എക്സ്-റേ: ഗോസിപ്പുവാര്‍ത്തകള്‍

Be Sociable, Share!

• 

“ദിവസവും രണ്ടുപേരും തമ്മില്‍ മണിക്കൂറുകള്‍ ഫോണില്‍ സംസാരിച്ചിരുന്നു. തുടരെയുള്ള ഫോണ്‍ വിളികളും എസ്എംഎസുകളുടെ എണ്ണവും ഈ അടുപ്പത്തിന് തെളിവായി പോലീസ് കണക്കാക്കുന്നു. അധ്യാപികയുമായുള്ള അടുപ്പം ശ്രദ്ധയില്‍പ്പെട്ട മാതാപിതാക്കള്‍ കോളേജിലെത്തി അധ്യാപികയോട് വിവരങ്ങള്‍ ചോദിച്ചിരുന്നു. മറ്റു തരത്തിലുള്ള അടുപ്പമല്ലെന്ന് രണ്ടുപേരും പറഞ്ഞത് വിശ്വസിച്ച് അജിത്തിന്റെ രക്ഷിതാക്കള്‍ മടങ്ങുകയായിരുന്നു.” മെയ് 13നു അജിത്ത് എന്ന വിദ്യാര്‍ഥി ട്രയിന്‍ തട്ടി മരിച്ചതിനെ കുറിച്ച് ‘മാതൃഭുമി’ ദിനപ്പത്രത്തില്‍ വന്ന വാര്‍ത്തയാണിത്. മരണത്തിനു കാരണമായ സംഭവത്തെ കുറിച്ചു  മാതൃഭൂമി നടത്തിയ നിരീക്ഷണങ്ങള്‍ അശ്ലീല സഹിത്യപ്രദ്ധികരണങ്ങള്‍ വച്ചുനീട്ടുന്ന കസര്‍ത്തുകളെ ഓര്‍മിപ്പിക്കുന്നതാണ്. ലൈംഗികചുവയുള്ള വാര്‍ത്തകള്‍ എങ്ങിനെ വിറ്റു കാശാക്കാം എന്ന് മലയാളിക്കു കാണിച്ചു കൊടുത്ത മാധ്യമരൂപമായിരുന്നു (അങ്ങിനെ വിളിക്കാമെങ്കില്‍) ‘ക്രൈം’ വാരിക. അജിത്തിന്റെ മരണത്തെ പറ്റി വന്ന മാതൃഭൂമി റിപോര്‍ട്ടുകള്‍ വായിച്ചാല്‍ പുരോഗമന നാട്യം വേണ്ടുവോളമുള്ള പുരാതന പത്രം എങ്ങിനെയാണ് ഒരു സോഫ്റ്റ് ക്രൈമായി മാറുന്നതെന്ന് കാണാവുന്നതാണ്.

“കോളേജ് അധ്യാപകര്‍ക്കിടയിലെ കിടമത്സരം മൂര്‍ച്ഛിച്ച ശേഷം അജിത്തിനോട് അടുപ്പം പുലര്‍ത്തിയിരുന്ന ഗസ്റ്റ് അധ്യാപികയുടെ ഭര്‍ത്താവ് സച്ചിനെ ഒരാള്‍ ലാന്‍ഡ് ഫോണിലൂടെയും ഇന്റര്‍നെറ്റ് ഫോണിലൂടെയും ബന്ധപ്പെട്ടിരുന്നു. അധ്യാപികയ്ക്കു ചിലരുമായി അടുപ്പമുണ്ടെന്നും അതിനെക്കുറിച്ച് അന്വേഷിക്കണമെന്നും പറഞ്ഞ ആള്‍ അധ്യാപികയുടെയും മറ്റും കോള്‍വിവരപ്പട്ടികയും സച്ചിന് ഇമെയില്‍ ചെയ്തു”. (മാതൃഭൂമി, മേയ് 11). പ്രൊഫഷനല്‍ കിടമത്സരവും, അധ്യാപകര്‍ തമ്മിലുള്ള വ്യക്തിവിദ്വേഷവുമാണു ഒരു സഹപ്രവര്‍ത്തകയെ കുറിച്ചു അവരുടെ ഭര്‍ത്താവിന്റെ അടുത്തു ഇത്തരത്തിലുള്ള നിരീക്ഷണങ്ങള്‍ നടത്തിയതിനു പിന്നിലുള്ളതു എന്നു വ്യക്തമാക്കുന്ന ഈ വാര്‍ത്ത വന്നതും മാതൃഭൂമിയിലാണ്. അധ്യാപകര്‍ തമ്മില്‍ ചേരി തിരിഞ്ഞു തമ്മിലടിയായിരുന്നു എന്നും അതില്‍ വിദ്യാര്‍ഥികളും ഉള്‍പ്പെട്ടിരുന്നു എന്നും  ഒന്നില്‍ കൂടുതല്‍ തവണ വര്‍ത്തമാന പത്രങ്ങള്‍ പോലിസിനെ ഉദ്ധരിച്ചു റിപോര്‍ട്ടു ചെയിതിരുന്നു.

