ആരായിരിക്കും ഒബാമയുടെ എതിരാളി

Share DilliPost

• 

റെജി പി ജോര്‍ജ്

അമേരിക്കയിലെ റിപബ്ലിക്കന്‍ പാര്‍ടി തീവ്രവലതുപക്ഷത്തേക്ക് അതിവേഗം നീങ്ങിക്കൊണ്ടിരിക്കുകയാണ് എന്ന ഒന്നിലധികം പഠനങ്ങള്‍ അടുത്ത കാലത്ത് വരികയുണ്ടായി. പാര്‍ടികളുടെ പ്രത്യയശാസ്ത്ര നിലപാടുകള്‍ പഠനവിധേയമാക്കി കൊണ്ട് വോട്ട് വ്യൂ ബ്ലോഗ് തെയ്യാറാക്കിയ റിപോര്‍ട്ടനുസരിച്ച് അമേരിക്കന്‍ കോണ്‍ഗ്രസില്‍ ഡെമോക്രാറ്റിക്-റിപബ്ലിക്കന്‍ ധ്രുവീകരണം കഴിഞ്ഞ ഒന്നേകാല്‍ നൂറ്റാണ്ടിനിടയ്ക്ക് ഏറ്റവും രൂക്ഷമാണിപ്പോള്‍ (താഴെയുള്ള ചാര്‍ട്ട് കാണുക). ഇതിനര്‍ത്ഥം ഡെമോക്രാറ്റിക് പാര്‍ടി ഇടതുപക്ഷത്തേക്ക് ചാഞ്ഞുവെന്നല്ല, മറിച്ച് റിപബ്ലിക്കന്‍ പാര്‍ടി കൂടുതല്‍ തീവ്രമായ വലതുനിലപാടുകളിലേക്ക് ചേക്കേറിയെന്നാണ്. അതുകൊണ്ടു തന്നെ റിപബ്ലിക്കന്‍ സ്ഥാനാര്‍ത്ഥികള്‍ തങ്ങളുടെ തീവ്ര നിലപാടുകള്‍ ഉയര്‍ത്തി പിടിച്ച് പരമാവധി യാഥാസ്ഥിതിക വോട്ടുകള്‍ സ്വരുക്കൂട്ടാനാണ് നിലവില്‍ ശ്രമിച്ചുകൊണ്ടിരിക്കുന്നത്.

നെറ്റ് ഗിന്‍ഗ്രിച്ചിന്റെ കാര്യം തന്നെയെടുക്കുക. അമേരിക്കന്‍ പ്രതിനിധി സഭാ സ്പീക്കര്‍ എന്ന നിലയില്‍ പേരെടുത്ത ഗിന്‍ഗ്രിച്ച് വാഷിംഗ്ടണ്‍ രാഷ്ടീയത്തില്‍ ഒരു പ്രമുഖ സാന്നിധ്യമാണ്. എന്നാല്‍ റിപബ്ലിക്കന്‍ പാര്‍ടിയിലെ യാഥാസ്ഥിതികര്‍ തമ്മിലുള്ള കിടമത്സരത്തില്‍ ഗിന്‍ഗ്രിച്ചിനു നഷ്ടപ്പെട്ടത് തന്റെ സദാചാര മുഖംമൂടിയാണ്. സ്വയം കടുത്ത യാഥാസ്ഥിതികനെന്ന് ഉയര്‍ത്തി കാണിക്കുന്ന ഗിന്‍ഗ്രിച്ച് ഇവാഞ്ചലിക്കല്‍ സഭയുടെ വോട്ടുകര്‍ക്കു വേണ്ടി കടുത്ത കിടമത്സരത്തിലാണ്. അതിനിടയിലാണ്, നോര്‍ത്ത് കരോലിനാ പ്രൈമറിക്ക് തൊട്ടു മുമ്പ്, എന്‍ബിസി ചാനല്‍ വഴി അദ്ദേഹത്തിന്റെ മുന്‍ രണ്ടാം ഭാര്യ ഗിന്‍ഗ്രിച്ച് തന്നെ ‘ഓപണ്‍ മാര്യേജി’നു നിര്‍ബന്ധിച്ചിരുന്നു എന്ന പ്രസ്താവന നടത്തുന്നത്. ‘ഓപണ്‍ മാര്യേജ്’ എന്നു പറഞ്ഞാല്‍ വിവാഹബന്ധത്തില്‍ ഏര്‍പ്പെടുന്ന വ്യക്തികള്‍ പരസ്പരം സമ്മതിക്കുകയാണ്, തങ്ങള്‍ക്ക് വിവാഹേതര ലൈംഗിക ബന്ധം പുലര്‍ത്തുവാന്‍ അവകാശം ഉണ്ടെന്ന്. ഗിന്‍ഗ്രിച്ചിനെതിരെ വന്ന പുത്തന്‍ ആരോപണത്തെകുറിച്ച് സംസാരിച്ചുകൊണ്ടാണ് സിഎന്‍എന്‍ റിപോര്‍ട്ടര്‍ ജോണ്‍ കിംഗ് നോര്‍ത്ത് കരോലിന പ്രൈമറി തുടങ്ങി വച്ചത് തന്നെ.

