Briefings: യുഎസ്-പാക് സഖ്യത്തില്‍ വിള്ളല്‍

Be Sociable, Share!

• 

നവംബര്‍ 26ലെ നാറ്റോ (North Atlantic Treaty Organization) ആക്രമണത്തില്‍ 24 പാക് പട്ടാളക്കാര്‍ കൊല്ലപ്പെട്ടതിനു ശേഷം അമേരിക്കയും പാകിസ്താനുമായി നിലനിന്നു വരുന്ന സഖ്യത്തിനു കാര്യമായ കേടുപാടുകള്‍ പറ്റിയിരിക്കുകയാണ്. അഫ്ഘാന്‍ പാക് അതിര്‍ത്തി ലംഘിച്ച്, പാകിസ്താനിലെ ട്രൈബല്‍ മേഖലയില്‍ തമ്പടിച്ചിരുന്ന പാക് പട്ടാള ക്യാമ്പിനു നേരെയാണ് നാറ്റോ (അമേരിക്ക) ആക്രമണമഴിച്ചു വിട്ടത്. ആക്രമണത്തെ കുറിച്ച് പരസ്പരവിരുദ്ധമായ പല റിപോര്‍ട്ടുകളും ഉടനെ തന്നെ പുറത്തു വന്നിരുന്നു.

പാക് പട്ടാളത്തിനു നേരെയുണ്ടായ ആക്രമണം മനപൂര്‍വമല്ലെന്നും, ഭീകരരാണ് അവിടെയുണ്ടായിരുന്നത് എന്ന ഇന്റലിജന്‍സ് വിവരത്തിന്റെ പുറത്താണ് നാറ്റോ വിമാനങ്ങള്‍ അതിര്‍ത്തി കടന്ന് പാകിസ്ഥാനിലെത്തിയതുമെന്നായിരുന്നു നാറ്റോയുടെ ആദ്യ ഔദ്യോഗിക പ്രതികരണം. എന്നാല്‍ പാകിസ്ഥാന്‍ ശക്തമായ പ്രതിഷേധവുമായി രംഗത്തു വന്നതോടെ പല തരത്തിലുള്ള കഥകളും മാധ്യമങ്ങളിലൂടെ പുറത്തു വരാന്‍ തുടങ്ങി.

ആക്രമണം നടന്നു ഏതാനും ദിവസത്തിനുള്ളില്‍ പ്രമുഖ അമേരിക്കന്‍ വലതുപക്ഷ പത്രമായ വാള്‍ സ്ട്രീറ്റ് ജേര്‍ണലില്‍ വന്ന ഏതാനും വാര്‍ത്തകളാണ് ശ്രദ്ധേയം. ആദ്യ വാര്‍ത്ത, പാക് പട്ടാളക്കാരാണ് നാറ്റോയ്ക്കെതിരെ ആദ്യം വെടിയുതിര്‍ത്തതെന്നായിരുന്നു. അതിനു പ്രതികരണമായാണ് നാറ്റോ ബോംബിംഗ് ആരംഭിക്കുകയും, അതില്‍ രണ്ടു ഡസന്‍ പാക് പട്ടാളക്കാര്‍ കൊല്ലപ്പെടുകയും ചെയ്തതെന്ന് ജേര്‍ണല്‍ റിപോര്‍ട്ടര്‍ പേരു വെളിപ്പെടുത്താന്‍ ആഗ്രഹിക്കാത്ത നാറ്റോ, അഫ്ഘാന്‍ വൃത്തങ്ങളുടെ സഹായത്തോടെ റിപോര്‍ട്ട് ചെയ്തു.

