യുപിഎയുടെ നടുവൊടിച്ച വിധി

Be Sociable, Share!

• 

എംജെഎസ്

ഇന്ത്യയുടെ സമീപകാല ചരിത്രത്തിലെ ഏറ്റവും പ്രസക്തമായ വിധികളിലൊന്നാണ് സുപ്രീം കോടതി ഫെബ്രുവരി 2നു പുറപ്പെടുവിച്ചത്. 2008ല്‍ പ്രധാന മന്ത്രി മന്‍മോഹന്‍ സിംഗിന്റെ ആദ്യ മന്ത്രിസഭ നല്‍കിയ ആകെ 122 റ്റെലികോം ലൈസന്‍സുകളും റദ്ദാക്കിയതു വഴി സര്‍ക്കാരിന്റെ റ്റെലികോം നയത്തെ തന്നെയാണ് രാജ്യത്തെ പരമോന്നത നീതിപീഠം പ്രതിക്കൂട്ടില്‍ നിര്‍ത്തിയിരിക്കുന്നത്. മുന്‍ റ്റെലികോം മന്ത്രി ആണ്ടിമുത്തു രാജയെ സിബിഐ അറസ്റ്റ് ചെയ്തതിന്റെ ഒന്നാം വാര്‍ഷിക ദിനം തന്നെയാണ് ജസ്റ്റിസ് ജിഎസ് സിംഗ്വിയും, ജസ്റ്റിസ് എകെ ഗാംഗുലിയുമുള്‍പ്പെടുന്ന ബഞ്ച് ഈ സുപ്രധാന ഉത്തരവിറക്കിയിരിക്കുന്നത് എന്നത് അഴിമതി കഥയിലെ നടകീയ നീതി! ഇതേ കേസില്‍ രാജയെ പ്രോസിക്യൂട്ട് ചെയ്യണമെന്നാവശ്യപ്പെട്ട് ജനതാ പാര്‍ടി നേതാവ് സുബ്രമണ്യ സ്വാമി പ്രധാനമന്തിക്കയച്ച കത്തുകളില്‍ ഒരു നടപടിയുമെടുക്കാതിരുന്ന പ്രധാന മന്ത്രിയുടെ ഓഫീസ് (പിഎംഒ) സുപ്രീം കോടതിയുടെ നിശിതവിമര്‍ശനത്തിനു വിധേയമായത് രണ്ടു ദിവസം മുന്‍പായിരുന്നു എന്നത് മന്‍മോഹന്‍ സിംഗും, അദ്ദേഹത്തിന്റെ യുപിഎ സര്‍ക്കാരും  ഇന്നു നേരിടുന്ന പ്രതിസന്ധിയുടെ ആഴം വ്യക്തമാക്കി തരുന്നുണ്ട്.

