ആരാണ് പാര്‍ടി?

Be Sociable, Share!

• 

എംജെഎസ്

വര: സജിത്

അഭ്യൂഹങ്ങള്‍ക്കു വിരാമമിട്ടു കൊണ്ട് മുഖ്യമന്ത്രി വിഎസ് അച്യുതാനന്ദന്‍ വരുന്ന നിയമസഭാ തെരഞ്ഞെടുപ്പില്‍ മത്സരിക്കുന്നില്ലെന്ന് തീരുമാനമായി. ചൊവ്വാഴ്ചയും ബുധനാഴ്ചയുമായി നടന്ന സിപിഎം സംസ്ഥാന സെക്രട്ടേറിയറ്റ് വിഎസിനെ മത്സരിപ്പിക്കേണ്ടതില്ല എന്നു തീരുമാനിക്കുകയും, ആ തീരുമാനം ഗഹനമായ ചര്‍ച്ചകള്‍ക്കു ശേഷം ബുധനാഴ്ച വൈകിട്ടു ചേര്‍ന്ന സംസ്ഥാന കമ്മിറ്റി അംഗീകരിക്കുകയും ചെയ്തതായാണ് റിപോര്‍ട്ടുകള്‍. സെക്രട്ടേറിയറ്റ് വിഎസ് മത്സരിക്കേണ്ടതില്ല എന്ന തീരുമാനത്തില്‍ ഉറച്ചു നിന്നതിനേ തുടര്‍ന്ന്, പാര്‍ടി എതിരാണെങ്കില്‍ താന്‍ മത്സരിക്കാനില്ലെന്നും, പാര്‍ടി തീരുമാനം മാനിക്കുന്നുവെന്നും വിഎസ് സംസ്ഥാന കമ്മിറ്റിയില്‍ പറഞ്ഞതായി മാതൃഭൂമിയുടെ ഓണ്‍ലൈന്‍ റിപോര്‍ട്ട് പറയുന്നു. അനാരോഗ്യം മൂലം, തന്റെ കൂടി തീരുമാന പ്രകാരമാണ് മത്സരിക്കാനില്ലെന്ന തീരുമാനം സെക്രട്ടേറിയറ്റ് കൈക്കൊണ്ടതെന്ന് വിഎസ് കമ്മിറ്റിയില്‍ പറഞ്ഞതായാണ് മാധ്യമം റിപോര്‍ട്ട് ചെയ്യുന്നത്. വിശദാംശങ്ങള്‍ എന്തായാലും വിഎസ് മത്സരരംഗത്തുണ്ടാവില്ലെന്ന് ഉറപ്പായി. പാര്‍ടി ജനറല്‍ സെക്രട്ടറി പ്രകാശ് കാരാട്ടും, പോളിറ്റ് ബ്യൂറോ അംഗം എസ് രാമചന്ദ്രപിള്ളയും പങ്കെടുത്ത സെക്രട്ടേറിയറ്റ് യോഗമാണ് വിഎസ് വേണ്ട എന്നു തീരുമാനിച്ചതെന്നു പരിഗണിക്കുമ്പോള്‍ ഈ വിഷയത്തില്‍ കേന്ദ്ര നേതൃത്വത്തിന്റെ തീരുമാനവും വ്യക്തമാണ്. അതുകൊണ്ട് തന്നെ, വിഎസിനനുകൂലമായി ധാരാളം പ്രകടനങ്ങള്‍ സംസ്ഥാനത്തിന്റെ പല ഭാഗങ്ങളില്‍ നടക്കുന്നുണ്ടെങ്കിലും, മറ്റൊരു 2006 ആവര്‍ത്തിക്കപ്പെടാനുള്ള സാധ്യത ഒട്ടും തന്നെയില്ല.