തെരഞ്ഞെടുപ്പിനു മുന്‍പ് വരെ മിറ്റ് റോമ്നി നോര്‍ത്ത് കരോലിന പ്രൈമറിയില്‍ വിജയിക്കും എന്നായിരുന്നു പൊതുവേ പ്രതീക്ഷിക്കപ്പെട്ടിരുന്നത്. എന്നാല്‍, തെരഞ്ഞെടുപ്പു സമയത്ത് തനിക്കെതിരെ ഉയര്‍ന്ന ആരോപണത്തെ ഒരവസരമാക്കി മാറ്റുകയാണ് ഗിന്‍ഗ്രിച്ച് ചെയ്തത്. ആദ്യമേ തന്നെ അദ്ദേഹം സിഎന്‍എന്‍ റിപോര്‍ട്ടര്‍ ജോണ്‍ കിംഗിനെ രൂക്ഷമാ‍യ ഭാഷയില്‍ കൈകാര്യം ചെയ്തു. ഇത് വളരെ പക്ഷപാതപരമായ തുടക്കമാണ്, ഒരു പ്രസിഡന്‍ഷ്യല്‍ പ്രൈമറി തുടങ്ങുവാന്‍ സിഎന്‍എന്‍ ഇങ്ങിനെ വ്യക്തിഹത്യ ആയുധമാക്കുന്നത് അമേരിക്കക്ക് മൊത്തം നാ‍ണക്കേടാണ്, തന്റെ എതിരാളിക്ക് അനുകൂലമായി നോര്‍ത്ത് കരോലിനാ പ്രൈമറി മാറ്റുവാനുള്ള ശ്രമമാണിത്, സിഎന്‍ബിസിക്ക് തന്റെ മുന്‍ രണ്ടാം ഭാര്യയുടെ പ്രസ്താവന കള്ളമാണെന്നു തെളിയിക്കുവാന്‍ മൂന്ന് സാക്ഷികളെ വരെ നല്കാം എന്നു പറഞ്ഞിരുന്നു, അവര്‍ അതൊന്നും സ്വീകരിക്കാതെ ഏകപക്ഷീയമായിട്ടാണ് ഇതുചെയ്തത് എന്നിങ്ങനെ പോയി ഗിന്‍ഗ്രിച്ചിന്റെ വാദങ്ങള്‍. അവ താത്കാലികമായെങ്കിലും ഫലം കണ്ടു. ആസന്നമായ പ്രൈമറിയില്‍ അദ്ദേഹം അട്ടിമറി വിജയം കൊയ്തു. എന്നാല്‍ പിന്നീട് ഗിന്‍ഗ്രിച്ച് പറഞ്ഞതു മുഴുവന്‍ പച്ചക്കള്ളമാണെന്ന് തെളിയുകയും അദ്ദേഹം ആ വാദം പിന്‍വലിക്കയും ചെയ്തു എന്നത് യാഥാര്‍ത്ഥ്യം. ഇത് റിപബ്ലിക്കന്‍ ഇരട്ടത്താപ്പുകളുടെ ഒരു മുഖം.

