സംഘികളുടെ പൊലീസ് സ്റ്റേറ്റ്

Be Sociable, Share!

• 

ഒരു വ്യാജ എറ്റുമുട്ടല്‍ കൂടി ഗുജാറാത്ത് സര്‍ക്കാരിന്റെ പേരില്‍ രേഖപ്പെടുത്തികൊണ്ട് അന്വഷണത്തിനായുള്ള നിയമ നടപടികള്‍ ആരംഭിച്ചിരിക്കുന്നു. മലയാളിയായ ജാവേദ് എന്ന പ്രാണേഷ് കുമാറും, വിദ്യാര്‍ഥിയായ ഇസ്രത്ത് ജഹാനുമുള്‍പ്പടെ നാലുപേര്‍ അതിദാരുണമാ‍യി കൊല്ലപ്പെട്ടതിന്റെ യാഥാര്‍ത്ഥ്യം അന്വേഷിക്കാ‍ന്‍ ഗുജറാത്ത് ഹൈക്കോടതിയുടെ ഡിവിഷന്‍ ബഞ്ചു സിബിഐക്ക് നിര്‍ദ്ദേശം നല്‍കി കൊണ്ട് ഉത്തരവായി. മുഖ്യമന്ത്രി നരേന്ദ്ര മോഡിയെ വധിക്കാനെത്തിയ ലഷ്കര്‍-ഇ-തൊയ്ബ
തീവ്രവാദികളെന്നാരോപിച്ചാണ് ഇവരെ ഗുജറാത്ത് ക്രൈം ബ്രാഞ്ച് കൊലപ്പെടുത്തിയത്. ഇത്തരത്തില്‍ ഇതു രണ്ടാം തവണയാണ് തീവ്രവാദി മുദ്ര കുത്തി നിരപരാധിളെ കൊലപ്പെടുത്തിയതിന്റെ പേരില്‍ ഗുജറാത്ത് ഭരണ സംവിധാനങ്ങള്‍ക്കു നേരേ നിയമ നടപടികള്‍ ഉണ്ടാകുന്നത്. നരേന്ദ്ര മോഡിയുടെ വലംകൈയായിരുന്ന മുന്‍ ആഭ്യന്തര മന്ത്രി അമിത് ഷാ മറ്റോരു വ്യാജ എറ്റുമുട്ടല്‍ കേസില്‍ അറസ്റ്റിലായതും, ഒടുവില്‍ ജാമ്യത്തില്‍ പുറത്തിറങ്ങിയതും അധികനാള്‍ മുമ്പല്ല.

2004 ജൂണ്‍ 15നാണ് കേസിന് ആധാരമായ സംഭവം നടന്നത്. അഹമ്മദാബാദ് നഗരത്തിലേക്കുള്ള ഹൈവേയില്‍ വച്ചു നടന്ന വെടിവെപ്പില്‍ താമരക്കുളം സ്വദേശിയായ ജാവേദ്‌ ഷെയ്ഖ് എന്ന പ്രാണേഷ് പിള്ള, പത്തൊമ്പതുകാരിയായ ഇസ്രത്ത് ജഹാന്‍, അംജദ് അലി റാണ, സീഷന്‍ ജോഹര്‍ എന്നിവര്‍ കൊല്ലപ്പെടുകയായിരുന്നുവെന്നാണ് ഗുജറാത്ത് പൊലീസിന്റെ ഭാഷ്യം. ഒരു നീല ഇന്‍ഡികാ കാറിനൊപ്പമാണ് കൊല്ലപ്പെട്ടവരുടെ മൃദദേഹങ്ങള്‍ പൊലീസ് പ്രദര്‍ശിപ്പിച്ചത്. ഏറ്റുമുട്ടലില്‍ കൊല്ലപ്പെടുകയായിരുന്നുവെന്ന് തോന്നിപ്പിക്കാന്‍ തോക്കുകളും മറ്റും സംഭവസ്ഥലത്ത് കൊണ്ടിട്ടിരുന്നു.

