ലാല്‍ ജോസിന്റെ പൈങ്കിളി മസാല

Be Sociable, Share!

• 

സുനീഷ്  

നായകന്‍ ദിലീപായിട്ടു കൂടി പടം കാണാന്‍ കയറിയത് സംവിധായകന്‍ ലാല്‍ ജോസാണല്ലോ എന്ന ഒരൊറ്റ ബലത്തിലായിരുന്നു. എന്തൊക്കെയായാലും ‘മീശമാധവനും’, ‘ക്ലാസ്മേറ്റ്സു’മൊക്കെ പിടിച്ച സംവിധായകനാണല്ലോ. പടം കണ്ടിരിക്കാനെങ്കിലും പറ്റും എന്നായിരുന്നു പ്രതീക്ഷ. ആ പ്രതീക്ഷയുടെ കടയ്ക്കല്‍ തന്നെയാണ് സംവിധായകന്റെ വെട്ട്. അത്രയും ഗംഭീരമായിട്ടുണ്ട് സ്പെയിനില്‍ പോയി ചിത്രീകരിച്ച, പ്രേക്ഷകര്‍ കാത്തിരുന്ന ദിലീപ്-ലാല്‍ജോസ്-ബെന്നി പി നായരമ്പലം റ്റീമിന്റെ ‘സ്പാനിഷ് മസാല’

‘ഇവിടെ പാലു കാച്ചല്‍ അവിടെ താലികെട്ടല്‍, അവിടെ താലി കെട്ടല്‍’ ഇവിടെ പാലു കാച്ചല്‍’ എന്ന് ‘അഴകിയ രാവണനി’ലെ ശ്രീനിവാസന്റെ പൈങ്കിളി നോവലെഴുത്തുകാരന്‍ കഥാപാത്രത്തിന്റെ ഡയലോഗിനെ ഓര്‍മിപ്പിക്കുന്ന അത്രയും ഭദ്രമായെഴുതപ്പെട്ട തിരക്കഥയാണ് സിനിമയുടെ കരുത്ത്. നന്മ നിറഞ്ഞൊഴുകുന്ന, മലയാളമല്ലാതെ മറ്റൊന്നും സംസാരിക്കാനറിയാത്ത, പ്രാരാബ്ധക്കാരനായ നായകന്‍ ചാര്‍ളി (ദിലീപ്) ജോബ് വിസയില്ലാതെ സ്പെയിനില്‍ ജോലി തെണ്ടി നടക്കുന്നു. ധനാഢ്യനായ ഒരു സ്പാനിഷ് നയതന്ത്രജ്ഞന്റെ കൊട്ടാരത്തില്‍ അയാള്‍ എത്തിച്ചേരുന്നതോടെയാണ് സിനിമയുടെ ഗിയര്‍ മാറുന്നത്. സായിപ്പിന്റെ അതിസുന്ദരിയായ മകള്‍ കമീല അന്ധയാണ്. അന്ധയായതെങ്ങിനെയന്ന കഥ കേള്‍ക്കുമ്പോള്‍, തങ്ങള്‍ അന്ധരായിപ്പോയിരുന്നെങ്കിലെന്ന് പ്രേക്ഷകര്‍ ആഗ്രഹിച്ചാല്‍ കുറ്റം പറയാന്‍ പറ്റില്ല. അന്ധയായതിനേക്കാള്‍ വേഗത്തില്‍ നായികയ്ക്ക് കാഴ്ചശക്തി വീണ്ടു കിട്ടുക കൂടിയാകുമ്പോള്‍ പടം കാണാനിരിക്കുന്നവര്‍ ഒരു പരുവമാകും.

നമ്മുടെ നിര്‍ധനനായ നായകന്‍ നായികയെ പ്രണയിച്ചു തുടങ്ങുന്നിടത്താണ് വഴിത്തിരിവ് കാഴ്ചയുടെ രൂപത്തില്‍ വരുന്നത്. നായികയ്ക്കു കാഴ്ച കിട്ടുന്നു, പക്ഷേ അവരുടെ അച്ഛന്‍ മരിക്കുന്നു. അച്ഛന്റെ ശവമടക്കിനു മുന്‍പേ,  കാണാതായ പഴയ കാമുകന്‍ തിരിച്ചു വരുന്നു. നായികയെ വിവാഹം കഴിക്കാനായി തന്റെ അമ്മയേയും കൊണ്ട് സ്പെയിനിലെത്തുന്ന ചാര്‍ളി തക്കാളിയുത്സവത്തിനിടയില്‍ വച്ച് കൃത്യമായി കമീലയേയും കാമുകന്‍ രാഹുലിനേയും കാണുന്നു. നായകന്റെ വേദന പ്രേക്ഷകരേയും വികാരഭരിതരാക്കുമെന്നായിരിക്കാം സംവിധായകനും തിരക്കഥാകൃത്തും ഒരുപക്ഷേ കരുതിയിരിക്കുക. സിനിമയുടെ രണ്ടാം പകുതി മുഴുവന്‍ ചാര്‍ളിയുടെ തീക്ഷ്ണ പ്രണയത്തേയും, നന്മയേയും വാരിക്കോരി കാണിക്കാന്‍ പെടാപ്പാടു പെടുകയാണ് സിനിമ. എന്തിനാണ് നായകനിത്രയും നന്മയെന്ന് പടം മുഴുവന്‍ കണ്ടാലും നമ്മള്‍ക്കു മനസിലാകാത്തിടത്താണ് സിനിമയുടെ കരുത്ത്.