അമേരിക്കയിലെ ഭവന വായ്പാ ഭീമനായ ഫ്രെഡി മാകിനു ഉപദേശം നല്കുന്നതിന് 1.6 മില്യണ്‍ ഡോളര്‍ (ഏകദേശം 8 കോടി രൂപ) കൈപ്പറ്റുകയും, അന്നീട്ട് അതേ ഫ്രെഡി മാകിനെ പൊതുവേദിയില്‍ വിമര്‍ശിക്കുകയും ചെയ്തിന്റെ പേരിലും ഗിന്‍ഗ്രിച്ചിന് വിമര്‍ശനം ഏറ്റുവാങ്ങേണ്ടി വന്നു. ഗിന്‍ഗ്രിച്ച് താഴേക്ക് പോകുമ്പോള്‍ മിറ്റ് റോമ്നിയുടെ വിജയം പല പ്രൈമറികളിലും മാധ്യമങ്ങള്‍ ഉറപ്പിക്കുകയായിരുന്നു. ‘റ്റൈം’ മാഗസിന്‍ റോമിനിക്കു സാധ്യത തീരെ ഇല്ല എന്നു എഴുതി തുടങ്ങിയിട്ട് ഒടുക്കം റോമ്നി അസാധ്യമായ തിരിച്ചുവരവ് നടത്തുന്നു എന്ന് പുതിയ കവര്‍പേജ് വാര്‍ത്ത എഴുതി. ആ വാര്‍ത്തയുടെ ചൂടാറുന്നതിനു മുന്‍പേ റിക് സാന്റൊറം എന്ന ഇറ്റാലിയന്‍ വംശജന്‍ മത്സരരംഗത്തെ കറുത്ത കുതിരയായുയര്‍ന്നു.

നാല്പതുകളില്‍ നില്‍ക്കുന്ന ഈ യാഥാസ്ഥിതികനാണ് ഇപ്പോള്‍ ഇവാഞ്ചലിക്കല്‍ സഭയുടെ ഇഷ്ടതാരം. തന്റെ പൂര്‍വ പിതാമഹന്‍ ഒരു ഖനിതൊഴിലാളി ആയിട്ടാണ് അമേരിക്കയില്‍ ജീവിച്ചത്, അതിനാല്‍ തനിക്ക് തൊഴിലാളികളുടെ ജീവിതവുമായി അഭേദ്യമായ ബന്ധമുണ്ടെന്നാണ് സാന്റോറാമിന്റെ വാദം. റോമ്നി മസാച്യുസെറ്റ്സ് ഗവര്‍ണര്‍ എന്ന നിലയില്‍ ലിബറല്‍ നയങ്ങളാണ് പലപ്പോഴും നടപ്പാക്കിയിരുന്നതെന്നും, അതു റിപബ്ലിക്കന്‍ പാര്‍ടിയുടെ യാഥാസ്തിതിക അജന്‍ഡയ്ക്കു വിരുദ്ധമായിരുന്നുവെന്നും പറഞ്ഞുകൊണ്ടാണ് സാന്റൊറാം റൊമ്നിയെ ആക്രമിച്ചത്. യാഥാസ്തിതിക വോട്ടുകള്‍ തനിക്കനുകൂലമായി സ്വരുക്കൂട്ടുക, ഇവാഞ്ചലിക്കല്‍ സഭയുടെ പിന്തുണ നേടുക എന്നിവയായിരുന്നു ഈ തന്ത്രത്തിന്റെ പ്രധാന ലക്ഷ്യങ്ങള്‍. അതു ഫലം കണ്ടില്ലെന്നു പറഞ്ഞുകൂടാ; മൂന്നു കോക്കസുകളിലും ഒരു പ്രൈമറിയിലും അദ്ദേഹം ഇതുവരെ വിജയിച്ചിട്ടുണ്ട്. ഒബാമയുടെ ക്രിസ്ത്യന്‍ മൂല്യങ്ങളില്‍ അവിശ്വാസം രേഖപ്പെടുത്തിയും, സ്വവര്‍ഗ വിവാഹങ്ങളെ എതിര്‍ത്തും ഇനി വരാനിരിക്കുന്ന തെരഞ്ഞെടുപ്പുകളില്‍ തന്റെ പ്രചാരണത്തിന്റെ ദിശ എങ്ങോട്ടായിരിക്കുമെന്ന് സാന്റോറാം ഇതിനകം കൃത്യമായ സൂചന നല്‍കിയിട്ടുണ്ട്.