Courtesy: The Hindu

2008ല്‍, രാജ റ്റെലികോം മന്ത്രിയായിരുന്ന സമയത്ത് യുപിഎ റ്റെലികോം ലൈസന്‍സുകള്‍ അനുവദിച്ചതില്‍ ആരോപിക്കപ്പെട്ട ക്രമക്കേടുകളാണ് പിന്നീട് രാജ്യത്തെ പിടിച്ചു കുലുക്കിയ സ്പെക്ട്രം അഴിമതിയായി അറിയപ്പെട്ടത്. ശക്തമായ അഴിമതിയാരോപണം പൊതുജനശ്രദ്ധയില്‍ വന്നതിനു ശേഷം സിബിഐ അന്വേഷണമേറ്റെടുക്കുകയും, രാജയുള്‍പ്പെടെ പലരും ജയിലിലാവുകയും, പ്രത്യേക ട്രയല്‍ കോടതി കേസിന്റെ വിചാരണ ആരംഭിക്കുകയും ചെയ്തു. സ്പെക്ട്രം വിതരണത്തില്‍ ക്രമക്കേടുകള്‍ ആരോപിക്കപ്പെട്ടിരുന്നതിനാല്‍ രാജയുടെ മന്ത്രാലയം നല്‍കിയ ലൈസന്‍സുകള്‍ റദ്ദാക്കണമെന്ന ആവശ്യം തുടക്കം മുതലേ ശക്തമായിരുന്നു. കപില്‍ സിബല്‍ റ്റെലികോം മന്ത്രിയായതിനു പിന്നാലെ റ്റെലികോം റെഗുലേറ്റര്‍ ട്രായ് (Telecom Regulatory Authority of India) 62 വിവാദ ലൈസന്‍സുകള്‍ റദ്ദാക്കണമെന്ന് സര്‍ക്കാരിനോടു നിര്‍ദേശിക്കുകയും ചെയ്തിരുന്നു. അന്ന് അതിനു ചെവി കൊള്ളാന്‍ സര്‍ക്കാര്‍ തെയ്യാറായില്ല. എന്നാല്‍ വ്യാഴാഴ്ചത്തെ സുപ്രീം കോടതി വിധിയെ തുടര്‍ന്ന് രാജ നല്‍കിയ 122 ലൈസന്‍സുകളും റദ്ദാക്കി, സ്പെക്ട്രം പുനര്‍ലേലം ചെയ്യാന്‍ നിര്‍ബന്ധിതമായിരിക്കുകയാണ് കേന്ദ്ര സര്‍ക്കാര്‍.

വിധിയുടെ നാനാര്‍ത്ഥങ്ങള്‍
സുപ്രീം കോടതി വിധിയെ പലരും പല വിധത്തില്‍ വ്യാഖ്യാനിക്കാന്‍ ശ്രമിക്കുന്നുണ്ടെങ്കിലും, ഏറ്റവും ലളിതമായി പറഞ്ഞാല്‍ ഭരിക്കുന്ന സര്‍ക്കാരിനു മുഖമടച്ചു കിട്ടിയിരിക്കുന്ന അടിയാണിത് എന്നു കാണാം. ഒന്നാം മന്മോഹന്‍ സര്‍ക്കാരിന്റെ റ്റെലികോം നയത്തെ അപ്പാടെയാണ് കോടതി തള്ളിക്കളഞ്ഞിരിക്കുന്നത്. ആഗോളവത്കരണ കാലത്തെ ഇന്ത്യയില്‍ കോര്‍പറേഷനുകള്‍ എങ്ങിനെ ദേശീയവിഭവങ്ങള്‍ തുച്ഛമായ വിലയ്ക്ക് കൈക്കലാക്കുന്നുവെന്നും, ഭരണകൂടം എങ്ങിനെ അവയ്ക്ക് ഒത്താശ ചെയ്യുന്നു എന്നും മനസിലാക്കണമെങ്കില്‍ ഈയൊരു അഴിമതിക്കഥ മാത്രം പരിശോധിച്ചാല്‍ മതിയാകും.

ട്രായിയുടെ ഉപദേശമനുസരിച്ച്, യുപിഎയ്ക്കു മുന്‍പുള്ള സര്‍ക്കാരിന്റെ റ്റെലികോം നയം പിന്തുടരുക മാത്രമാണ് താന്‍ ചെയ്തതെന്നും, അല്ലാതെ അഴിമതിയൊന്നും നടത്തിയിട്ടില്ലെന്നുമാണ് രാജയുടെ വാദം. ‘ആദ്യം വരുന്നവര്‍ക്കാദ്യം’ (first-come-first-served) എന്ന അടല്‍ ബിഹാരി വാജ്പായി സര്‍ക്കാര്‍ നടപ്പാക്കിയ റ്റെലികോം നയം അതേ പടി പിന്തുടരുകയാണ് മന്‍മോഹന്‍ സിംഗ് സര്‍ക്കാരും ചെയ്തത്. സ്വാഭാവികമായും അക്കാലത്തെ റ്റെലികോം മന്ത്രിയെന്ന നിലയില്‍ ഈ നയം നടപ്പാക്കിയത് രാജയാണു താനും. ഇതിന്റെ അടിസ്ഥാനത്തില്‍, രണ്ടാം തലമുറ സ്പെക്ട്രം ലേലം ചെയ്യാതെ ‘ആദ്യം വന്ന കമ്പനികള്‍ക്ക്’ സര്‍ക്കാര്‍ നല്‍കിയ ലൈസന്‍സുകളാണ് ഇപ്പോള്‍ കോടതി റദ്ദാക്കിയിരിക്കുന്നത്. എത്തിസലാത്ത് ഡിബി (15 ലൈസന്‍സുകള്‍), യൂണിടെക് വയര്‍ലെസ് (22), റ്റാറ്റ റ്റെലിസെര്‍വിസസ് (3), ലൂപ് റ്റെലികോം (21), എസ് റ്റെല്‍ (6), സിസ്റ്റമ ശ്യാം (21), ഐഡിയ സെല്ലുലാര്‍ (9), സ്പൈസ് (4), വീഡിയോകോണ്‍ (21) എന്നീ കമ്പനികള്‍ക്കാണ് ഇപ്പോള്‍ ലൈസന്‍സ് നഷ്ടപ്പെട്ടിരിക്കുന്നത്.