ഏതാനും ദിവസങ്ങള്‍ക്കുള്ളില്‍ ജേര്‍ണലില്‍ വന്ന മറ്റൊരു വാര്‍ത്ത പറഞ്ഞത്, അഫ്ഘാന്‍ അതിര്‍ത്തിയില്‍ ക്യാമ്പു ചെയ്തിരുന്ന പാക് പട്ടാള ഉദ്യോഗസ്ഥരുടെ അനുമതിയോടെയാണ് നാറ്റോ വിമാനങ്ങള്‍ പാകിസ്ഥാന്റെ ട്രൈബല്‍ ഏരിയയില്‍ പ്രവേശിച്ചതെന്നും, ആക്രമണം നടത്തിയതെന്നുമായിരുന്നു. ഈ വാര്‍ത്തയുടെ സോഴ്സാകട്ടെ, അമേരിക്കന്‍ ഔദ്യോഗിക വൃത്തങ്ങളും. ആക്രമണ സ്ഥലത്ത് പാക് പട്ടാളക്കാരുണ്ടായിരുന്നുവെന്നത് അതിര്‍ത്തിയിലെ സൈനീകര്‍ക്ക് അറിയില്ലായിരുന്നു എന്നും പ്രസ്തുത റിപോര്‍ട്ട് പറയുന്നു. ഈ രണ്ടു വാര്‍ത്തകളും പാകിസ്ഥാന്‍ ശക്തമായി നിഷേധിച്ചിട്ടുണ്ട്.

പാക് പ്രതികരണം
നാറ്റോ ആക്രമണത്തോടുള്ള പാകിസ്ഥാന്‍ സര്‍ക്കാരിന്റെ (സൈന്യത്തിന്റെ) പ്രതികരണം സൂചിപ്പിക്കുന്നത് മേല്പറഞ്ഞ പോലുള്ള പരസ്പരവിരുദ്ധ റിപോര്‍ട്ടുകള്‍ അമേരിക്കന്‍ പ്രൊപഗാന്‍ഡയുടെ ഭാഗമാണെന്നു തന്നെയാണ്. കാരണം സമീപകാലത്തൊത്തും ഇത്ര ശക്തമായ പ്രതിഷേധവുമായി അമേരിക്കക്കെതിരെ പാക് പട്ടാളം രംഗത്തു വന്നിട്ടില്ല എന്നതു തന്നെ. ഒസാമ ബിന്‍ലാദന്റെ കൊലയെ തുടര്‍ന്ന് പാക് പട്ടാളവും ഭരണകൂടവും ലോകരാഷ്ട്രങ്ങള്‍ക്കു മുന്നില്‍ നാണം കെട്ടിട്ടു പോലും അമേരിക്കന്‍ ആക്രമണത്തിനെതിരെ ഒന്നു ശക്തമായി പ്രതികരിക്കാനുളള ശേഷി പോലും അന്ന് പട്ടാളം കാണിച്ചിരുന്നില്ല. പകരം, ‘ഭീകരവിരുദ്ധ യുദ്ധ’ത്തില്‍ പാകിസ്ഥാന്‍ വഹിച്ചു വരുന്ന ശ്രദ്ദേയപങ്കിനെ കുറിച്ച് പടിഞ്ഞാറന്‍ മാധ്യമങ്ങളില്‍ ലേഖനമെഴുതുകയാണ് പ്രസിഡന്റ് ആസിഫ് അലി സര്‍ദാരി അന്നു ചെയ്തത്.

എന്നാല്‍, നവംബര്‍ 26ലെ ആക്രമണത്തെ തുടര്‍ന്ന് പാകിസ്ഥാന്‍ ആദ്യം ചെയ്തത് അഫ്ഘാനിസ്ഥാനിലേക്കുള്ള നാറ്റോയുടെ ചരക്കു വിതരണ പാത അടച്ചിടുകയാണ്. അഫ്ഘാനിസ്ഥാനിലെ യുദ്ധം അനുദിനം വഷളായിക്കൊണ്ടിരിക്കെ നാറ്റോയെ സംബന്ധിച്ച് കിട്ടാവുന്ന ഏറ്റവും ശക്തമായ പ്രഹരമാണിത്. ഖൈബര്‍ പാസിനടുത്തുള്ള ടോര്‍ഖാം, ചമന്‍ എന്നീ ബോര്‍ഡര്‍ ക്രോസിംഗുകളാണ് പാകിസ്ഥാന്‍ അടച്ചിട്ടത്. അതുവഴി, പാകിസ്ഥാന്‍ വഴി അഫ്ഘാനിസ്ഥനിലേക്ക് പട്ടാളത്തിനാവശ്യമായ വസ്തുക്കള്‍–ആയുദ്ധങ്ങളും ആയുധേതര ചരക്കുകളും–എത്തിക്കാന്‍ നാറ്റോയ്ക്ക് താത്കാലികമായെങ്കിലും പറ്റാതായിരിക്കുന്നു.

