പന്തെഴുത്ത്: ഇനി നാലാണ്ടുകളുടെ കാത്തിരിപ്പ്

Be Sociable, Share!

• 

വന്‍പ്രതീക്ഷകളുടെ ഭാരവുമേറിയെത്തി ഒടുവില്‍ ശിരസു കുനിച്ച് കളിക്കളം വിടേണ്ടി വന്ന അതികായര്‍, കിക്കുകളുടെ രാജാവായ ദീഗോ ഫോര്‍ലാന്‍, ആഫ്രിക്കന്‍ ഭൂഖണ്ഡത്തിന്റെ പ്രതീക്ഷകള്‍ നെഞ്ചേറ്റി കുതിച്ച അസിമാവോ ജിയാന്‍, ഒരു വേടിയുണ്ടയുടെ അനക്കവും കാത്ത് ജാഗരൂഗനായിരിക്കുന്ന മിറാസ്ലോവ് ക്ലോസെ, കളിക്കളത്തിനു പുറത്ത് ധ്യാനനിരതനായ മറഡോണ…. മനസില്‍ മായാതെ നില്‍ക്കുന്ന ലോകകപ്പിന്റെ ഓര്‍മകളെ കുറിച്ച് പികെ ആനന്ദ്

അങ്ങിനെ വുവുസെലകളുടെ ഇരമ്പമവസാനിച്ചു. ജൂലൈ 11നു ജോഹാനെസ്ബര്‍ഗിലെ പടുകൂറ്റന്‍ സോക്കര്‍ സിറ്റിയില്‍ പുതിയ ലോക ചാമ്പ്യന്മാരുടെ കിരീടധാരണത്തിനു സാക്ഷ്യം വഹിച്ചു കൊണ്ട് നീണ്ട ഒരു മാസത്തെ ആഘോഷങ്ങളും, പോര്‍വിളികളും, ആഘാതങ്ങളും കൊടിയിറങ്ങി. ജൂണ്‍ 11ന് സോക്കര്‍ സിറ്റിയില്‍ ഉസ്ബെക് റെഫറി രാവ്ഷന്‍ ഇര്മാറ്റൊവിന്റെ വിസിലില്‍ ഉരുളാന്‍ തുടങ്ങിയ ജാബുലാനി, കൃത്യം ഒരു മാസത്തിന്റെ പിരിമുറുക്കങ്ങള്‍ക്കും, സ്വപ്നങ്ങള്‍ക്കും, സ്വപ്നവിഘാതങ്ങള്‍ക്കുമൊടുവില്‍ ഇംഗ്ലിഷ് റെഫറി ഹോവാര്‍ഡ് വെബ്ബിന്റെ അവസാന വിസിലില്‍ അതെ വേദിയില്‍ വച്ച് ഓട്ടം നിര്‍ത്തി. കാല്പന്തുകളിയുടെ ചാരുതയില്‍ വിരിയുന്ന വസന്തത്തിനായി ഇനി നാലാണ്ടുകള്‍ കാത്തിരിക്കണം.