ഒരു തികഞ്ഞ കോണ്‍സ്റ്റിറ്റ്യൂഷനലിസ്റ്റ് (ഗവണ്മെന്റ് വളരെ പരിമിതമായ നിലയില്‍ മാത്രം മതി എന്ന് വാദിക്കുന്ന) ആയ റോണ്‍ പോള്‍ ആണ് നിലവിലുള്ള മറ്റൊരു സ്ഥാനാര്‍ത്ഥി. റിപബ്ലിക്കന്‍ പാര്‍ടിയിലെ യുവാക്കളെ ഏറ്റവുമധികം സ്വാധീനിക്കുന്ന ഈ ലിബര്‍ട്ടേറിയന്‍ സ്വതന്ത്ര സ്ഥാനാര്‍ത്ഥി ആയി രംഗത്തുവരുവാന്‍ പോലും സാധ്യതയുണ്ടെന്നു കേള്‍ക്കുന്നു. റ്റീപാര്‍ടി മൂവ്മെന്റിന്റെ ആത്മിയഗുരു എന്നു വിശേഷിപ്പിക്കാവുന്ന റോണ്‍ പോള്‍ വളരെ പരിമിതമായ സര്‍ക്കാര്‍, സ്വര്‍ണത്തെ അടിസ്ഥാനമാക്കിയുള്ള ഡോളര്‍, പരിമിതമായ വിദേശ നയം, വ്യക്തി സ്വാതന്ത്ര്യത്തിന് സ്റ്റേറ്റിനെക്കാള്‍ വലുപ്പം, ദേശീയ ഇന്‍കം റ്റാക്സ് നിരോധനം എന്നൊക്കെയുള്ള നയങ്ങളാണ് അദ്ദേഹമുയര്‍ത്തുന്നത്. അമേരിക്കയുടെ ഫെഡറല്‍ റിസേര്‍വ് നിര്‍ത്തലാക്കണം എന്നു പോലും റോണ്‍ പോള്‍ വാദിക്കുന്നു!

അതി സമ്പന്നനും ഒരു മോര്‍മോണ്‍ വിശ്വാസിയുമായ മിറ്റ് റോമ്നിയാണ് റിപബ്ലിക്കന്‍ പാര്‍ടിയുടെ ഏറ്റവും ശ്രദ്ധേയനായ സ്ഥാനാര്‍ത്ഥി. മുന്‍ പ്രസിഡന്റ് ജോര്‍ജ് ബുഷിന്റെ അടക്കം പിന്തുണയുമായി മത്സരരംഗത്തുള്ള റോമ്നി റിപബ്ലിക്കന്‍ പാര്‍ടിയിലെ യാഥാസ്ഥിതികരുമായി നല്ല ബന്ധത്തിലല്ല. മോര്‍മോണിസത്തിന്റെ ഭാഗമായതിനാല്‍ ഇവാഞ്ചലിക്കല്‍ ചര്‍ച്ചിനും റോമ്നി സ്വീകാര്യനല്ല. വളരെ പ്രതിലോമകരമായ നിലപാടുകളും തന്റെ തന്നെ പല നയങ്ങളും മാറ്റിയും അറിച്ചും പറഞ്ഞും താത്കാലിക ലാഭം കൊയ്യുവാനുള്ള ശ്രമത്തില്‍ റോമ്നി ശ്രദ്ധേയമാകുന്നത്, 2008ല്‍ ഒബാമ നടത്തിയ പ്രചാരണത്തെ അപ്പടി കോപ്പി ചെയ്യുന്നതിലൂടെയാണ്. ഒബാമയുടെ ‘യെസ് വി ക്യാന്‍’ എന്ന മുദ്രാവാക്യത്തെ അനുകരിച്ച് ‘കീപ്പ് അമേരിക്ക, അമേരിക്കന്‍’ എന്നൊരു മുദ്രാവാക്യം ഉയര്‍ത്തിയാണ് റോമ്നി ഇലക്ഷനില്‍ ഇറങ്ങിയിരിക്കുന്നത്. എന്നാല്‍, ‘കെകെകെ’ എന്ന ചുരുക്കപേരില്‍ അറിയപ്പെടുന്ന കുക്ലക്സ് ക്ലാന്‍ എന്ന തീവ്ര വലതുപക്ഷ ഗ്രൂപ്പിന്റെ മുദ്രാവാക്യം ആണിതെന്ന് വാര്‍ത്തകളിലൂടെ പുറത്തു വന്നത് വിവാദമായിരിക്കുകയാണ്.