ഏതൊരു യുദ്ധത്തിന്റേയും ജീവനാഡിയാണ് അതിന്റെ പിന്നാമ്പുറത്തുണ്ടാകേണ്ട കാര്യക്ഷമമായ വിതരണ ശൃംഖല. ഈ വിതരണമാര്‍ഗത്തിലൂടെയായിരിക്കും യുദ്ധത്തിലേര്‍പ്പെട്ടിരിക്കുന്ന പട്ടാളക്കാര്‍ക്ക് ആവശ്യം വേണ്ട എല്ലാം രാജ്യങ്ങള്‍ എത്തിച്ചു കൊടുക്കുക. അഫ്ഘാനിസ്ഥാനെ പോലുള്ള, കടലുമായി നേരിട്ടു ബന്ധമില്ലാത്ത, ഒരു രാജ്യത്തു വര്‍ഷങ്ങളോളം നീണ്ട യുദ്ധം ചെയ്യുക എന്നു വച്ചാല്‍ വിതരണ ശൃംഖല ഏറെ കാര്യക്ഷമായിരിക്കേണ്ടതുണ്ട്. പ്രത്യേകിച്ചും, പടിഞ്ഞാറന്‍ സൈനികരാണ് അഫ്ഘാനിസ്ഥാനില്‍ യുദ്ധം ചെയ്യുന്നത് എന്നത് കാര്യത്തിന്റെ ഗൗരവം വര്‍ധിപ്പിക്കുന്നു.

നാറ്റോക്ക് പ്രധാനമായും രണ്ടു വിതരണ മാര്‍ഗങ്ങളാണുള്ളത്. ഒന്ന് പാക്-അഫ്ഘാന്‍ അതിര്‍ത്തി. രണ്ടാമത്തേത് റഷന്‍ എയര്‍ സ്പേസ് വഴി മധ്യേഷ്യ മുറിച്ച് കടന്ന് നേരേ അഫ്ഘാനിസ്ഥാനിലേക്കുള്ള മാര്‍ഗം. എന്‍ഡിഎന്‍ (Northern Distribution Network) എന്നാണ് ഇതറിയപ്പെടുന്നത്. നാറ്റോയുടെ ആയുധേതര ചരക്കുകളില്‍ ഭൂരിഭാഗവും ഇന്ന് അഫ്ഘാനിസ്ഥാനിലെത്തുന്നത് എന്‍ഡിഎന്‍ വഴിയാണ്. അതായത്, ഖൈബര്‍ പാസിലൂടെയുള്ള വിതരണ മാര്‍ഗം പാകിസ്ഥാന്‍ നാറ്റോ ആക്രമണത്തെ തുടര്‍ന്ന് അടച്ചിട്ടതിനു ശേഷം അമേരിക്കയുടേയും മറ്റു നാറ്റോ രാജ്യങ്ങളുടേയും മുന്‍പില്‍ ഇപ്പോള്‍ എന്‍ഡിഎന്‍ മാത്രമേ ഒരു വിതരണ മാര്‍ഗമായുള്ളൂ. നാറ്റോ യുദ്ധത്തിന്റെ കടയ്ക്കല്‍ തന്നെയാണ് പാകിസ്ഥാന്‍ കത്തി വച്ചിരിക്കുന്നതെന്നു സാരം.