എന്തുകൊണ്ട് വിഎസ് മത്സരിക്കുന്നില്ല? മറുപടി പറയേണ്ടത് പാര്‍ടി നേതൃത്വം തന്നെയാണ്. എന്തിന് നേതൃത്വം മറുപടി പറയണം എന്ന മറുചോദ്യവും ഉയരാം. വിഎസ് മാത്രമല്ലല്ലോ, പിണറായി വിജയനും മത്സരിക്കുന്നില്ലല്ലോ എന്ന വാദമുണ്ട്. എന്തിനു വിഎസിനു വേണ്ടി മാത്രം ഈ കോലാഹലം എന്നാണ് വ്യംഗ്യം. പക്ഷേ, വിഎസിന്റെ കാര്യത്തില്‍ മറുപടി പറയേണ്ടി വരും. ദേശീയ, സംസ്ഥാന രാഷ്ട്രീയ സാഹചര്യങ്ങള്‍ പരിഗണിച്ചാല്‍ ഇതെന്തുകൊണ്ടാണെന്ന് വ്യക്തമാകും. ഇന്ത്യയിലെ ഇടതുപക്ഷം നിര്‍ണായകമായ സംസ്ഥാന തെരഞ്ഞെടുപ്പിനെ നേരിടുകയാണ് ഏപ്രില്‍ മാസത്തില്‍. 2009 പൊതുതെരഞ്ഞെടുപ്പില്‍ നേരിട്ട തിരിച്ചടി അഖിലേന്ത്യാ തലത്തില്‍ തൊഴിലാളി വര്‍ഗ രാഷ്ട്രീയത്തിനു തന്നെ ഏറ്റ പ്രഹരമായിരുന്നു. ഒന്നാം യുപിഎ സര്‍ക്കാരിനെ കാലത്ത് ദേശീയ രാഷ്ട്രീയത്തില്‍ കിട്ടിയ മെല്‍ക്കൈ നിലനിര്‍ത്താന്‍ കഴിഞ്ഞില്ലെന്നു മാത്രമല്ല, ഇടതുപക്ഷത്തിന്റെ ദയനീയ പ്രകടനം ബൂര്‍ഷ്വാരാഷ്ട്രീയത്തെ ശക്തിപ്പെടുത്തുകയും ചെയ്തു. ഇപ്പോഴത്തെ അഴിമതിക്കഥകളും, കേന്ദ്ര സര്‍ക്കാരിന്റെ സാമ്രാജ്യത്വാനുകൂല നയങ്ങളും ഉദാഹരണങ്ങളാണ്. ലോക്സഭാ തെരഞ്ഞെടുപ്പിനു ശേഷം ഇടതുപക്ഷത്തിന് ശക്തിയുള്ള കേരളത്തിലും ബംഗാളിലും നടന്ന മുനിസിപ്പല്‍/പഞ്ചായത്ത് തെരഞ്ഞെടുപ്പുകളിലും കമ്യൂണിസ്റ്റു പാര്‍ടികള്‍ക്ക് തിരിച്ചടിയായിരുന്നു. ബംഗാളില്‍ മൂന്നു പതിറ്റാണ്ടുകള്‍ക്കു ശേഷം ഇടതുമുന്നണിക്ക് ഭരണം നഷ്ടപ്പെടും എന്ന അവസ്ഥയാണെന്ന് അവിടെ നിന്നുള്ള റിപോര്‍ട്ടുകള്‍ പറയുന്നു. ബംഗാള്‍ വീണാല്‍ അതു ദേശീയ രാഷ്ട്രീയത്തിലുണ്ടാക്കുന്ന ചലനങ്ങള്‍ ചെറുതായിരിക്കില്ല. അതും തൃണമൂല്‍ കോണ്‍ഗ്രസിനെ പോലുള്ള ഒരു പിന്തിരിപ്പന്‍ ഫാഷിസ്റ്റ് പാര്‍ടി അധികാരത്തില്‍ വന്നാല്‍ സിപിഎമ്മിന് പ്രത്യേകിച്ചും, ഇടതുപക്ഷത്തിനു പൊതുവിലും, വിശാല തലത്തില്‍ തൊഴിലാളി/കര്‍ഷക വര്‍ഗങ്ങള്‍ക്കും ദോഷമേ ചെയ്യൂ. ഇത്തവണത്തെ ബംഗാള്‍ തെരഞ്ഞെടുപ്പ് എളുപ്പമാവില്ലെന്ന് പാര്‍ടി നേതൃത്വം തന്നെ ഒളിഞ്ഞും തെളിഞ്ഞും സമ്മതിക്കുന്നുണ്ട്. പാര്‍ടിയുടെ ജനകീയാടിത്തറയ്ക്ക് ഇളക്കം തട്ടാന്‍ കാരണം പ്രധാനമായും ബുദ്ധദേവ് ഭട്ടാചാര്യ സര്‍ക്കാരിന്റെ വ്യവസായ വത്കരണ നയമാണെന്നാണ് പൊതുവെയുള്ള വിമര്‍ശനം. പ്രത്യേകിച്ചും, നന്ദിഗ്രാമിലെ വെടിവപ്പ് ഇടതുപക്ഷ പ്രസ്ഥാനങ്ങള്‍ക്കുണ്ടാക്കിയിട്ടുള്ള ക്ഷീണം ചെറുതല്ല.

