മനപ്പോരാട്ടങ്ങള്‍*

Be Sociable, Share!

• 

വിജിത്ത്

ഈ നിയമസഭാ തെരഞ്ഞെടുപ്പ് ശ്രദ്ധേയമായത് ഒരു കാര്യത്തിലായിരുന്നു. കഴിഞ്ഞ കുറേ വര്‍ഷങ്ങളായി പ്രതിപക്ഷത്തെ വലിയ ഭൂരിപക്ഷത്തോടെ ജനങ്ങള്‍ വിജയിപ്പിക്കുന്നതാണ് നാം കണ്ടുകൊണ്ടിരുന്നത്. ഇക്കുറി അതില്‍ നിന്ന് വ്യത്യസ്തമായ ഒരു പാറ്റേണ്‍ ആണ് തെരഞ്ഞടുപ്പ് ഫലം നല്‍കിയത്. കഴിഞ്ഞ ലോകസഭ തെരഞ്ഞെടുപ്പ് ഫലവും, പ്രാദേശിക സ്വയംഭരണസ്ഥാപനങ്ങളിലേക്ക് നടന്ന തെരഞ്ഞെടുപ്പ് ഫലവും പഴയ പാറ്റേണ്‍ ആവര്‍ത്തിക്കും എന്ന് തന്നെയാണ് നമുക്ക് തന്ന സൂചന. പക്ഷേ തികച്ചും ഇടതു വിരുദ്ധമായ ആ അന്തരീക്ഷത്തില്‍ നിന്നും ഇടതനുകൂലമായ സാഹചര്യം ചുരുങ്ങിയ മാസങ്ങള്‍ക്കുള്ളില്‍  എങ്ങനെയുണ്ടായി എന്നുള്ളത് പ്രധാനപ്പെട്ട ഒരു അന്വേഷണ വിഷയമാവേണ്ടതാണ്. ഇക്കാലയളവില്‍ കോണ്‍ഗ്രസ് പ്രതിച്ഛായയ്ക്കു മങ്ങലേല്‍പ്പിച്ച ചില കാര്യങ്ങള്‍ അഴിമതിക്കേസുകളാണ്. കൂടാതെ ഭരണത്തിന്റെ അവസാന നാളുകളില്‍ എല്‍ഡിഎഫ് സര്‍ക്കാര്‍ നടപ്പിലാക്കിയ ക്ഷേമ പരിപാടികളും ഇടതു വികാരം വളത്തിയിട്ടുണ്ടാവും. പക്ഷേ അതൊന്നും ഇത്ര വലിയ ഒരു ഷിഫ്ടിനെ മനസിലാക്കുന്നതില്‍ പൂര്‍ണമാവുന്നില്ല. അത്തരം വസ്തുനിഷ്ഠ സാഹചര്യങ്ങളില്‍ മാത്രം നമുക്കതിന്റെ ഉത്തരങ്ങള്‍ ലഭിക്കുകയുമില്ല.

ഓരോ തെരഞ്ഞടുപ്പും വസ്തുനിഷ്ഠസാഹചര്യങ്ങളോടൊപ്പം ആത്മനിഷ്ഠമായ വൈകാരികതയുടെ കൂടി കളിയരങ്ങാണ്. വൈകാരികമായ ഒട്ടേറെ ഘടകങ്ങള്‍ കൂടി ചേര്‍ന്നാണ് ജനങ്ങളുടെ വോട്ടിംഗ് രൂപപ്പെടുക. പ്രാദേശിക സ്വയംഭരണസ്ഥാപനങ്ങളിലേക്ക് നടന്ന തെരഞ്ഞെടുപ്പില്‍ നിലനിന്ന കോണ്‍ഗ്രസ് അനുകൂല അന്തരീക്ഷത്തിനു ശേഷമാണ് കേരളത്തിലെ കോണ്‍ഗ്രസിന്റെ എക്കാലത്തെയും വലിയ നേതാവ് കെ കരുണാകരന്‍ മരിക്കുന്നത്. സജീവരാഷ്ട്രീയത്തില്‍ ഇല്ലായിരുന്നെങ്കിലും കരുണാകരന്‍ ജനങ്ങള്‍ക്ക്‌ കോണ്‍ഗ്രസിനോട് ഏറ്റവും എളുപ്പം ചേര്‍ത്ത് വയ്ക്കാവുന്ന,  കാലം കൊണ്ട് രൂപപ്പെട്ട അടയാളമായിരുന്നു.  കരുണാകരന്റെ മരണവുമായി ബന്ധപെട്ട  ആത്മനിഷ്ഠമായ വൈകാരികത ഈ തെരഞ്ഞടുപ്പില്‍ എങ്ങനെ പ്രവര്‍ത്തിച്ചിരിക്കാം എന്നുള്ള സാധ്യതയാണ്  ഈ കുറിപ്പ് അന്വേഷിക്കുന്നത്.

