മന്‍മോഹന്‍ ജനങ്ങളെ വിഡ്ഢികളാക്കുന്നു: അസാഞ്ജെ

Be Sociable, Share!

• 

വിക്കിലീക്സ് സ്ഥാപകന്‍ ജൂലിയന്‍ അസാഞ്ജെ പുതിയ ലോകത്തിന്റെ ദൂതനാണെന്ന് പ്രമുഖ പത്രപ്രവര്‍ത്തകനായ ജോണ്‍ പില്‍ജര്‍ അഭിപ്രായപ്പെടുന്നു. വിക്കിലീക്സിന്റെ വെളിപ്പെടുത്തലുകള്‍ക്ക് മറുപടിയില്ലാത്തായപ്പോഴാണ്, പരിഭ്രാന്തരായ പടിഞ്ഞാറന്‍ രാജ്യങ്ങള്‍ ദൂതനെ തന്നെ കല്ലെറിയാന്‍ തുനിഞ്ഞത്. ഇന്ത്യയിലെ സ്ഥിതിയും വ്യത്യസ്ഥമായിരുന്നില്ല. ഗുരുതരമായ ആരോപണങ്ങള്‍ യുപിഎ സര്‍ക്കാരിനെതിരെ ഉയര്‍ന്നപ്പോള്‍ ജനങ്ങളുടെ മനസിലെ സംശയം ദുരീകരിക്കുന്നതിനു പകരം, ചര്‍ച്ചയും അന്വേഷണവുമാവശ്യപ്പെട്ട പ്രതിപക്ഷത്തെ കളിയാക്കാനാണ് പ്രധാനമന്ത്രി മന്‍മോഹന്‍ സിംഗ് ശ്രമിച്ചത്. വിക്കിലീക്സ് വെളിപ്പെടുത്തലുകളോടുള്ള ഇന്ത്യന്‍ രാഷ്ട്രീയ നേതൃത്വത്തിന്റെ പ്രതികരണം ഞെട്ടിപ്പിക്കുന്നതാണെന്ന് എന്‍ഡിറ്റിവി ചെയര്‍മാന്‍ പ്രണോയ് റോയുമായി നടത്തിയ അഭിമുഖത്തില്‍ അസാഞ്ജെ പറയുന്നു. മാര്‍ച്ച് 22ന് ‘ദ ഹിന്ദു’വില്‍ പ്രസിദ്ധീകരിക്കപ്പെട്ട അഭിമുഖത്തിന്റെ പ്രസക്തഭാഗങ്ങളുടെ പരിഭാഷയാണ് ചുവടെ.
ലോകം മുഴുവന്‍ നിങ്ങളെ വേട്ടയാടുന്ന ഒരു സമയമാണിത്. ജന്മദേശമായ ഓസ്ട്രേലിയ നിങ്ങളെ ‘രാജ്യ ദ്രോഹി’ എന്ന് വിളിക്കുന്നു; അമേരിക്ക നിങ്ങളെ അറസ്റ്റ് ചെയ്യാന്‍ ആഗ്രഹിക്കുന്നു; സ്വീഡനില്‍ നിങ്ങള്‍ സ്ത്രീപീഡന കേസിലെ പ്രതിയാണ്… നീതിന്യായ വ്യവസ്ഥയുടെ ഉന്നതിയില്‍ ഊറ്റം കൊള്ളുന്ന പാശ്ചാത്യ ലോകത്തിന്റെ ഈ നടപടിയില്‍ അത്ഭുതം തോന്നുന്നുണ്ടോ?
ഫ്രാങ്ക്ലിന്, മാഡിസണ്‍ തുടങ്ങിയ പിതാമഹരുടെ പാരമ്പര്യം അപ്പാടെ അമേരിക്കന്‍ ഭരണകൂടം തിരസ്കരിക്കുന്നതില്‍ വേദനയുണ്ട്. ‘സ്വാതന്ത്ര്യ സംരക്ഷണം’ Codified Bill of Rightsന്റെ ഒന്നാം ഭേദഗതി തന്നെ ഉറപ്പു തരുന്ന ഒരു രാജ്യമാണ് അമേരിക്ക. എന്നിട്ടും ഇങ്ങിനെ സംഭവിക്കുന്നത് നിരാശാജനകമാണ്. പക്ഷേ, ഞെട്ടിപ്പിക്കുന്നതല്ല. കാരണം, നാലഞ്ചു വര്ഷമായി വിക്കിലീക്സ് യുഎസിന്റെയും അതുപോലെ മറ്റു രാഷ്ട്രങ്ങളുടേയും സൈനിക നടപടികളെ പിന്തുടര്‍ന്ന് പോരുന്നുണ്ട്. ‘സെക്യൂരിറ്റി സ്റ്റേറ്റ്’ എന്ന ആശയം അമേരിക്കയിലും, മറ്റു പല രാജ്യങ്ങളിലും പിടിമുറുക്കുന്നതു നമുക്കു കാണാം. അതായത്, ചില വിഷയങ്ങളില്‍ ആക്രമണോത്സുകമായിരിക്കും ഇക്കൂട്ടരുടെ പ്രതികരണം. വിക്കിലീക്സിന്റെ വെളിപ്പെടുത്തലുകളുടെ വലുപ്പവും ആഴവും കൂടുമ്പോള്‍ ഭരണകൂടത്തിന്റെ പ്രതികരണം കൂടുതല്‍ ആക്രമണോത്സുകമാവുന്നു.