ദേശീയതലത്തിലും ബംഗാളിലും നിലനില്‍ക്കുന്ന സാഹചര്യം ഇതാണെന്നിരിക്കേ കേരളത്തിലെ സ്ഥിതിയും വ്യത്യസ്തമല്ല. ഇടതുപക്ഷ സര്‍ക്കാര്‍ രണ്ടാമതും തെരഞ്ഞെടുക്കപ്പെടേണ്ട ആവശ്യം ഏറ്റവുമധികമുള്ള ഒരു സമയമാണിത്. ഒട്ടനവധി വികസന/ക്ഷേമ പ്രവര്‍ത്തനങ്ങള്‍ കാര്യക്ഷമമായി തന്നെ നടപ്പാക്കിയിട്ടുള്ള ഒരു സര്‍ക്കാരാണ് വിഎസിന്റേത്. ഒരു മികച്ച റ്റീമും, തൊഴിലാളി വര്‍ഗ രാഷ്ട്രീയത്തോട് കടുത്ത പ്രതിബദ്ധതയുള്ള ഒരു ലീഡറും ഒന്നിച്ചു വന്നു എന്നതു തന്നെയാകണം ഈ സര്‍ക്കാരിന്റെ ഏറ്റവും വലിയ ശക്തി. വോട്ടു വാങ്ങാന്‍ ജനത്തിനു കളര്‍ റ്റിവി കൊടുത്താല്‍ മതി എന്നു പറയുന്ന സ്വത്വ രാഷ്ട്രീയ കിങ്കരന്മാര്‍ അയല്‍ സംസ്ഥാനങ്ങളില്‍ നാടു വാഴുന്ന കാലത്താണ്, ജനങ്ങളുടെ ക്ഷേമം നോക്കുന്ന, അഴിമതിയെ ചെറുക്കുന്ന, വിപണിയില്‍ ഇടപെടുന്ന ഒരു സര്‍ക്കാര്‍ കേരളത്തിലുണ്ടാവുന്നതെന്നോര്‍ക്കണം. അതുകൊണ്ടു തന്നെ ഇടതുപക്ഷ സര്‍ക്കാര്‍ നിലനില്‍ക്കേണ്ടത് പാര്‍ടിയുടെ അത്ര തന്നെയോ അല്ലെങ്കില്‍ പാര്‍ടിയേക്കാള്‍ ഏറെയോ കേരളത്തിന്റെ ആവശ്യമാണ്. ഒരേസമയം ജനകീയ സര്‍ക്കാരായിരുന്നിട്ടും, എന്തുകൊണ്ട് ഇടതുപക്ഷം ലോകസഭാ തെരഞ്ഞെടുപ്പിലും പഞ്ചായത്ത് തെരഞ്ഞെടുപ്പിലും കനത്ത പരാജയങ്ങള്‍ നേരിട്ടു എന്ന ചോദ്യമുയരാം. വിഷയം പലയിടങ്ങളിലായി, പല വീക്ഷണത്തെ അടിസ്ഥാനമാക്കി ചര്‍ച്ച ചെയ്യപ്പെട്ടിട്ടുള്ളതാണ്. ഇലക്ഷന്‍ കമ്മിഷന്‍ കേരളമടക്കമുള്ള സംസ്ഥാനങ്ങളില്‍ തെരഞ്ഞെടുപ്പ് പ്രഖ്യാപിച്ചതിനു ശേഷം ഏഷ്യാനെറ്റ് പുറത്തു വിട്ട സര്‍വേയില്‍ പോലും കാണിക്കുന്നത് കേരളത്തില്‍ ഭരണകൂട വിരുദ്ധ വികാരം (anti-incumbency factor) വളരെ കുറവാണെന്നാണ്. എന്നിട്ടും എന്തു കൊണ്ട് ഇടതുപക്ഷം തെരഞ്ഞെടുപ്പില്‍ തോല്‍ക്കപ്പെടുന്നു എന്നതാണ് ചോദ്യം. ഉത്തരം പലതാകാം. പാര്‍ടി നേതൃത്വത്തോടുള്ള ജനങ്ങളുടെ എതിര്‍പ്പാകാം (പ്രധാനമായും മുഖ്യധാരാ മാധ്യമങ്ങളുടെ പ്രചാരണം വഴി), വിഭാഗീയത പാര്‍ടി യന്ത്രത്തെ തളര്‍ത്തിയതു കൊണ്ടാകാം, രാഷ്ട്രീയ കാലാവസ്ഥയ്ക്കനുഗുണമായ തന്ത്രങ്ങള്‍ മെനയുന്നതില്‍ നേതൃത്വം പരാജയപ്പെട്ടതാകാം. ഇനിയും കാരണങ്ങള്‍ നിരത്താന്‍ കഴിയുമായിരിക്കും. കാരണമെന്തായാലും, പഞ്ചായത്തു തെരഞ്ഞെടുപ്പു കാലത്തെ രാഷ്ട്രീയ കാലവസ്ഥയായിരുന്നില്ല കേരളത്തില്‍ കഴിഞ്ഞ ഏതാനും ആഴ്ചകളായി നിലനിന്നിരുന്നത്.

