DataPost: ഒന്നുമില്ലാപ്പട

Be Sociable, Share!

• 

Courtesy: PTI

കോമണ്‍‌വെല്‍ത്ത് ഗെയിംസിന്റെ തിളക്കം ആഘോഷിക്കുന്ന മാധ്യമങ്ങള്‍ പൊതുമറവിയുടെ (public amnesia) ഏറ്റവും മികച്ച ബ്രാന്‍ഡ് അംബാസഡര്‍മ്മാരായി മാറുയിരിക്കുന്നു. ചക്കരക്കുടത്തില്‍ തങ്ങള്‍ക്കും കയ്യിടാനൊത്തില്ലല്ലോ എന്ന ഖേദത്തെക്കാളും ഒട്ടും മുകളിലല്ല ദേശീയപത്രങ്ങളുടെ പല അഴിമതിസ്കൂപ്പുകളും എന്ന് ഇപ്പൊള്‍ തോന്നാന്‍ കാരണമുണ്ട്. കിട്ടേണ്ടതു കിട്ടേണ്ടവര്‍ക്കെല്ലാം കിറ്റുകണക്കിനു കിട്ടിക്കഴിഞ്ഞു എന്നാണ് മനസിലാക്കാനകുന്നത്. കാരണം: ഇക്കഴിഞ്ഞ ദിവസങ്ങളില്‍ ന്യൂദില്ലി തീവണ്ടിയാപ്പീസില്‍ നിന്നും ഇന്ത്യന്‍ ഭരണകൂടം ചാപ്പകുത്തിചുരുട്ടിക്കെട്ടിയയച്ചത് നിസ്വരായ ആയിരങ്ങളെയാണ്. ഒരു രാജ്യത്തിന്റെ കൊളോണിയല്‍ ദാസ്യവൃത്തിക്കു മിഴിവൊരുക്കാന്‍ വിദൂരഗ്രാമങ്ങളില്‍ നിന്ന് ഠേക്കേദാര്‍മാരും, മറ്റു പിണിയാളരും ചേര്‍ന്നു അടിമകളെപ്പോലെ ലേലം വിളിച്ചുകൊണ്ടുവന്ന അഴുകിക്കറുത്ത ദീനദേഹനങ്ങളെ, പണികഴിഞ്ഞപ്പോള്‍ പടികടത്തുന്ന തിരക്കിലായിരുന്നു ഭരണകൂടം ഇക്കഴിഞ്ഞ ദിവസങ്ങളില്‍. മനുഷ്യാവകാശങ്ങളെ കാറ്റില്‍ പറത്തിയാണ് ഇവരെ പണിയെടുപ്പിച്ചതെന്ന് ബി.ബി.സി. അടക്കമുള്ള വിദേശമാധ്യമങ്ങള്‍ കൂടി വിളിച്ചുപറഞ്ഞു. എന്നിട്ടും നമ്മുടെ മുത്തശ്ശിപ്പത്രങ്ങള്‍ക്കു അതു വലിയ വാര്‍ത്തയായിരുന്നില്ല. ദില്ലി സ്റ്റേഷനില്‍ നിന്നും വാഗണുകളില്‍ കുത്തിത്തിരുകി പറഞ്ഞയച്ചവര്‍ക്കെല്ലാം കയ്യില്‍ ടിക്കറ്റിനുപകരം ചുമലിലും ദേഹത്തും സ്റ്റേറ്റു ചാര്‍ത്തിക്കൊടുത്ത അടയാളമുദ്രകളുണ്ടായിരുന്നെന്നു റിപോര്‍ട്ടുകള്‍ പറയുന്നു. അറവുമാടുകളെപ്പോലെ തരംതിരിച്ചു അവരെ നമ്മള്‍ നുരയും പതയും ചാര്‍ത്തി തിരിച്ചയച്ചു.
ഈ സാഹചര്യത്തില്‍ മറ്റൊരു കണക്കു നോക്കുന്നതു നല്ലതാണ്. താഴെക്കൊടുക്കുന്ന ചാര്‍ട്ട് ലോകത്തിലെ ദാരിദ്രത്തിന്റെ ഏതാണ്ടു പുതിയ കണക്കാണ്. ഇതോടൊപ്പം വായിക്കാവുന്ന ചില കുസൃതിക്കണക്കുകള്‍ (trivia) ഇതാ: ലോകത്തിലെ എണ്‍പതു ശതമാനം പേരും ദിവസം നാനൂറു രൂപയില്‍ കൂടുതലില്ലാത്തവരാണ്. ലോകത്തെ പാവപ്പെട്ടവരായ നാല്പ്പതു ശതമാനംത്തിന്റെ മൊത്തം വരുമാനം ആഗോളമൊത്തവരുമാനത്തിന്റെ അഞ്ചു ശതമാനം പോലും വരില്ല. ഏറ്റവും വലിയ ധനികരായ 20%, ലോകത്തെ മൊത്തം സമ്പത്തിന്റെ മൂന്നില്‍ ഒന്നും കയ്യടക്കിവച്ചിരിക്കുന്നു. ഐക്യരാഷ്ട്രസഭയുടെ ശിശുക്ഷേമസംഘടനയായ യൂണിസെഫിന്റെ കണക്കനുസരിച്ചു ഏതാണ്ട് ഒരുദിവസം 25,000 കുട്ടികള്‍ പട്ടിണിമൂലം ഈ ലോകത്തു മരിക്കുന്നു. ഏതാണ്ട് ഒരു ബില്ല്യണ്‍ (ഇന്ത്യയുടെ ജനസംഖ്യക്കു തുല്യം) പേരാണ് ഒരു പുസ്തകം വായിക്കാനോ, പേരെഴുതി ഒപ്പിടാനൊ അറിയാതെ ഇരുപത്തൊന്നാം നൂറ്റാണ്ടിനെ വരവേറ്റത്.  ഒരു രസത്തിനു ഈ ചാര്‍ട്ടുകൂടികാണു.

Be Sociable, Share!

• 

Tags: commonwealth games, Economy Development, Education, World Bank