ഇങ്ങനെ നിരവധി രാജ്യങ്ങള്‍ താങ്കളുടെ പതനം ആഗ്രഹിക്കുമ്പോള്‍ ജൂലിയന്‍ അസാഞ്ജെക്ക് എവിടെ സുരക്ഷിതനായി ജീവിക്കാന്‍ കഴിയും? അവസാനം, ജയിലില്‍ തന്നെ കഴിയേണ്ടി വരും എന്നു തോന്നുന്നുണ്ടോ?
എക്കാലത്തും നമുക്കെല്ലാം സുരക്ഷിതമായി ജീവിക്കാന്‍ പറ്റുന്ന ഏതു രാജ്യമാണുള്ളത്? പക്ഷേ, ചിലപ്പോള്‍ ഭൂരിപക്ഷം ജനങ്ങളുടെ ഇച്ഛാശക്തി നമ്മോടൊപ്പമുണ്ടായെന്നു വരും. ഈജിപ്തിലേയും, ടുണിഷ്യയിലേയും എന്റെ സുഹൃത്തുക്കള്‍ പറയുന്നത്, നിലവില്‍–വിപ്ലവത്തിനു ശേഷം–ജീവിക്കാന്‍ ഏറ്റവും സുരക്ഷിതമായ സ്ഥലം ഈ രാജ്യങ്ങളാണെന്നാണ്.

അമേരിക്കന്‍ വൈസ്-പ്രസിഡന്റ് ജോ ബിഡന്‍ നിങ്ങളെ സൂപര്‍ റ്റെററിസ്റ്റ് എന്നാണ് വിളിച്ചത്. ശത്രുവിനെ നേരിടുന്ന പോലെ നിങ്ങളെ നേരിടണമെന്ന് ഒരു മുന്‍ സ്പീക്കറും പറയുകയുണ്ടായി. എന്തെങ്കിലും തരത്തിലുള്ള ഭീഷണി എപ്പോഴെങ്കിലും നേരിട്ടു കിട്ടുകയുണ്ടായോ?
ഭീഷണികള്‍ പലപ്പോഴും കിട്ടിയിട്ടുണ്ട്. പക്ഷേ, അത്തരം ഭീഷണികളെ ഞങ്ങള്‍ ഗൗരവമായി എടുക്കാറില്ല. ഭീഷണികള്‍ മുഴക്കാത്ത, ഞങ്ങളെ കുറിച്ച് വേവലാതികളുള്ള ജനങ്ങളുണ്ട്. അവരാണ് ഞങ്ങളെ സംബന്ധിച്ച് കൂടുതല്‍ പ്രധാനപ്പെട്ടവര്‍.

