത്വം കൊടുത്തത് എന്നതായിരിക്കും. അതാരായാലും നിയമത്തിന്റെ മുന്നില്‍ കൊണ്ടുവരാനുള്ള ഉത്തരവാദിത്വം ഭരിക്കുന്നവര്‍ക്കുണ്ട്. അതെത്രയും പെട്ടെന്ന് അറിയാനുള്ള അവകാശം ഭരിക്കപ്പെടുന്നവര്‍ക്കും.

മേയ് 4ന് രാത്രി പത്തരയോടെ ഒഞ്ചിയം വള്ളിക്കാട് ലീഗ് ഹൗസിനു സമീപത്തു വച്ചാണ് ടിപി ആക്രമിക്കപ്പെട്ടത്. റിപോര്‍ട്ടുകളനുസരിച്ച്, ബൈക്കില്‍ യാത്ര ചെയ്യുകയായിരുന്ന ടിപിയെ വള്ളിക്കാട്ടു വച്ച് അക്രമികള്‍ തടഞ്ഞു നിര്‍ത്തി വെട്ടുകയായിരുന്നു. തലയ്ക്കും മുഖത്തുമാണ് കൂടുതലും വെട്ടേറ്റത്. വെട്ടിവീഴ്ത്തിയ ശേഷം ബോംബെറിഞ്ഞ്, ടിപിയുടെ മരണം ഉറപ്പു വരുത്തിയതിനു ശേഷമാണ് അക്രമികള്‍ പിന്‍വാങ്ങിയതെന്ന് മാധ്യമ റിപോര്‍ട്ടുകള്‍ പറയുന്നു. പിന്നീട് വടകര താലൂക്ക് ആശുപത്രിയില്‍ വച്ചാണ് മരണം സ്ഥിരീകരിച്ചത്.

മനുഷ്യത്വമുള്ള ആര്‍ക്കും ഒരു കാരണവശാലും ന്യായീകരിക്കാന്‍ പറ്റാത്ത സംഭവമാണ് ഇതെന്ന കാര്യം നിസ്തര്‍ക്കമാണ്. ആംബുലന്‍സില്‍ നിന്നും ഇറക്കി ആശുപത്രിയിലേക്ക് എടുക്കുന്ന ടിപിയുടെ ചോരത്തുണിയില്‍ പൊതിഞ്ഞ മൃതദേഹം ഇന്നലെ തന്നെ പലരും റ്റെലിവിഷനില്‍ കണ്ടിട്ടുണ്ടാകും. അതു കണ്ട് ഹൃദയം തകര്‍ന്നില്ലെങ്കിലേ അതിശയിക്കാനുള്ളൂ. ഒഞ്ചിയത്തെ പ്രധാനപ്പെട്ട സിപിഎം പ്രവര്‍ത്തകനായിരുന്നു ടിപി. വിഭാഗീയ പ്രവര്‍ത്തനത്തിന്റെ പേരില്‍ പാര്‍ടിയില്‍ അച്ചടക്ക നടപടി നേരിടേണ്ടി വന്നിട്ടുള്ള അദ്ദേഹം പിന്നീട് പാര്‍ടി വിട്ടു പോവുകയും ഒഞ്ചിയം മാര്‍ക്സിസ്റ്റ് പാര്‍ടി രൂപീകരിക്കുകയും ചെയ്തു. ഏറാമല-അഴിയൂര്‍ പഞ്ചായത്തുകളിലെ ഭരണമാറ്റവുമായി 2009ല്‍ ഉയര്‍ന്നു വന്ന വിവാദങ്ങളായിരുന്നു ഒഞ്ജിയത്തെ പ്രതിസന്ധിയുടെ മുഖ്യകാരണം. ടിപിയും മറ്റു സഖാക്കളും പിന്നീട് ഇത് സിപിഎമ്മിന്റെ ‘നയവ്യതിയാന’വുമായി ബന്ധപ്പെടുത്തി പാര്‍ടിക്കെതിരായ ആക്രമണം ശക്തിപ്പെടുത്തി. ഇതു പിന്നീട് റെവലൂഷനറി മാര്‍ക്സിസ്റ്റ് പാര്‍ടിയുടെ രൂപീകരണത്തിലേക്കു നയിക്കുകയും, സംസ്ഥാന തലത്തില്‍ സിപിഎം വിരുദ്ധ ഇടതുപക്ഷ സംഘങ്ങളെ ഏകോപിപ്പിക്കാനായി ടിപിയടക്കമുള്ളവര്‍ ശ്രമങ്ങളാരംഭിക്കുകയും ചെയ്തു.