ഇതില്‍ പല കമ്പനികളും ഇപ്പോള്‍ തന്നെ സിബിഐയുടേയും, എന്‍ഫോഴ്സ്മെന്റ് ഉദ്യോഗസ്ഥരുടേയും അന്വേഷണത്തിനു കീഴിലാണ്. കോടതി വിധിയനുസരിച്ച് ഈ കമ്പനികള്‍ക്ക് തങ്ങളുടെ കൈവശമുള്ള സ്പെക്ട്രം തിരിച്ചു സര്‍ക്കാരിനെ ഏല്പിക്കാന്‍ നാലു മാസത്തെ സമയമുണ്ട്. ഇതിനകം ട്രായ് പുതിയ റ്റെലികൊം പോളിസി നിര്‍ദേശിക്കുകയും സര്‍ക്കാര്‍ അതിന്മേല്‍ നടപടിയെടുക്കുകയും വേണം. ദേശീയ വിഭവങ്ങള്‍ സുതാര്യവും, നേരായതുമായ വഴിയിലൂടെയേ വില്‍ക്കാന്‍ പാടൂ എന്ന് ഭരണഘടനയുടെ പതിനാലാം ആര്‍ട്ടിക്കിള്‍ ഉദ്ധരിച്ച് വ്യക്തമാക്കിയ കോടതി ട്രായിക്കും, റ്റെലികോം മന്ത്രാലയത്തിനും വ്യക്തമായ നിര്‍ദേശം നല്‍കി കഴിഞ്ഞു. സര്‍ക്കാരിനു മുന്നില്‍ ഇനിയുള്ള പോംവഴി മേല്പറഞ്ഞ കമ്പനികള്‍ തിരിച്ചേല്പിക്കുന്ന സ്പെക്ട്രം (ഏകദേശം 500 മെഗാഹെര്‍ട്സ്) പുനര്‍ലേലം ചെയ്ത് അര്‍ഹരായ റ്റെലികോം കമ്പനികള്‍ക്കു വില്‍ക്കുകയാണ്.

ഈ ഒമ്പതു കമ്പനികള്‍ ഏകദേശം 6.6 കോടി മൊബൈല്‍ കണക്ഷനുകള്‍ ഇതു വരെ നല്‍കിയിട്ടുണ്ട്. അതായത്, കോടതി വിധി അത്രയും ഉപയോക്താക്കളെ ബാധിക്കുമെന്നുറപ്പ്. പക്ഷേ, പുതിയ റ്റെലികോം പോളിസി നടപ്പാക്കാന്‍ നാലു മാസം അനുവദിക്കപ്പെട്ടിരിക്കുന്ന സാഹചര്യത്തില്‍ ഉപയോക്താക്കള്‍ക്ക് കണക്ഷന്‍ മാറാന്‍ ആവശ്യത്തിനു സമയവും ലഭിക്കും. യൂണിറ്റെക് വയര്‍ലെസിനാണ് ഇക്കൂട്ടത്തില്‍ ഏറ്റവും വലിയ അടിയേറ്റിരിക്കുന്നത്. നോര്‍വീജിയന്‍ കമ്പനിയായ റ്റെലിനോറുമായി ചേര്‍ന്ന് യൂണിനോര്‍ എന്ന ബ്രാന്‍ഡില്‍ യൂണിറ്റെക് ഇതുവരെ 3.6 കോടി മൊബൈല്‍ കണക്ഷനുകള്‍ നല്‍കിയിട്ടുണ്ട്. ഇതു റദ്ദാക്കുന്നതു വഴി കമ്പനിയ്ക്കു വന്‍ നഷ്ടം നേരിടേണ്ടി വരും.

