ഇറാന്‍-ഇസ്രയേല്‍ സംഘര്‍ഷം ഇന്ത്യയിലേക്ക്

Be Sociable, Share!

• 

ഇറാന്‍-ഇസ്രയേല്‍ സംഘര്‍ഷം കൂടുതല്‍ രൂക്ഷമാകാന്‍ പോകുന്നേയുള്ളൂ എന്ന സന്ദേശമാണ് ഫെബ്രുവരി 13ലെ ദില്ലി കാര്‍ബോംബ് സ്ഫോടനം നല്‍കുന്നത്. ഒരു ഇസ്രയേലി നയതന്ത്രജ്ഞന്റെ ഭാര്യ സഞ്ചരിച്ചിരുന്ന ടൊയോട്ടാ ഇനോവാ കാറാണ് ദില്ലിയില്‍ സ്ഫോടനത്തിനിരയായത്. അവര്‍ എംബസിയില്‍ നിന്നും കുട്ടികളുടെ സ്കൂളിലേക്കു പോകും വഴി മോട്ടോര്‍ബൈക്കില്‍ വന്ന അക്രമികള്‍ ഒരു ട്രാഫിക് സിഗ്നനില്‍ വച്ച് എംബസി കാറില്‍ മാഗ്നറ്റിക് ബോംബ് ഘടിപ്പിക്കുകയായിരുന്നുവെന്ന് പ്രാഥമിക റിപോര്‍ട്ടുകള്‍ പറയുന്നു. സ്ഫോടനത്തില്‍ ഇസ്രയേലി പൗരയ്ക്കും, കാര്‍ ഡ്രൈവര്‍ക്കും ഗുരുതരമായ പരിക്കേറ്റുട്ടുണ്ട്. ജോര്‍ജിയന്‍ തലസ്ഥാനമായ തിബിലിസിയില്‍ ഇസ്രയേലി എംബസിയിലെ ഒരു ഉദ്യോഗസ്ഥന്റെ കാറില്‍ ഏതാണ്ട് ദില്ലിയില്‍ ഉപയോഗിക്കപ്പെട്ടതു പോലെയുള്ള മാഗ്നറ്റിക് ബോംബ് തിങ്കളാഴ്ച തന്നെ ഉദ്യോഗസ്ഥര്‍ നിര്‍വീര്യമാക്കിയിരുന്നു. ഒരു എംബസി ഡ്രൈവര്‍ സമയത്തിനു കാറില്‍ ഘടിപ്പിക്കപ്പെട്ടിരിക്കുന്ന ബോംബ് കണ്ടതു കൊണ്ടാണ് തിബിലിസിയില്‍ സ്ഫോടനം ഒഴിവാക്കാന്‍ പറ്റിയത്. അതായത്, സമായമായ രീതികളിലൂടെയാണ് ഇന്ത്യയിയും ജോര്‍ജിയയിലും ബോംബിംഗ് ആസൂത്രണം ചെയ്യപ്പെട്ടത് എന്ന് സൂചന. ആരാണ് ഇതു ചെയ്തതെന്ന കാര്യത്തില്‍ ഇരുരാജ്യങ്ങളിലേയും ഉദ്യോഗസ്ഥര്‍ ഒന്നും വിട്ടുപറയാന്‍ തെയ്യാറായിട്ടില്ല.

എന്നാല്‍, ദില്ലിയിലെ സ്ഫോടനം നടന്ന് മണിക്കൂറുകള്‍ക്കകം തന്നെ സംഭവത്തിനു പിന്നില്‍ ഇറാനും, ലെബനീസ് ഷിയാ പ്രസ്ഥാനമായ ഹെസ്ബൊല്ലയുമാണെന്ന് ഇസ്രയേല്‍ പ്രധാനമന്ത്രി ബെഞ്ചമിന്‍ നെതന്യാഹു പറയുകയുണ്ടായി. “ആക്രമണത്തിന്റെ ഉത്തരവാദികള്‍ ആരാണെന്ന് ഞങ്ങള്‍ക്ക് കൃത്യമായി അറിയാ”മെന്നായിരുന്നു ഇസ്രയേലി വിദേശകാര്യ മന്ത്രി അവിഗ്ദോര്‍ ലീബെര്‍മാന്റെ പ്രസ്താവന. ആരോപണം ഇറാന്‍ ശക്തമായി നിഷേധിച്ചിട്ടുണ്ട്. എങ്കിലും, നെതന്യാഹുവിന്റെ പ്രസ്താവന സൂചിപ്പിക്കുന്നത് ഇറാന്‍-ഇസ്രയേല്‍ സംഘര്‍ഷം ഉടനെ മൂര്‍ച്ചിക്കുമെന്നതാണ്. പൊതുവേ പ്രതിസന്ധിയിലാണ്ടു കിടക്കുന്ന മിഡില്‍ ഈസ്റ്റിനെ അതു കൂടുതല്‍ കുഴപ്പത്തിലേക്കു വലിച്ചിഴയ്ക്കും.