ആരംഭത്തില്‍ സിപിഎമ്മിനു ക്ഷീണമേല്പിക്കാന്‍ ഒഞ്ചിയം വിമതര്‍ക്കു കഴിഞ്ഞിരുന്നു എന്നതു സത്യമാണ്. താഴെത്തട്ടിലുള്ള പ്രവര്‍ത്തകരില്‍ വലിയൊരു വിഭാഗം ടിപിക്കും സംഘത്തിനുമൊപ്പം സിപിഎം വിട്ടു പോയിരുന്നു. 2009ലെ ലോകസഭാ തെരഞ്ഞെടുപ്പിലും പിന്നീടു നടന്ന പഞ്ചായത്തു തെരഞ്ഞെടുപ്പിലും ‘ഒഞ്ചിയം കമ്യൂണിസ്റ്റുകാര്‍’ ശക്തി തെളിയിക്കുകയും ചെയ്തിരുന്നു. ഇതോടെ കേരളത്തിന്റെ രാഷ്ട്രീയ ഭൂപടത്തില്‍ ടിപിയുടേയും മറ്റു ‘ഒഞ്ചിയം മാര്‍ക്സിസ്റ്റുകളുടേയും’ പ്രാധാന്യം കുതിച്ചുയര്‍ന്നുവെന്ന് പ്രത്യേകം പറയേണ്ടതില്ലല്ലോ. സമീപകാലത്ത് സിപിഎമ്മിനോട് വളരെ വിമര്‍ശനാത്മക നിലപാടായിരുന്നു ടിപിയും സഹസഖാക്കളും എടുത്തിരുന്നത്. ഇവര്‍ പ്രത്യക്ഷത്തിലും പരോക്ഷത്തിലും വലതുപക്ഷത്തെ സഹായിക്കുകയാണ് എന്ന ആരോപണം സിപിഎമ്മും ഉയര്‍ത്തിയിരുന്നു. പരസ്പരം എതിര്‍ക്കുന്ന രണ്ടു പാര്‍ടികള്‍ എന്ന നിലയില്‍ ഒഞ്ചിയത്തും പരിസര പ്രദേശങ്ങളിലും സിപിഎമ്മും, റെവലൂഷനറി മാര്‍ക്സിസ്റ്റ് പാര്‍ടിയും തമ്മില്‍ ചെറിയ സംഘര്‍ഷങ്ങളും സമീപകാലത്ത് ഉണ്ടായിരുന്നു. ഈ സാഹചര്യത്തിലാണ് ടിപി ദാരുണമായി കൊലചെയ്യപ്പെടുന്നത്.