രാഷ്ട്രീയമാനങ്ങള്‍    
ചൊവ്വാഴ്ചത്തെ വിധിയില്‍ തന്റെ ഓഫീസും, രണ്ടു ദിവസത്തിനുള്ളില്‍ വന്ന രണ്ടാം വിധിയില്‍ താന്‍ നയിക്കുന്ന സര്‍ക്കാര്‍ തന്നെയും പ്രതിക്കൂട്ടിലായെങ്കിലും പ്രധാനമന്ത്രി മന്‍മോഹന്‍ സിംഗ് ഈ വിഷയത്തില്‍ ഒന്നു പ്രതികരിക്കുമെന്നു പോലും പ്രതീക്ഷിക്കുക വയ്യ. വ്യാഴാഴ്ചത്തെ കോടതി വിധി വന്നതിനു പിന്നാലെ കോണ്‍ഗ്രസ് തിടുക്കത്തില്‍ വിളിച്ചു ചേര്‍ത്ത പത്രസമ്മേളനത്തില്‍ റ്റെലികോം മന്ത്രി കപില്‍ സിബല്‍ കൂടുതല്‍ സമയവും പ്രധാനമന്ത്രിയേയും, ആഭ്യന്തര മന്ത്രി പി ചിദംബരത്തേയും (വിവാദ ലൈസന്‍സുകള്‍ നല്‍കിയ കാലത്ത് ധനകാര്യ മന്ത്രി) പ്രതിരോധിക്കാനാണ് ചിലവഴിച്ചത്. സ്പെക്ട്രം അഴിമതിയുടെ പൂര്‍ണ ഉത്തരവാദിത്വം മുന്‍ റ്റെലികോം മന്ത്രി രാജയ്ക്കും, ‘ആദ്യം വന്നവര്‍ക്കാദ്യം’ ലൈസന്‍സ് എന്ന നയം രൂപീകരിച്ച എന്‍ഡിഎ സര്‍ക്കാരിനുമാണെന്നാണ് സിബലിന്റെ വാദം. യുപിഎയുടെ മറ്റു മന്ത്രാലയങ്ങളുടെ ഉപദേശം സ്വീകരിക്കുന്നതില്‍ രാജ വീഴ്ച വരുത്തിയെന്നും സിബല്‍ ഇപ്പോള്‍ പറയുന്നു.