ഇറാന്‍?
ആരായിരിക്കും ഈ ആക്രമണത്തിനു പിന്നില്‍? ദില്ലിയിലും, തിബിലിസിയിലും ലക്ഷ്യം ഇസ്രയേലി നയതന്ത്രജ്ഞരായിരുന്നുവെന്നത് സംഭവത്തിനു അന്താരാഷ്ട്ര മാനങ്ങള്‍ നല്‍കുന്നു. ചാരസംഘടനകളുടെ രഹസ്യ ഓപറേഷനുകളെ പറ്റിയുള്ള കൃത്യമായ വസ്തുതകള്‍ വളരെ വിരളമായേ പുറത്തു വരാറുള്ളൂ. പക്ഷേ, ബോംബുകള്‍ വയ്ക്കപ്പെട്ട രീതിക്ക് മറ്റു ചില സമാനതകള്‍ കൂടിയുണ്ട്. സമീപകാലത്ത് അഞ്ച് ഇറേനിയന്‍ ആണവശാസ്ത്രഞര്‍ ഏകദേശം ഇതേ രീതിയിലുള്ള ബോംബാക്രമണങ്ങളില്‍ കൊല്ലപ്പെട്ടിരുന്നു. ഇറാന്റെ ആണവപദ്ധതി തകര്‍ക്കുന്നതിനായി ഇസ്രയേലി ചാരസംഘടനയായ മൊസാദ് നടത്തുന്ന രഹസ്യ ഓപറേഷന്റെ ഭാഗമായാണ് ഈ ശാസ്ത്രഞര്‍ കൊല്ലപ്പെടുന്നതെന്ന് പല റിപോര്‍ട്ടുകളുമുണ്ടായിരുന്നു. മാഗ്നറ്റിക് ബോംബുകള്‍ ഉപയോഗിച്ച് ശാസ്ത്രജ്ഞര്‍ സഞ്ചരിച്ചിരുന്ന വാഹനങ്ങള്‍ തകര്‍ത്താണ് പലപ്പോഴും കൊലനടത്തിയിരുന്നത്. ഇറാനിലെ നതാന്‍സ് ആണവ നിലയത്തിലെ ഡയറക്ടറായിരുന്ന മൊസ്തഫ അഹ്മദി റോഷന്‍ ജനുവരി 11നാണ് കാര്‍ബോംബ് ആക്രമണത്തില്‍ കൊല്ലപ്പെട്ടത്. മോട്ടോര്‍സൈക്കിളില്‍ വന്ന അക്രമകാരികള്‍ റോഷന്റെ കാര്‍ മാഗ്നറ്റിക് ബോംബ് വച്ച് തകര്‍ക്കുകയായിരുന്നു. സംഭവത്തിനു ശേഷം ആക്രമണത്തിന്റെ ഉത്തരവാദിത്വം പൂര്‍ണമായും ഇസ്രയേലിനാണെന്നും, പകരം ചോദിക്കുമെന്നും ഇറാന്‍ പറഞ്ഞിരുന്നു.

അമേരിക്കന്‍ ചാനലായ എന്‍ബിസി കഴിഞ്ഞയാഴ്ച പ്രക്ഷേപണം ചെയ്ത ഒരു റിപോര്‍ട്ടും ഇറാനിലെ ഒരു ഭരണകൂട വിമതസംഘത്തിന്റെ സഹായത്തോടെ ഇസ്രയേല്‍ തന്നെയാണ് ശാസ്ത്രജ്ഞരെ കൊലപ്പെടുത്തിയിരുന്നത് എന്ന ആരോപണമുയര്‍ത്തിയിരുന്നു. മൊജാഹിദീന്‍-ഇ കല്‍ഖ് എന്ന ഈ വിമതസംഘടന 1997 മുതല്‍ അമേരിക്കയുടെ തീവ്രവാദ സംഘങ്ങളുടെ പട്ടികയിലുള്ളതാണ്. ഏതാനും അമേരിക്കന്‍ ഉദ്യോഗസ്ഥരെ ഉദ്ധരിച്ചുകൊണ്ടാണ് മൊജാഹിദീന്‍-ഇ കല്‍ഖുമായി ചേര്‍ന്ന് ഇസ്രയേല്‍ ഇറാനില്‍ രഹസ്യപ്രവര്‍ത്തനങ്ങള്‍ നടത്തുന്നുണ്ടെന്ന് എന്‍ബിസി റിപോര്‍ട്ട് പറഞ്ഞത്. അതായത്, ദില്ലിയിലെ സ്ഫോടനം ഒരു പക്ഷേ ഇറേനിയന്‍ പ്രതികാരമായിരിക്കാം. ഇത്തരത്തിലുള്ള രഹസ്യപ്രവര്‍ത്തനങ്ങള്‍ അന്തര്‍ദേശീയ ബന്ധങ്ങളില്‍ പുതിയതല്ല.