റോമ്നിയുടെ ബെയ്ന്‍ കാപ്പിറ്റല്‍ എന്ന കമ്പനിയിലെ ജോലിയാണ് മറ്റൊരു വിവാദം സൃഷ്ടിക്കുന്ന ആരോപണം. നഷ്ടത്തില്‍ ഓടുന്ന കമ്പനികളെ ലാഭത്തില്‍ ആക്കുകയാണ് ബെയ്ന്‍ കാ‍പ്പിറ്റല്‍ ചെയ്യുന്നത് എന്നാണ് അദ്ദേഹത്തിന്റെ അവകാശവാദം. അങ്ങനെ പതിനായിരക്കണക്കിനു പുതിയ ജോലികള്‍ സൃഷ്ടിച്ചു എന്നും റോമ്നി അവകാശപ്പെടുന്നു. എന്നാല്‍ ബെയ്ന്‍ കാപ്പിറ്റല്‍ ചെറുകിട ഇടത്തരം സ്റ്റോറുകളെ കോര്‍പറേറ്റ്വത്കരിച്ച് തൊഴില്‍ നഷ്ടം ഉണ്ടാക്കുന്നു എന്നതാണ് അതിനെതിരെ ഉയരുന്ന പ്രധാന ആരോപണം. അതിസമ്പന്നനായ റൊമ്നി 1% വരുന്ന അതിസമ്പന്നര്‍ക്ക് നികുതി കൂട്ടുന്നതിനെതിരാണ്. അദ്ദേഹം പറയുന്നത് സമ്പന്നരുടെ കൈവശം പണം ഉണ്ടെങ്കില്‍ മാത്രമേ രാജ്യത്ത് പുത്തന്‍ വ്യവസായം വരൂ എന്നാണുതാനും. അതിനാല്‍ സമ്പന്നര്‍ക്ക് നികുതിയിളവു നല്‍കണം. നികുതി കുറച്ചാല്‍ കൂടൂതല്‍ പണം കൈയ്യില്‍ വരും, അപ്പോള്‍ കൂടൂതല്‍ ബിസിനസ് അവര്‍ തുടങ്ങും, അതുവഴി കൂടുതല്‍ ആളുകള്‍ക്ക് ജോലി കിട്ടും എന്നതാണ് നയം.

കൂട്ടത്തില്‍ ഒബാമ ഒരു സോഷ്യലിസ്റ്റ് ആണെന്ന ആരോപണം ഉയര്‍ത്തി പ്രസിഡന്റിനെ നയങ്ങളെ ആക്രമിക്കുന്ന തന്ത്രവുമുണ്ട്. സോഷ്യലിസം തെറ്റാണെന്ന് വിശ്വസിക്കപ്പെടുകയും, സംഘടിതമായി പ്രചരിക്കപ്പെടുകയും ചെയ്യുന്ന ഒരു രാജ്യത്ത് ഭരിക്കുന്നവര്‍ക്കെതിരെ പ്രയോഗിക്കാവുന്ന ഏറ്റവും വലിയ ആരോപണമാണിത്. പൊതുവില്‍ സ്ഥാനാര്‍ത്ഥി ആകുവാനുള്ള മത്സരത്തില്‍ വളരെ മുമ്പില്‍ നില്ക്കുന്ന റോമ്നി നേരിടുന്ന വലിയ പ്രതിസന്ധി റിപബ്ലിക്കന്‍ പാര്‍ടിയുടെ ശക്തി ദുര്‍ഗമായ യാഥാസ്ഥിതിക വിഭാഗത്തിന് ഇപ്പോഴും സ്വീകാര്യനായിട്ടില്ല എന്നതാണ്.