***
കിരീടം ചൂടാന്‍ എന്ത് കൊണ്ടും തങ്ങള്‍ക്കു കഴിവുണ്ടെന്ന് തെളിയിച്ചു കൊണ്ടായിരുന്നു നോക്കൗട്ട് റണ്ടിന്റെ തുടക്കം മുതല്‍ സ്പെയിനിന്റെ പ്രയാണം. അവരുടെ എതിരാളികളായി കലാശക്കളിയില്‍ എത്തിയത് ഹോളണ്ടും. തീര്‍ത്തും വ്യത്യസ്ത രീതികളില്‍, കലാശക്കൊട്ടിലെക്ക് നീങ്ങിയ രണ്ടു റ്റീമുകള്‍. ആദ്യ കളിയില്‍ സ്വിറ്റ്സര്‍ലാന്‍ഡിന്റെ കൈയ്യില്‍ നിന്നേറ്റ ഒരു ഗോള്‍ തോല്‍വിക്ക് ശേഷം ധീരമായാണ് സ്പെയിന്‍ ഉയിര്‍ത്തെഴുന്നേറ്റത്. അതിനു വിപരീതമായി, ഓറഞ്ചു പട എല്ലാ കളികളിലും, ക്ലീന്‍ ഷീറ്റുമായാണ് ഫൈനലില്‍ എത്തിയത്. കളിച്ച കളികളില്‍ ഒന്നില്‍ പോലും തോല്‍വി അറിയാതെ. യോഗ്യതാ മത്സരങ്ങള്‍ മുതല്‍ ലോകകപ്പ് ഫൈനല്‍ വരെ തോല്‍വിയറിയാതെ ഒരു സ്വപ്നയാത്ര. അതായിരുന്നു ഹോളണ്ടിന്റെ റെക്കോര്‍ഡ്‌. 1970ലെ ബ്രസീലിനെ അനുസ്മരിപ്പിച്ചുകൊണ്ടുള്ള, കിരീടത്തിലേക്കുള്ള പ്രയാണം. എന്നാല്‍ 1974ലെ ചാമ്പ്യന്മാരായ പടിഞ്ഞാറന്‍ ജര്‍മനിയെ പോലെ, യൂറോപ്പിലെ കിരീടധാരണത്തിനു ശേഷമാണ് ലോകം പിടിച്ചെടുക്കാന്‍ സ്പെയിന്‍ തിരിച്ചത്. 2008ല്‍ വിയന്നയില്‍, ജര്‍മനിയെ ഒറ്റ ഗോളിനു പരാജയപ്പെടിത്തിയാണ് സ്പെയിന്‍ യൂറോ കപ്പില്‍ മുത്തമിട്ടത്. പക്ഷേ, ‘നിതാന്ത പരാജിതര്‍’ എന്നറിയപ്പെടുന്ന സ്പാനിഷ് പടയുടെ ചരിത്രം നിര്‍ണായക മത്സരങ്ങളിലെല്ലാം മുട്ടുമടക്കുന്നതായിരുന്നു. ഹോളണ്ടിന്റെ സ്ഥിതിയും വ്യത്യസ്ഥമല്ല. ഇതിനു മുന്‍പ് രണ്ടു തവണ ഫൈനലില്‍ എത്തിയിട്ടുള്ള ഹോളണ്ട് 1974ല്‍ പശ്ചിമ ജര്‍മനിയോടും, 1978ല്‍ അര്‍ജന്റീനയോടും പരാജയപ്പെടുകയായിരുന്നു. സ്പെയിനാകട്ടെ 1950ലാണ് അവസാനം സെമിഫൈനല്‍ കളിച്ചത്.