ഹെസ്ബൊല്ല?
മറ്റൊരു സാധ്യത സംഭവത്തിനു പിന്നില്‍ ഹെസ്ബൊല്ലയാണെന്നതാണ്. മറ്റു രാജ്യങ്ങളിലെ ഇസ്രയേലി അമേരിക്കന്‍ താത്പര്യങ്ങളെ ഹെസ്ബൊല്ല പലപ്പോഴും ആക്രമിച്ചിട്ടുള്ളതായി ആരോപണങ്ങളുയര്‍ന്നിട്ടുണ്ട്. ആധുനിക ആയുധങ്ങളുടെ കാര്യത്തിലും, ഇന്റലിജന്‍സ് ശേഖരണത്തിന്റെ കാര്യത്തിലും ഹെസ്ബൊല്ല ഒട്ടും പിന്നിലല്ല. മാത്രമല്ല, ഹെസ്ബൊല്ലയുടെ ഓപറേഷന്‍സ് ചീഫായിരുന്ന ഇമാദ് മുഘ്നിയയുടെ നാലാം ചരമവാര്‍ഷികത്തിന്റെ തൊട്ടടുത്ത ദിനമാണ് ദില്ലി ബോംബിംഗ് നടക്കുന്നത്. 2008ല്‍ ഡമാസ്കസില്‍ വച്ചു നടന്ന ഒരു കാര്‍ബോംബ് ആക്രമണത്തിലാണ് മുഘ്നിയ കൊല്ലപ്പെട്ടത്. ആക്രമണത്തിനു പിന്നില്‍ മൊസാദാണെന്ന ആരോപണം ഇന്നും ശക്തമാണ്. ഇസ്രയേലിന്റെ ഹിറ്റ്ലിസ്റ്റിലെ മുമ്പന്മാരിലൊരാളായിരുന്നു മുഘ്നിയ. മുഘ്നിയയുടെ മരണത്തിനു പിന്നില്‍ ഇസ്രയേലാണെന്നും, ഹെസ്ബൊല്ല അതിനു പകരം ചോദിക്കുമെന്നും സംഘടനാ തലവന്‍ ഷേഖ് ഹസന്‍ നസ്റള്ള ഒന്നിലധികം തവണ പറഞ്ഞിട്ടുള്ളതാണ്. ഈ സാഹചര്യത്തിലാണ് ദില്ലി-തിബിലിസി ബോംബുകള്‍ക്കു പിന്നില്‍ ഹെസ്ബൊല്ലയുടെ കൈകളുണ്ടെന്ന് ഇസ്രയേലി ഉദ്യോഗസ്ഥര്‍ പറയുന്നത്.

പക്ഷേ, നിലവില്‍ ആണവവിഷയത്തിന്റെ കാര്യത്തില്‍ ഇറാന്‍ മുന്‍പെത്തേക്കാളധികമായി ഒറ്റപ്പെട്ടു നില്‍ക്കുന്ന അവസരത്തില്‍ ഇത്തരമൊരു പ്രതികാരം കൊണ്ട് തെഹ്റാനും ഹെസ്ബൊല്ലയ്ക്കും എന്തു നേട്ടമാണുണ്ടാകുക എന്നതാണ് ചോദ്യം? പൊതുവേ യുക്തിസഹമായ തീരുമാനങ്ങള്‍, പ്രത്യേകിച്ചും ഇസ്രയേലുമായി ബന്ധപ്പെട്ട വിഷയങ്ങളില്‍, കൈക്കൊള്ളുന്നവരാണ് ഇറാനും ഹെസ്ബൊല്ലയും. മിഡില്‍ ഈസ്റ്റില്‍ ഹെസ്ബൊല്ലയെ പിന്തുണയ്ക്കുന്നത് രണ്ടു രാഷ്ട്രങ്ങളാണ്–ഇറാനും സീറിയയും. അതില്‍ സീറിയയിലെ ബഷര്‍ അല്‍-അസദ് ഭരണകൂടം വന്‍ പ്രതിസന്ധി നേരിട്ടു കൊണ്ടിരിക്കുന്നു. അസദ് വീണാല്‍ ഹെശ്ബൊല്ലയ്ക്ക് അവശേഷിക്കുന്ന ഒരേയൊരു സഖ്യരാജ്യം ഇറാനാകും. ആണവവിഷയത്തിന്റെ കാര്യത്തില്‍ ഇറാനേയും പരമാവധി ഒറ്റപ്പെടുത്താനാണ് പടിഞ്ഞാറന്‍ രാജ്യങ്ങളും ഇസ്രയേലും ശ്രമിച്ചു കൊണ്ടിരിക്കുന്നത്. ആ ശ്രമത്തിന് ഗള്‍ഫ് രാജാക്കന്മാരുടെ പിന്തുണയുമുണ്ട്. അത്തരമൊരു സാഹചര്യത്തില്‍ തിങ്കളാഴ്ച ദില്ലിയിലുണ്ടായതു പോലെയുള്ള സ്ഫോടനം എന്തായാലും ഇറാന്റേയും ഹെസ്ബൊല്ലയുടേയും വിശാലതാത്പര്യങ്ങളോട് ചേര്‍ന്നു പോകുന്ന ഒന്നല്ല.

