പ്രണയവും ധനതത്വശാസ്‌ത്രവും

Be Sociable, Share!

• 

എന്നോട് പ്രണയമാണെന്ന്
നീ ഒരിക്കലും പറയാത്തതെന്താണ് ?
ഞാന്‍ ചോദിച്ചു.
പറഞ്ഞുകഴിയുമ്പോള്‍
അതിന്റെ വീര്യം കെട്ടാലോ? എന്നവള്‍.
സ്നേഹത്തിനും റേഷന്‍ സമ്പ്രദായമുണ്ടെന്ന്
അങ്ങനെ ഞാനറിഞ്ഞു.

സപ്ലൈ കൂടിയാല്‍
ഡിമാന്റ് കുറയുമെന്നു വാദിച്ച്
എന്നെ ചുംബിക്കുന്നത്
അവള്‍ നിര്‍ത്തിയത്
അപ്പോള്‍ ഓര്‍മ്മ വന്നു.
അന്ന് സേയുടെ നിയമം[1]
വിലപ്പോയിരുന്നില്ല.

പ്രണയത്തിനും
മൈക്രോ എക്കണോമിക്സിന്റെ
നിയമങ്ങള്‍ ബാധകമാക്കിയിരിക്കുന്നു.
ഡിമാന്‍ഡ്-സപ്ലൈ കര്‍വുകള്‍
പ്രണയത്തെ വരിഞ്ഞുകെട്ടിക്കൊന്നു.

ഞാനിപ്പോള്‍
ഒരു പെര്‍മനന്റ്
ഡിസ്‌ഇക്വിലിബ്രിയത്തിലാണ്.

[1] Say’s Law – Supply creates its own demand.

എസ്.ഡി.

(ഫെബ്രുവരി 2007)

Be Sociable, Share!

• 

Tags: literature, Poem, SD