എവിടെയാണ് ഗുജറാത്തിലെ പുരോഗമന പ്രസ്ഥാനങ്ങള്‍?

Share DilliPost

• 

Courtesy: Frontline

എന്തുകൊണ്ടാണ് 2002ലെ കൊള്ളയേയും, കൊള്ളിവെപ്പിനേയും, ബലാത്സംഗങ്ങളേയും മറ്റും തള്ളിപ്പറയാന്‍ സംഘപരിവാരം ഇനിയും തെയ്യാറാവാത്തത്? നരേന്ദ്ര മോഡിയോടു മാത്രമല്ല, ബിജെപിയുടെ ഏതു ദേശീയനേതാവിനോടും ചോദിച്ചു നോക്കു, ഗോധ്രാനന്തര കൂട്ടക്കൊലയെ അപലപിക്കാന്‍ ആരെങ്കിലും തെയ്യാറാകുമോ? എന്തുകൊണ്ട്? ചോദിക്കുന്നത് റ്റീസ്റ്റ സെറ്റല്‍വാദ്. മുഖവുരകള്‍ ആവശ്യമുള്ള ഒരു പ്രവര്‍ത്തകയല്ല അവര്‍. ഗുജറാത്തിലെ മുസ്ലിം വിരുദ്ധ ലഹളയുടെ ഇരകള്‍ക്ക് നീതി ലഭിക്കുന്നതിനു വേണ്ടി കഴിഞ്ഞ പത്തു വര്‍ഷങ്ങളായി പ്രവര്‍ത്തിക്കുന്ന സിറ്റിസന്‍സ് ഫോര്‍ ജസ്റ്റിസ് ആന്‍ഡ് പീസ് എന്ന സംഘടനയെ നയിക്കുന്നത് റ്റീസ്റ്റയാണ്. ഇക്കാലമത്രയും കലാപബാധിതരുടെ നാവായി പ്രവര്‍ത്തിച്ചു വരുന്ന റ്റീസ്റ്റ പല രീതിയില്‍ മോഡി സര്‍ക്കാരിന്റെ വേട്ടയാടലിനു ഇരയായിട്ടുമുണ്ട്. ഗുജറാത്തിലെ മുസ്ലിങ്ങളുടെ പാര്‍ശ്വവത്കരണത്തെ കുറിച്ചും, മുഖ്യമന്ത്രി മോഡിയുടെ പുതിയ രാഷ്ട്രീയ തന്ത്രങ്ങളെ കുറിച്ചും ഈ അഭിമുഖത്തില്‍ അവര്‍ സംസാരിക്കുന്നു:

ഹിന്ദുത്വയെ കുറിച്ചുള്ള കര്‍ക്കശ നിലപാട് സംഘപരിവാരം, പ്രത്യേകിച്ചും ബിജെപി, തത്കാലത്തേക്കെങ്കിലും ഉപേക്ഷിച്ച മട്ടാണല്ലോ. എന്നാല്‍, ഗുജറാത്തില്‍ ഹിന്ദുത്വ അജന്‍ഡ ഇവര്‍ ഇപ്പോഴും ശക്തമായി ഉയര്‍ത്തിപ്പിടിക്കുന്നുണ്ട് താനും. അതേകുറിച്ച് എന്തു തോന്നുന്നു?
സംഘപരിവാറിന്റേയും അവരുടെ പാര്‍ലമെന്ററി മുഖമായ ബിജെപിയുടേയും അജന്‍ഡകള്‍ തമ്മില്‍ പലപ്പോഴും ചേര്‍ന്നു പോകുന്നില്ലെന്ന തോന്നലുണ്ടായേക്കാം. അതു ഭരണഘടനാപരമായ ഉത്തരവാദിത്വങ്ങളും, ജനാധിപത്യത്തിന്റെ സമ്മര്‍ദവും മറ്റും ബിജെപിക്കു നേരിടേണ്ടി വരുന്നതു കൊണ്ടുണ്ടാകുന്നതാണ്. തെരഞ്ഞെടുപ്പു സാഹചര്യങ്ങള്‍ക്കനുകൂലമായി ബിജെപി ഈ നിലപാടില്‍ അയവു വരുത്തുകയോ, കൂടുതല്‍ കര്‍ക്കശ നിലപാടു സ്വീകരിക്കുകയോ ചെയ്യുന്നു. ഉത്തര്‍ പ്രദേശില്‍ ബിജെപിയുടെ തെരഞ്ഞെടുപ്പു തന്ത്രം തന്നെ നോക്കു. അതല്ലാതെ, ബിജെപി ഒരിക്കലും ഹിന്ദുത്വ പാത കയ്യൊഴിഞ്ഞിട്ടില്ല.