മാത്രമല്ല, അഫ്ഘാനിസ്ഥാന്റെ ഭാവിയെ കുറിച്ചു ചര്‍ച്ച ചെയ്യാനുള്ള ബോണ്‍ കോണ്‍ഫറന്‍സില്‍ നിന്നും വിട്ടുനില്‍ക്കാനും പാകിസ്ഥാന്‍ തീരുമാനിച്ചു. അഫ്ഘാനിസ്ഥാനില്‍ സമാധാനം കൊണ്ടു വരാനുള്ള ഏതു ശ്രമത്തിനും പാകിസ്ഥാന്റെ പിന്തുണ നിര്‍ണായകമാണെന്നിരിക്കേ, കോണ്‍ഫറന്‍സില്‍ നിന്നും വിട്ടു നില്‍ക്കാനുള്ള തീരുമാനം പടിഞ്ഞാറന്‍ രാജ്യങ്ങള്‍ക്ക് വന്‍ തിരിച്ചടി തന്നെയാണ്. അമേരിക്കയുടെ വന്‍ സമ്മര്‍ദമുണ്ടായിട്ടും തീരുമാനത്തില്‍ നിന്നും പുറകോട്ടു പോകാന്‍ പാകിസ്ഥാന്‍ തെയ്യാറായില്ല. ഈ രണ്ടു തീരുമാനങ്ങളും സൂചിപ്പിക്കുന്നത് നാറ്റോ ആക്രമണത്തോടുള്ള പാകിസ്താന്റെ എതിര്‍പ്പ് ശക്തമാണെന്നു തന്നെയാണ്. പാകിസ്ഥാനു പരസ്യ പിന്തുണയുമായി ചൈന രംഗത്തെത്തിയത് ഇതോടു ചേര്‍ത്തു വായിക്കണം.

ആക്രമണത്തിന്റെ കാണാപ്പുറങ്ങള്‍
നാറ്റോയുടെ ആക്രമണം അബദ്ധം പറ്റിയതാണെന്ന വാദം അധികമാളുകളൊന്നും മുഖവിലയ്ക്കെടുക്കുന്നില്ല. ഒബാമ പ്രസിഡന്റായതിനു ശേഷം പാകിസ്ഥാനിലെ യുദ്ധം അമേരിക്ക കൂടുതല്‍ ശക്തിപ്പെടുത്തുകയാണ് ചെയ്തത്. ഒസാമ ബിന്‍ ലാദന്റെ കൊലയ്ക്കു ശേഷം അമേരിക്കയുടെ ഡ്രോണ്‍ ആക്രമണങ്ങള്‍ പാകിസ്ഥാനില്‍ വര്‍ധിക്കുകയായിരുന്നു. ഇതിനാകട്ടെ, പ്രസിഡന്റിന്റെ നേരിട്ടുള്ള ഉത്തരവുണ്ടെന്ന് പല റിപോര്‍ട്ടുകളും പറയുന്നു. പലപ്പോഴും പാക് പട്ടാളത്തോട് കൂടിയാലോചിക്കാന്‍ പോലും മെനക്കെടാതെ അമേരിക്കന്‍ മനുഷ്യരഹിത വിമാനങ്ങള്‍ അതിര്‍ത്തി മുറിച്ചു കടന്ന് വന്‍ ബോംബിംഗ് നടത്തി തിരിച്ചു പറക്കുന്നു. പാക് പട്ടാളത്തിന് ഇതിനോടമര്‍ഷമുണ്ടെങ്കിലും അമേരിക്കയെ നേരിട്ടെതിര്‍ക്കാനുള്ള ശേഷിയോ, മനസാന്നിധ്യമോ അവര്‍ ഇതുവരെ കാണിച്ചിട്ടില്ല. എന്നാല്‍, പരോക്ഷമായി അഫ്ഘാനിസ്ഥാനിലെ തീവ്രവാദികളെ പാകിസ്ഥാന്‍ സഹായിക്കുന്നുവെന്നാണ് അമേരിക്കന്‍ ആരോപണം.