അങ്ങിനെയുള്ള ഹോളണ്ടും സ്പെയിനും തമ്മില്‍ ഏറ്റു മുട്ടിയപ്പോള്‍ പ്രതീക്ഷകള്‍ വാനത്തേക്കുയര്‍ന്നുവെന്നത് നേര്. പക്ഷേ, തീര്‍ത്തും നിരാശപ്പെടുത്തുന്ന ഫൈനലായിരുന്നു ലോകം മുഴുവനുമുള്ള ആരാധകരെ കാത്തിരുന്നത്. ഗോള്‍ ക്ഷാമം വിളയാടിയ 90 മിനിറ്റില്‍ കൂടുതലും കണ്ടത് കൈയേറ്റങ്ങളായിരുന്നു. റെസ്ലിങ്ങിനെയും, റഗ്ബിയെയും ഓര്‍മിപ്പിച്ച കളിയില്‍ പിറന്നത്‌ 13 കാര്‍ഡുകള്‍ — എല്ലാം മഞ്ഞ. അതില്‍ ഒന്‍പതെണ്ണം ഹോളണ്ടിനും, നാലെണ്ണം സ്പെയിനിനും. ആ ഒന്‍പതില്‍, രണ്ടു മഞ്ഞ കാര്‍ഡ് കണ്ട് ഹോളണ്ടിന്റെ ഹൈറ്റിങ്ങ പുറത്തു പോയി. തുടര്‍ച്ചയായി രണ്ടാം ലോക കപ്പിലും നിശ്ചിത സമയത്ത് ഫലം കാണാതെ വന്നപ്പോള്‍ കളി എക്സ്ട്രാ-റ്റൈമിലേക്കു കടന്നു. പെനാല്‍റ്റിയെന്ന കളിയെക്കൊല്ലിയില്‍ നിന്ന് സ്പെയിനെ അത്ഭുതകരമായി രക്ഷിച്ചത് ബാര്സലോണ താരമായ ആന്ദ്രെ ഇനിഎസ്ട. സ്ട്രൈക്കരായ ഡേവിഡ്‌ വിയ്യക്ക്‌ കൃത്യമായ പാസുകള്‍ നല്‍കി വിസ്മയം സൃഷ്ട്ടിച്ച ഇനിഎസ്ട ഈ ലോകകപ്പിന്റെ സൗന്ദര്യം തന്നെയായിരുന്നു.  എക്സ്ട്രാ-റ്റൈമിന്റെ രണ്ടാം പകുതിയില്‍ മുന്നേറിയ ഇനിഎസ്ട പെനാല്‍റ്റി ബോക്സിന്റെ വലത്തെയറ്റത്തു നിന്ന് തൊടുത്ത ഉഗ്രന്‍ ഷോട്ട് ഹോളണ്ടിന്റെ വല തുളച്ചതോടെ സ്വര്‍ണ കപ്പില്‍ സ്പെയിനിന്റെ പേരു വീണു കഴിഞ്ഞിരുന്നു. പ്രതിരോധം ആക്രമണതന്ത്രമാക്കി മാറ്റിയ സ്പെയിന്‍ ഈ ലോക കപ്പില് വഴങ്ങിയത് വെറും രണ്ടു ഗോളുകള്‍ മാത്രം. ഫൈനലിലും കഥ വ്യത്യസ്തമായിരുന്നില്ല. ശക്തമായ  സ്പാനിഷ് പടച്ചട്ട വലിച്ചുകീറാന്‍ ഹോളണ്ടിനായില്ല. നിധി കാക്കും പോലെ ഗോള്‍ കോട്ട കാത്തുസൂക്ഷിച്ച സ്പെയിനിന്റെ നായകനും ഗോളിയുമായ ഇകേര്‍ കസ്സിയാസ് ഈ പ്രതിരോധ തന്ത്രത്തില്‍ വഹിച്ച പങ്ക് ചെറുതല്ല. ജയത്തോടെ സ്പെയിന്‍ മറ്റൊരു റെക്കോര്‍ഡ്‌ കൂടി തിരുത്തി. ലോക കപ്പില്‍ ആദ്യത്തെ കളി തോറ്റ ഒരു റ്റീമും ഇതുവരെ കപ്പില്‍ മുത്തമിട്ടിട്ടുണ്ടായിരുന്നില്ല. കൂടാതെ, വളരെ കുറച്ചു ഗോളുകള്‍ അടിച്ചു ലോക കപ്പ്‌ ജയിക്കുന റ്റീമും സ്പെയിനാണ്.