ഭൂരിപക്ഷവാദമാണ് ബിജെപിയുടെ രാഷ്ട്രീയം. ഭൂരിപക്ഷ സമുദായത്തിന്റെ വോട്ട് തങ്ങള്‍ക്കനുകൂലമാക്കി മാറ്റുക. 1984ലെ സിഖ് കലാപത്തിനു ശേഷം കോണ്‍ഗ്രസും ഇതു തന്നെയാണ് ചെയ്തത്. ഗുജറാത്തിലായാലും, മറ്റേതു സംസ്ഥാനത്തായാലും, ഈ ഭൂരിപക്ഷ വാദത്തിനു ചുറ്റുമാണ് ബിജെപി നിന്നു തിരിയുന്നത്. അല്ലെങ്കില്‍ പിന്നെ എന്തിനാണ് ‘ഹിന്ദുക്കളുടെ രോഷം’, ‘ഹിന്ദുക്കളുടെ ക്ഷോഭം’, ‘ഹിന്ദുക്കളുടെ പീഡനം’ എന്നിങ്ങനെ ഏതു നേരവും പറഞ്ഞുകൊണ്ടിരിക്കുന്നത്? സമൂഹത്തെ വിഭജിച്ച് അതിലൂടെ രാഷ്ട്രീയ നേട്ടം കൊയ്യുക മാത്രമല്ല, ഈ രാജ്യത്തിന്റെ ഭരണയന്ത്രത്തിന്റെ പല ഭാഗങ്ങളിലും നുഴഞ്ഞു കയറാനും അവര്‍ക്കായിട്ടുണ്ട്. അവര്‍ക്കിന്നു പൊലീസുകാരുണ്ട്, അധ്യാപകരുണ്ട്, എന്തിന് ജഡ്ജുമാര്‍ വരെയുണ്ട്!

ഗുജറാത്തില്‍ കാലങ്ങളോളം പ്രവര്‍ത്തിച്ച ഒരാളെന്ന നിലയില്‍ സംഘപരിവാരം എങ്ങിനെയാണ് സംസ്ഥാനത്ത് തങ്ങളുടെ അജന്‍ഡ മുന്നോട്ടു കൊണ്ടു പോകുന്നതെന്ന് പറയാമോ? ഹിന്ദുത്വയുടെ പോസ്റ്റര്‍ ബോയിയായ മോഡി എന്തുകൊണ്ടാണ് ഇപ്പോള്‍ തീവ്രവാദ നിലപാടുകളില്‍ നിന്നും വിട്ടു നില്‍ക്കുന്നത്?
ഗുജറാത്ത് ഒരു പ്രത്യേക കേസ് സ്റ്റഡി തന്നെയാണ്. ബഹുസ്വരതയിലടിയുറച്ച ഒരു ഭൂതകാലം ഗുജറാത്തിനുണ്ടായിരുന്നുവെന്നത് മറക്കരുത്. ഗുജറാത്തിനെ പറ്റി സംസാരിക്കുമ്പോള്‍ ഓര്‍മയിലേക്കു വരിക നര്‍മദിന്റേയും, വാലി ഗുജറാത്തിയുടേയും മറ്റും കവിതകളാണ്. ഉര്‍ദു കവിയായിരുന്ന വാലി ഗുജറാത്തി പലയിടങ്ങളിലും അലഞ്ഞു തിരിഞ്ഞൊടുവിലാണ് ഗുജറാത്തില്‍ താമസമാക്കുന്നത്. ഈ വാലി ഗുജറാത്തിയുടെ അഹമ്മദാബാദിലെ ദര്‍ഗയാണ് 2002 ഫെബ്രുവരി 28 രാത്രിയില്‍ ഒരു സംഘം അക്രമികള്‍ നശിപ്പിച്ചത്. മൂന്നു മാസത്തോളം സംസ്ഥാനം മുഴുവന്‍ അക്രമമഴിച്ചു വിട്ട അതേ കലാപകാരികള്‍. അന്നത്തെ കമ്മിഷണറായിരുന്ന പിസി പാണ്ഡെയുടെ ആപ്പീസിന്റെ പുറത്തുള്ള റോഡിലായിരുന്നു വാലി ഗുജറാത്തിയുടെ ദര്‍ഗ. ആര്‍എസ്എസും, അതിന്റെ സഹസംഘടനകളും ഗുജറാത്തില്‍ കൈവരിച്ച നേട്ടത്തിന്റെ നേര്‍ചിത്രമാണ് ഈ സംഭവം നല്‍കുന്നത്.