പോലിസിന്റെ കഥയില്‍ സംശയം തോന്നിയ ആള്‍ക്കാര്‍ അന്നു തന്നെ ഇത് ഒരു വ്യാജ എറ്റുമുട്ടലാണ്  എന്ന സംശയം ഉയര്‍ത്തിയിരുന്നു. ഇതോടൊപ്പം പലകോണുകളില്‍ നിന്നും സ്വതന്ത്ര അന്വഷണത്തിനു വേണ്ടിയുള്ള മുറവിളി ഉയരുകയും ചെയ്തു. 2009ല്‍ ഈ കേസില്‍ അന്വഷണം നടത്തിയ മെട്രോപോളിറ്റന്‍ മജിസ്ട്രേറ്റ് എസ്പി തമാങ് ഇതു വ്യാജ ഏറ്റുമുട്ടലാണ് എന്നു കണ്ടെത്തിയിരുന്നു. അതിനെ തുടര്‍ന്നു കോടതിയില്‍ എത്തിയ ഹര്‍ജി ഫയലില്‍ സ്വികരിച്ചു കൊണ്ട് പ്രത്യേകാന്വേഷണ സംഘത്തോട് ഈ കേസ് അന്വഷിക്കാന്‍ കോടതി ആവശ്യപ്പെട്ടു. ഒപ്പം പ്രതികള്‍ എന്നു ആരോപണം ഉയര്‍ന്നവരുടെ ഇതിലിള്ള പങ്കിനെ കുറിച്ചു വിശദമായി അന്വഷിക്കാനും കോടതി ആവശ്യപ്പെട്ടു.

എസ്പി തമാങ്ങിന്റെ കണ്ടെത്തലുകള്‍ ശരിവയ്ക്കുന്ന റിപോര്‍ട്ടാണ് പ്രത്യേകാന്വേഷണ സംഘം കോടതിയില്‍ സമര്‍പ്പിച്ചത്. ഇതിനെ തുടര്‍ന്നാണ് കേസ് ഫയല്‍ ചെയ്യാനും, അന്വേഷിച്ച് റിപോര്‍ട്ട് സമര്‍പ്പിക്കാനും കോടതി ഇപ്പോള്‍ വിധിയായിരിക്കുന്നത്. വംശ വെറിയന്‍മാരുടെ കാടത്തങ്ങള്‍ ഒരിക്കല്‍ കൂടി ലോകത്തിന്റെ മുന്‍‌മ്പില്‍ വെളിവാകുകയാണ് ഈ കോടതി വിധിയിലൂടെ.

ഇത്തരത്തില്‍, നരേന്ദ്രമോഡിയെ കൊല്ലാന്‍ വന്ന തിവ്രവാദികളന്ന് ചാപ്പ കുത്തപ്പെട്ടവരും, പൊലീസിനാല്‍ തിവ്രവാദം ആരോപിക്കപ്പെട്ട് കൊല്ലപ്പെട്ടവരും അനേകം വരും. അത്തരത്തില്‍ കൊലചെയ്യപ്പെട്ട  സമാനതകളുള്ള രണ്ടാളുകളുടെ പേരും കൊല്ലപ്പെട്ട ദിവസവും അതുമായി ബന്ധപ്പെട്ടു ഉയര്‍ന്ന
സംശയങ്ങളും താഴെ നല്‍കുന്നു

സമീര്‍ ഖാന്‍ പത്താന്‍-(23/10/2002): നരേന്ദ്രമോഡിയെ വധിക്കാനെത്തിയ ലഷ്കര്‍-ഇ-തൊയ്ബ തിവ്രവാദി ആണെന്ന് പോലിസ്. കസ്റ്റഡിയില്‍ എടുത്ത ശേഷം രക്ഷപെടാന്‍ ശ്രമിച്ചപ്പോള്‍ കൊന്നു എന്നാണ് പോലിസ് ഭാഷ്യം.  എന്നാല്‍, സമീര്‍ ഖാനെ പൊലീസ് കൊലപ്പെടുത്തുകയായിരുന്നു എന്നു  ഐജി തലത്തില്‍ നടത്തിയ അന്വഷണത്തില്‍ കണ്ടെത്തിയിരുന്നു. ഇതു വരെയും ഒരു നടപടിയും റിപോര്‍ട്ടിന്‍മേല്‍ സര്‍ക്കാരിന്റെ ഭാഗത്തു നിന്നു ഉണ്ടായിട്ടില്ല. ബന്ധുക്കള്‍ കോടതിയില്‍ പരാതി നല്‍കി കാത്തിരിക്കുന്നു.

