എക്സ്-റേ:മലയാള മാധ്യമങ്ങളുടെ ദാസ്യരസം

Be Sociable, Share!

• 

മന്‍മോഹന്‍ സിംഗ് സര്‍ക്കാരിന്റെ സിവിസി (Central Vigilance Commission) നിയമനം വിവാദമായതോടെയാണ് കേരളം കണ്ട ഒരു പഴയ അഴിമതികെയ്സ് വീണ്ടും മലയാളിയുടെ പൊതുബോധത്തിലേക്ക് കയറി വരുന്നത്. വര്‍ഷങ്ങളുടെ പഴക്കമുണ്ടെങ്കിലും കേരളരാഷ്ട്രീയത്തിലെ സുപ്രധാന സംഭവങ്ങളിലൊന്നായിരുന്നു പാമോയില്‍ അഴിമതി കെയ്സ്. ഈ കെയ്സിനു മേല്‍ പുനരന്വേഷണത്തിനു തിരുവനന്തപുരം വിജിലന്‍സ് കോടതി ഉത്തരവിട്ടു എന്ന തിങ്കളാഴ്ചത്തെ വാര്‍ത്ത കേരളത്തിലെ മുഖ്യധാരാ ‘നിഷ്പക്ഷ’ മാധ്യമങ്ങള്‍ എങ്ങിനെയാണ് റിപോര്‍ട്ട് ചെയ്തത് എന്നത് പരിശോധിക്കേണ്ടതാണ്. ഈ കെയ്സ് ആദ്യം അന്വേഷിച്ചത് ഇടതുപക്ഷ സര്‍ക്കാരാണെന്നോ, എകെ ആന്റണി സര്‍ക്കാരിന്റെ കാലത്താണ് കെയ്സ് അട്ടിമറിക്കപ്പെട്ടത് എന്നോ, കെയ്സ് ക്ലോസ് ചെയ്യണമെന്നു സുപ്രീം കോടതിയില്‍ സത്യവാങ്മൂലം സമര്‍പ്പിച്ചത് ഉമ്മന്‍ ചാണ്ടി സര്‍ക്കാരാണെന്നോ ഉള്ള വസ്തുതകളെ പറ്റി ചൊവ്വാഴ്ചത്തെ പ്രധാന മാധ്യമങ്ങളില്‍ ഒരു പരാമര്‍ശവുമില്ല. കെ കരുണാകരന്റെ 1991-95 മന്ത്രിസഭയില്‍ ധനകാര്യ മന്ത്രിയായിരുന്ന ഉമ്മന്‍ ചാണ്ടി പാമോലിന്‍ ഫയലില്‍ ഒപ്പിട്ടത് അദ്ദേഹത്തെ പ്രതിപട്ടികയില്‍ ചേര്‍ക്കുന്നതിലേക്ക് നയിക്കുമെന്ന സത്യം ഈ വാര്‍ത്തകളില്‍ ഒരിടത്തും ഇടമില്ലതെപോകുകയും ചെയ്തു. കെയ്സിന്റെ ചരിത്രം പറഞ്ഞാല്‍ ഉമ്മന്‍ ചാണ്ടിക്കും സംഘത്തിനും അത് ദോഷം ചെയ്യുമെന്നറിയാവുന്ന മാധ്യമപ്പടയ്ക്ക് എങ്ങിനെ വിജിലന്‍സ് കോടതിയുടെ വിധി റിപോര്‍ട്ട് ചെയ്യണമെന്നറിയാം. ഉമ്മന്‍ ചാണ്ടി പ്രതിയാക്കപ്പെടും എന്ന ഭീഷണി തിരഞ്ഞെടുപ്പു സമയത്ത് ഇടതുപക്ഷം രാഷ്ട്രീയ ലാഭത്തിനായി നടത്തുന്ന ഒരു നാടകമാണെന്ന ഒളിയമ്പോടു കൂടിയാണ് വാര്‍ത്ത പൊതുജനസമക്ഷം അവതരിപ്പിക്കപ്പെട്ടത്.