ഇന്ന് മോഡിയെടുത്തണിയുന്ന മുഖംമൂടി കൊണ്ട് ഒരു കാര്യവുമില്ല. മുസ്ലിം ചെറുപ്പക്കാര്‍ക്കുള്ള പ്രധാനമന്ത്രിയുടെ സ്കോളര്‍ഷിപ് പദ്ധതിയില്‍ നിന്നും സംസ്ഥാനത്തെത്തിയ പതിനായിരത്തിലധികം കോടി രൂപ സംസ്ഥാന സര്‍ക്കാര്‍ തിരിച്ചയച്ച കാര്യമറിയാന്‍ സര്‍ക്കാര്‍ രേഖകള്‍ തന്നെ നോക്കിയാല്‍ മതിയാകും. സംസ്ഥാന സര്‍ക്കാര്‍ നിയമിച്ച പബ്ലിക് പ്രൊസിക്യൂട്ടര്‍മാരില്‍ എത്ര പേര്‍ മുസ്ലിങ്ങളുണ്ട്?

പല നഗരങ്ങളിലും മുസ്ലിങ്ങള്‍ ഘെറ്റോകളിലാണ് ജീവിക്കുന്നത്. ഇത്തരം ഘെറ്റോകള്‍ 2002നു മുന്‍പും ഗുജറാത്തിലുണ്ടായിരുന്നു. എന്നാല്‍ കഴിഞ്ഞ പത്തു വര്‍ഷക്കാലയളവില്‍ കാര്യങ്ങള്‍ കൂടുതല്‍ വഷളായി. ചില സ്കൂളുകളില്‍ മുസ്ലിം, ക്രിസ്ത്യന്‍ കുട്ടികള്‍ക്ക് പ്രവേശനം ലഭിക്കുകയേ ഇല്ല. അഹമ്മദാബാദ്, വഡോദര, സൂറത്ത് എന്നീ നഗരങ്ങളിലെ ക്രിസ്ത്യന്‍ ആഘോഷങ്ങള്‍ നടക്കുന്നതെങ്ങിനെയെന്നു നോക്കിയാല്‍ തന്നെ സംസ്ഥാനത്തിന്റെ ഒരേകദേശ ചിത്രം ലഭിക്കും. രാത്രിയിലെ ആഘോഷവേളകളില്‍ പള്ളികളുടെ കതകുകള്‍ അടച്ചിടണം, ശബ്ദം വെളിയില്‍ പോകാതിരിക്കാന്‍. വാര്‍ത്താ മാധ്യമങ്ങള്‍ പൊതുവേ ഇതിനോടൊക്കെ കണ്ണടയ്ക്കുകയാണു പതിവ്. ക്രിസ്ത്യന്‍ ട്രസ്റ്റുകളും, പാര്‍ശ്വവത്കരിക്കപ്പെട്ട വിഭാഗങ്ങള്‍ക്കിടയില്‍ പ്രവര്‍ത്തിക്കുന്ന മിഷനറി സംഘങ്ങളും പലപ്പോഴും പല രീതിയിലുള്ള ആക്രമണങ്ങള്‍ക്ക് വിധേയമാകുന്നതും റിപോര്‍ട്ട് ചെയ്യപ്പെടാറില്ല.