പൊളിറ്റിക്കല്‍ ആക്ഷന്‍ കമ്മറ്റികള്‍
സ്ഥാനാര്‍ത്ഥികള്‍ എല്ലാവരും തന്നെ സമ്പന്നരാണെങ്കിലും ഒരു സ്ഥാനാര്‍ത്ഥിക്ക് സ്വന്തമായി ചിലവാക്കുവാന്‍ കഴിയുന്ന പണത്തിന് ഒരു പരിധി കര്‍ശനമായി നിശ്ചയിക്കപ്പെട്ട ഒരു തെരഞ്ഞെടുപ്പാണ് ഇപ്പോഴത്തേത്. എന്നാല്‍, തിരഞ്ഞെടുപ്പു കമ്മിഷന്റെ ഇത്തരം നിയന്ത്രണങ്ങളെ റിപബ്ലിക്കന്‍ പാര്‍ടി സ്ഥാനാര്‍ത്ഥികള്‍ വളരെ തന്ത്രപൂര്‍വം മറികടക്കുന്നതാണ് ഇപ്പോഴത്തെ പ്രചാരണത്തില്‍ നമ്മള്‍ കാണുന്നത്. പൊളിറ്റിക്കല്‍ ആക്ഷന്‍ കമ്മറ്റികള്‍ (പിഎസി) എന്ന് അറിയപ്പെടുന്ന ഒരു തരം എന്‍ജിഒ സംഘടനകളെ ഉപയോഗിച്ചാണ് ഈ പ്രചാരണം നടത്തുന്നത്.

തെരഞ്ഞെടുപ്പു ചട്ടത്തെ മറി കടക്കുന്നതിങ്ങനെ: സ്ഥാനാര്‍ത്ഥിയുടെ പ്രധാനപ്പെട്ട തിരഞ്ഞെടുപ്പു കമ്മറ്റിയംഗം ഒരു ദിവസം അപ്രതീക്ഷിതമായി രാജിവയ്ക്കുന്നു. അടുത്ത ദിവസം അദ്ദേഹം ഒരു പിഎസിയുടെ തലപ്പത്ത് വരുന്നു. പിഎസി സ്ഥാനാര്‍ത്ഥിക്കു വേണ്ടീ ഒരു യോഗം സംഘടിപ്പിക്കുന്നു. സ്ഥാനാര്‍ത്ഥി അവിടെ വേദിയില്‍ സന്നിഹിതനായിരിക്കുമ്പോള്‍ പഴയ തെരഞ്ഞെടുപ്പു കമ്മറ്റി മെമ്പര്‍ സ്ഥാനാര്‍ത്ഥിയുടെ സാന്നിധ്യത്തില്‍ പിഎസിയുടെ പ്രവര്‍ത്തനം വിശദീകരിക്കുന്നു. അതിനു വേണ്ടീ സാമ്പത്തിക സഹായം ആവശ്യപ്പെടുന്നു. അവിടെ കടന്നു വരുന്നവര്‍ക്ക് ആ പിഎസിയുടെ പ്രവര്‍ത്തനത്തിന് എത്ര രൂപ കൊടുക്കുന്നതിനും പരിധിയില്ല. അങ്ങനെ പൊളിറ്റിക്കല്‍ ആക്ഷന്‍ കമ്മറ്റികള്‍ എന്ന പുത്തന്‍ എന്‍ജിഒകളാല്‍ നിയന്ത്രിക്കപ്പെടുന്ന ഒരു തെരഞ്ഞെടുപ്പിലേക്കാണ് അമേരിക്ക നീങ്ങുന്നത്.

പിഎസികളെ വളരെ ശക്തമായി എതിര്‍ത്തിരുന്ന പ്രസിഡന്റ് ഒബാമ ഈയടുത്ത് തനിക്കു വേണ്ടി  ഒരു പിഎസി രൂപികരിക്കുവാന്‍ രംഗത്ത് ഇറങ്ങിയത് വളരെ ശ്രദ്ധ ആകര്‍ഷിക്കപ്പെട്ടു. അദ്ദേഹത്തിന്റെ അനുകൂലികള്‍ പറയുന്നത് പിഎസി രാജ്യത്ത് നിയമപരമായി പരിരക്ഷയുള്ള ഒരു സംവിധാനമാണ്, അതിനെ എതിര്‍ക്കുന്നു എന്ന് പറയുന്നതിനര്‍ത്ഥം ആ രീതിയില്‍ അല്ലാതെ തിരഞ്ഞെടുപ്പു പ്രചാരണം അസാധ്യമാകുന്ന ഒരു തിരഞ്ഞെടുപ്പില്‍ തോല്‍വി സമ്മതിക്കുന്നതിനു സമമാണെന്നാണ്. അതിനാല്‍, തിരഞ്ഞെടുപ്പില്‍ കാശ് ഇറക്കിതന്നെ ഒബാമയും മത്സരിക്കും എന്നര്‍ത്ഥം.