മാതൃഭൂമി കെയ്സ് റിപ്പോര്‍ട്ട്‌ ചെയ്തു കൊണ്ട് പറഞ്ഞത്:‌
“തുടരന്വേഷണത്തിന് സ്‌പെഷ്യല്‍ പ്രോസിക്യൂട്ടര്‍ സമര്‍പ്പിച്ച അപേക്ഷയില്‍ രണ്ടുവരി മാത്രമാണുണ്ടായിരുന്നത്. കൂടുതല്‍ പേര്‍ പ്രതിപ്പട്ടികയിലേക്ക് വരാന്‍ സാധ്യതയുണ്ട്. അവരുടെ പങ്കിനെക്കുറിച്ച് അന്വേഷിക്കണം. അതിനാല്‍ തുടരന്വേഷണം വേണമെന്ന് സര്‍ക്കാര്‍ കോടതിയില്‍ ബോധിപ്പിച്ചു. പിന്നീട്, അന്വേഷണ ഉദ്യോഗസ്ഥന്‍ കാര്യകാരണ സഹിതം തുടരന്വേഷണ ആവശ്യം ഉന്നയിച്ചു.”

മനോരമയുടെ ഉമ്മന്‍ ചാണ്ടി ഡിഫന്‍സിങ്ങനെ:
“15 കൊല്ലം മുന്‍പ് രജിസ്റ്റര്‍ ചെയ്ത കെയ്സാണിത്. കുറ്റപത്രം സമര്‍പ്പിച്ചിട്ട് 10 കൊല്ലമായി. ഈ കാലത്തെല്ലാം തന്നെ പ്രതിയാക്കാതെ സാക്ഷിയാക്കി മാറ്റുകയാണ് ചെയ്തത്. ഇപ്പോള്‍ എന്തുകൊണ്ടാണ് തന്നെ പ്രതിയാക്കാന്‍ സര്‍ക്കാര്‍ ശ്രമിക്കുന്നതെന്ന് എല്ലാവര്‍ക്കും നന്നായി അറിയാം. എങ്കിലും സാങ്കേതികത്വം പറഞ്ഞ് ഒഴിഞ്ഞു മാറില്ല. പൊതുജീവിതത്തില്‍ ഉന്നതമൂല്യങ്ങള്‍ കാത്തു സൂക്ഷിക്കാന്‍ പരമാവധി ശ്രമിച്ചിട്ടുണ്ട്”.