ഗോസിപ്പുകള്‍ തമാശകളല്ല. എല്ലാ കാലത്തും വ്യക്തികളെ കുറിച്ച് പൊതു അഭിപ്രായം രൂപികരിക്കപ്പെടുന്നതില്‍ അവ ചെറുതല്ലാത്ത ഒരു പങ്കു വഹിക്കാറുണ്ട്. ഇങ്ങനെ ഗോസിപ്പുകള്‍ പറയുന്നവര്‍ക്കു അവരവരുടേതായ പല താത്പര്യങ്ങളും ഉണ്ടാകും. അധികാര തര്‍ക്കങ്ങള്‍, തന്‍പോരിമാ കലഹങ്ങള്‍, അസൂയ എന്നിവയാണു സാധരണ ഗതിയില്‍ ഗോസിപ്പുകളുടെ പിന്നില്‍ ഉണ്ടാകാറുള്ള പ്രേരണ. നേരിട്ടേറ്റുമുട്ടാന്‍ ഭയമുള്ളവരുടേയും, കുറുക്കുവഴിക്കു കാര്യങ്ങള്‍ സാധിക്കാന്‍ താത്പര്യമുള്ളവരുടേയും ഒരു പ്രധാന ആയുധം ഗോസിപ്പുകളാണ്. ചിലര്‍ക്ക് അതു ഒരു നേരം പോക്കാണ്. നടപ്പുശീലങ്ങള്‍ക്കു വിരുദ്ധമായി ഒരു സ്ത്രി വന്നാല്‍ അവരെ നേരിടുന്നതിനുള്ള എറ്റവും എളുപ്പമുള്ള മാര്‍ഗം അവരുടെ സ്വഭാത്തെ കുറിച്ചു കഥകളിറക്കുകയെന്നതാണ്. സ്ത്രീവിഷയമാണെങ്കില്‍ ഗോസിപ്പുകള്‍ എളുപ്പം പരക്കുകയും ചെയ്യും. നമ്മുടെ സമൂഹത്തില്‍ ഇത്തരത്തിലുള്ള ഗോസിപ്പുകള്‍ പൊതുവെ സ്ത്രികളെ കുടും‌ബ, സാമൂഹിക സമ്മര്‍ദങ്ങള്‍ക്കു അടിമപ്പെടുത്തുകയും, മറ്റുള്ളവര്‍ക്കു കീഴ്പെട്ടുനില്‍ക്കാന്‍ നിര്‍ബന്ധിതരാക്കുകയും ചെയ്യും. തൊഴിലിടങ്ങളിലും പൊതുസമൂഹത്തിലും സ്ത്രീകള്‍ നേരിടേണ്ടി വരുന്ന പ്രശ്നങ്ങളിലേക്കുള്ള ചുണ്ടുപലകയായി മാറേണ്ടിയിരുന്ന ഒരു സംഭവത്തെ മുഖ്യധാരാ മാധ്യമങ്ങള്‍ എതിരിട്ടത്, ബന്ധങ്ങളുടെ പവിത്രതയെ കുറിച്ച് സദാചാര പ്രഭാഷണം നടത്തിയാണ്. സ്ത്രി അമ്മയാണ്, സഹോദരിയാണ്, ഭാര്യയാണ് എന്നും, ആയതിനാല്‍ അവള്‍ സദാചാരമൂല്യങ്ങള്‍ ഉയര്‍ത്തി പിടിക്കാന്‍ ബാധ്യസ്ഥയാണ് എന്നും മറ്റുമുള്ള പതിവു ശൈലി തന്നെയായിരുന്നു ഇവിടേയും സ്വീകരിക്കപ്പെട്ടത്.