കഴിഞ്ഞ സെപ്തംബര്‍ 13ന് കാബൂളിലെ അമേരിക്കന്‍ എംബസി ആക്രമിക്കപ്പെട്ടത് വലിയ വാര്‍ത്തയായിരുന്നു. അഫ്ഘാന്‍ ഉദ്യോഗസ്ഥരുടെ അഭിപ്രായത്തില്‍ ആക്രമണത്തിനു പിന്നില്‍ പാക് സഹായത്തോടെ പ്രവര്‍ത്തിക്കുന്ന ഹഖാനി നെറ്റ്വര്‍ക്കായിരുന്നു. ഈ സംഭവം പാക്-അമേരിക്കന്‍ ബന്ധത്തില്‍ കാര്യമായ വിള്ളല്‍ വരുത്തിയിരുന്നു എന്ന് പ്രൈവറ്റ് ഇന്റലിജന്‍സ് ഏജന്‍സി സ്ട്രാറ്റ്ഫോര്‍ റിപോര്‍ട്ട് ചെയ്തിരുന്നു. നവംബര്‍ 28ന് പ്രശസ്ത രാഷ്ട്രീയ നിരീക്ഷകനും ഇടതുപക്ഷ പ്രവര്‍ത്തകനുമായ താരിഖ് അലി ‘ലണ്ടന്‍ റെവ്യു ഓഫ് ബുക്സി’ല്‍ എഴുതിയ ഒരു ബ്ലോഗ് പോസ്റ്റില്‍ പറയുന്നത് എംബസി ആക്രമണത്തിന് പ്രതികാരമായിട്ടായിരിക്കാം നാറ്റോ പാക് പട്ടാളക്കാരെ കൊലപ്പെടുത്തിയത് എന്നാണ്.

പാകിസ്ഥാന്റെ സാന്നിധ്യമില്ലാതെ ബോണ്‍ കോണ്‍ഫറന്‍സ് ഡിസംബര്‍ 5ന് ജര്‍മനിയിലെ ബോണില്‍ ആരംഭിച്ചു. അന്താരാഷ്ട്ര സമൂഹം അഫ്ഘാന്‍ സര്‍ക്കാരിനുള്ള (?) പിന്തുണ നിര്‍ബാധം തുടരുമെന്ന് ലോകരാജ്യങ്ങളെല്ലാം പ്രഖ്യാപിക്കുകയും ചെയ്തു. എന്നാല്‍, അഫ്ഘാനിസ്ഥാനിലെ ഗ്രൗണ്ട് റിയാലിറ്റി വ്യത്യസ്തമാണെന്ന് ഇന്ന് എല്ലാവര്‍ക്കുമറിയാം. നാറ്റോയുടെ ഒന്നേകാല്‍ ലക്ഷം പട്ടാളക്കാരുടെ സഹായമുണ്ടായിട്ടും കാബൂളിനപ്പുറത്തേക്ക് അവിടെ ഭരണകൂടമില്ല. നവതാലിബാന്‍ അനുദിനം ശക്തിപ്പെട്ടു വരികയും ചെയ്യുന്നു. അങ്ങിനെയൊരു സാഹചര്യത്തില്‍, നവംബറിലെ നാറ്റോ ആക്രമണവും അതിന്റെ പ്രത്യാഘാതങ്ങളും ഒരുപക്ഷേ ശുഭാപ്തിവിശ്വാസികളുടെ യുക്തിക്കു പിടി തരുന്നതായിക്കൊള്ളണമെന്നില്ല.

—ആനുകാലിക സ്ട്രാറ്റജിക് വിഷയങ്ങളെ കുറിച്ചുള്ള പംക്തിയാണ് Briefings.

Be Sociable, Share!

• 

Tags: Afghanistan, Briefings, International, NATO, Pakistan, Taliban, US