യൂറോപ്പിനെ ആരു രക്ഷിക്കും?

Be Sociable, Share!

• 

ഒരു ഭൂഖണ്ഠം ചൂതാട്ടസ്ഥാപനമായി മാറുന്ന അതിശയിപ്പിക്കുന്ന കാഴ്ചയാണ് ഇക്കഴിഞ്ഞ മാസങ്ങളില്‍ യൂറോപ് ലോകത്തിനു കാണിച്ചു തന്നതു. പതിനേഴു രാജ്യങ്ങളുടെ സാമ്പത്തീക സാമൂഹിക കൂട്ടായ്മ എന്ന നിലയില്‍ (യൂറോ സോണ്‍) ഇന്നു യൂറോപ്പിനെ കാണാനാവില്ല. കടപ്പത്ര കമ്പോളം ഒരുക്കിക്കൊടുത്ത അതീവ ഗുരുതരമായ സാമ്പത്തിക പ്രതിസന്ധിയില്‍ നിന്നും കരകയറാനുള്ള അവസാനത്തെ ശ്രമം എന്ന നിലയിലും, യൂറോ കറന്‍സിയെ രക്ഷിക്കാനുള്ള അറ്റകൈ പ്രയോഗം എന്ന നിലയിലും യൂറോ രാഷ്ട്രത്തലവന്മാര്‍ ഡിസംബര്‍ 9ന് യൂറോപ്യന്‍ യൂണിയന്‍ തലസ്ഥാനമായ ബ്രസല്‍സില്‍ യോഗം ചേരുകയാണ്.

ഇതു വരെ ചെയ്തതില്‍ നിന്നും പുതുതായി ഒന്നും  തന്നെ പ്രതീക്ഷിക്കേണ്ടതില്ലെന്നു ഒരു വിഭാഗം ആണയിടുമ്പോള്‍ കടൂത്ത ചില നടപടികളെടുത്തില്ലെങ്കില്‍ യൂറോക്കൂട്ടായ്മ ശിഥിലമായിപ്പോകും എന്ന ഭീതിയിലാണ് പൊതുവെ എല്ലാവരും തന്നെ. പക്ഷേ, എന്തു ചെയ്യണം എന്ന കാര്യത്തില്‍ ഒരു സമവായം  ഇതുവരെയില്ല.

മൊത്തം 27 യൂറോപ്യന്‍ രാജ്യങ്ങള്‍ക്കും ബാധകമായ തീരുമാനങ്ങള്‍ വേണമെന്നു ബ്രിട്ടന്‍ അഭിപ്രായപ്പെടുമ്പോള്‍ യൂറോസോണ്‍ സാമ്പത്തികകൂട്ടായ്മയില്‍ അംഗങ്ങളായ 17 രാജ്യങ്ങളെ മാത്രമേ തങ്ങള്‍ പരിഗണിക്കുന്നുള്ളൂ എന്നു സാമ്പത്തിക ശക്തികളായ ജര്‍മനിയും ഫ്രാന്‍സും വ്യക്തമാക്കിയിട്ടുണ്ട്. ഗ്രീസില്‍ തുടങ്ങി പോര്‍ച്ചുഗലും, അയര്‍ലണ്ടും, ഇറ്റലിയും, സ്പെയിനും പിടിച്ചുകുലുക്കി ഭരണകൂടങ്ങളെ കടപുഴക്കി ജനജീവിതം താറുമാറാക്കി മുന്നേറുന്ന ഈ സാമ്പത്തിക സുനാമിയുടെ ഉത്തരവാദിത്വം ഫിനാന്‍സ് മൂലധനവുമായി രാഷ്ട്രങ്ങള്‍ നടത്തിയ അവിഹിത ബന്ധമാണെന്നും അതിനോടൂ സധൈര്യം വിടപറയുക (കടം തിരിച്ചടക്കാന്‍ ആകില്ലെന്നു പറഞ്ഞിട്ടാണെങ്കില്‍ കൂടി) എന്നതല്ലാതെ മറ്റൊരു സിദ്ദൗഷധവും ഈ രോഗത്തിനില്ല എന്നു യൂറോപ്പിലെ നേതാക്കള്‍ തിരിച്ചറിയാത്തിടത്തോളം
ദുരന്തകഥകള്‍ തൂടരും.