സ്പെക്ട്രം അഴിമതിക്കേസുകളുടെ ഓരോ ഘട്ടം കഴിയുമ്പോഴും നിലപാട് മാറ്റിയവരാണ് യുപിഎ സര്‍ക്കാരിലുള്ളവര്‍. രാജക്കെതിരെയുള്ള ആരോപണമുയര്‍ന്ന കാലത്ത് മന്‍മോഹന്‍ സിംഗ് തന്റെ റ്റെലികോം മന്ത്രിയെ സംരക്ഷിക്കുകയാണ് ചെയ്തത്. 2008ല്‍ സ്പെക്ട്രം വിതരണം നടന്ന സമയത്തു തന്നെ സര്‍ക്കാരിന്റെ റ്റെലികോം നയത്തില്‍ ക്രമക്കേടുകളുണ്ടെന്നും, പുതിയ ലൈസന്‍സുകള്‍ നല്‍കിയതിനു പിന്നില്‍ വന്‍ അഴിമതിയുണ്ടെന്നും സിപിഎം ആരോപിച്ചിരുന്നു. അത്തരം വിമര്‍ശനങ്ങള്‍ ചെവികൊള്ളാന്‍ ഉത്തരവാദിത്വപ്പെട്ട പ്രധാനമന്ത്രി തെയ്യാറായില്ലെന്നു മാത്രമല്ല, രാജയെ കയറൂരി വിടുക കൂടിയായിരുന്നു. രാജയുടെ അഴിമതിയുടെ സംഘാടകനെന്നു ആരോപണമുള്ള മുന്‍ റ്റെലികോം സിക്രട്ടറി പിജെ തോമസിനെ കേന്ദ്ര വിജിലന്‍സ് കമ്മിഷണറാക്കി 2010 സെപ്റ്റംബറില്‍ നിയമിക്കുക വഴി സ്വയം കുഴി തോണ്ടുകയായിരുന്നു മന്‍മോഹന്‍ ചെയ്തത്. സര്‍ക്കാരിന്റെ റ്റെലികോം നയം സര്‍ക്കാരിനു ഒന്നേമുക്കാല്‍ കോടി രൂപയുടെ നഷ്ടമുണ്ടാക്കി എന്ന സിഎജി റിപോര്‍ട്ട് വന്നതിനു ശേഷം രാജ ജയിലിലായപ്പോള്‍, രാജയെ മാത്രം ഒറ്റതിരിച്ച് ആക്രമിക്കുക എന്നതായി കോണ്‍ഗ്രസ് തന്ത്രം. പുതിയ റ്റെലികോം മന്ത്രി കപില്‍ സിബല്‍ തുടക്കത്തില്‍ അവകാശപ്പെട്ടത് സിഎജി റിപോര്‍ട്ടില്‍ പറയുന്ന പോലെ സര്‍ക്കാരിനു ഒരു നഷ്ടവും റ്റെലികോം നയം മൂലം വന്നിട്ടില്ലെന്നായിരുന്നു. എന്നാല്‍, റ്റെലികോം നയത്തെ ഒന്നടങ്കം തള്ളിക്കളഞ്ഞതു വഴി സിബലിന്റെ വാദം തിരസ്കരിച്ചിരിക്കുകയാണ് കോടതിയിപ്പോള്‍.

രാജ്യത്തിനു കോടിക്കണക്കിനു രൂപയുടെ നഷ്ടം വരുത്തി വച്ച റ്റെലികോം നയത്തിന്റെ ശില്പികള്‍ എന്‍ഡിഎ സര്‍ക്കാരാണെന്ന കോണ്‍ഗ്രസിന്റെ വാദം സാങ്കേതികമായി ശരിയാണ്. പക്ഷേ, 2004ലാണ് മന്മോഹന്‍ സിംഗ് അധികാരത്തില്‍ വരുന്നത്. വിവാദമായിരിക്കുന്ന സ്പെക്ട്രം വിതരണം നടക്കുന്നതാകട്ടെ 2008ലും. മുന്‍സര്‍ക്കാരിന്റെ നയങ്ങളെല്ലാം അതേ പടി തുടരാനാണെങ്കില്‍ പിന്നെന്തിനാണ് പുതിയൊരു സര്‍ക്കാര്‍? എന്‍ഡിഎയുടെ തെറ്റായിരുന്ന ഒരു നയം തിരുത്താന്‍ മന്മോഹനു നാലുവര്‍ഷം മതിയായിരുന്നില്ലെ? തന്റെ മന്ത്രിസഭയിലെ ഒരു ക്യാബിനറ്റു മന്ത്രി രാജ്യത്തെ ഏറ്റവും വിലപ്പെട്ട വിഭവങ്ങളിലൊന്ന് ഇഷ്ടക്കാര്‍ക്കും, അര്‍ഹതയില്ലാത്തവര്‍ക്കും മറ്റും തോന്നിയ വിലയ്ക്ക് തൂക്കിവില്‍ക്കുന്നതു തടയാന്‍ കഴിഞ്ഞില്ലെങ്കില്‍ പിന്നെ പ്രധാനമന്ത്രി എന്ന പദവി കൊണ്ട് എന്താണ് ‘സത്യസന്ധനായ’ മന്‍മോഹന്‍ സിംഗ് ഉദ്ദേശിക്കുന്നത്. തന്റെ മന്ത്രിസഭയിലെ ഓരോ മന്ത്രായലത്തിന്റെ ചെയ്തികള്‍ക്ക് ഉത്തരവാദിത്വം അതാത് മന്ത്രിമാര്‍ക്ക് മാത്രമാണെന്നാണോ പ്രധാനമന്ത്രി വാദിക്കുന്നത്? കൂട്ടുത്തരവാദിത്വമില്ലാത്ത ഒരു സര്‍ക്കാരിനു അധികാരത്തില്‍ തുടരാനുള്ള ധാര്‍മികവും, സാങ്കേതികവുമായ അര്‍ഹതയുണ്ടോ? ഇങ്ങിനെ ഒരുപാടു ചോദ്യങ്ങള്‍ക്ക് ഉത്തരം പറയാനുള്ള ബാധ്യത കേന്ദ്ര സര്‍ക്കാരിനുണ്ട്. എല്ലാകുറ്റവും രാജയില്‍ ചുമത്തി മാറി നിന്നു കൈകഴുകാന്‍ മന്മോഹനും സിബലിനുമൊന്നും അത്രയെളുപ്പം പറ്റില്ല.