അമേരിക്കന്‍ പ്രസിഡന്റ് നമ്മുടെയെല്ലാം സൂപര്‍ പ്രസിഡന്റാണെന്ന് താങ്കള്‍ ഒരിക്കല്‍  അഭിപ്രായപ്പെടുകയുണ്ടായി. ഇന്ത്യയെക്കുറിച്ച് ഇപ്പോള്‍ പുറത്തു വന്നിട്ടുള്ള വിക്കിലീക്സ് കേബിളുകള്‍ കൂടുതലും വെളിവാക്കുന്നത് ഇന്ത്യയുടെ ആഭ്യന്തര നയങ്ങളിള്‍ കൈകടത്താനുള്ള അമേരിക്കയുടെ അമിതാവേശമാണ്. ഇത് പ്രതീക്ഷിച്ചിരുന്നോ?
അമേരിക്കയുടെ വിദേശനയങ്ങളുമായി ബന്ധപ്പെട്ടു പുറത്തു വന്ന ഈ വാര്ത്തകള്‍ ഒന്നും തന്നെ അത്ഭുതപ്പെടുത്തുന്നവയല്ല. ഇതവരുടെ പ്രവര്ത്തനശൈലിയാണ്. കേബിളുകള്‍ ആദ്യമായി വായിക്കാന്‍ തുടങ്ങിയപ്പോള്‍ ചെറിയൊരു അമ്പരപ്പുണ്ടായിരുന്നു. അതായത്, 1960കളില്‍ തെക്കനമേരിക്കന്‍ മാര്‍ക്സിസ്റ്റുകള്‍ സ്റ്റേറ്റ് ഡിപാര്‍ട്മെന്റിനെ പറ്റി എന്തൊക്കെ വിമര്‍ശനങ്ങളാണോ ഉയര്‍ത്തിയിരുന്നത്, അതൊക്കെ ശരിയാണെന്നു വരുന്നു! അവര്‍ അന്നു നടത്തിയിരുന്നത് വെറും രാഷ്ട്രീയ വിടുവായത്തമായിരുന്നില്ല. അതായത്, അമേരിക്കന്‍ വ്യവസായ സ്ഥാപനങ്ങളുടെ ഒരു ഉപകരണമായിട്ടാണ് പലപ്പോഴും സ്റ്റേറ്റ് ഡിപാര്‍ട്മെന്റ് പ്രവര്‍ത്തിച്ചിരുന്നതെന്നു കാണാം! ഓസ്ട്രേലിയയിലും ഇതിന്റെ ഉദാഹരണങ്ങള്‍ ധാരാളമാണ്. ലേബര്‍ സര്‍ക്കാരിലെ ഒരു ക്യാബിനറ്റ് മിനിസ്റ്റര്‍ അമേരിക്കന്‍ എംബസിയുടെ സോഴ്സായിരുന്നു. എംബസിയിലെ സ്ഥിരം സന്ദര്‍ശകനുമായിരുന്നു അദ്ദേഹം.

കേബിളുകള്‍ പുറത്തുവിട്ട കാര്യങ്ങള്‍ യുഎസ് എംബസ്സിയിലെ ചില നയതന്ത്രവിദഗ്ദരുടെ അഭിപ്രായങ്ങളോ വിശകലനങ്ങളോ ആണെന്നൊരു എതിരഭിപ്രായം ഉണ്ട്. ഈ രഹസ്യ കേബിളുകള്‍ വെളിച്ചത്ത് കൊണ്ട് വരുന്നതിലൂടെ തന്റെ ജോലി അവസാനിച്ചു എന്ന് താങ്കള്‍ പറയുന്നു. എന്നാല്‍ ഇതിനു വേറോരു പ്രശ്നം കൂടിയില്ലെ? അതായത്, ഈ ഡിപ്ലോമാറ്റുകളുടെ അഭിപ്രായങ്ങളും, വിലയിരുത്തലുകളും വസ്തുതകളായി എടുത്ത് പല രാഷ്ട്രങ്ങളേയും കൂടുതല്‍ ദുര്‍ബലപ്പെടുത്താനുള്ള ശ്രമങ്ങളുണ്ടാവില്ലെ? അതുകൊണ്ട്, കേബിളുകള്‍ വെളിപ്പെടുത്തി, ഇനിയെനിക്കു റോളൊന്നുമില്ല എന്നു പറഞ്ഞ് നിങ്ങള്‍ക്കു കൈകഴുകാനാകുമൊ?
തീര്ച്ചയായും ഇല്ല. ഈ കേബിളുകള്‍ നയതന്ത്രജ്ഞരുടെ അഭിപ്രായങ്ങള്‍ മാത്രമാണെന്ന നിരീക്ഷണം പക്ഷേ ശരിയല്ല. ഇതില്‍ പലതും തങ്ങളുടെ ഔദ്യോഗിക കൃത്യനിര്‍വഹണത്തിന്റെ ഭാഗമായി അംബാസഡര്‍മാര്‍ വാഷിംഗ്ടണിലേക്കയച്ച രേഖകളാണ്. സെര്‍വിസ് ചെയ്യുന്ന രാജ്യങ്ങളില്‍ തങ്ങള്‍ക്ക് ഭദ്രമായ സോഴ്സസ് ഉണ്ടെന്ന് അമേരിക്കന്‍ ഭരണകൂടത്തെ അറിയിക്കുക എന്നതു കൂടിയാണ് ഇക്കൂട്ടരുടെ ലക്ഷ്യം. അതായത്, വസ്തുതകളെന്ന് അവര്‍ കരുതുന്ന കാര്യങ്ങളാണ് അവര്‍ റിപോര്‍ട്ടാക്കുന്നത്. അഭിപ്രായങ്ങള്‍ അതില്‍ വരുമെന്നു മാത്രം. അതാണ്, അമേരിക്കന്‍ തലസ്ഥാനത്തേക്ക് ഡിപ്ലോമാറ്റിക് കേബിളുകളായി അയയ്ക്കപ്പെടുന്നത്.

ഇന്ത്യന്‍ കേബിളുകളുടെ കാര്യം തന്നെയെടുക്കാം. കൈക്കൂലി കേസിനെ കുറിച്ച് അമേരിക്കന്‍ നയതന്ത്രജ്ഞര്‍ എന്തിനു നുണ പറയണം? അതുകൊണ്ട് അവര്‍ക്കെന്തു നേട്ടം? ഇവ ഇന്ത്യയിലെ അംബാസഡര്‍ അമേരിക്കയിലേക്കയയ്ക്കുന്ന രേഖകളാണ്. ഇന്ത്യയിലെ രാഷ്ട്രീയ നേതാക്കളെ പറ്റിയാണ് ഈ കേബിളുകള്‍. ഇതില്‍ പറയുന്ന കാര്യങ്ങള്‍ തെറ്റാണെങ്കില്‍ അംബാസഡര്‍ പലരുടെ മുന്നിലും മറുപടി പറയേണ്ടി വരും. തെറ്റായ വിവരമാണ് അയയ്ക്കുന്നതെങ്കില്‍ അത് ഇന്ത്യ-അമേരിക്ക ബന്ധത്തെ പോലും ദോഷകരമായി ബാധിച്ചേക്കാം. അതായത്, ഒന്നുകില്‍ അംബാസഡര്‍ ഇന്ത്യ-അമേരിക്ക ബന്ധം വഷളാക്കാനായി തെറ്റായ വിവരങ്ങള്‍ അയച്ചു, അല്ലെങ്കില്‍ കേബിളില്‍ പറയുന്നതത്രയും സത്യമാണ്.