ഇനി യൂറൊയുടെ അവസ്ഥ എന്താണ്? രക്ഷപ്പെടാവുന്ന അവസ്ഥയിലല്ല ഈ കറന്‍സി ഉള്ളതു. “ഇതിന്റെ വിശ്വാസ്യത നഷ്ടപ്പെട്ടിരിക്കുന്നു” എന്നാണ് ജര്‍മന്‍ ചാന്‍സലര്‍ എയ്ഞ്ചെല മെര്‍ക്കല്‍ ഡിസംബര്‍ 8ന്  പറഞ്ഞത്. അതേ ദിവസം 1.3415 ഡോളറിനു ഒന്നെന്ന മൊരഞ്ഞ നിരക്കിലാണ് കറന്‍സി കമ്പോളത്തില്‍ യൂറോ നീങ്ങിയിരുന്നതു. വിനിമയ നിരക്കില്‍ മെച്ചപ്പെട്ട മാറ്റങ്ങളില്ലെങ്കില്‍ നിക്ഷേപകര്‍ കൂട്ടത്തോടെ യൂറോയെ കൈവിട്ടാല്‍ ഒരു തന്ത്രപ്രധാന കറന്‍സിയുടെ കഥ അവിടെ തീരുന്നു. ഈ സാഹചര്യം മുന്‍കൂട്ടി കണ്ടിട്ടെന്നവണ്ണം  പല വലിയ ബാങ്കുകളും യൂറൊക്കു പകരം സാധ്യതകളെക്കുറിച്ചു ചിന്തിച്ചു തുടങ്ങിയിട്ടുണ്ടൂ.

ഇപ്പോള്‍ യൂറോപ്പില്‍ കാണുന്ന നാടകത്തിനു ഒരു സാമ്പത്തിക പ്രതിസന്ധി എന്ന നിലയില്‍ നിന്നും  ഒരു ചൂതാട്ട പ്രതിസന്ധി എന്ന മുഖവും കൂടിയുണ്ട്. ഗ്രീസിലെയും പോര്‍ചുഗലിലേയും  മറ്റു പ്രതിസന്ധിയിലായ രാജ്യങ്ങളിലേയും ബോണ്ടുകള്‍ തുച്ചവിലക്കു കൈക്കലാക്കിയ വന്‍കിട ഹെജ്ജ് ഫണ്ടുകള്‍ തങ്ങളുടെ അശ്ലീല സ്വധീനമുപയോഗിച്ചു രാഷ്ട്രത്തലവന്മാരെയും, കമ്പനികളെയും,
ബാങ്കുകളെയും  സ്വാധീനിച്ചു ഈ കടപ്പത്രങ്ങള്‍ക്കു അവയുടെ മൊത്തം മൂല്യവും (full payment) വാങ്ങിച്ചെടുക്കാനുള്ള അടവും പയറ്റുന്നുണ്ട്.

ചില ഹെജ്ജ് ഫണ്ടുകള്‍ ഗ്രീസിലെ ബോണ്ടുകള്‍ ഡോളറിന്മെല്‍ 25 സെന്റ എന്ന നിരക്കിലാണു വാങ്ങുന്നതു. ഈ ബോണ്ടുകളുടെ മുഖവിലയുടെ 30 ശതമാനമയിരുന്നു ആദ്യം ഇസിബി തിരിച്ചടവായി തിട്ടപ്പെടൂത്തിയിരുന്നതു. അതിപ്പോള്‍ ഹെജ്ജ് ഫണ്ടുകളുടെ സ്വാധീനഫലമായി 50 ശതമാനത്തില്‍ എത്തിയിട്ടുണ്ട്. അതായതു. ഇതില്‍ ഉള്‍പ്പെടുന്ന മറ്റു നൂലാമാലകളും കൂടി കണക്കിലെടുക്കുമ്പോള്‍ 25 സെന്റിനു വാങ്ങുന്ന വക 50 സെന്റിനു തിരിച്ചു വില്ക്കാനുള്ള സാഹചര്യം ഹെജ്ജ് ഫണ്ടുകള്‍ക്കു കിട്ടും.