മാത്രമല്ല, ഇന്ത്യാ ഗവേണ്മെന്റ് ട്രാന്‍സാക്ഷന്‍ ഓഫ് ബിസിനസ് റൂള്‍സ് (1961) അനുസരിച്ച് ഗൗരവമായ സാമ്പത്തിക മാനങ്ങളുള്ള നയതീരുമാനങ്ങള്‍ വിവിധ മന്ത്രാലയങ്ങളും, ഡിപാര്‍ട്മെന്റുകളും ധനകാര്യ മന്ത്രാലയവുമായി ചര്‍ച്ച ചെയ്ത് അഭിപ്രായമാരായേണ്ടതാണ്. അതുകൊണ്ട് തന്നെ സ്വാഭാവികമായും റ്റെലികോം നയത്തെ കുറിച്ച് അന്നത്തെ ധനകാര്യമന്ത്രിയായിരുന്ന ചിദംബരത്തിന്റെ ഉപദേശം തേടേണ്ട ഭരണഘടനപരമായ ഉത്തരവാദിത്വം രാജയ്ക്കുണ്ടായിരുന്നു. റ്റെലികോം മന്ത്രാലയത്തിനു നേരായ ഉപദേശം നല്‍കേണ്ട ഉത്തരവാദിത്വം ചിദംബരത്തിനുമുണ്ടായിരുന്നു. ഈ വിഷയം ഉയര്‍ത്തി കാണിച്ചാണ് അഴിമതി തടയുന്നതിലുള്ള ഭരണഘടനാപരമായ ഉത്തരവാദിത്വം നിറവേറ്റുന്നതില്‍ ചിദംബരം പരാജയപ്പെട്ടുവെന്നും, അതിനാല്‍ സിബിഐയുടെ റ്റുജി അന്വേഷണം ചിദംബരത്തിലേക്കും വ്യാപിപ്പിക്കണമെന്നും സുബ്രമണ്യ സ്വാമിയെ പോലുള്ളവര്‍ വാദിക്കുന്നത്.