ഒരു പതിറ്റാണ്ടിനു മുന്‍പ് നാം കണ്ട ദിലീപ് കഥാപാത്രത്തെ അതു പോലെ തന്നെ സൃഷ്ടിക്കാനാണ് സംവിധായകന്‍ ശ്രമിച്ചിരിക്കുന്നത്. അതേ മുഖഗോഷ്ടികള്‍, അതേ നിഷ്കളങ്കത, അതേ പങ്കപ്പാടുകള്‍! ഒരേയൊരു വ്യത്യാസം ഇത്തവണ ദിലീപ് സ്പെയിനിലെത്തിയിട്ടുണ്ട് എന്നതാണ്. നായകനെ ചുറ്റിനുമുള്ളവര്‍ വിഡ്ഢിവേഷം കെട്ടിക്കുന്നത് കണ്ടു നില്‍ക്കുന്ന നായികയ്ക്കുണ്ടാവുന്ന അനുകമ്പ ഇതിനു മുന്‍പ് എത്ര മലയാള സിനിമയില്‍ വന്നിട്ടുണ്ട് എന്ന ചോദ്യം ഒരു ക്വിസ് രൂപത്തില്‍ സിനിമയുടെ അവസാനം പ്രേക്ഷകരോടു ചോദിക്കാവുന്നതായിരുന്നു. ശരിയുത്തരം പറയുന്നവര്‍ക്ക് ഒരു പവന്‍ എന്നെങ്കിലും പരസ്യം ചെയ്താല്‍ പടം കാണാന്‍ ഒരുപക്ഷേ നാലാളു കയറിയേക്കാം.

മുട്ടിനു മുട്ടിനു അരോചകമായ പാട്ടുകള്‍ കുത്തിനിറച്ച് സിനിമയുടെ ബോറടി വേണ്ടുവോളം കൂട്ടുന്നതില്‍ സമ്പൂര്‍ണ വിജയം വരിച്ചിട്ടുണ്ട് ഗായകസംഘം. വില്ലന്റെ നിര്‍ണായക മുഹൂര്‍ത്തങ്ങളെല്ലാം ബിജുമേനോന്റെ മാനേജര്‍ കഥാപാത്രം ഒളിഞ്ഞു നിന്നു കാണുന്നതിനാല്‍ വില്ലന്‍ വില്ലനാണെന്നു തെളിയിക്കാന്‍ സംവിധായകനു സിനിമയുടെ അവസാനം വലിയ ബുദ്ധിമുട്ടൊന്നും വേണ്ടി വന്നില്ല. കൊട്ടാരത്തിലെ ജോലിക്കാരനായെത്തുന്ന പപ്പന്‍ വേഷം കൊണ്ട് സുരാജ് വെഞ്ഞാറമൂടിന്റെ അസാന്നിധ്യം അറിഞ്ഞില്ല എന്നൊരുപകാരമുണ്ടായിരുന്നു.

എന്തിനാണ് ലാല്‍ജോസ് സാറേ ഇങ്ങിനെയൊരു പടം? സ്പെയിന്‍ കാണിക്കാനായിരുന്നെങ്കില്‍ ഇതിനേക്കാള്‍ ചിലവു കുറഞ്ഞ എത്രയോ ഉപാധികളുണ്ടായിരുന്നു? അല്ല ഒരു സിനിമയാണ് ഉദ്ദേശിച്ചതെങ്കില്‍, സോറീ ‘സ്പാനിഷ് മസാല’ എന്തായാലും അതല്ല.

Be Sociable, Share!

• 

Tags: Cinema, Dileep, lal jose, malayalam film, review, Spanish Masala, Suneesh