ഏതാനും ചില മാസങ്ങളിലെ കളികൊണ്ടു ലാഭം  100 ശതമാനം! ഇനി ഇത്തരം ബോണ്ടുകള്‍ വാങ്ങില്ല എന്നു ഇസിബി ആണയിടുന്നുണ്ട്. എന്നാല്‍  വാങ്ങിയിടത്തോളം മതി പല ഹെജ്ജ് ഫണ്ടൂകള്‍ക്കും “ഹബീബീ” പാടാന്‍. പുരകത്തുമ്പോള്‍ വാഴവെട്ടുന്നവര്‍ എത്ര സാധുക്കളാണെന്ന് ഇതു കാണുമ്പോള്‍ തോന്നുന്നതില്‍ തെറ്റില്ല.

Source: European Commission (2011)

എന്താണ് ഇപ്പോഴത്തെ പ്രതിസന്ധിക്കു കാരണം? പ്രമുഖ സാമ്പത്തിക ശാസ്ത്രജ്ഞന്‍ പ്രഭാത് പട്നായിക്കിന്റെ അഭിപ്രായത്തില്‍ 2008-09ലെ സാമ്പത്തിക പ്രതിസന്ധിയുടെ (Great Recession) തുടര്‍ച്ചയാണ് ഇന്നു യൂറോപ്പില്‍ സംഭവിക്കുന്നത്. യൂറൊപ് ഇന്നു നേരിടുന്ന കടക്കെണിക്ക് (താഴെയുള്ള പട്ടിക കാണുക) പ്രധാനമായും രണ്ടു കാരണങ്ങളാണുള്ളത്. ഒന്ന്, റിസഷന്റെ ഭാഗമായി യൂറൊപ്യന്‍ സര്‍ക്കാരുകളുടെ വരുമാനം വന്‍തോതില്‍ ഇടിഞ്ഞു. ഇതേ സമയത്തു തന്നെയാണ് ധനമേഖലയിലെ (financial sector) ഭീമന്മാരെ രക്ഷിക്കാനായി (bailout) ശതകോടിക്കണക്കിന് യൂറോ ഈ സര്‍ക്കാരുകള്‍ക്ക് ചിലവിടെണ്ടി വന്നത്. അതായത്, ഒരേ സമയം വരുമാനത്തില്‍ ഇടിവും, ചിലവില്‍ വന്‍വര്‍ധനയും. ചിലവിലെ ഈ വര്‍ധനയാകട്ടെ ഭൂരിഭാഗവും ചെന്നടിഞ്ഞത് ധനമൂലധനത്തിന്റെ താത്പര്യങ്ങള്‍ സംരക്ഷിക്കുന്നതിലേക്കായതിനാല്‍ ചോദന (demand) വര്‍ധിപ്പിക്കുന്നതിനോ, അതുവഴി ഉത്പാദന മേഖലയില്‍ ഉണര്‍വുണ്ടാകുന്നതിനോ ഇടയാക്കിയില്ല. ഫലം നീണ്ടു നില്‍ക്കുന്ന പ്രതിസന്ധി.