സിപിഎമ്മാണ് കൊലയ്ക്കു പിന്നില്‍ എന്ന ആരോപണം കൊലപാതകം നടന്ന് മണിക്കൂറൊന്നു തികയുന്നതിനു മുന്‍പേ പല കോണുകളില്‍ നിന്നും ഉയരുകയുണ്ടായി. സിപിഎം പ്രവര്‍ത്തകരെ പോലും ഞെട്ടിക്കുന്ന തരത്തിലായിരുന്നു ആരോപണങ്ങളുടെ കെട്ടഴിക്കപ്പെട്ടത്. മരണം സ്ഥിരീകരിക്കപ്പെട്ട ഉടനേ ഭരിക്കുന്ന പാര്‍ടിയുടെ സംസ്ഥാന പ്രസിഡന്റ് സംഭവത്തിന്റെ ഉത്തരവാദിത്വം സിപിഎമ്മിന്റെ മേല്‍ കെട്ടി വച്ചു. എതിരാളികളെ ഉന്മൂലനം ചെയ്യുന്ന സ്റ്റാലിനിസ്റ്റ് രാഷ്ട്രീയമാണ് സിപിഎം ഇപ്പോഴും പിന്തുടരുന്നതെന്നാണ് കെപിസിസി തലവന്‍ രമേശ് ചെന്നിത്തല പറഞ്ഞത്. സംസ്ഥാന ആഭ്യന്തര മന്ത്രിയും, പൊലീസ് പ്രാഥമിക അന്വേഷണം പോലും പൂര്‍ത്തിയാക്കുന്നതിനു മുന്‍പേ, സിപിഎമ്മിലേക്കാണ് വിരല്‍ ചൂണ്ടിയത്. ജനകീയ വികസന സമിതി ചെയര്‍മാന്‍ എംആര്‍ മുരളിക്കും സിപിഎമ്മാണ് കൊല ചെയ്യിച്ചത് എന്ന കാര്യത്തില്‍ തര്‍ക്കമില്ല. ഇതോടെ ഒരു രാഷ്ട്രീയ പാര്‍ടിയായി തുടരാനുള്ള ധാര്‍മിക ഉത്തരവാദിത്വം സിപിഎമ്മിനില്ല എന്നും മുരളി പറയുകയുണ്ടായി. മാധ്യമങ്ങളുടെ റിപോര്‍ട്ടിംഗ് രീതിയും വ്യത്യസ്തമായിരുന്നില്ല. മേയ് 5ലെ ‘മാതൃഭൂമി’, ‘മലയാള മനോരമ’ പത്രങ്ങളിലെ വാര്‍ത്ത വായിച്ചാല്‍ കൃത്യം ചെയ്തത് സിപിഎമ്മാണ് എന്ന സന്ദേശമാണ് വായനക്കാര്‍ക്കു കിട്ടുന്നത്. (മാതൃഭൂമി വാര്‍ത്തയിലെ വലിയ പൊരുത്തക്കേടിനേയും അതിലൊളിഞ്ഞിരിക്കുന്ന ദുഷ്ടലാക്കിനേയും പറ്റി പ്രമുഖ ബ്ലോഗര്‍ മാരീചന്‍ ഫെയ്സ്ബുക്കിലിട്ട കമന്റ് ഇവിടെ കാണുക). ആഴ്ചകള്‍ക്കു മുന്‍പ് ടിപി എഴുതിയ ലേഖനം അദ്ദേഹത്തിന്റെ മരണശേഷം പുനപ്രസിദ്ധീകരിച്ച ‘മറുനാടന്‍ മലയാളി’ എന്ന വെബ്സൈറ്റ് ആമുഖമായെഴുതിയത് ‘സിപിഎമ്മിന്റെ ക്രൂരമായ ആക്രമണത്തില്‍’ ടിപി കൊല്ലപ്പെട്ടുവെന്നാണ്. സാമാന്യ ബുദ്ധിയുള്ളവര്‍ ഇതില്‍ നിന്നും എന്താണ് മനസിലാക്കേണ്ടത്? കൊലപാതകം നടന്ന് മണിക്കൂറുകള്‍ക്കുള്ളില്‍, ഒരറസ്റ്റു പോലും രേഖപ്പെടുത്തുന്നതിനു മുന്‍പേ ആഭ്യന്തര മന്ത്രി മുതല്‍, ഫെയ്സ്ബുക്കിലെ ഇടതുവിരുദ്ധര്‍ വരെ ഒരേ സ്വരത്തില്‍ സിപിഎമ്മിനെ പ്രതിക്കൂട്ടില്‍ നിര്‍ത്തുന്നതിനു പിന്നിലെ രാഷ്ട്രീയമെന്താണ്? മരണം സ്ഥിരീകരിക്കപ്പെട്ട ഉടനേ കൊലയാളികളാരാണെന്ന് കെപിസിസി പ്രസിഡന്റിനു മാത്രം മനസിലായതെങ്ങിനെയാണ്? ആരാണ് മറുപടി പറയുക?

വേണ്ടത് നിക്ഷ്പക്ഷമായ അന്വേഷണമാണ്. അന്വേഷണം തുടങ്ങുന്നതിനു മുന്‍പേ കൊലയാളികള്‍ ആരാണെന്ന് ആഭ്യന്തര മന്ത്രി പ്രഖ്യാപിച്ചിരിക്കുന്ന സ്ഥിതിയില്‍ അതു നടക്കുമോ എന്നതിലാണ് ആശങ്ക. ടിപിയുടെ കൊലപാതകത്തെ ശക്തമായി അപലപിക്കുന്നതോടൊപ്പം സ്വതന്ത്രമായ അന്വേഷണം വേണമെന്നും, ഇതിനു പിന്നിലെ ഗൂഢാലോചന വെളിച്ചത്തു കൊണ്ടുവരണമെന്നും സിപിഎമ്മും ആവശ്യപ്പെട്ടിട്ടുണ്ട്. ഒഞ്ചിയം മേഖലയില്‍ സിപിഎം വീണ്ടും ശക്തിപ്പെട്ടു വരികയാണെന്നും, കഴിഞ്ഞ നിയമ സഭാ തെരഞ്ഞെടുപ്പ് അതിനു തെളിവാണെന്നും, അത്തരമൊരു സാഹചര്യത്തില്‍ ടിപിയെ പോലൊരാളെ ശാരീരികമായി വകവരുത്തുന്നതിലൂടെ സിപിഎമ്മിനെന്തു നേട്ടമാണുണ്ടാകുക എന്നുമാണ് പാര്‍ടി സംസ്ഥാന സെക്രട്ടറി പിണറായി വിജയന്‍ മേയ് 5നു രാവിലെ നടത്തിയ പത്രസമ്മേളനത്തില്‍ ചോദിച്ചത്. ഇനി പാര്‍ടിക്ക് അവിടെ ക്ഷീണമാണെന്നു തന്നെ കരുതുക, എങ്കിലും എതിരാളികളെ ശാരീരികമായി ഇല്ലാതാക്കുന്നതിലൂടെ രാഷ്ട്രീയ നേട്ടം കൊയ്യാമെന്ന മൗഢ്യം സിപിഎമ്മിനില്ല എന്നും അദ്ദേഹം പറയുകയുണ്ടായി.