വിസന്റെ ടെല്‍ ബോസ്ക്, എന്ന പഴയ റിയാല്‍ മാദ്രിദ് പരിശീലകനന്റെ കീഴിയില്‍, സ്പെയിന്‍ മൂര്ച്ചയേറിയതും, ചാരുതയുമാര്‍ന്ന ഫുട്ബോളാണ് കാഴ്ചവച്ചത്. വര്‍ഷങ്ങളായി ലോക നിലയില്‍ സ്പെയിന്‍ വളരയേറെ പ്രതീക്ഷയും, വൈഭവവും, പ്രദര്‍ശിപ്പിച്ച ശേഷം അവസാന കടമ്പയില്‍ വീഴുകയായിരുന്നു. എന്നാല്‍ ഇത്തവണ ആ ചരിത്രം ബോസ്കെയുടെ കുട്ടികള്‍ തിരുത്തിയെഴുതി. ‘ടിക്കി ടക’ എന്ന നാമധേയത്തില്‍ അറിയപ്പെടുന്ന പാസിംഗ് തന്ത്രമാണ് സ്പെയിനിന്റെ കളിക്ക് കാതലായുള്ളത്. ‘പാസ്സ് കൊടുത്തുകൊണ്ട് നീങ്ങുക’ എന്നാണു ‘ടികി ടാകയുടെ’ അര്‍ഥം. ഇത്തരം പസ്സിങ്ങിലൂടെ പുറത്തു വരുന്നത് റ്റീം വര്‍ക്കാണ്. കാല്പന്തു കളി 11 കളിക്കാരെയും കോര്‍ത്തിണക്കി കൊണ്ടു നടക്കുന്ന പോരാട്ടമാണെന്നും, അല്ലാതെ ഗോളടിക്കുന്നവന്റെ ഒറ്റയാന്‍ നീക്കങ്ങളല്ലെന്നുമുള്ള വാദം ഊട്ടിയുറപ്പിക്കപ്പെടുകയായിരുനു സ്പെയിനിന്റെ കളിരീതി. ഈ കളി ശൈലിയാണ് യുവ തുര്‍ക്കികളായ ജര്‍മനിയെ പരാജയപ്പെടുത്താന്‍ സ്പെയിനിനെ സഹായിച്ചത്. വേഗതയും, മൂര്ച്ചയേറിയ പ്രത്യാക്രമണങ്ങളും കൊണ്ട് ഇംഗ്ലണ്ടിനെയും അര്‍ജന്റീനയെയും മുട്ടുകുത്തിച്ച ജര്‍മനിക്ക് പക്ഷേ, സ്പെയിനിന്റെ തന്ത്രങ്ങള്‍ക്കു മുന്നില്‍ അടിയറവു പറയേണ്ടി വന്നു.

***
ജര്‍മനി എന്ന റ്റീമിന്റെ കളി വിടരുന്നതിനു കൂടി ലോക കപ്പ്‌ സാക്ഷിയായി. ചെറുപ്പം കളിയാടിയ ലോക കപ്പയിരുന്നു ദക്ഷിണാഫ്രിക്കയില്‍ അവര്‍ക്ക്. മിറോസ്ലാവ് ക്ലോസെ എന്ന മുന്നേറ്റക്കാരനെ സഹായിച്ചത് ഒരു കൂട്ടം ഉശിരരും, ഊര്ജലസ്വലരുമാരായ കളിക്കാരായിരുന്നു. കൂടാതെ, വിവിധ ദേശീയതകളുടെ ഒരു സംഗമമായിരുന്നു ജര്‍മന്‍ റ്റീം. കുടിയേറ്റ നിയമങ്ങള്‍ ലഘൂകരിച്ചതോടെ പല ദേശീയതകളുള്ള മിടുക്കന്‍ കളിക്കാര്‍ ജര്‍മനിയുടെ ദേശീയ റ്റീമിന്റെ ചിറകിലേറി. റ്റുണീഷ്യന്‍ വംശജനായ സാമി ഖദീര, ടര്‍കിഷ് വംശജനായ മെസുറ്റ് ഓസില്‍, ഘാനക്കരനായ ജെറോം ബോട്ടെന്ഗ്, ബ്രസീലുകാരനായ കകാവു, സ്പാനിഷ് വംശജനായ മരിയോ ഗോമെസ് എന്നിങ്ങനെ നീളുന്നു ജര്‍മന്‍ നിരയുടെ ശക്തിദുര്‍ഗങ്ങള്‍. ഇവര്‍ക്കെല്ലാം പുറമേ, വെറും 20 വയസുകാരനായ, തന്റെ ആദ്യ ഫുട്ബോള്‍ റ്റൂര്‍ണമെന്റില്‍ തന്നെ അഞ്ചു ഗോളടിച്ചു സുവര്‍ണ പാദുകം സ്വന്തമാക്കിയ തോമസ്‌ മ്യുള്ളര്‍, 25 വയസുകാരനായ ബാസ്ടിയന്‍ ശ്വൈന്‍സ്റൈഗര്‍, നായക സ്ഥാനമേറ്റെടുത്തു ഭംഗിയാക്കിയ ഫിലിപ് ലാം, മിന്നി തിളങ്ങി ഇടതു വിങ്ങില്‍ ആക്രമിച്ചു കളിക്കുന്ന പോടോള്‍സ്കി എന്നിവര്‍ കൂടിയാവുമ്പോള്‍ ജര്‍മനി ലോകോത്തര നിര തന്നെയാവുന്നു. നായകനായ മൈക്കള്‍ ബല്ലാക്കിന്റെ അഭാവം ജര്‍മന്‍ ആരാധകര്‍ അറിഞ്ഞതേയില്ല. പക്ഷേ, ജര്‍മന്‍ പടയുടെ മുന്നേറ്റം സ്പാനിഷ് കോട്ടയ്ക്കു മുന്നില്‍ അടിയറവു പറഞ്ഞു. കാര്ലെസ് പുയോളിന്റെ ഹെഡര്‍ ജര്‍മന്‍ ആരാധകരുടെ ഹൃദയത്തിലേക്കാണ് തുളഞ്ഞു കയറിയത്. റ്റൂര്‍ണമെന്റില്‍ മൊത്തം 16 ഗോളടിച്ച ജര്‍മനി ഇനിയും ഒരങ്കത്തിനു തയ്യാറാണെന്ന സന്ദേശത്തോടെയാണ് ദക്ഷിണാഫ്രിക്കയില്‍ നിന്നും വിട പറഞ്ഞത്.

***
തല കുനിക്കാതെ ദക്ഷിണാഫ്രിക്ക വിട്ട റ്റീമാണ് യുറുഗ്വായ്. നാല്പതു വര്‍ഷത്തിനു ശേഷം സെമി ഫൈനലിലേക്ക് ഒരു  കുതിപ്പ്. ഓസ്കാര്‍ ടബാരെസ് എന്ന കഴിവുറ്റ പരിശീലകന്റെ സാന്നിധ്യം‍. ഏറെ പ്രതീക്ഷ നല്‍കി, ലാറ്റിന്‍ അമേരിക്കയില്‍ നിന്നും പങ്കെടുത്ത അഞ്ചു റ്റീമുകളില്‍, നാലെണ്ണം ക്വാര്‍ട്ടറിലെത്തിയെങ്കിലും അതില്‍ യുറുഗ്വായ് മാത്രമാണ് സെമി കണ്ടത്. ദീഗോ ഫോര്‍ലാന്‍ എന്ന മാന്ത്രികന്‍ നടത്തിയ ചടുല നീക്കങ്ങള്‍ ഒരു ഭൂഖണ്ഡത്തിന്റെ മൊത്തം ഫുട്ബോള്‍ സ്വപ്നങ്ങളെയാണ് അത്യുന്നതിയിലേക്കുയര്‍ത്തിയത്. സുവര്‍ണ പാദുകം തലനാരിഴക്ക് നഷ്ടപ്പെട്ടെങ്കിലും മൊത്തം റ്റൂര്‍ണമെന്റിലെയും മികച്ച താരമായുയര്‍ന്ന ഫോര്‍ലാന്‍ സ്വര്‍ണ പന്ത് സ്വന്തമാക്കി. ഫ്രീകിക്കിലൂടെയും, ഗ്രൌണ്ട് ഷോട്ടുകളിലൂടെയും ഗോളുകള്‍ നേടാനുള്ള അപാര കഴിവാണ് ഫോര്‍ലാനെ മഹാനായ കളിക്കാരനാക്കുന്നത്. മൂന്നാം സ്ഥാനത്തിനു വേണ്ടി ജര്‍മനിക്കെതിരെ രണ്ടാം പകുതിയില്‍, നേടിയ ‘വോളി’, സെമിയില്‍ ഹോളണ്ടിനെതിരെ നേടിയ ലോംഗ് ഷോട്ട് ഗോള്‍, ക്വാര്‍ട്ടറില്‍ ഘാനയ്ക്കെതിരെ ലക്ഷ്യത്തിലേക്കു പായിച്ച ഫ്രീ കിക്ക് എന്നിവയൊന്നും ഫുട്ബോള്‍ സ്നേഹികളുടെ മനസില്‍ നിന്നും അത്ര പെട്ടെന്നൊന്നും മായുകയില്ല. പക്ഷെ ലൂയിസ് സുവാറസിന്റെ, ‘ദൈവത്തിന്റെ  കൈ സഹായം’ ഇല്ലായിരുന്നെങ്കില്‍ ഘാന സെമിയിലേക്ക് കയറിയേനെ. ഗോള്‍ പോസ്റ്റിനു മുന്നില്‍ വച്ച് ബോള്‍ കൈ കൊണ്ടു തടുത്ത സുവരസിന് റെഡ് കാര്‍ഡ് കിട്ടി പുറത്തു പോകേണ്ടി വന്നെങ്കിലും, എക്സ്ട്രാ-ടൈമിന്റെ അവസാന നിമിഷത്തില്‍ അസമോവ ജിയാന്റെ പെനാല്‍റ്റി ക്രോസ്-ബാറില്‍ തട്ടി തിരികെ വന്നപ്പോള്‍, സുവരസ് എന്ന വില്ലന്‍ ഹീറോയായുയരുകയായിരുന്നു.

ആഫ്രിക്കന്‍ സ്വപ്നങ്ങളെ, ഒറ്റക്കെട്ടായി നെഞ്ചിലേറ്റിയ റ്റീമായിരുന്നു ഘാന. മറ്റെല്ലാ പടക്കുതിരകളും അടിയറവു പറഞ്ഞു പാതി വഴിയില്‍ വീണപ്പോഴും, ഘാന മുന്നേറൂകയായിരുന്നു. ക്വാട്ടറിലും, ഉശിരന്‍ പോരാട്ടമാണ് അവര്‍ പുറത്തെടുത്തത്. ജിയാന്‍, സുല്ലി മുന്ടാരി, സ്റ്റീഫന്‍ അപ്പിയ, മറ്റും കെവിന്‍-പ്രിന്‍സ് ബോട്ടെന്ഗ് എന്നീ നിര ഘാനയെ സെമിയുടെ അടുത്തുവരെ എത്തിച്ചു. ആഫ്രിക്കയ്ക്കു ഫുട്ബോള്‍  പുത്തരിയല്ലെന്നും, അവര്‍ക്ക് തനതായ ശൈലിയും, ആവേശവും കൈമുതലായി ഉണ്ട് എന്നും അവര്‍ ആവര്‍ത്തിച്ചു കാണിച്ചു.