ഒളിപ്പിക്കപ്പെട്ട പാമോലിന്‍ ചരിത്രം
1991ല്‍ അധികാരത്തില്‍ വന്ന കരുണാകര മന്ത്രിസഭ 1995ല്‍ അനവധി ആരോപണങ്ങളില്‍ പെട്ട് സ്ഥാനം ഒഴിയുകയും തുടര്‍ന്ന് ആന്റണി മുഖ്യമന്ത്രിയാകുകയും ചെയ്തു. പാമോയില്‍ കേസില്‍ അന്വേഷണംആരംഭിച്ചുവെങ്കിലും അത് എങ്ങും എത്താതെ ഒരു വര്ഷം കടന്നു പോയി. 1996ല്‍ ഇടതു സര്‍ക്കാര്‍ അധികാരത്തില്‍ വരുകയും പുതിയ അന്വേഷണം ആരംഭിക്കുകയും ചെയ്തു. 1997ല്‍ കരുണാകരന്‍ ഉള്‍പ്പെടെ ആറുപേരെ പ്രതിചേര്‍ത്ത്  അഴിമതിനിരോധ നിയമങ്ങള്‍ക്കൊപ്പം ഗൂഢാലോചന കുറ്റങ്ങളും കൂടി അടങ്ങുന്ന വകുപ്പുകള്‍ (Section 13(2) read with 13(1) (d) of the Prevention of Corruption Act, 1988 and under Section120 B (conspiracy) of the Indian Penal Code) ചേര്‍ത്ത്  വിജിലന്‍സ് പ്രത്യേക കോടതിയില്‍ പ്രഥമവിവര റിപോര്‍ട്ട് സമര്‍പ്പിച്ചു. ഇതിനെതിരെ കരുണാകരന്‍ ഹൈകോടതിയില്‍ ഇതേ വര്ഷം തന്നെ ഹര്‍ജി സമര്‍പ്പിക്കുകയും, കോടതി അത് തള്ളുകയും  ചെയ്തു. ഹൈകോടതി വിധിക്കെതിരെ കരുണാകരന്‍ സുപ്രീംകോടതിയില്‍ സമര്‍പ്പിച്ച പ്രത്യേക ഹര്‍ജി 1998ല്‍ കോടതി വിശദമായി വാദം കേള്‍ക്കുന്നതിനായി ഫയലില്‍ സ്വീകരിക്കുകയും പ്രതികളെ അറസ്റ്റ് ചെയ്യുന്നതും കുറ്റപത്രം സമര്‍പ്പിക്കുന്നതും താല്‍കാലികമായി തടയുകയുമുണ്ടായി. ഇതോടൊപ്പം  തന്നെ അന്വേഷണം തുടരാനും കോടതി അനുവാദം നല്‍കി. അന്വേഷണം പൂര്‍ത്തിയാക്കിയശേഷം സുപ്രീംകോടതിയുടെ അനുമതിയോടെ 1999 നവംബര്‍ ഒന്നിന് കുറ്റപത്രം വിജിലന്‍സ് കോടതിയില്‍ സമര്‍പ്പിച്ചു. ഇതിനെതിരെ 2000ല്‍ കരുണാകരന്‍ സുപ്രീംകോടതിയില്‍ സമര്‍പ്പിച്ച പ്രത്യേക ഹര്‍ജി കോടതി തള്ളുകയായിരുന്നു.

ഇത്രയും പുരോഗതി ഈ കെയ്സില്‍ ഉണ്ടാകുന്നതു ഇടതു സര്‍ക്കാരിന്റെ കാലത്താണ്. 2001ല്‍ ആന്റണിയുടെ നേതൃത്വത്തില്‍ വലതുപക്ഷ സര്‍ക്കാര്‍ അധികാരത്തില്‍ വന്നതിനു ശേഷം, പാമോയില്‍ കെയ്സിലുള്ള അന്വേഷണവും അതിന്‍മേലുള്ള തുടര്‍നടപടികളും മരവിപ്പിക്കുകയാണുണ്ടായത്. കാലവിളമ്പം വരുത്തി കേസ് അട്ടിമറിക്കുകയും തെളുവുകള്‍ നശിപ്പിക്കുകയും ചെയ്യുന്നത്തിന് ഇത് ഇടയാക്കി എന്നതാണ് യഥാര്‍ത്ഥ്യം. ഇതിനും പുറമേയാണ് 2005 ജനുവരിയില്‍ ആരോപണ വിധേയനായ ഉമ്മന്‍ ചാണ്ടി മുഖ്യമന്ത്രി ആയിരിക്കെ പ്രോസിക്യൂഷന്‍ നടപടി തുടരേണ്ടതില്ലെന്നു ചൂണ്ടിക്കാട്ടി കേരള സര്‍ക്കാര്‍ കേന്ദ്രത്തിന് കത്തയച്ചത്. കുടാതെ  സര്‍ക്കാരിന് വേണ്ടി കേസ് പിന്‍വലിക്കുന്നതായി 2005 നവംബര്‍ 24ന് കേരള ചീഫ് സെക്രട്ടറി സുപ്രീംകോടതിയില്‍ സത്യവാങ്മൂലം സമര്‍പ്പിക്കുകയും ചെയ്തു. 2006ല്‍ വിഎസ് സര്‍ക്കാര്‍ അധികാരത്തിലെത്തിയത്തിനു ശേഷം ഈ സത്യവാങ്മൂലം പിന്‍വലിച്ച് കോടതി നടപടികളുമായി മുന്നോട്ടു പോകാന്‍ തീരുമാനിക്കുകയായിരുന്നു. 2011 ജനുവരി മാസത്തില്‍ കോടതി നടപടികള്‍ പുനരാരം ഭിക്കാന്‍  സുപ്രീം കോടതിയില്‍ നിന്ന് അറിയിപ്പുണ്ടായതിനു ശേഷമാണ് വിജിലന്‍സ് കോടതി ഈ കേസിന്‍മേലുള്ള തുടര്‍നടപടികള്‍ തുടങ്ങിയത്. അതാണ് ഇപ്പോള്‍ വിണ്ടും അന്വേഷണം എന്ന ഘട്ടത്തിലേക്ക് എത്തുന്നതിലേക്ക് നയിച്ചത്.