എന്നാല്‍ കച്ച്, സബര്‍കാന്ത, ദാഹിദ് എന്നിവിടങ്ങളില്‍ പോയി നോക്കു. അവിടെ കാര്യങ്ങള്‍ ഭേദമാണ്. ഈ വിവേചനപാത ഗുജറാത്തി സമൂഹത്തിനു മൊത്തത്തില്‍ ദോഷമാണ് ചെയ്യുന്നത് എന്നൊരു ചിന്ത ഇന്ന് പല ഗുജറാത്തികളിലുമുണ്ട്.

മതപരിവര്‍ത്തന വിരുദ്ധ നിയമങ്ങള്‍ പലപ്പോഴും ന്യൂനപക്ഷങ്ങളെ, പ്രത്യേകിച്ചും ക്രിസ്ത്യാനികളെ ലക്ഷ്യം വയ്ക്കാനായി ദുരുപയോഗിക്കപ്പെടുന്നു…
അതു ശരിയാണ്. ഗുജറാത്തും, രാജസ്ഥാനുമാണ് ഇത്തരം നിയമങ്ങള്‍ കൊണ്ടു വന്ന രണ്ടു സംസ്ഥാനങ്ങള്‍. ‘ഫ്രീഡം ഓഫ് റിലീജിയന്‍ ആക്ട്’ (മതസ്വാതന്ത്ര്യ നിയമം) എന്നാണ് ഇതിന്റെ പേരെങ്കിലും, ഇത് വാസ്തവത്തില്‍ ചെയ്യുന്നത് സ്വന്തം മതം പഠിപ്പിക്കാനും, പ്രചരിപ്പിക്കാനും ഇന്ത്യയിലെ ഏതു പൗരനും/പൗരയ്ക്കും അവകാശമുറപ്പു നല്‍കുന്ന ഭരണഘടനയുടെ ആര്‍ട്ടിക്കിള്‍ 25ന്റെ ലംഘനമാണ്. ഈ നിയമങ്ങള്‍ ഭരണഘടനാ വിരുദ്ധമാണെന്ന അഭിപ്രായമാണ് എനിക്കുള്ളത്.

ഭവന, വിദ്യാഭ്യാസ, തൊഴില്‍ പദ്ധതികളില്‍ നിന്നെല്ലാം ഗുജറാത്തിലെ മുസ്ലിങ്ങള്‍ മാറ്റി നിര്‍ത്തപ്പെടുന്നു എന്ന് വാര്‍ത്തകളുണ്ട്. അതിനെ കുറിച്ച് എന്തു പറയുന്നു?   
സത്യമാണ്. ഈ കണക്കുകള്‍ നോക്കു: ഗുജറാത്തിലെ മൊത്തം മുസ്ലിം ജനസംഖ്യയുടെ 26 ശതമാനം മാത്രമേ പത്താം ക്ലാസ് വരെയെത്തുന്നുള്ളൂ. സംസ്ഥാനത്തെ മൊത്തം കണക്കെടുത്താല്‍ ഇത് 41 ശതമാനമാണ്. പട്ടണങ്ങളില്‍ താമസിക്കുന്ന മുസ്ലിങ്ങളിലെ ദാരിദ്ര്യം ഉന്നതജാതിക്കാരായ ഹിന്ദുക്കളെ അപേക്ഷിച്ച് 800 ശതമാനവും, ഒബിസി വിഭാഗങ്ങളെ അപേക്ഷിച്ച് 50 ശതമാനവും അധികമാണ്. സംസ്ഥാനത്തെ മൊത്തം ബാങ്ക് അക്കൗണ്ടുകളില്‍ 12 ശതമാനത്തോളം മുസ്ലിങ്ങളുടേതാണ്, പക്ഷേ, കേവലം 2.6 ശതമാനത്തിനു മാത്രമേ ലോണ്‍ ലഭിക്കുന്നുള്ളൂ. കടുത്ത പട്ടിണിയും, പോഷകദാരിദ്ര്യവുമുള്ള സംസ്ഥാനമാണ് ഗുജറാത്ത് എന്നത് മറക്കരുത്. സ്ത്രീകളിലും കുട്ടികളിലും ലോഹിതക്ഷയം (anaemia) 1999ല്‍ 46.3 ശതമാനമായിരുന്നെങ്കില്‍, 2004ല്‍ അത് 55 ശതമാനമായുയര്‍ന്നു. ഇതാണ് ‘വൈബ്രന്റ് ഗുജറാത്തി’ന്റെ ഒരു നേട്ടം.