സാദ്ദിഖ് ജമാല്‍ മേത്തര്‍(10/1/2003): പോലിസ് ഭാഷ്യം: അതിഭങ്കര ഭികരന്‍; ലഷ്കര്‍-ഇ-തൊയ്ബ തിവ്രവാദി; നരേന്ദ്രമോഡിയെ വധിക്കാന്‍ ഗൂഡാലോജന നടത്തി. മുംബൈ സ്വദേശി കരണ്‍ ഇതു ഗുജറാ‍ത്ത് പോലിസ് നടത്തിയ മറ്റൊരു വ്യാജ എറ്റുമുട്ടല്‍ ആണ് എന്നതിനു കോടതിയില്‍ തെളിവുകള്‍ നല്‍കിയിരിക്കുന്നു. സാദ്ദിഖ് തന്റെ ഒപ്പം ദുബായില്‍ ജോലിനോക്കിയിരുന്ന ആളാണന്നും അയാളുടെ ബന്ധുക്കള്‍ 2002ലെ കലാപത്തില്‍ കൊല്ലപ്പെട്ടതാണന്നും നാട്ടിലേക്കുള്ള മടക്ക യാത്രക്കിടയില്‍ മുംബൈയില്‍ നിന്നും അറസ്റ്റ് ചെയ്യപ്പെടുകയായിരുന്നു എന്നും ഇതു എറ്റുമുട്ടലില്‍ കൊല്ലപ്പെട്ടതല്ല എന്നുമാണ് മൊഴി നല്‍കിയത്.

ആംനസ്റ്റി ഇന്റര്‍നാഷനല്‍ പുറത്തുവിട്ട ഒരു റിപോര്‍ട്ടില്‍ ഇത്തരത്തില്‍ ഗുജറാത്തില്‍ കൊലചെയ്യപ്പെട്ട ഒട്ടനവധി ആള്‍ക്കാരുടെ വിവരങ്ങള്‍ ഉണ്ട്. (റിപോര്‍ട്ട് ഇവിടെ കാണുക:
http://www.amnesty.org/en/library/info/ASA20/011/2007/en) കൊല്ലപ്പെട്ടവരെല്ലാവരും തീവ്രവാദികളും, അധോലോകികളും മറ്റും മറ്റുമാണെന്ന് പൊലീസ് മുറ തെറ്റാതെ റിപോര്‍ട്ടുകള്‍ തെയ്യാറാക്കി വച്ചിട്ടുണ്ട്.

2002ലെ മുസ്ലിം വംശഹത്യയും, അതിനു ശേഷം അരങ്ങേറിയിട്ടുള്ള ഭരണകൂട കൊലപാതകങ്ങളും (സൊഹ്റാബുദീന്‍-ഇസ്രത്ത് കേസുകളുള്‍പ്പെടെ) തുറന്നു കാണിക്കുന്നത് ഗുജറാത്തിലെ പൊലീസ് സ്റ്റേറ്റിന്റെ വികൃതമുഖത്തെ തന്നെയാണ്. ലോകത്തിലെ ഏറ്റവും വലിയ ജനാധിപത്യമെന്ന് മേനി നടിക്കുന്ന ഒരു രാജ്യത്താണ് ഇതു നടക്കുന്നതെന്നോര്‍ക്കണം! ഈ പൊലീസ് സ്റ്റേറ്റിന്റെ അമരക്കാരെ തന്നെയാണ് രാജ്യത്തെ ഏറ്റവും വലിയ വികസന മുന്നേറ്റത്തിന്റെ കോമരങ്ങളായി ഫിനാന്‍സ് ക്യാപിറ്റലും സംഘികളും  ഒരുപോലെ കൊണ്ടാടുന്നത് എന്നിടത്താണ് കാവ്യനീതി.

—ആനുകാലിക രാഷ്ട്രീയ സാമ്പത്തിക വിഷയങ്ങളെ കുറിച്ചുള്ള ചെറുകുറിപ്പുകളുള്‍ക്കൊള്ളുന്ന പംക്തിയാണ് Daily Edit.

Be Sociable, Share!

• 

Tags: BJP, Daily Edit, Gujarat, Hindutva, Narendra Modi