മുന്‍മന്ത്രിയും, മുസ്ലിം ലീഗ് നേതാവുമായ കുഞ്ഞാലിക്കുട്ടിക്കെതിരായാ ആരോപണങ്ങള്‍ വീണ്ടും പൊതു ബോധത്തിലേക്ക് വന്നത് (റൗഫിനു നന്ദി), ഇടമലയാര്‍ കെയ്സില്‍ മുന്‍ മന്ത്രിയും കേരളാ കോണ്‍ഗ്രസ് (ബി) നേതാവുമായ ആര്‍ ബാലകൃഷ്ണ പിള്ള ശിക്ഷിക്കപ്പെട്ടത്, ഇടതു സര്‍ക്കാര്‍ മുന്നോട്ടു വച്ച വ്യവസ്ഥകള്‍ക്കനുസരിച്ച് സ്മാര്‍ട് സിറ്റി കെട്ടിപ്പൊക്കാമെന്ന് ദുബായ് കമ്പനിയായ ടികോം സമ്മതിച്ചത്, സുപ്രീം കോടതിയുടെ ഇടപെടല്‍ വഴി പാമോയില്‍ കെയ്സ് വീണ്ടും ചര്‍ച്ചയായതും, വിജിലന്‍സ് കോടതി അതില്‍ പുനരന്വേഷണത്തിന് ഉത്തരവിട്ടത് എന്നിങ്ങനെ സമീപകാലത്തുണ്ടായ രാഷ്ട്രീയ-നിയമ സംഭവവികാസങ്ങള്‍ കേരളത്തിലെ വലതുപക്ഷത്തെ അതീവദുര്‍ബലരാക്കി. കഴിഞ്ഞ ഒരു മാസമായി സംസ്ഥാനത്തെ രാഷ്ട്രീയ ചര്‍ച്ചകളെ നിയന്ത്രിച്ചിരുന്ന ഈ സംഭവങ്ങളിലെല്ലാം വിഎസിന്റെ ദൃശ്യമായ കയ്യുണ്ടായിരുന്നു. സ്മാര്‍ട് സിറ്റി വിഷയത്തില്‍ കടുത്ത വിമര്‍ശനം നാനാതുറകളില്‍ നിന്നും നേരിടേണ്ടി വന്നിട്ടും സംസ്ഥാനത്തിന്റെ താത്പര്യങ്ങള്‍ ബലികഴിച്ച് ഇവിടെ ആരും സ്മാര്‍ട്ടാവേണ്ട എന്ന വിഎസ് നിലപാട് നവലിബറല്‍ ഇന്ത്യയില്‍ മൂലധനത്തിനു വേണ്ടി ദാസ്യപ്പണി ചെയ്യുന്ന ഭരണവര്‍ഗത്തിന് മാതൃകയാവേണ്ടതാണ്. അതുപോലെ, പാമോയില്‍ കെയ്സ് വാദിച്ചതും, ഇടമലയാര്‍ കെയ്സില്‍ അപ്പീല്‍ പോയതുമെല്ലാം അഴിമതിയോടുള്ള ഒരു പൊതുപ്രവര്‍ത്തകന്റെ സന്ധിയില്ലാ സമരമായി വ്യാഖ്യാനിക്കപ്പെട്ടു. വിഎസ് എന്ന ഫാദര്‍ ഫിഗറിനെ ഈ ചര്‍ച്ചകള്‍ കൂടുതല്‍ വലുതാക്കിയതേയുള്ളൂ. അങ്ങിനെ ഒരു ഭാഗത്ത് അഴിമതിക്കാരും, പെണ്ണുപിടിയന്മാരും, മൂലധനദാസന്മാരുമായ വലതരും, മറുഭാഗത്ത് രക്ഷകപരിവേഷത്തോടെ വിഎസ് എന്ന കുരിശുയുദ്ധക്കാരന്‍ നയിക്കുന്ന ഇടതരും എന്ന ബൈനറി രാഷ്ട്രീയ കാലാവസ്ഥയെ പൊതുവില്‍ ഇടതുപക്ഷത്തിന് അനുകൂലമാക്കി മാറ്റുന്ന ഒരു ഘട്ടത്തിലാണ് യുഡിഎഫ് ആരോപണങ്ങള്‍ നേതാവിനു നേരെ തന്നെ തിരിച്ചു വിടുന്നത്.