മറ്റൊരു സാഹചര്യം നോക്കിയാല്‍, ചാള്‍സ് ടെയ്ലര്‍ കേസില്‍ ഹേഗിലെ അന്താരാഷ്ട കോടതി ഡിപ്ലോമാറ്റിക് കേബിളുകള്‍ തെളിവുകളായിട്ടാണ് സ്വീകരിച്ചതെന്നു കാണാം. പല സ്ഥലങ്ങളിലും കേബിളുകള്‍ ഉപയോഗിക്കപ്പെട്ടിട്ടുണ്ട്. ഔദ്യോഗിക രേഖകളായും, ആധികാരിക ഉദ്ധരണികളായും, തെളിവുകളായും അവ സ്വീകരിക്കപ്പെട്ടിട്ടുമുണ്ട്. എന്നാല്‍, ഡിപ്ലോമാറ്റിക് കേബിളുകള്‍ വിശ്വസനീയമല്ലെന്നും, പല സര്‍ക്കാരുകളും അവ സ്വീകരിക്കാറില്ലെന്നും പറയുന്ന ഇന്ത്യന്‍ പ്രധാനമന്ത്രി മന്മോഹന്‍ സിംഗ് ജനങ്ങളെ തെറ്റിദ്ധരിപ്പിക്കാനാണ് ശ്രമിക്കുന്നത്. ഈ വാദം തെറ്റാണ്. ഈ കേബിളുകള്‍ വെളിച്ചം കാണാന്‍ പോകുന്നെന്ന് സ്റ്റേറ്റ് സെക്രട്ടറി ഹിലാരി ക്ലിന്റണ്‍ കഴിഞ്ഞ വര്‍ഷം തന്നെ ഇന്ത്യന്‍ സര്‍ക്കാരിന് (ഒരുപക്ഷേ മന്‍മോഹന് നേരിട്ട്) മുന്നറിയിപ്പു നല്‍കിയിരുന്നു. ഇന്ത്യയിലെ അമേരിക്കന്‍ അംബാസഡര്‍ വാഷിംഗ്ടണിലേക്കയച്ച റിപോര്‍ട്ടുകള്‍ തന്നെയാണ് ഈ കേബിളുകള്‍. അതിനെ ആ സാഹചര്യത്തില്‍ തന്നെ കാണണം. പക്ഷേ, കേബിളില്‍ പറഞ്ഞിരിക്കുന്ന എല്ലാ കാര്യങ്ങളും തെറ്റാണെന്ന അര്‍ത്ഥം അതിനില്ല. ആരൊക്കെയാണ് അമേരിക്കന്‍ നയതന്ത്രജ്ഞരുടെ സോഴ്സസെന്നും, എങ്ങിനെയൊക്കെയാണ് അവര്‍ വിവരങ്ങള്‍ ശേഖരിക്കുന്നതെന്നും കണ്ടെത്തേണ്ടതുണ്ട്. കേബിളുകള്‍ ആധികാരികമാണ് എന്ന കാര്യത്തില്‍ ഒരു സംശയവും വേണ്ട. ആധികാരികത ഉള്ളതു കൊണ്ടാണ് പെന്റഗണ്‍ ഞങ്ങളെ ആക്രമിക്കുന്നത്. അതുകൊണ്ടാണ് ചെറുപ്പക്കാരനായ ഇന്റലിജന്‍സ് ഓഫീസര്‍ ബ്രാഡ്ലി മാനിംഗ് കഴിഞ്ഞ ഒരു വര്‍ഷത്തോളമായി തടവുശിക്ഷ അനുഭവിക്കുന്നത്.

ഇന്ത്യയിലെ ചില മുതിര്‍ന്ന നയതന്ത്രജ്ഞര്‍ ഇതിന്റെ മറ്റൊരു വശം സൂചിപ്പിക്കുകയുണ്ടായി. അതായത്, ജൂനിയര്‍ ഡിപ്ലോമാറ്റുകള്‍ തയ്യാറാക്കുന്ന കേബിളുകള്‍ പോലും അംബാസഡറുടെ പേരിലാണ് അയയ്ക്കപ്പെടുകയെന്നും, അതുപോലെ വാഷിംഗ്ടണില്‍ നിന്നുള്ള എല്ലാ കേബിളുകളും സ്റ്റേറ്റ് സെക്രട്ടറിയുടെ പേരിലാണ് വരികയെന്നും. ഈ കേബിളുകള്‍ യഥാര്‍ത്ഥത്തില്‍ അംബാസഡര്‍മാരും, സ്റ്റേറ്റ് സെക്രട്ടറിയും വായിക്കണമെന്നു പോലുമില്ലെന്നാണ് അവര്‍ പറഞ്ഞത്…
ഇത് വിഷയത്തിന്റെ ഗൗരവമനുസരിച്ചിരിക്കും. പലപ്പോഴും, ഒരു രാഷ്ട്രീയ നേതാവോ, അംബാസഡറോ അനുമതി കൊടുത്തതിനു ശേഷമായിരിക്കും കേബിളുകള്‍ അയയ്ക്കുക. കേബിളുകള്‍ അനാവശ്യമായി അംബാസഡറുടെ പേരുപയോഗിക്കില്ലല്ലോ.