പരാജയം കേന്ദ്ര സര്‍ക്കാരിന്റേതു കൂടിയാണ്. ഉദാഹരണത്തിന്, 2002 മുതലുള്ള വാര്‍ഷിക റിപോര്‍ട്ടുകളില്‍ ഗുജറാത്ത് കലാപബാധിതരെ പുനരധിവസിപ്പിക്കുന്നതില്‍ അലംഭാവം കാണിക്കുകയാണെന്ന് ദേശീയ മനുഷ്യാവകാശ കമ്മിഷന്‍ പ്രസ്താവിക്കുന്നുണ്ട്. പക്ഷേ, ഈ റിപോര്‍ട്ടുകളുടെ അടിസ്ഥാനത്തില്‍ ഒരു നടപടിയും എടുക്കപ്പെട്ടിട്ടില്ല. ദേശീയ ന്യൂനപക്ഷ കമ്മിഷനും മുസ്ലിം യുവാക്കള്‍ക്കുള്ള സ്കോളര്‍ഷിപ്പുകള്‍ സംസ്ഥാന സര്‍ക്കാര്‍ നല്‍കാതിരുന്ന വിഷയത്തില്‍ ഇടപെട്ടില്ല. ദേശീയ വനിതാ കമ്മിഷനും, ദേശീയ ശിശുവവകാശ സംരക്ഷണ കമ്മിഷനുകളും ലോഹിതക്ഷയ, പട്ടിണി വാര്‍ത്തകളിന്മേല്‍ ഒരു നടപടിയുമെടുത്തതായറിവില്ല. എന്തു കൊണ്ട്?

പാര്‍ശ്വവത്കരിക്കപ്പെട്ടവരുടെ ജീവിതമെങ്ങിനെയാണ്?
അവരുടെ മുന്നിലുള്ള ഒരേയൊരു മാര്‍ഗം നിലനില്‍ക്കുന്ന വിവേചനത്തിനെതിരെ ശക്തമായി പോരാടുക എന്നതാണ്. അതിനായി കോടതികളും, സര്‍ക്കാര്‍ ഏജന്‍സികളും എന്നിവേണ്ട അന്താരാഷ്ട്ര ഫോറങ്ങളുമുള്‍പ്പെടെ ലഭ്യമായ എല്ലാ വഴികളും ഉപയോഗിക്കുക. സമുദായ സംഘടനകള്‍ ഇത്തരം പോരാട്ടത്തിന് സഹായവുമായി മുന്നോട്ടു വരുന്നുണ്ട് എന്നത് ആശാവഹമാണ്. പക്ഷേ, ഇന്ത്യന്‍ സ്റ്റേറ്റ് എവിടെയാണ്? എവിടെയാണ് ഗുജറാത്ത് സര്‍ക്കാര്‍?