കോട്ട പിടിച്ചാല്‍ രാജ്യം വീണു എന്നത് മധ്യകാല യുദ്ധ യുക്തിയാണ്. സിപിഎമ്മിനെ തകര്‍ക്കാന്‍ ഫാഷിസ്റ്റുകള്‍ കണ്ണൂരിനെ ആക്രമിക്കുന്നതിനെ ഇതേ യുക്തിയുപയോഗിച്ചാണ് ഒരിക്കല്‍ എംഎന്‍ വിജയന്മാഷ് വിശകലനം ചെയ്തത്. പാര്‍ടി എന്ന ശരീരത്തിന്റെ കോട്ട കണ്ണൂരായി മാഷ് ഒരിക്കല്‍ വിഭാവനം ചെയ്തെങ്കില്‍ ഇന്ന് പാര്‍ടി എന്ന നിലപാടിന്റെ കോട്ട വിഎസ് ആണെന്നു വിഭാവനം ചെയ്യുന്ന ലക്ഷക്കണക്കിനാളുകളുണ്ട് കേരളത്തില്‍. ഈ വിശ്വാസം വലതുപക്ഷ വേരോട്ടത്തിനു ഭീഷണിയാണെന്ന് മറ്റാരും തിരിച്ചറിഞ്ഞില്ലെങ്കിലും ഉമ്മന്‍ ചാണ്ടിയും സംഘവും തിരിച്ചറിഞ്ഞിരുന്നു. അതുകൊണ്ടാണ്, അങ്കം മുറുകിയപ്പോള്‍, ആയുധങ്ങളെല്ലാം വിഎസിനു നേരെ തിരിഞ്ഞത്. എന്നാല്‍ തന്റെ മകനെതിരെ കിട്ടിയ പരാതി ആഭ്യന്തര മന്ത്രാലയത്തിനു കൈമാറിയും, ലോട്ടറി കെയ്സിന്റെ അന്വേഷണത്തില്‍ വേണ്ടി വന്നാല്‍ മകന്റെ പങ്കും അന്വേഷിക്കണമെന്ന് പ്രധാനമന്ത്രിക്കു കത്തെഴുതിയും വിഎസ് ആരോപണങ്ങളെ നേരിട്ട രീതി ഏതൊരു കമ്യൂണിസ്റ്റ് നേതാവിനും മാതൃകയാക്കാവുന്നതാണ്. ഇങ്ങിനെയൊരു സാഹചര്യത്തിലാണ് സംസ്ഥാന തെരഞ്ഞെടുപ്പില്‍ ഇടതുപക്ഷത്തെ ആരു നയിക്കും എന്ന ചോദ്യമുയര്‍ന്നു വരുന്നത്.

പാര്‍ട്ടി ആവശ്യപ്പെട്ടാല്‍ മത്സരിക്കാന്‍ തെയ്യാറാണെന്നാണ് മാര്‍ച് മൂന്നിന് വിഎസ് പത്രക്കാരോട് പറഞ്ഞത്. ദില്ലിയില്‍ നിര്‍ണായക പോളിറ്റ് ബ്യൂറോ/കേന്ദ്ര കമ്മിറ്റി യോഗങ്ങള്‍ നടക്കുന്നതിനു മുന്നോടിയായിട്ടാണ് ഈ പ്രസ്താവന വന്നത്. അതായത്, താന്‍ മാനസികമായും ശാരീരികമായും സജ്ജനാണെന്ന സന്ദേശം നേതൃത്വത്തിനനയ്ക്കല്‍ തന്നെയായിരുന്നിരിക്കണം ആ പ്രസ്താവനയുടെ ഉദ്ദേശ്യം. പക്ഷേ, പിബിയും സിസിയും ഇക്കാര്യത്തില്‍ അന്തിമ തീരുമാനമെടുത്തില്ല എന്നാണ് കാരാട്ട് പിന്നീട് പത്രസമ്മേളനത്തില്‍ പറഞ്ഞത്. ബംഗാളിനെ നയിക്കുന്നത് ബുദ്ധദേവാണെന്ന് തീരുമാനിച്ചെങ്കിലും കേരളത്തിന്റെ കാര്യം സംസ്ഥാന സമിതിക്കു വിടുകയായിരുന്നുവത്രേ. എന്തുകൊണ്ട് ഈ ഇരട്ട സമീപനം എന്ന് കാരാട്ട് വിശദീകരിച്ചു കണ്ടില്ല. പ്രത്യേകിച്ചും പാര്‍ടിയുടെ തെറ്റു തിരുത്തല്‍ രേഖയില്‍ വര്‍ധിച്ചു വരുന്ന ഫെഡറലിസ്റ്റ് പ്രവണതകള്‍ക്കെതിരെ ശക്തമായ വിമര്‍ശനം നിലനില്‍ക്കെയാണ് കേന്ദ്ര കമ്മിറ്റി ഇത്തരമൊരു തീരുമാനമെടുത്തത്. അതും സംസ്ഥാനത്ത് വിഭാഗീയത നിലനില്‍ക്കുന്നു എന്ന സിസി നിരീക്ഷണം നിലനില്‍ക്കെ. തുടര്‍ന്നു ചേര്‍ന്ന സംസ്ഥാന സെക്രട്ടേറിയറ്റും കേരളത്തില്‍ ആരു നയിക്കുമെന്ന കാര്യത്തില്‍ അന്തിമ തീരുമാനമെടുക്കാതെ ജില്ലാ കമ്മിറ്റികളുടെ സാധ്യതാ പട്ടിക വരാനായി കാത്തു. അതിനും ശേഷമാണ് ബുധനാഴ്ച അന്തിമതീരുമാനമുണ്ടാകുന്നത്.