ഒഞ്ചിയത്തു നിന്നും വിട്ടു പോയ സഖാക്കളെ പാര്‍ടിയിലേക്ക് വീണ്ടും അടുപ്പിക്കാനുള്ള ശ്രമം സിപിഎം ഗൗരവമായി തന്നെ നടത്തിയിരുന്നു. ഒഞ്ചിയം പ്രതിസന്ധി ഉണ്ടായ സമയത്തെ ഏരിയ സെക്രട്ടറി ദയാനന്ദനെ മാറ്റി പൊതുവേ ജനസമ്മിതിയുള്ള മുന്‍ വടകര ഏരിയ സെക്രട്ടറിയായിരുന്ന സി ഭാസ്കരന്‍ മാഷിന് ഒഞ്ചിയം കമ്മിറ്റിയുടെ ചുമതല നല്‍കിയതടക്കമുള്ള ശ്രമങ്ങള്‍ ഇതിന്റെ ഭാഗമാണ്. പിന്നീടാണ് സിഎച് അശോകന്‍ ഏരിയ കമ്മിറ്റിയുടെ സെക്രട്ടറിയാകുന്നത്. ഈ ശ്രമങ്ങള്‍ക്ക് ഫലമുണ്ടായി എന്നാണ് നിയമ സഭാതെരഞ്ഞെടുപ്പ് കാണിച്ചത്. വടകര മണ്ഡലത്തില്‍ നിന്നും ഇടതുമുന്നണിയുടെ സികെ നാണു ശക്തമായി വിജയിക്കുകയുണ്ടായി. ഇത്തരമൊരു സാഹചര്യത്തില്‍ ടിപിയുടെ മരണം ഏറ്റവും ദോഷകരമായി ബാധിക്കുക സിപിഎമ്മിനെയാണ് എന്നതാണ് യാഥാര്‍ത്ഥ്യം. പ്രത്യേകിച്ചും നെയ്യാറ്റിന്‍കര ഉപതെരഞ്ഞെടുപ്പ് പടിവാതില്‍ക്കലെത്തി നില്‍ക്കുന്ന ഒരു സമയത്ത്. എന്നാല്‍ ഈ യാഥാര്‍ത്ഥ്യം മറച്ചു വച്ചുകൊണ്ടാണ് അപവാദമില്ലുകള്‍ പ്രവര്‍ത്തിക്കുന്നത്.

സത്യം എത്രയും പെട്ടെന്ന് വെളിച്ചത്തു കൊണ്ടു വരികയാണ് യുഡിഎഫ് സര്‍ക്കാര്‍ ചെയ്യേണ്ടത്. ഒപ്പം കൊല്ലപ്പെട്ട സഖാവിന്റെ പേരിലുള്ള രാഷ്ട്രീയ മുതലെടുപ്പ് ഉടനേ നിര്‍ത്തുകയും. കൊലയാളികള്‍ ആരായാലും, എത്ര വലിയവരായാലും, ഏതു പാര്‍ടിക്കാരായാലും അവര്‍ ശിക്ഷിക്കപ്പെടേണ്ടതുണ്ട്. സത്യം വെളിച്ചത്തു വരേണ്ടതുമുണ്ട്. അല്ലെങ്കില്‍ അപകടം കേരളത്തിനാണ്. നാമെല്ലാവരും ചേര്‍ന്ന് പണിതിയുയര്‍ത്തിയ കേരളത്തിന്. സഖാവ് ടിപിക്ക് അന്ത്യാഭിവാദ്യങ്ങള്‍.

–എംജെ സ്റ്റാന്‍ലി 

Be Sociable, Share!

• 

Tags: Congress, CPIM, Editorial, MJ Stanly, Political violence, TP Chandrasekharan