മറ്റൊരു ശക്തി?
മറ്റൊരു സാധ്യത സ്ഫോടനത്തിനു പിന്നില്‍ ഇറാനെ കൂടുതല്‍ ഒറ്റപ്പെടുത്തണമെന്നാഗ്രഹിക്കുന്ന ശക്തികള്‍ തന്നെയായിരിക്കാമെന്നതാണ്. കുറ്റം എളുപ്പത്തില്‍ ഇറാന്റെ മേല്‍ ചുമത്താനാകും. അതിന്റെ പേരില്‍ തെഹ്റാനെ കൂടുതല്‍ ഒറ്റപ്പെടുത്താനും, ഒരുപക്ഷേ കൂടൂതല്‍ ശക്തമായ ഉപരോധങ്ങള്‍ അടിച്ചേല്പിക്കാനും, അല്ലെങ്കില്‍ ഇറാനെ ആക്രമിക്കാനുള്ള വാദത്തിനു ശക്തിപകരാനും ഈ ശക്തികള്‍ക്കാകും. അതിന്റെ സാധ്യതകള്‍ നെതന്യാഹുവിന്റെ വാക്കുകളില്‍ തന്നെയുണ്ട്. തിങ്കളാഴ്ചയിലെ സ്ഫോടനത്തിനു ശേഷം എക്സ്ക്ലുസീവ് അനാലിസിസ് എന്ന ഇന്റലിജന്‍സ് കമ്പനി ഇസ്രയേല്‍ ഇറാന്റെ ആണവ കേന്ദ്രങ്ങള്‍ ആക്രമിക്കാനുള്ള സാധ്യത 50 ശതമാനത്തില്‍ നിന്നും 60 ശതമാനത്തിലേക്കുയര്‍ത്തിയിരുന്നു.

മിഡില്‍ ഈസ്റ്റിലെ ഈ ചാരയുദ്ധത്തില്‍ പെട്ടുപോകാതെ സ്വന്തം ദേശീയതാത്പര്യങ്ങള്‍ക്കനുസരിച്ചു വേണം ഇന്ത്യ ഈ സംഭവത്തോടു പ്രതികരിക്കേണ്ടത്. സംഭവം നടന്നത് ഇന്ത്യന്‍ മണ്ണിലാണെന്നത് വിഷയത്തിന്റെ ഗൗരവം വര്‍ധിപ്പിക്കുന്നു. ഇന്ത്യ ഒരേ സമയം ഇസ്രയേലിന്റെയും ഇറാന്റേയും ശക്തമായ വ്യാപാര പങ്കാളിയാണ്. അമേരിക്കയുടേയും, യൂറോപ്പിന്റേയും ഉപരോധങ്ങളെ അവഗണിച്ച് ഇറാനുമായുള്ള എണ്ണ വ്യാപാര ബന്ധം തുടരുമെന്ന് പ്രഖ്യാപിച്ചിട്ടുള്ള രാജ്യമാണ്. സത്യം പുറത്തുകൊണ്ടു വരുന്നതിനാകണം ഇന്ത്യ പ്രാമുഖ്യം കൊടുക്കേണ്ടത്.

–ആനുകാലിക അന്തര്‍ദേശീയ രാഷ്ട്രീയത്തെ കുറിച്ചുള്ള പംക്തിയാണ് ബ്രീഫിംഗ്സ്

Be Sociable, Share!

• 

Tags: Briefings, Hezbollah, Iran, israel, Middle East, Mosad