വിജയന്‍ മത്സരിക്കില്ല എന്ന കാര്യം ഏറെക്കുറെ ഉറപ്പായിരുന്നു. ലവാലിന്‍ കെയ്സു തന്നെ കാരണം. ആരോപണ വിധേയനായിട്ടും വിജയന്‍ പാര്‍ടി സെക്രട്ടറി സ്ഥാനത്തു തുടരുന്നതിനെ കുറിച്ച് ഒരിക്കല്‍ കാരാട്ട് പറഞ്ഞത് ഭരണഘടനാ സ്ഥാനങ്ങളൊന്നും അദ്ദേഹം വഹിക്കുന്നില്ലെന്നാണ്. അതായത്, ലവാലിന്‍ കെയ്സ് നിലനില്‍ക്കുന്നിടത്തോളം കാലം വിജയന്‍ പാര്‍ലമെന്ററി രംഗത്തേക്കു വരാനുള്ള സാധ്യതയില്ലെന്നര്‍ത്ഥം. എന്നാല്‍, വിഎസ് ജനപ്രിയനാണ്. പ്രത്യേകിച്ചും സമീപകാല അഴിമതിക്കേസുകളിലെ വിധിയും, സ്മാര്‍ട് സിറ്റി കരാറും മറ്റും ആ ജനപ്രിയവേഷത്തെ കുറേക്കൂടി ശക്തമാക്കിയിട്ടേയുള്ളൂ. അത്തരമൊരു സാഹചര്യത്തില്‍, പാര്‍ടി ആവശ്യപ്പെട്ടാള്‍ മത്സരിക്കാന്‍ തെയ്യാറാണെന്ന് വിഎസ് തന്നെ വ്യക്തമാക്കിയിട്ടുള്ള സാഹചര്യത്തില്‍, അദ്ദേഹം തന്നെ ഇടതുമുന്നണിയെ നയിക്കുമെന്നായിരുന്നു പൊതുവേ പ്രതീക്ഷിക്കപ്പെട്ടിരുന്നത്. അങ്ങിനെയാണെങ്കില്‍, വിഎസിന്റെ ജനപ്രീതി പൊതുവില്‍ മുന്നണിക്കനുകൂലമായി വരും എന്നു മാത്രമല്ല, വിഭാഗീയപ്രശ്നങ്ങള്‍ക്കപ്പുറത്തേക്ക് ഒറ്റക്കെട്ടായി തെരഞ്ഞെടുപ്പിനെ നേരിടാന്‍ പാര്‍ടിക്ക് കഴിയുകയും ചെയ്യുമായിരുന്നു. ജാതി/മത/സമുദായ ശക്തികളെല്ലാം ഇടതുപക്ഷത്തിനെതിരെ നിന്നിട്ടും ഇത്തവണ ജയിക്കാനായാല്‍ ആധുനിക കേരളത്തെ സംബന്ധിച്ചിടത്തോളം അതൊരു സാംസ്കാരിക കുതിച്ചു ചാട്ടമാവുമായിരുന്നു. അങ്ങിനെ ദേശീയ തലത്തിലും, സംസ്ഥാന തലത്തിലും ഏറെക്കുറെ സവിശേഷതകളുള്ള ഒരു തെരഞ്ഞെടുപ്പായിരുന്നിട്ടൂം, ഏറെക്കുറെ കൊള്ളാവുന്ന ഒരു സര്‍ക്കാരാണ് വീണ്ടും ജനവിധി തേടുന്നതെന്നിരിക്കെ, എന്തുകൊണ്ടാണ് ക്യാപ്റ്റനെ ഒഴിവാക്കി ഒരു റ്റീമിനെ പ്രഖ്യാപിക്കാന്‍ നേതൃത്വം തുനിയുന്നത്?