ഏന്താണു ഈ സാമൂഹിക മൂല്യങ്ങള്‍ ഉയര്‍ത്തിപിടിക്കണം എന്നു പറയുന്നതിലൂടെ അര്‍ത്ഥമാക്കുന്നത്? ശിഷ്യനായ അജിത്തുമായി അധ്യാപികയ്ക്കുണ്ടായ അടുപ്പത്തെ തുടര്‍ന്നുണ്ടായ പ്രശ്നങ്ങളാണ് അജിത്തിന്റെ മരണത്തിന് കാരണമെന്ന് പൊലിസ് കണ്ടെത്തിയിട്ടുണ്ട്. കോളേജിലെ മുന്‍ അധ്യാപിക അജിത്തുമായി പുലര്‍ത്തിയിരുന്ന അടുപ്പത്തിന് ദൈര്‍ഘ്യമേറിയ ഫോണ്‍ സംഭാഷണവും സന്ദേശങ്ങളും തെളിവാണെന്ന് പോലീസ് പറയുന്നു. (മാതൃഭൂമി, മേയ് 9). വിവരസങ്കേതികവിദ്യ വളര്‍ച്ച പ്രാപിച്ച ഈ കാലഘട്ടത്തില്‍ എല്ലാ വ്യക്തികള്‍ക്കും പൊതുസമൂഹമായും തന്റെ സുഹൃത്തുകളുമായും ബന്ധപ്പെടുക എളുപ്പമാണ്.  സാമൂഹിക പരിമിതികള്‍ക്കു വിധേയമായികൊണ്ടാണങ്കിലും ഇത്തരത്തിലുള്ള സമ്പര്‍ക്കം തന്നെ അടിമത്വത്തില്‍ തളച്ചിട്ടിരിക്കുന്ന വ്യവസ്ഥയെ കുറിച്ചു ഓരോ വ്യക്തിക്കും അറിവുണ്ടാകുന്നതിലെക്കു നയിക്കപെടും.

ഞാന്‍ വെറും വീട്ടുകാരി മാത്രമായി (വിട്ടുവേലക്കാരി) ഒതുങ്ങി കഴിയാന്‍ ആഗ്രഹിക്കുന്നില്ല എന്നു പല പെണ്‍കുട്ടികളും തുറന്നു പറയാന്‍ തയ്യാറാകുന്നുണ്ട്. ഇത്തരത്തിലുള്ള തുറന്നു പറച്ചിലുകള്‍ “ഒരുമ്പെട്ടവളുമാരുടെ” സ്ത്രി കൂട്ടങ്ങളേ സൃഷ്ടിക്കുന്നു എന്നു ഇവിടുത്തെ പാരമ്പര്യവാദികള്‍ മുറവിളിക്കുട്ടാന്‍ തുടങ്ങിയിട്ടു കുറച്ചായി. അവരുടെ അഭിപ്രായത്തില്‍ സ്ത്രീകള്‍ സദാചാര മൂല്യങ്ങള്‍ ഉയര്‍ത്തിപിടിക്കാ‍ന്‍ ബാധ്യസ്ഥരാണ്. അതായത്, ഭര്‍ത്താവിന്റെ ലൈംഗിക ആവശ്യയങ്ങള്‍ നിറവേറ്റുക, കുട്ടികളെ പ്രസവിക്കുക, വീടു വൃത്തിയാക്കി സൂക്ഷിക്കുക, ‘വീടിന്റെ അഭിമാനം’ കാക്കുക എന്നിവയൊക്കെ ഈ മൂല്യസംരക്ഷണ ബോധത്തില്‍ വരും. സ്ത്രീകള്‍ കുടുംബത്തിന്റെയും, സമൂഹത്തിന്റെയും മാനാഭിമാനം സംരക്ഷിക്കാന്‍ ബാധ്യസ്ഥപ്പെട്ടവരാണ്. ഈ പൊതുബോധത്തെ ഊട്ടിയുറപ്പിക്കുകയാണ്, അല്ലെങ്കില്‍ ചൂഷണം ചെയ്തു കൊണ്ട് ഗോസിപ്പുകള്‍ വില്‍ക്കുകയാണ് മലയാളത്തിലെ മുഖ്യധാരാ മാധ്യമങ്ങള്‍ ചെയ്യുന്നത്. എന്താണ് നടന്നത് എന്നെഴുതുന്നതിനു പകരം, എന്താകാം നടന്നിട്ടുണ്ടാകുക എന്ന് ഗോസിപ്പിന്റെ തൊങ്ങലോടെ അവതരിപ്പിക്കുക എന്നതാണ് നമ്മുടെ പ്രൊഫഷണലിസം.