പ്രതിസന്ധിക്കു പരിഹാരമായി യൂറോ നേതാക്കള്‍ മുന്നോട്ടു വയ്ക്കുന്ന പ്രതിവിധികള്‍ ഇപ്പോഴത്തെ സാഹചര്യത്തെ കൂടുതല്‍ രൂക്ഷമാക്കുകയേ ഉള്ളൂ എന്ന് പലരും മുന്നറിയിപ്പു തരുന്നുണ്ട്. ഉദാഹരണത്തിന്. യൂറോ സോണിലെ രാജ്യങ്ങള്‍ സാമ്പത്തിക അച്ചടക്കം ഉടനെ കൈവരിക്കണമെന്നതാണ് ഒരു നിര്‍ദേശം. അതായത്, സാമ്പത്തിക പ്രതിസന്ധിയെ തുടര്‍ന്ന് വരുമാനത്തില്‍ വന്‍തോതില്‍ ഇടിവുണ്ടായിരിക്കുന്ന ഇപ്പോഴത്തെ സാഹചര്യത്തില്‍ സര്‍ക്കാരുകള്‍ അച്ചടക്കത്തിന്റെ പേരില്‍ ചിലവ് ഇനിയും വെട്ടിക്കുറയ്ക്കണമെന്ന്. ക്ഷേമപ്രവര്‍ത്തനങ്ങളില്‍ നിന്നും പൂര്‍ണമായും പിന്‍വാങ്ങുക, സര്‍ക്കാര്‍ ആസ്തികള്‍ ലേലം ചെയ്യുക, സ്വകാര്യമൂലധനത്തിനെ പരമാവധി പ്രോത്സാഹിപ്പിക്കുക എന്നിങ്ങനെ… ഈ ലക്ഷ്യങ്ങള്‍ നേടാനായി യൂറോ കരാറിനെ മാറ്റിയെഴുതുക എന്നതാണ് ഡിസംബര്‍ 9ലെ ഉച്ചകോടിയുടെ ലക്ഷ്യം.

പ്രതിസന്ധിയില്‍ നിന്നും കുറുക്കുവഴികളില്ല എന്നു തന്നെയാണ് സമീപകാല ചരിത്രം നല്‍കുന്ന സൂചന. ഇപ്പോഴത്തെ ഉപരിപ്ലവമായ മാറ്റങ്ങള്‍ ഫിനാന്‍സ് ക്യാപിറ്റലിന്റെ താത്കാലിക താത്പര്യങ്ങള്‍ സംരക്ഷിക്കാനേ ഉതകൂ. ഉത്പാദനമേഖലയിലെ മുരടിപ്പ് മാറാതെ സമ്പദ് രംഗത്തുണര്‍വുണ്ടാവില്ല. മുരടിപ്പ് മാറണമെങ്കില്‍ സ്വാഭാവികമായും മൊത്തം ചോദന ഉയരുകയും വേണം. എന്നാല്‍ അച്ചടക്കത്തിന്റെ പേരില്‍ സര്‍ക്കാരുകള്‍ ചിലവു വെട്ടിക്കുറച്ചു കൊണ്ടിരിക്കുന്ന സമയത്ത്, ജനജീവിതം കൂടുതല്‍ ദുസഹമായിരിക്കൊണ്ടിരിക്കുമ്പോള്‍ ചോദന എങ്ങിനെയുയരാനാണ്? ഫലം, ദീര്‍ഘകാലം നീണ്ടു നില്‍ക്കുന്ന വളര്‍ച്ചാ മുരടിപ്പോ അല്ലെങ്കില്‍ മാന്ദ്യം തന്നെയോ ആയിരിക്കും. അതിനെ മറികടക്കാനുള്ള ഘടനാപരമായ ശേഷിയോ, ഇച്ഛാശക്തിയോ ധനമൂലധനത്തിന്റെ തടവില്‍ കഴിയുന്ന യൂറോ സോണിനില്ലതാനും.

—ആനുകാലിക രാഷ്ട്രീയ സാമ്പത്തിക വിഷയങ്ങളെ കുറിച്ചുള്ള പംക്തിയാണ് Daily Edit

Be Sociable, Share!

• 

Tags: Capitalism, Daily Edit, Economy, Euro zone, Financial crisis