Data Post: ഇന്ധനവിലയുടെ രാഷ്ട്രീയം

Be Sociable, Share!

• 

എണ്ണക്കമ്പനികള്‍ രാജ്യത്തെ സമ്പദ്വ്യവസ്ഥയുടെ നാഡീഞരമ്പുകളാണെന്നും, അവയുടെ വളര്‍ച്ച രാജ്യത്തിന്റെ വളര്‍ച്ചയാണെന്നുമാണ് മന്‍മോഹന്‍ സിംഗ് ഭരിക്കുന്ന യുപിഎ സര്‍ക്കാരിന്റെ നിലപാട്. ഓരോ തവണ പെട്രോളിയം ഉത്പന്നങ്ങളുടെ വില വര്‍ധിപ്പിക്കുമ്പോഴും പെട്രോളിയം സെക്രട്ടറി എസ് സുന്ദരേശനും, എണ്ണ മന്ത്രി മുരളി ദിയോറയും ആവര്‍ത്തിച്ചു പറഞ്ഞിട്ടുള്ള കാര്യമാണിത്. എണ്ണ കമ്പനികള്‍, പ്രത്യേകിച്ചും എണ്ണ മാര്‍ക്കറ്റിംഗ് കമ്പനികള്‍ (ഹിന്ദുസ്ഥാന്‍ പെട്രോളിയം, ഭാരത് പെട്രോളിയം, ഇന്ത്യന്‍ ഓയില്‍) ഓരോ വര്‍ഷവും കനത്ത നഷ്ടം നേരിട്ടു കൊണ്ടിരിക്കുകയാണെന്നും, അതുകൊണ്ട് അന്തര്‍ദേശീയ വിപണിയിലെ വിലമാറ്റങ്ങള്‍ക്കനുസരിച്ച് എണ്ണയുത്പന്നങ്ങളുടെ റിട്ടെയില്‍ വില മാറേണ്ടതുണ്ടെന്നും സര്‍ക്കാര്‍ വാദിക്കുന്നു. ഈ ന്യായം പറഞ്ഞാണ് വിലക്കയറ്റം മൂലം കഷ്ടപ്പെടുന്ന ജനങ്ങളുടെ ചുമലിലേക്ക് അമിത ഇന്ധനവിലയുടെ ഭാരം കൂടെ മന്‍മോഹന്‍ സിംഗ് എടുത്തു വയ്ക്കുന്നത്. എന്നാല്‍ സര്‍ക്കാരിന്റെയും എണ്ണ കമ്പനികളുടേയും വാദത്തില്‍ ഒട്ടും കഴമ്പില്ലെന്ന് കണക്കുകള്‍ നിരത്തി പലരും തുറന്നു കാണിച്ചിട്ടുള്ളതാണ്. സര്‍ക്കാര്‍ന്റേയും പൊതുമേഖലയിലെ എണ്ണയുത്പാദന കമ്പനികളും സബ്സിഡി നല്‍കുന്നതു വഴി എണ്ണ മാര്‍ക്കറ്റിംഗ് കമ്പനികള്‍ക്ക് യാതൊരു നഷ്ടവുമുണ്ടാവുന്നില്ലെന്നും, അണ്ടര്‍ റിക്കവറി എന്ന കേവലമൊരു റ്റെക്നിക്കല്‍ പദമുപയോഗിച്ചാണ് രാജ്യത്തെ എണ്ണ ലോബി സര്‍ക്കാര്‍ നയങ്ങളെ സ്വാധീനിക്കുന്നതെന്നും ഞങ്ങള്‍ മുന്‍പും ചൂണ്ടി കാണിച്ചിട്ടുണ്ട്. ജൂലൈ-സെപ്തംബര്‍ പാദവര്‍ഷം രാജ്യത്തെ എണ്ണ കമ്പനികള്‍ സാമ്പത്തിക പ്രകടനങ്ങള്‍ പരിശോധിച്ചാല്‍ ഇതു കൂടുതല്‍ വ്യക്തമാകും. ഈ മൂന്നു മാസക്കാലം കൊണ്ട് എണ്ണ വ്യാപാരം നടത്തുന്ന മൂന്നു പൊതുമേഖലാ സ്ഥാപനങ്ങള്‍ കൊയ്തെടുത്ത ലാഭം 9,525.8 കോടി രൂപയാണ് (പട്ടിക കാണുക‌–ഉറവിടം കമ്പനികളുടെ രണ്ടാം പാദവര്‍ഷ ഫൈനാന്‍ഷ്യല്‍ സ്റ്റേറ്റ്മെന്റ്സ്). ഇതേ കാലയളവില്‍ പൊതുമേഖലയിലെ ഇന്ധനോത്പാദകര്‍ (ഓയില്‍ ആന്‍ഡ് നാചുറല്‍ ഗ്യാസ് കോര്‍പറേഷന്‍, ഓയില്‍ ഇന്ത്യ, ഗെയില്‍ ഇന്ത്യ) ഉണ്ടാക്കിയ ലാഭം 7,228.25 കോടി രൂപ വരും. ഇന്ധന മേഖലയിലെ മൂന്നു പ്രധാന സ്വകാര്യ കമ്പനികളുടെ ലാഭം 6638 കോടി രൂപ. ഇതില്‍ മുകേഷ് അംബാനിയുടെ റിലയന്‍സ് ഇന്‍ഡസ്ട്രീസ് (രാജ്യത്തെ ഏറ്റവും വലിയ കമ്പനി) രേഖപ്പെടുത്തിയത് ഏകദേശം 5,000 കോടി രൂപ. ഈ കമ്പനികള്‍ക്കു വേണ്ടിയാണോ മന്‍മോഹന്‍ സര്‍ക്കാര്‍ അടിക്കടി ഇന്ധന വില കൂട്ടിയത്? പെട്രോള്‍ വിലനിര്‍ണയത്തിലുള്ള സര്‍ക്കാര്‍ നിയന്ത്രണം എടുത്തു മാറ്റിയത്? ജനങ്ങള്‍ക്കു മനസിലാവുന്ന ഭാഷയില്‍ മറുപടി പറയാനുള്ള ബാധ്യത മന്‍മോഹന്‍ സിംഗിനുണ്ട്.

Be Sociable, Share!

• 

Tags: Data Post, Economics, Murli Deora, Oil politics, UPA