വ്യക്തിയില്ല മുന്നണിയേ ഉള്ളൂ എന്നതാണ് ഇതിനുള്ള ഒരു മറുപടി. ഇതൊരു പറഞ്ഞു പഴകിയ കള്ളമാണ്. ബൂര്‍ഷ്വാ പാര്‍ടികളില്‍ നിന്നും വ്യത്യസ്തമാണെങ്കിലും വ്യക്തിപ്രഭാവം എന്നും കമ്യൂണിസ്റ്റു പാര്‍ടികളുടെ സവിശേഷതയായിരുന്നു. ജോസഫ് സ്റ്റാലിന് മകന്റെ ജീവനേക്കാള്‍ വലുതായിരുന്നു നാത്സികളുടെ പരാജയം എന്ന വാദം മുതല്‍ പിണറായിഉ വിജയന് അടിയന്തിരാവസ്ഥ കാലത്തേറ്റ അടികളുക്ക കണക്കില്‍ വരെ ഈ വ്യക്തിപ്രഭാവ നിര്‍മാണത്തിന്റെ ശകലങ്ങള്‍ കാണാം. വ്യക്തിയില്ല എന്നു പറയുമ്പോഴും വ്യക്തിയുണ്ടായിട്ടുണ്ട്. പക്ഷേ, അങ്ങിനെ പ്രഭാവമുള്ള വ്യക്തി പിന്തിരിപ്പന്‍ രാഷ്ട്രീയത്തിന്റെ വക്താവായ ഏകാധിപതിയായി മാറുന്നുണ്ടെങ്കില്‍ അവിടെയാണ് ശ്രദ്ധിക്കേണ്ടത്. അല്ലാതെ, ജനം ഇഷ്ടപ്പെടുന്നു എന്നത്, ജനകീയ പരിവേഷം കിട്ടുന്നു എന്നത്, ആരെയെങ്കിലും മാറ്റി നിര്‍ത്താനോ, ഭയപ്പെടാനോ ഉള്ള ന്യായീകരണമാവരുത്. മറിച്ച് ആ ജനകീയതയും, വ്യക്തിപ്രഭാവവും പ്രസ്ഥാനത്തിന് അനുഗുണമായി ഉപയോഗിക്കാനാണ് നേതൃത്വം ശ്രമിക്കേണ്ടത്. കാരണം, പാര്‍ടി വ്യക്തിയല്ല എന്നു പറയുന്ന പോലെ തന്നെയാണ് പാര്‍ടി നേതൃത്വവുമല്ല എന്നത്. “Bureaucratic behaviour and refusal to tolerate criticism is inimical to inner-Party democracy” എന്നാണ് പാര്‍ടിയുടെ തെറ്റുതിരുത്തല്‍ രേഖയില്‍ നേതൃത്വത്തെ പറ്റിയുള്ള പരാമര്‍ശം. ഈ പരാമര്‍ശം നിലനില്‍ക്കെ തന്നെയാണ്, മറ്റൊരു തെരഞ്ഞെടുപ്പു വേളയില്‍ പാര്‍ടിയുടെ ‘അസഹിഷ്ണുത’യേയും, ‘ബ്യൂറോക്രസി’യേയും കുറിച്ച് അജന്‍ഡ നിശ്ചയിക്കാന്‍ വലതുമാധ്യമങ്ങള്‍ക്ക് അവസരം ലഭിക്കുന്നതെന്നോര്‍ക്കണം.