ഇതിനു മുന്‍പ് പുറത്തായ അഫ്ഘാന്‍ കേബിളുകളില്‍ ഇന്ത്യക്കെതിരെ പാകിസ്ഥാന്‍ ഭീകര പ്രവര്‍ത്തനത്തിലേര്‍പ്പെടുത്തുന്നതിനെ പറ്റി പരാമര്‍ശമുണ്ടായിരുന്നു…
ഇന്ത്യ എന്ന ടാഗോടു കൂടിയ ഏകദേശം 6,000 സ്റ്റേറ്റ് ഡിപാര്‍ട്മെന്റ് കേബിളുകളാണ് ഞങ്ങള്‍ക്കു കിട്ടിയത്. അതിന്റെ ആദ്യ ഭാഗം മാത്രമേ ‘ദ ഹിന്ദു’ പ്രസിദ്ധീകരിച്ചിട്ടുള്ളൂ. വരുന്ന ആഴ്ചകളില്‍ ഇനിയും പലതും പുറത്തു വരാനുണ്ട്. അതില്‍ പലതും പാകിസ്ഥാനുമായുള്ള ബന്ധത്തെ പറ്റിയാണ്. എന്നാല്‍ ഞങ്ങള്‍ അതീവ താത്പര്യത്തോടെ നോക്കുന്നത് പാകിസ്ഥാനില്‍ നിന്നുള്ള കേബിളുകളാണ്. അവ ഇതുവരെ പ്രസിദ്ധീകരിക്കപ്പെട്ടിട്ടില്ല. അതിനായി ഞങ്ങള്‍ ശ്രമിച്ചു കൊണ്ടിരിക്കുകയാണ്. ഇന്ത്യാക്കാരും, പാകിസ്ഥാനികളും അവയ്ക്കായി കാത്തിരിക്കുകയാണെന്ന് എനിക്കറിയാം.

വിക്കിലീക്സിന്റെ ഇന്ത്യാ വെളിപ്പെടുത്തലുകളില്‍ ഏറ്റവും നിര്‍ണായകം എന്നു കരുതുന്നതെന്താണ്?
എംബസി കേബിളുകളില്‍ എന്തെഴുതപ്പെട്ടിരിക്കുന്നു എന്നതിനേക്കാളേറെ, അതിനു കിട്ടുന്ന പ്രതികരണങ്ങളാണ് കൂടുതല്‍ ശ്രദ്ധേയം. ഞങ്ങള്‍ രേഖകള്‍ പുറത്തു വിടാന്‍ തുടങ്ങിയപ്പോള്‍ അമേരിക്ക എംബസി ആദ്യം ചെയ്തത് വിക്കിലീക്സിനുള്ള ഫണ്ടു വരവ് തടസപ്പെടുത്താനായി സാമ്പത്തിക സ്ഥാപനങ്ങളില്‍ സമ്മര്‍ദം ചെലുത്തുക എന്നതാണ്. അമേരിക്കന്‍ ഭരണകൂടവും, സാമ്പത്തിക സ്ഥാപനങ്ങളും തമ്മിലുള്ള അധികാര ബന്ധമാണ് അതു വെളിപ്പെടുത്തിയത്. അതുപോലെ, എംപിമാര്‍ക്ക് കൈക്കൂലി കൊടുക്കാനുള്ള പണത്തിന്റെ പെട്ടികള്‍ അമേരിക്കന്‍ എംബസിയിലെ ഉദ്യോഗസ്ഥന്മാര്‍ക്ക് കാണിച്ചു കൊടുത്തിരുന്നു എന്ന വെളിപ്പെടുത്തലുണ്ടായപ്പോള്‍, അതിനോടുണ്ടായ പ്രതികരണം അസ്വസ്ഥജനകമായിരുന്നു. കേബിളുകള്‍ ഉയര്‍ത്തുന്ന ആരോപണങ്ങള്‍ സത്യമല്ലെന്നും, അതിനാല്‍ സ്വന്തം നിരപരാധിത്വം തെളിയിക്കാന്‍ അന്വേഷണം വേണമെന്നൊന്നുമല്ലായിരുന്നു ആവശ്യം, മറിച്ച് ജനങ്ങളെ വിഡ്ഢികളാക്കാനുള്ള ശ്രമമാണ് നമ്മള്‍ കണ്ടത്. ആദ്യം, കേബിളുകളെ കുറിച്ച് പ്രതികരിക്കാന്‍ അവര്‍ വിസമ്മതിച്ചു. പിന്നീട്, അവ സ്ഥിതീകരിക്കപ്പെടാത്ത റിപോര്‍ട്ടുകളാണെന്നും, ഒരു ഭരണകൂടവും അവ സ്വീകരിച്ചിട്ടില്ലെന്നും പറഞ്ഞു. ഇതു പച്ചക്കള്ളമാണ്. തെറ്റുകാര്‍ പെരുമാറുന്ന വിധമാണത്. ഇന്ത്യയിലെ നിയമസാമാജികരും, രാഷ്ട്രീയക്കാരും എങ്ങിനെയാണ് ഒരു ഗുരുതരമായാ ആരോപണത്തോട് പ്രതികരിക്കുന്നത് എന്നാണ് ഇതു കാണിച്ചു തന്നത്. വിഷയത്തെ നേരിടുന്നതിനു പകരം, അതില്‍ നിന്നും ഒളിച്ചോടാനും, ജനങ്ങളില്‍ നിന്നും യാഥാര്‍ത്ഥ്യം മറച്ചു വയ്ക്കാനുമാണ് അവര്‍ ശ്രമിച്ചത്. കേബിളുകളിലെ, ഏറ്റവും പ്രധാനപ്പെട്ട കാര്യം ഇനിയും പുറത്തു വരാനിരിക്കുന്നതേയുള്ളൂ.