വിഎസ് ആണ് ഇടതനുകൂല വൈകാരികതയുടെ കേന്ദമായി പ്രവര്‍ത്തിച്ചത് എന്നു മനസിലാക്കാന്‍  പ്രയാസമില്ല. ആ രണ്ടക്ഷരത്തിലേക്ക് ജനങ്ങള്‍ തങ്ങളുടെ യഥാര്‍ത്ഥ പ്രതീക്ഷകളും  കാല്‍പ്പനികമോഹങ്ങളും ഇറക്കി വച്ചു. ഇടതു  വൈകാരികത വി എസിലൂടെ ഒരു വ്യക്തിയിലേക്ക് ചുരുങ്ങി കൂടുതല്‍ ബിംബവല്ക്കരിക്കപ്പെട്ടു. വിഎസ് ഒരു വികാരമായി. പക്ഷെ പ്രാദേശിക സ്വയംഭരണ സ്ഥാപനങ്ങളിലേക്ക് തെരഞ്ഞെടുപ്പ് നടന്നപ്പോള്‍ വിഎസിന്റെ സാന്നിധ്യം ഉണ്ടായിരുന്നിട്ടു കൂടി  ഇടതുപക്ഷം കനത്ത തിരിച്ചടിയാണ് നേരിട്ടത്. അന്നത്തെ വിഎസില്‍ നിന്നും ഈ തെരഞ്ഞെടുപ്പുകാലത്തെ വിഎസിലേക്കുള്ള ദൂരം ബാലകൃഷ്ണപ്പിള്ള ജയിലിലേക്ക് നടന്നുകയറിയ ദൂരമാണ്. അപ്പോള്‍ ഇതിനിടയിലുണ്ടായ മറ്റു ചില സംഭവങ്ങള്‍കൂടി പരിശോധിച്ചാല്‍ മാത്രമേ നമുക്ക് മുന്നോട്ടു പോവാന്‍ കഴിയുകയുളളു. ഇത് മനസിലാക്കണമെങ്കില്‍ വലതുപക്ഷ  വൈകാരികതയുടെ മനോഘടന കൂടി പരിശോധിക്കേണ്ടതുണ്ട്. വൈകാരികമായി നിഷ്ക്രിയമായിരുന്നു വലത് അനുകൂല മനോഘടന, ഈ തെരഞ്ഞടുപ്പില്‍. പ്രാദേശിക സ്വയംഭരണസ്ഥാപനങ്ങളിലേക്ക് നടന്ന തെരഞ്ഞെടുപ്പില്‍ കണ്ട കോണ്‍ഗ്രസ് അനുകൂല വൈകാരികത ഈ തെരഞ്ഞെടുപ്പിലെത്തുമ്പോഴേക്കും ഇല്ലാതായി. ആ വൈകാരികതയെ ഉറപ്പിച്ചു നിര്‍ത്തിയ ബിംബങ്ങള്‍ നഷ്ടമാവുന്നതിലൂടെയാണ് അത് പ്രധാനമായും സംഭവിക്കുന്നത്‌. അത്തരം ഒന്നായിരുന്നു കരുണാകരന്റെ മരണം കോണ്‍ഗ്രസിന് നല്‍കിയിരിക്കുക. കോണ്‍ഗ്രസ് അനുകൂല മനോഘടനയുടെ ചരിത്രപരമായി നിര്‍മിക്കപ്പെട്ട ബിംബമായിരുന്നു, കരുണാകരന്‍. കരുണാകരന്റെ മരണം കോണ്‍ഗ്രസ് അനുകൂല മനോഘടനയില്‍ താല്‍ക്കാലികമായ ഒരു പ്രതിസന്ധി സൃഷ്ടിക്കുമെന്നുള്ളതില്‍ സംശയമൊന്നുമില്ല. കാരണം കേരളത്തിലെ ജനങ്ങള്‍ക്ക് കോണ്‍ഗ്രസിന് നേരെ
ഒരു സമചിഹ്നം കൊടുത്താല്‍ ആലോചിക്കാതെ എഴുതാവുന്ന ഒരു പേര് കരുണാകരന്റേതാണ്. കരുണാകരന്റെ മരണത്തിലൂടെ അത്തരം ഒരു പ്രതിസന്ധി കോണ്‍ഗ്രസ് അനുകൂല മനോഘടനയുള്ള വ്യക്തികള്‍ തീര്‍ച്ചയായും അനുഭവിച്ചിരിക്കും. കോണ്‍ഗ്രസിന്  ഒരു വികാരമാവാന്‍ കഴിഞ്ഞില്ല. പക്ഷെ ഈ പ്രതിസന്ധി കുറച്ചൊക്കെ ഇടത് അനുകൂലമാവുന്നുണ്ട്. അത് സംഭവിക്കുന്നത്‌ വിഎസിലൂടെ തന്നെയാണ്.