ജനങ്ങളുടെ കാഴ്ചപ്പാട് രൂപീകരിക്കുന്നതില്‍ ഈ മാധ്യമങ്ങള്‍ക്കുള്ള പങ്ക് ഏറെ ചര്‍ച്ച ചെയ്യപ്പെട്ടിട്ടുള്ളതാണ്.  മാധ്യമങ്ങള്‍ക്ക് ജനങ്ങളെ വിഡ്ഢികളാക്കാന്‍ കഴിയില്ലെന്നും, മാധ്യമങ്ങളുടെ പൊള്ളയായ വാദങ്ങള്‍ അവര്‍ തിരിച്ചറിയുമെന്നും വാദിക്കുന്നവരുമുണ്ട്. വസ്തുതകള്‍ വളച്ചൊടിച്ചും യഥാര്‍ത്ഥ വാര്‍ത്തകള്‍ തമസ്കരിച്ചും പറയാതെ പറഞ്ഞും മാധ്യമങ്ങള്‍ നിര്‍മിക്കുന്ന വ്യാജബോധത്തിനുള്ളിലൂടെ സത്യം കാണാന്‍ ജനങ്ങള്‍ക്കാകും എന്നതാണവരുടെ വാദം. നൂറു ശതമാനം മാധ്യമ സാക്ഷരത ഉള്ള ഒരു സമൂഹത്തില്‍ പോലും ഈ വാദം ഭാഗികമായി മാത്രമേ സത്യമാകുന്നുള്ളൂ. കോടിക്കണക്കിന് രൂപ മുടക്കി കമ്പനികള്‍ പരസ്യം നല്‍കുന്നത് എന്തിനാണ്? പരസ്യങ്ങള്‍ വഴി പൊതുബോധത്തില്‍ വരേണ്യതയുടെ പ്രതീകങ്ങള്‍ സൃഷ്ടിക്കാമെന്നും, ആ പ്രതീകങ്ങളുടെ ബലത്തില്‍ ഉത്പന്നങ്ങള്‍ കമ്പോളത്തില്‍ ഉയര്‍ന്ന വിലയ്ക്ക് വില്‍ക്കാനാകുമെന്നും ബ്രാന്‍ഡ് മുതലാളിമാര്‍ക്കറിയാം. ജനമനസുകളെ സ്വാധീനിക്കാന്‍ വിപണി എങ്ങിനെയാണ് മാധ്യമങ്ങളെ ഉപയോഗിക്കുന്നത് എന്നതിന്റെ ഏറ്റവും നല്ല ഉദാഹരണമാണ് ഇത്.

ഏതു തരത്തില്‍  ജനമനസ്സുകള്‍   സ്വാധീനിക്കപ്പെടണം എന്ന കാര്യം മാധ്യമങ്ങള്‍ സ്വയം തീരുമാനിക്കുന്ന വസ്തുതയാണ്. ആ തീരുമാനം മാധ്യമങ്ങളുടെ സാമൂഹിക പ്രതിബദ്ധതയേയും സര്കുലേഷനേയും ആശ്രയിച്ചിരിക്കും. ജനത്തിന് വേണ്ടതെന്തൊക്കെയാണെന്ന കാര്യത്തില്‍ ആദ്യം ഒരു മുന്‍ധാരണയിലെത്തുക, പിന്നീട് അതിനെ കുറിച്ചു മാത്രം മാത്രം എഴുതുക എന്നതാണ് ഒരു രീതി. ഈ മുന്‍ധാരണ തീരുമാനിക്കപ്പെടുന്നതാകട്ടെ വാര്‍ത്തയുടെ വിപണി മൂല്യത്തിന്റെ അടിസ്ഥാനത്തിലുമാകും. അങ്ങിനെ ഏറ്റവും വിപണിമൂല്യമുള്ള ഒരു ഒരു വാര്‍ത്താഘടകമാണ് ലൈംഗികത. അതുകൊണ്ടാണ് ക്രൈമിന്റെ പോക്രിത്തരം മുതല്‍ മാതൃഭൂമിയുടെ സോഫ്റ്റ് പോണ്‍ വരെ വിറ്റുപോകുന്നതും. സാമൂഹിക പ്രതിബദ്ധത ന്യൂസ്റൂമുകള്‍ പണ്ടേ ഉപേക്ഷിച്ച നാണയത്തുട്ടാണ്. വാര്‍ത്തയുടെ വിപണിമൂല്യം വാര്‍ത്താമുറികള്‍ ഭരിക്കുമ്പോള്‍ ചെറുത്തുനില്പുകള്‍ക്കു പോലും തുരങ്കം വയ്ക്കുന്ന നിലപാടുകളേ മാധ്യമസ്ഥാപനങ്ങള്‍ക്ക് കൈക്കൊള്ളാന്‍ കഴിയൂ. ആനുകാലിക സംഭവങ്ങള്‍ ഈ ആശങ്കയ്ക്ക് അടിവരയിടുന്നു.

Be Sociable, Share!

• 

Tags: Kerala, Mathrubhoomi, media, Morality, Sexuality, X-Ray