എല്ലാ പൗരര്‍ക്കും, അവര്‍ ദലിതരോ, ക്രിസ്ത്യാനികളോ, മുസ്ലിങ്ങളോ ആകട്ടെ, തുല്യാവകാശം ഉറപ്പു വരുത്താനുള്ള ഭരണഘടനാപരമായ ഉത്തരവാദിത്വം സര്‍ക്കാരിനില്ലെ? ഭവനപദ്ധതി, സ്കോളര്‍ഷിപ്പുകള്‍ എന്നിങ്ങനെയുള്ള കാര്യങ്ങളില്‍ സര്‍ക്കാരിന്റെ ഏതു ഡിപാര്‍ട്മെന്റാണ് വിവേചനം നടപ്പാക്കുന്നതെന്ന് നമ്മള്‍ കൃത്യമായി കണ്ടെത്തേണ്ടതുണ്ട്. ഈ വാര്‍ത്തകള്‍ വെളിയില്‍ കൊണ്ടു വരാനായി മാധ്യമങ്ങള്‍ പരിശ്രമിക്കണം. പുരോഗമ സ്വഭാവമുള്ള രാഷ്ട്രീയ പ്രവര്‍ത്തകരും ഈ സമരങ്ങളെ ഏറ്റെടുക്കേണ്ടതുണ്ട്. എന്നാല്‍, ഈ ‘നമ്മള്‍’/'അവര്‍’ എന്ന ദ്വന്ദം സംസ്ഥാനത്തെ രാഷ്ട്രീയ പ്രതിപക്ഷത്തെ പോലും പ്രതിരോധത്തിലാക്കിയിരിക്കുകയാണ്.

എവിടെയാണ് പുരോഗമന രാഷ്ട്രീയ പ്രസ്ഥാനങ്ങള്‍? ഒരു കാലത്ത് സിപിഎമ്മും, സിപിഐയുമുള്‍പ്പെടുന്ന ഇടതു പാര്‍ടികളും അവയുടെ ബഹുജന സംഘടനകളുമെല്ലാം സംസ്ഥാനത്തെ ഇത്തരം പോരാട്ടങ്ങളില്‍ സജീവമായിരുന്നു. ഇന്ന് അവരെയൊന്നും കാണാന്‍ പോലുമില്ല.

മോഡിയുടെ സദ്ഭാവനാ മിഷനെ പറ്റി എന്തു പറയാനുണ്ട്?   
ഈ ലോകത്തിനു തന്നെ അപമാനമാണത്. നികുതിദായകര്‍ കഷ്ടപ്പെട്ട് സമ്പാദിച്ച പണം ദുര്‍വ്യയം ചെയ്യുകയാണ് നരേന്ദ്ര മോഡി. മുഖ്യമന്ത്രിയോടു മാത്രമല്ല, അദ്ദേഹത്തെ ഇക്കാലമത്രയും ശക്തമായി പിന്തുണച്ചു വരുന്ന മറ്റൊരു ബിജെപി നേതാവ് അരുണ്‍ ജെയ്റ്റ്ലിയോടോ, അല്ലെങ്കില്‍ ബിജെപിയുടെ മറ്റേതെങ്കിലും ദേശീയ നേതാവിനോടോ 2002ലെ കൂട്ടക്കൊലകളെ കുറിച്ചു ചോദിച്ചു നോക്കു… അവരിലാരെങ്കിലും അതിനെ അപലപിക്കുമോ? ഗോദ്ര ദുരന്തത്തെ എല്ലാവരും ഒരേ ശബ്ദത്തില്‍ അപലപിച്ചിട്ടുണ്ട്. പക്ഷേ, ഗോദ്രാനന്തര അക്രമങ്ങളെ തള്ളിപ്പറയാന്‍ സംഘപരിപാരത്തിനെന്താണിത്ര മടി? കാരണം, കൂട്ടക്കൊലയുടേയും, വെറുപ്പിന്റേയും നേട്ടങ്ങള്‍ തങ്ങള്‍ യഥേഷ്ടം കൊയ്തെടുത്തിട്ടുണ്ടെന്ന് ഇക്കൂട്ടങ്ങള്‍ക്കറിയാം.

‌‌–ഫ്രണ്ട്ലൈന്‍ മാഗസിനില്‍ വന്ന അഭിമുഖത്തിന്റെ പരിഭാഷ  

Share DilliPost

• 

Tags: Fascism, Gujarat riot, Interview, Narendra Modi, Teesta Setalvad