ഇനിയെന്ത്?
സ്പെക്ട്രം പുനര്‍ലേലം ചെയ്യുന്നതു വഴി പഴയ റ്റെലികോം സേവനദാദാക്കള്‍ക്കാണ് മെച്ചമുണ്ടാകാന്‍ പോകുന്നത്. ലൈസന്‍സ് നഷ്ടപ്പെട്ട ഒമ്പതു കമ്പനികളുടെ ആറു കോടിയില്‍ പരം മൊബൈല്‍ ഉപയോക്തക്കള്‍ വോഡാഫോണും, എയര്‍റ്റെലുമുള്‍പ്പെടുന്ന കോടതി വിധി ബാധിക്കാത്ത കമ്പനികളിലേക്ക് കണക്ഷന്‍ മാറ്റും. മാത്രമല്ല, ഒറ്റയടിക്ക് ഒമ്പതു കമ്പനികള്‍ മത്സരരംഗത്തു നിന്നും അപ്രത്യക്ഷമാകുന്നത്, റ്റെലികോം മേഖലയില്‍ നിലവില്‍ നിലനില്‍ക്കുന്ന രൂക്ഷമായ മത്സരത്തിനു അയവു വരുത്തുകയും, കമ്പോള സാഹചര്യങ്ങള്‍ കമ്പനികള്‍ക്കനുകൂലമായി മാറുകയും ചെയ്യാം. വലിയ കമ്പനികള്‍, അധിക ചാര്‍ജ് ഈടാക്കാനും സാധ്യതയുണ്ട്.

ധനകമ്മി മൂലം കഷ്ടപ്പെടുന്ന സര്‍ക്കാരിന് സ്പെക്ട്രം തിരിച്ചേല്പിക്കുന്ന കമ്പനികള്‍ക്ക് അവരുടെ പണം തിരികെ നല്‍കാനായി കൂടുതല്‍ വായ്പ എടുക്കേണ്ടതായി വരും. പക്ഷേ, ഇതൊരു ഹ്രസ്വകാല ബുദ്ധിമുട്ടാണ്. തിരികെ ലഭിക്കുന്ന 500 മെഗാഹെര്‍ട്സോളം സ്പെക്ട്രം പുനര്‍ലേലം ചെയ്യുന്നതു വഴി ഈ പണം തിരിച്ചു പിടിക്കല്‍ സര്‍ക്കാരിനെ സംബന്ധിച്ച് ബുദ്ധിമുട്ടുള്ള കാര്യമല്ല. പക്ഷേ, ലൈസന്‍സ് നഷ്ടപ്പെട്ട കമ്പനികള്‍ക്ക് സര്‍ക്കാരിന്റെ തെറ്റായ റ്റെലികോം നയം മൂലമാണ് തങ്ങള്‍ക്ക് നഷ്ടം സംഭവിച്ചിരിക്കുന്നതെന്നും, അതിനാല്‍ നഷ്ടപരിഹാരം വേണമെന്നും വാദിച്ച് സര്‍ക്കാരിനെതിരെ കോടതിയില്‍ പോകാന്‍ കഴിയും. അത്തരമൊരു സാഹചര്യത്തില്‍, സര്‍ക്കാരിന് ദീര്‍ഘകാല നിയമയുദ്ധത്തിലേര്‍പ്പെടേണ്ടി വരും.

രാജയുടെ ഭാവി ഇനിയെന്താകുമെന്നതാണ് മറ്റൊരു പ്രധാന ചോദ്യം. കേസു നടക്കുന്നത് ട്രയല്‍ കോടതിയിലാണെങ്കിലും, വിധിയെന്താവുമെന്ന കാര്യത്തില്‍ വ്യാഴാഴ്ച തന്നെ ഏകദേശം തീര്‍പ്പായി കഴിഞ്ഞു. രാജ നല്‍കിയ മുഴുവന്‍ റ്റെലികോം ലൈസന്‍സുകളും റദ്ദാക്കുക വഴി അദ്ദേഹത്തിന്റെ തീരുമാനങ്ങളില്‍ ഗുരുതരമായ വീഴ്ചകളുണ്ടായിരുന്നുവെന്ന് സുപ്രീം കോടതി തന്നെ വിധിച്ചിരിക്കുന്ന സാഹചര്യത്തില്‍ ട്രയല്‍ കോടതിക്ക് ഇനി കാര്യമായൊന്നും ഇക്കാര്യത്തില്‍ ചെയ്യാനുണ്ടാവില്ല. ശിക്ഷാവിധി കാത്തിരിക്കുകയേ രാജക്കിനി ചെയ്യാനുള്ളൂ. എന്നാല്‍ ചിദംബരം അന്വേഷണത്തിനു കീഴില്‍ വരണമോ എന്ന ചോദ്യത്തിനുത്തരം കാണേണ്ടത് ട്രയല്‍ കോടതിയാണ്.