ഇതാണ് സത്യമെന്നിരിക്കെ, ഈ ചരിത്രം അപ്പാടെ മറച്ചുവച്ചു കൊണ്ട് എങ്ങിനെയും വലതുപക്ഷത്തെ രക്ഷിച്ചെടുക്കാന്‍ മനോരമ മാതൃഭൂമിയാദികള്‍ ശ്രമിക്കുന്ന കാഴ്ചയാണ് ചൊവ്വാഴ്ച വായനക്കാര്‍ കണ്ടത്. കേരളം കണ്ട ഏറ്റവും വലിയ ആഗോളവത്കരണ വിരുദ്ധ പ്രക്ഷോഭങ്ങളില്‍ ഒന്നായി മാറിയ ആസിയാന്‍ കരാര്‍-വിരുദ്ധ സമരത്തെ പരിഹസിച്ച, വരദാചാരിയുടെ തല വെട്ടി സമര്‍ത്ഥമായി ലാവലിന്‍ കേസില്‍ ഒട്ടിച്ച് ഒരു ജനതയെ ആകമാനം തെറ്റിദ്ധരിപ്പിച്ച, ഈ മാധ്യമമുത്തശിമാര്‍ ഉമ്മന്‍ ചാണ്ടിക്കെതിരെ യാതൊരു കോടതി പരാമര്‍ശവും ഇല്ലെന്നും അതുകൊണ്ട് ഇനിയൊന്നും പേടിക്കേണ്ടതില്ലെന്നും സമാശ്വസിക്കുകയായിരുന്നു. ദില്ലി പൊലീസ് സ്പെഷ്യല്‍ പവേഴ്സ് ആക്റ്റ് പ്രകാരം ലോട്ടറി കേസ് അന്വേഷിക്കാന്‍ സിബിഐയെ സമീപിക്കണമെങ്കില്‍ കേരളത്തിലെ പൊലീസ് സ്റ്റേഷനില്‍ ഒരു കേസ് രജിസ്റ്റര്‍ ചെയ്യണമെന്നു ഉളുപ്പില്ലാതെ പച്ച കള്ളം എഴുതിയ മനോരമ കൈയ്യോടെ പിടിക്കപ്പെട്ടപ്പോള്‍ നാട്ടു മര്യാദയുടെ പേരിലെങ്കിലും ഒരു ക്ഷമ പറയേണ്ടതായിരുന്നു. മത്സരിക്കില്ല എന്ന് ഉമ്മന്‍‌ ചാണ്ടി വാശി പിടിച്ചെന്നും തിരഞ്ഞെടുപ്പുകളില്‍ ‘ശീര്‍ഷാസന’ത്തിലൂടെയും വിജയിക്കാം എന്നു കണ്ടെത്തിയ ആന്റണി ശാസന രൂപത്തില്‍ ഇടപെട്ടു എന്നും പൈങ്കിളിഭാഷയില്‍ വിവരിക്കുന്ന മാതൃഭൂമി ലേഖകന്‍ സ്വന്തം പത്രത്തിന്റെ രാഷ്ട്രീയം തന്നെയാണ് തുറന്നു കാണിക്കുന്നത്.