ചുരുക്കത്തില്‍, ഈ തീരുമാനം വഴി സംസ്ഥാന തെരഞ്ഞെടുപ്പില്‍ ഇടതുപക്ഷത്തിന് സമീപകാലത്തുണ്ടായ മേല്‍ക്കൈയ്ക്കാണ് തിരിച്ചടിയേറ്റിരിക്കുന്നത്. വിഎസ് എന്ന വ്യക്തിയേക്കാളേറെ വിഎസ് എന്ന നിലപാട് തിരസ്കരിക്കപ്പെട്ടിരിക്കുന്നു എന്ന വിമര്‍ശനത്തെയായിരിക്കും പാര്‍ടി നേതൃത്വത്തിനു ചെറുക്കേണ്ടി വരിക. നേതൃത്വം ആരോപണങ്ങള്‍ക്ക് അതീതരല്ല എന്ന സാഹചര്യത്തില്‍ ഈ തീരുമാനം വലതുപക്ഷത്തിന് തീറ്റയെറിഞ്ഞു കൊടുത്തതിനു തുല്യമാണു താനും. ഇടതുപക്ഷ പ്രസ്ഥാനത്തിനു പൊതുവില്‍ ഗുണമൊന്നും ചെയ്യാന്‍ പോകുന്നുമില്ല. രാഷ്ട്രീയം വേണ്ട പാര്‍ടി മാത്രം മതി എന്നു വാദിക്കുന്ന ലെനിനിസ്റ്റ് സദാചാരവാദികള്‍ക്ക് വിഎസിനെ പുറത്താക്കിയതും പാര്‍ടി നേതൃത്വത്തിന്റെ കരുത്തിന്റെ തെളിവായിരിക്കാം. ‘വ്യക്തി പാര്‍ടിയേക്കാള്‍ ജനപ്രിയനാകുന്നതിനേക്കാള്‍’ അപകടകരമാണ് നേതൃത്വം തന്നെ പാര്‍ടിയായി മാറുന്നത്. കാരണം വ്യക്തിയെ തിരുത്താന്‍ കഴിഞ്ഞില്ലെങ്കില്‍ അടര്‍ത്തി മാറ്റാം. നേതൃത്വത്തിനെ തിരുത്താന്‍ കഴിഞ്ഞില്ലെങ്കിലോ? നേതൃത്വം മാത്രമല്ലല്ലോ പാര്‍ടി.

അനുബന്ധം: ആരോഗ്യപരമായ പ്രശ്നങ്ങള്‍ ഉയര്‍ത്തിക്കാണിച്ച് വിഎസിനോട് മാറി നില്‍ക്കാന്‍ നേതൃത്വം ആവശ്യപ്പെട്ടെന്ന് ചില റിപോര്‍ട്ടുകള്‍. അതു കണ്ടപ്പോള്‍ ഓര്‍മ വന്നത് അഞ്ചു വര്‍ഷം പഴക്കമുള്ള ഒരു സംഭവമാണ്. 2006 തുടക്കത്തില്‍ വിഎസിന്റെ ഒരു പരിപാടി ദില്ലി ജെഎന്‍യുവില്‍ സംഘടിപ്പിക്കാനായി ഇതെഴുതുന്നയാളും, സഖാവ് അഭിലാഷ് മലയിലും ചേര്‍ന്ന് ബന്ധപ്പെട്ടവരെ സമീപിച്ചിരുന്നു. ആരോഗ്യപ്രശ്നങ്ങള്‍ മൂലം സഖാവ് വിഎസിന് ക്യാമ്പസിലേക്കു വരാന്‍ കഴിയില്ലെന്നായിരുന്നു ആദ്യം കിട്ടിയ മറുപടി. പിന്നീട്, പയനീര്‍ ദിനപ്പത്രത്തില്‍ ജോലി ചെയ്യുന്ന ഒരു സുഹൃത്തു വഴി വിഎസിന്റെ സെക്രട്ടറിയായിരുന്ന ഷാജഹാനെ നേരിട്ടു വിളിക്കുകയായിരുന്നു. തത്കാലത്തേക്ക് ആരോഗ്യപ്രശ്നങ്ങളൊന്നുമില്ലെന്നും, ജെഎന്‍യുവിലേക്കു വരുന്ന കാര്യം ചോദിച്ചിട്ടു പറയാമെന്നും ഷാജഹാന്‍. മാര്‍ച്ച് മാസം പോളിറ്റ് ബ്യൂറോ അംഗങ്ങളൊന്നും മത്സരിക്കേണ്ടതില്ല എന്ന തീരുമാനമുണ്ടായ അന്നു രാത്രി വിഎസ് ജെഎന്‍യുവിലേക്ക് വരികയും ചെറിയൊരു സംഘം വിദ്യാര്‍ത്ഥികളോട് സംസാരിക്കുകയും ചെയ്തു.

Be Sociable, Share!

• 

Tags: Assembly elections, CPIM, Kerala Politics, Pinarayi Vijayan, VS Achuthanandan