ചിദംബരത്തിന്റെ പങ്കിനെ കുറിച്ച് അന്വേഷിക്കാന്‍ സിബിഐക്ക് നിര്‍ദേശം നല്‍കണമെന്നാവശ്യപ്പെട്ട് സുബ്രമണ്യ സ്വാമി നല്‍കിയ ഹര്‍ജിയില്‍ ഒരു തീരുമാനമെടുക്കാന്‍ വിസമ്മതിച്ച സുപ്രീം കോടതി സമാന ഹര്‍ജി ട്രയല്‍ കോടതിയുടെ മുന്നിലുള്ളത് ചൂണ്ടിക്കാണിക്കുകയുണ്ടായി. ചിദംബരത്തിന്റെ കാര്യത്തില്‍ സ്പെഷ്യല്‍ സിബിഐ ജഡ്ജി ഒപി സൈനി ഫെബ്രുവരി 4ന് (ശനിയാഴ്ച) തീരുമാനമെടുക്കും. തീരുമാനം ചിദംബരത്തിനെതിരാണെങ്കില്‍, അദ്ദേഹത്തിന് ആഭ്യന്തരമന്ത്രി പദം രാജി വയ്ക്കേണ്ടതായും വരും. നയരൂപീകരണത്തിലും, പദ്ധതികള്‍ നടപ്പാക്കലിലും സമ്പൂര്‍ണ പരാജയമാറി മാറിയിരിക്കുന്ന മന്‍മോഹന്‍ സര്‍ക്കാരിനു അത്തരമൊരു ആഘാതം കൂടി താങ്ങാനുള്ള ശേഷിയുണ്ടാകുമോ?

ഇനി ചിദംബരം തത്കാലത്തേക്ക് രക്ഷപ്പെട്ടെന്നു തന്നെ കരുതുക. റ്റെലികോം പ്രേതങ്ങള്‍ സര്‍ക്കാരിനെ വിട്ടൊഴിയാന്‍ പോകുന്നില്ല. പ്രധാന മന്ത്രിയുടെ കഴിവുകേടിനും, സര്‍ക്കാരിന്റെ കെടുകാര്യസ്ഥതയുക്കും, ഇതു രണ്ടും ചേര്‍ന്ന് രാജ്യത്തിനു വരുത്തി വച്ചിരിക്കുന്ന കോടിക്കണക്കിനു രൂപ നഷ്ടത്തിനും ഒരു രാജയെ ബലിയാടാക്കി കൊണ്ടു മാത്രം മറുപടി പറയാമെന്ന കോണ്‍ഗ്രസ് തന്ത്രം ഒരേ സമയം ജനത്തേയും നീതിപീഠത്തേയും നോക്കി കൊഞ്ഞനം കുത്തുന്നതിനു സമമാണ്. പ്രധാന മന്ത്രിക്ക് ആത്മാഭിമാനോ, അല്പമെങ്കിലും ഉത്തരവാദിത്വബോധമോ ഉണ്ടായിരുന്നെങ്കില്‍ ആ ഇരിക്കുന്ന ഓഫീസില്‍ നിന്നും ഇറങ്ങിപോകേണ്ടതാണ്. പക്ഷേ, അത്രയൊക്കെ മന്മോഹനില്‍ നിന്നും പ്രതീക്ഷിക്കുക അത്യാഗ്രഹമായിരിക്കും. ആകെ മുങ്ങിയാല്‍ മാത്രമല്ല, ആകെ നാറിയാലും ചിലപ്പോ കുളിരില്ല.

Be Sociable, Share!

• 

Tags: 2G scam, A Raja, Congress, Manmohan Singh, MJS, Politics, Supreme Court, Telecom, UPA