ഈ പ്രതിസന്ധി വളരെ പെട്ടന്നു മറികടക്കാന്‍ വിഎസ് കരുണാകരന്‍റെ മരണം സൃഷ്ടിച്ച പ്രതിസന്ധി നിറഞ്ഞ മനോഘടനയിലേക്ക് റിപ്ലേസ് ചെയ്യപ്പെട്ടിരിക്കാം. കരുണാകരനെപ്പോലെ തന്നെ പ്രായമുള്ള കര്‍ക്കശക്കാരനായ ഒരാള്‍ക്ക് മാത്രമേ അതിനു കഴിയുകയുമുള്ളൂ. ഒരു ബിംബത്തെ മറ്റൊരു ബിംബം കൊണ്ടുള്ള പകരം വെയ്പ്പ്. ബാലകൃഷ്ണ പിള്ളയെ ജയിലിലടച്ച വിഎസ് അതിനെ റേഷനലൈസ് ചെയ്തു കൊള്ളും. അപ്പോഴും ആളുകള്‍ക്ക് എതിര്‍ രാഷ്ട്രീയ പ്രസ്ഥാനത്തില്‍പെട്ട ഒരാളെ പിന്തുണക്കുന്നത്തിലുള്ള സ്വാഭാവികമായ പ്രതിസന്ധി വിഎസിനു സീറ്റ് നിഷേധിക്കാന്‍ ശ്രമം നടന്നു എന്ന മാധ്യമങ്ങള്‍ നല്‍കിയ അറിവിലൂടെ  മറികടക്കാം. കാരണം  വിഎസിനു വേണ്ടി ഇടതിനു വോട്ട് നല്‍കുമ്പോഴും അത്  അബോധമായി ഇടതുവിരുദ്ധ വോട്ട് തന്നെയാണ്. വലതുപക്ഷത്തിനു ഭൂരിപക്ഷം ആഗ്രഹിച്ച ജനങ്ങള്‍ വിഎസ് മുഖ്യമന്ത്രി ആവണമെന്ന് വിധിച്ചത്  ഈ മനപ്പോരാട്ടങ്ങള്‍ കൊണ്ട് കൂടിയായിരിക്കാം.

*മനപ്പോരാട്ടങ്ങള്‍—ദസ്തെവിസ്കിയുടെ’കാരമസോവ് സഹോദരന്മാര്‍’ എന്ന നോവലിലെ ഒരധ്യായം.

ലേഖകന്‍ മനശാസ്ത്രാധ്യാപകനാണ്.

Be Sociable, Share!

• 

Tags: Assembly elections, Congress, CPM, K Karunakaran, Kerala, LDF, UDF, Vijith, VS Achuthanandan