ഒബാമയുടെ സാധ്യതകള്‍
ഡെമൊക്രാറ്റിക് പാര്‍ടിയുടെ സ്ഥാനാര്‍ത്ഥി ആയി വീണ്ടും മത്സരിക്കുവാന്‍ ഒബാമ ഇറങ്ങുമ്പോള്‍ കടന്നുപോയ തെരഞ്ഞെടുപ്പില്‍ കണ്ട ആവേശമൊന്നും ആരും പ്രകടിപ്പിക്കുന്നില്ല. എന്നാല്‍ ദുര്‍ബലരും പരസ്പരം പോരടിക്കുന്നവരുടേതുമായി മാറിയ റിപബ്ലിക്കന്‍ പാര്‍ടിക്കെതിരെ നിലവിലുള്ള സാഹചര്യത്തില്‍ ഒബാമക്ക് ശുഭപ്രതീക്ഷ പുലര്‍ത്തുവാന്‍ കഴിയുന്നുണ്ട്. പക്ഷേ, തെരഞ്ഞെടുപ്പിനിനിയും മാസങ്ങള്‍ കഴിയാനുണ്ടെന്നിരിക്കേ വ്യക്തമായ പ്രവചനങ്ങള്‍ അസാധ്യമാണ്. സമീപകാലത്ത് അമേരിക്കന്‍ സാമ്പത്തിക രംഗത്തുണ്ടായ ഉണര്‍വും, തൊഴിലില്ലായ്മയിലുണ്ടായ ഇടിവും ഒബാമയുടെ ജനപിന്തുണ ശക്തിപ്പെടുത്തിയിട്ടുണ്ട് എന്നാണ് പൊതുവിലുള്ള വിലയിരുത്തല്‍. എന്നാല്‍ മൂന്ന് ലക്ഷത്തോളം വീടുകള്‍ ജപ്തിക്ക് തയ്യാറായി നില്‍ക്കുന്ന ഒരു രാജ്യമാണ് അമേരിക്ക എന്നോര്‍ക്കണം. ആഗോള സാമ്പത്തിക രംഗത്തുണ്ടാകുന്ന ചെറിയ അനക്കങ്ങള്‍ പോലും അമേരിക്കന്‍ സമ്പദ് വ്യവസ്ഥയ്ക്ക് കനത്ത ഷോക്കുകള്‍ ആയി മാറിയേക്കാം.

അതേ സമയം ഒബാമയുടെ നയങ്ങള്‍ ബുഷിന്റേതില്‍ നിന്നും വലിയ വ്യത്യസ്തത ഒന്നും പുലര്‍ത്തുന്നില്ല എന്നത് അമേരിക്കയിലെ അക്കാദമിക ലോകത്തും, മാറ്റങ്ങള്‍ ആഗ്രഹിച്ചിരുന്ന പൊതു സമൂഹത്തിലും വലിയ ഉത്കണ്ഠ ഉളവാക്കുന്നുണ്ട്. അദ്ദേഹം ഒരുഭാഗത്ത് സമാധാനത്തിനുള്ള നൊബേല്‍ സമ്മാനം വാങ്ങുകയും മറുഭാഗത്ത് മനുഷ്യാവകാശ ലംഘനത്തിനും നീതി നിഷേധത്തിനും കൂട്ടുനില്ക്കുകയും ചെയ്യുന്നു എന്ന് ആരോപണം നേരിടുന്നു. ഇറാനുമേലുള്ള ഉപരോധവും യുദ്ധത്തിനു തയ്യാറെടുക്കുന്നതും ഒക്കെ ആശങ്കയുടെ പുകപടലങ്ങള്‍ സൃഷ്ടിക്കുന്നു. അതേസമയം ഇതൊന്നും ഇല്ലാതെ 2012ലെ ഒബാമ എങ്ങിനെ പൊതുതെരഞ്ഞെടുപ്പു ജയിക്കും എന്നതാണ് കാതലായ ചോദ്യം.

Share DilliPost

• 

Tags: Barack Obama, Post from America, Regi P George, US politics, US Presidential Election