കോടതിയില്‍ നിന്നും പുനരന്വേഷണ പരാമര്‍ശം വരുന്ന നിമിഷത്തില്‍ ഉമ്മന്‍‌ ചാണ്ടിയുടെ  മുഖത്തെ ഉദ്വേഗം വിവരിക്കാന്‍  മനോരമ നല്‍കിയ സ്ലോ മോഷന്‍ വിവരണവും നിഷ്പക്ഷ മാധ്യമ പ്രവര്‍ത്തനമെന്ന ചിറകിനടിയില്‍ ഒളുപ്പിച്ചു വച്ചിരിക്കുന്ന നിര്‍ലജ്ജ രാഷ്ട്രീയ ദാസ്യത്തിന്റെ ഉത്തമ ദൃഷ്ടാന്തമായി. ‘അലയടങ്ങി, ഉലയാതെ ഉമ്മന്‍ചാണ്ടി’ എന്ന തല വാചകത്തില്‍ തന്നെ മനോരമയുടെ ആശ്വാസവും ദാസ്യരസവും മറനീക്കി പുറത്ത് വരുന്നുണ്ട്. മനോരമയുടെ അതേ പേജില്‍ എകെജി സെന്ററിലെ എല്‍ഡിഎഫ് യോഗത്തിനു മുന്‍പ് രജിസ്റ്ററില്‍ ഒപ്പിടുന്ന മുഖ്യമന്ത്രി വിഎസ് അച്യുതാനന്ദന്റേയും, സിപിഎം സെക്രട്ടറി പിണറായി വിജയന്റേയും, ആഭ്യന്തര മന്ത്രി കോടിയേരി ബാലകൃഷ്ണന്റേയും ഫോട്ടോയുമുണ്ട്. അതിനുള്ള അടിക്കുറുപ്പ് പതിവുപോലെ വിഷം വമിക്കുന്നത് തന്നെ. ‘നമ്മിലാരുടെ പേര്‍?’ എന്ന നിഷ്കളങ്ക ചോദ്യത്തിനുള്ളില്‍ ഒളിപ്പിച്ചു വച്ചിരിക്കുന്ന വലതുപക്ഷ രാഷ്ട്രീയത്തിന്റെ ആത്മരതി തിരിച്ചറിയപ്പെടാതെ പോകരുത്.

അനുബന്ധം: പാമോയില്‍ കെയ്സിലെ കോടതിവിധിയെ കുറിച്ച് ദേശാഭിമാനിയില്‍ യേശുദാസന്‍ വരച്ച കാര്‍ട്ടൂണാണ് ചുവടെ:

(സുപ്രധാന രാഷ്ട്രീയ സാമൂഹിക വിഷയങ്ങളില്‍ കേരളത്തിലെ മുഖ്യധാരാ മാധ്യമങ്ങള്‍ എന്തുതരം ഇടപെടലുകളാണ് നടത്തുന്നത് എന്ന പംക്തിയാണ് ‘എക്സ്-റേ’. പറയാതെ പറയുക, പറയാതിരിക്കുക, പലവട്ടം പറയുക, വളച്ചു പറയുക, രണ്ടു രീതിയില്‍ പറയുക, കള്ളം പറയുക, കള്ളം പോലെ പറയുക മുതലായ കണ്കെട്ട് വിദ്യകള്‍ മലയാള മാധ്യമങ്ങള്‍ക്ക് പുതുമയല്ല. പക്ഷേ, ഈ നടപ്പുരീതി വിശദമായ ചര്‍ച്ചക്ക് വിധേയമാക്കേണ്ടതുണ്ട് എന്ന തിരിച്ചറിവിലാണ് എക്സ്-റേ എഴുതി തുടങ്ങുന്നത്.)

Be Sociable, Share!

• 

Tags: K Karunakaran, Manorama, Mathrubhumi, media, Oomman Chandy, Palmolein case, PJ Thomas, X-Ray