വിക്കിലീക്സ് പ്രധാനമായും അമേരിക്കയുടെ നയങ്ങളിലാണ് ശ്രദ്ധ കേന്ദ്രീകരിച്ചിരിക്കുന്നത്. ജൂലിയന്‍ അസാഞ്ജെ അമേരിക്ക-വിരുദ്ധനാണോ?
ഒരിക്കലുമല്ല. പ്രസാധനത്തേയും, പ്രസ്സിനേയും സംരക്ഷിക്കാന്‍ ശ്രമിക്കുന്ന ഒരു സംഘടനയാണ് ഞങ്ങളുടേത്. അതുവഴി, മാഡിസനും, ജെഫേഴ്സനും മറ്റും പങ്കു വച്ച യഥാര്‍ത്ഥ മൂല്യങ്ങളാണ് ഞങ്ങള്‍ പിന്‍പറ്റുന്നത്. ഏകദേശം 120 രാജ്യങ്ങളുമായി ബന്ധപ്പെടുന്ന വിവരങ്ങള്‍ ഞങ്ങള്‍ ഇതുവരെ പ്രസിദ്ധീകരിച്ചിട്ടുണ്ട്. അതുകൊണ്ടു തന്നെ, ഞങ്ങള്‍ അമേരിക്കയില്‍ മാത്രം ശ്രദ്ധ കേന്ദ്രീകരിച്ചിരിക്കുന്നു എന്ന വാദത്തില്‍ കഴമ്പില്ല. വിവരങ്ങളുടെ പ്രാധാന്യമനുസരിച്ചാണ് ഞങ്ങളവ പ്രസിദ്ധീകരിക്കുന്നത്. എന്നാല്‍ അമേരിക്കയെ പൂര്‍ണമായും ഒഴിവാക്കാനുമാവില്ല. കാരണം, ഈ കേബിളുകളെല്ലാം, അമേരിക്കയിലേക്കു വന്നതാണ്. മാത്രമല്ല, അമേരിക്കന്‍ സമ്പദ് രംഗത്തിന്റെ 30-40 ശതമാനം നേരിട്ടോ അല്ലാതെയോ സുരക്ഷാ വ്യവസായവുമായി ബന്ധപ്പെട്ടിരിക്കുന്നു. അതുകൊണ്ടു തന്നെ, ആ രാജ്യത്തിന് ഒരുപാട് രഹസ്യങ്ങളുണ്ട്. അഫ്ഘാനിസ്ഥാനിലും, ഇറാഖിലും അമേരിക്ക ചെയ്തു കൂട്ടുന്ന കാര്യങ്ങളോട് ഞങ്ങള്‍ക്ക് അഭിപ്രായവ്യത്യാസമുണ്ട്. അതിനാലാണ്, പല ധീരമനുഷ്യരും ഞങ്ങള്‍ക്ക് വിവരങ്ങള്‍ ചോര്‍ത്തി തരുന്നത്. അതുകൊണ്ട്, ഞങ്ങളാലാവുന്നത് ഞങ്ങള്‍ ചെയ്യുന്നു.

Be Sociable, Share!

• 

Tags: Interview, Julian Assange, Manmohan Singh, media, The Hindu, US State Department, WikiLeaks