***

ഒരു പക്ഷെ, വന്‍ ശക്തികളായ, ബ്രസീലിന്റെയും, അര്‍ജന്റീനയുടെയും, പുറത്തു പോകലയിരിക്കും, ഈ ലോക കപ്പിന്റെ ഏറ്റവും വലിയ ദുഃഖ കഥ. രണ്ടു വ്യത്യസ്ത രീതികളില്‍, ക്വാര്‍ട്ടറില്‍ തോല്‍വി ഏറ്റുവാങ്ങേണ്ടി വന്നതു, ഈ രണ്ടു റ്റീമുകളുടെയും ഫുട്ബോള്‍ ഫില്ലോസോഫിയെ പ്രതിക്കൂട്ടിലാക്കുന്നു. അര്‍ജന്റീനയുടെ പതനം, കഴിഞ്ഞ ലോക കപ്പിലെ പോലെ തന്നെ, ഇത്തവണയും ജര്‍മനിയോടേറ്റു വാങ്ങിയ പരാജയത്തോടെയായി. കഴിഞ്ഞ തവണ തോല്‍വി പെനാല്‍റ്റി ഷൂട്ട്‌-ഔട്ടില്‍ ആയിരുന്നെങ്കില്‍, ഇത്തവണ ദാരുണമായിരുന്നു. ഫുട്ബോള്‍ ഇതിഹാസം ദീഗോ മറഡോണ പരിശീലനത്തിന്റെ കടിഞ്ഞാന്‍ കൈയ്യില്‍ വാങ്ങിയതിന്‍ പിന്നെ അര്‍ജന്റീന റ്റീമിന് നവ ഉന്മേഷം പകരും എന്നാണ് കരുതപ്പെട്ടിരുന്നത്. പക്ഷേ, വളരെയേറെ പ്രയാസപെട്ടാണ് അര്‍ജന്റീന യോഗ്യത നേടിയതു തന്നെ. ഏതാണ്ട് 110-ഓളം കളിക്കാരെ മാറി-മാറി ഉപയോഗിച്ചാണ്, മറഡോണ യോഗ്യത റൌണ്ടുകള്‍ അവസാനിപ്പിച്ചത്. പക്ഷെ, ദക്ഷിണാഫ്രിക്കയില്‍ എത്തിയ റ്റീം അനായാസമായി മുന്നേറിയപ്പോള്‍ കഥ മാറുകയാണെന്ന് പലരും വിശ്വസിച്ചു. കിടയറ്റ ആറ്‌ സ്ട്രൈക്കര്‍ മാരുമായെത്തിയ മറഡോണ ആക്രമണത്തിനാണ് പ്രാധാന്യം നല്‍കിയത്. ഈ ആക്രമണോത്സുക ശൈലി അര്‍ജന്റീനക്ക് ഗ്രൂപ്പ്‌ പോരാട്ടങ്ങളിലും, പ്രീ-ക്വാര്‍ട്ടറിലും ഏറെ ഗുണം ചെയ്തു. പക്ഷെ, ജര്‍മനി അനായാസമായി മറഡോണയുടെ കുട്ടികളെ തറപറ്റിച്ചു. പ്രതിരോധമായിരുന്നു വില്ലന്‍. ബുര്ടിസ്സോ, ഒട്ടമേണ്ടി, ഹൈന്‍സ, ഡെമിക്കെലിസ് എന്നിവരടങ്ങുന്ന പ്രതിരോധ ഒരിക്കലും ലോകോത്തര നിലവാരത്തിലേക്കുയര്‍ന്നില്ല. മെസ്സിയുടെ മേലുള്ള അമിതമായ ആശ്രയവും റ്റീമിന് വിനയായി.

