കഥാചിത്രങ്ങള്‍

Be Sociable, Share!

• 

ദില്ലി ഇന്ദിരാ ഗാന്ധി നാഷനല്‍ സെന്റര്‍ ഫോര്‍ ദ ആര്‍ട്സില്‍ (IGNCA) ഒക്റ്റോബര്‍ 20 മുതല്‍ നടന്നു വരുന്ന ‘ആഖ്യാന്‍: മാസ്ക്സ്, പപ്പറ്റ്സ് ആന്‍ഡ് പിക്ച്ചര്‍ ഷോമെന്‍ ട്രഡിഷന്‍സ് ഓഫ് ഇന്ത്യ’ അന്വേഷിക്കുകയും ആഘോഷിക്കുകയും ചെയ്യുന്നത് ഇന്ത്യയുടെ ‘കഥ പറച്ചില്‍’ പാരമ്പര്യത്തിന്റെ അര്‍ത്ഥ വൈവിധ്യങ്ങളാണ്. മൂര്‍ത്തത/അമൂര്‍ത്തത, മിത്തിക്കല്‍/റിയല്‍, ഏകത്വം/ബഹുത്വം, സ്വത്വം/അപരത്വം തുടങ്ങി നിരവധി തലങ്ങളിലൂടെ സഞ്ചരിക്കുന്ന ഈ പാരമ്പര്യങ്ങളില്‍ പലതും, കാഴ്ചയുടെ അല്ലെങ്കില്‍ പെര്‍ഫോര്‍മന്‍സിന്റെ പുതിയ ഭാഷ നിര്‍മിക്കുന്നു. മുഖം മൂടികള്‍, പാവകളി, ചിത്രകഥകള്‍ എന്നിങ്ങനെ മൂന്നു വിഭാഗങ്ങളിലായി നടന്നു കൊണ്ടിരിക്കുന്ന പ്രദര്‍ശനം വിസ്മൃതിയിലേക്കു മറഞ്ഞുകൊണ്ടിരിക്കുന്ന കലാ, സാംസ്കാരിക ആഖ്യാനങ്ങളെ വീണ്ടെടുക്കുക എന്ന ലക്ഷ്യമാണ് മുന്നോട്ടു വയ്ക്കുന്നത്. നവംബര്‍ 20 വരെ നീണ്ടു നില്‍ക്കുന്ന പ്രദര്‍ശനത്തിന്റെ കാഴ്ചകളാണ് ചുവടെ:

കാവഡ്: രാജസ്ഥാനിലെ മേവാര്‍, മാര്‍വാര്‍ പ്രദേശങ്ങളില്‍ കാണപ്പെടുന്ന കഥപറച്ചില്‍ പാരമ്പര്യം. ചിത്രപ്പണികളുള്ള ഒരു ക്ഷേത്രമാതൃക സൃഷ്ടിച്ച്, അതിലെ ചിത്രങ്ങളിലൂടെ കഥ പറയുന്ന രീതിയാണ് കാവഡിന്റേത്. ആസ്വാദകനു സ്വന്തമാകുന്നത് ഒരു ദേശാടനത്തിന്റെ അനുഭവം.

ഫട്ട്: പാബുജി, ദേവനാരായണന്‍ എന്നീ രാജസ്ഥാനിലെ ജനപ്രിയ യോദ്ധാക്കളുടെ വീരചരിതങ്ങളെ അടിസ്ഥാനമാക്കിയാണ് ഫട്ട് ചിത്രങ്ങള്‍ വരയ്ക്കപ്പെടുന്നത്. ചുരുള്‍ രൂപത്തിലുള്ള ഇത്തരം ചിത്രങ്ങള്‍ ജോഷീസ് എന്നറിയപ്പെടുന്ന പ്രൊഫഷനല്‍ കലാകാരാണ് വരയ്ക്കുന്നത്. പാബുജിയെ പോലെയുള്ളവരുടെ കഥകളെ ഇന്നും രാജസ്ഥാനിലെ ഗ്രാമീണ ജനതയ്ക്കിടയില്‍ സജീവമായി നിലനിര്‍ത്തുന്നതില്‍ ഫട്ട് കലാകാര്‍ക്കുള്ള പങ്ക് ചെറുതല്ല

ഗംഭീര: ഇന്ത്യയിലെ ഏറ്റവും പുരാതനമായ ഫോക് പാരമ്പര്യങ്ങളില്‍ ഒന്നായ ഗംഭീര മാസ്ക് ഇന്ന് വെസ്റ്റ് ബംഗാളിലെ മാല്‍ദ ജില്ലയില്‍ മാത്രമേ കാണപ്പെടുന്നുള്ളൂ. ഒരു വലിയ ഡ്രമ്മിന്റെ അകമ്പടിയോടെ, മരത്തില്‍ പണിത, ശില്പചാതുരിയുള്ള മുഖംമൂടികള്‍ ധരിച്ച് ദേവീദേവതകളെ പ്രീതിപ്പെടുത്താനായി കലാകാര്‍ നൃത്തം ചെയ്യുന്നതാണ് ഗംഭീരയിലെ പ്രധാന ഇനം.

പട്ടം കഥ: ഒരു വലിയ ക്യാന്‍വാസില്‍ നിരവധി ചിത്രങ്ങളിലൂടെ കഥ പറയുന്ന രീതിയാണ് ആന്ധ്രാ പ്രദേശില്‍ നിന്നുള്ള പട്ടം കഥ. ചില സമൂഹങ്ങളുടെ ഉല്പത്തിയെ കുറിച്ചുള്ള മിത്തുകളാണ് ഇവരുടെ കഥകളില്‍ കൂടുതലും കാണുന്നത്. മാസയ്യ, കൊരജുല, ഡക്കലി, ഗുരപ്പു, കക്കിപദിഗല തുടങ്ങിയ വിഭാഗങ്ങളാണ് മുഖ്യമായും പട്ടം കഥാപാരമ്പര്യത്തിന്റെ ഭാഗമായിട്ടുള്ളത്

പട്: വെസ്റ്റ് ബംഗാളിലെ ജനപ്രിയമായ കഥപറച്ചില്‍ പാരമ്പര്യമാണിത്. മറ്റു ചിത്രകലാ പാരമ്പര്യത്തില്‍ നിന്നും വ്യത്യസ്തമായി ഹിന്ദുക്കളും, മുസ്ലിങ്ങളും ഒരേപോലെ പട്ടില്‍ പങ്കെടുക്കുന്നു. രാമായണ, മഹാഭാരത, ഹിന്ദു മിത്തോളജി, പീര്‍ ഗാസി എന്നിവയൊക്കെയാണ് പട്ടിലെ കഥാകേന്ദ്രമാകാറ്.

ചിത്രങ്ങളും എഴുത്തും ആര്‍ ജാനകി

Be Sociable, Share!

• 

Tags: Art, Culture, R Janaki