ബ്രസീലിന്റെ പതനം തനതു ശൈലി മറന്നും, മാറിയും കളിച്ചതിന്റെ ഫലമായിരുന്നു. കളിച്ചു ശീലിച്ച, ശൈലിയില്‍ കാതലായ മാറ്റങ്ങള്‍ വരുത്തി ഡുന്ഗ പ്രതിരോധത്തിന് ഊന്നല്‍ നല്‍കി. ഇത്തരത്തിലുള്ള ഗെയിം പ്ലാനില്‍ പ്രത്യാക്രമണങ്ങളാണ് മുന്‍നിരത്തപെട്ടത്‌. ഒറ്റ സ്ട്രൈക്കാരായ ഫാബിയാനോവിനെ മുന്നില്‍ നിര്‍ത്തി, മധ്യ നിരയില്‍ റോബിന്യോവും കകയും വഴി മുന്നേറ്റങ്ങള്‍ നടത്താനുള്ള തന്ത്രം പക്ഷേ വില പോയില്ല. പ്രതിരോധ നിരയില്‍ ജില്ബെര്ടോ സില്‍വ, മൈകോണ്‍, ഫെലിപ്പേ മെലോ എന്നിവരുടെ സാന്നിധ്യം ശ്രദ്ധേയമായിരുന്നു. ഗ്രൂപ്പ് കളികളില് ഏറെ ദുര്‍ബലരായിരുന്ന വടക്കന്‍ കൊറിയക്കെതിരെ വെള്ളം കുടിച്ചു പോയ ബ്രസീല്‍ പോര്ച്ചുഗലിനോട് സമനില വഴങ്ങി. പ്രിക്വാര്‍ട്ടറില്‍ ചിലിയെ പരാജയപ്പെടുത്താനായെങ്കിലും ക്വാര്‍ട്ടറില്‍ ഹോളണ്ടിനെ മറി കടക്കാന്‍ ബ്രസീലിനായില്ല. സ്നൈഡറുടെ, ഹെഡറുകള്‍ ലക്ഷ്യസ്ഥാനത്തു  കൊണ്ടപ്പോള് ബ്രസീല്‍ വീണു. പരുക്കന്‍ കളി പുറത്തെടുത്ത മെലോ റെഡ് കാര്‍ഡ് കണ്ടു പുറത്തു പോയതോടെ ബ്രസീലിന്റെ താളം ആകെ തെറ്റുകയായിരുന്നു. ഒറ്റ ദിവസത്തിന്റെ ഇടവേളക്കിടയില്‍ പരാജയം ഏറ്റു വാങ്ങിയ ഈ രണ്ടു ലാറ്റിന്‍ അമേരിക്കന്‍ ശക്തികളും ഫുട്ബോള്‍ പ്രേമികളെ അഗാധ ദുഖത്തിലേക്കാഴ്ത്തിയിട്ടുണ്ടാവുമെന്നുറപ്പ്.

***
കളി വിരുന്നു ഒരുക്കുന്നതിലും, സംഘടനത്തിലും നിറച്ചു വൈഭവം കാട്ടിയാണ് ദക്ഷിണാഫ്രിക്ക ഈ ലോക കപ്പ്‌ സംഘടിപ്പിച്ചത്. റഗ്ബി, ക്രിക്കറ്റ്‌ എന്നീ മഹാമേളകള്‍, ഒരുക്കിയ ശേഷം കാല്‍പ്പന്തു കളിയും, വിജയത്തോടെ നടത്താന്‍ ‘മഴവില്‍ നാടിനു’ കഴിഞ്ഞു. പത്തു കൂറ്റന്‍ സ്റ്റേഡിയങ്ങളാണ് ദക്ഷിണാഫ്രിക്ക പണികഴിപ്പിച്ചത്. ജോഹന്നസ്ബര്‍ഗിലെ സോക്കര്‍ സിറ്റിയും, എല്ലിസ് പാര്‍ക്കും, പോര്‍ട്ട്‌ എലിസബത്തിലെ നെല്‍സന്‍ മണ്ടേല ബേ, ഡര്‍ബനിലെ മോസേസ് മഭിധ, കേപ് ടൌണിലെ ഗ്രീന്‍ പോയിന്റ്‌ എന്നിവയും ദൃശ്യ വിസ്മയം തീര്‍ത്തു. സോക്കര്‍ സിറ്റി ആഫ്രിക്കയുടെ വംശിയ പൈതൃകങ്ങള്‍ ഉള്‍കൊള്ളിച്ചു കൊണ്ടാണ് രൂപകല്‍പ്പന ചെയ്യപെട്ടത്. ‘കലബാഷ്’ എന്ന ആഫ്രിക്കന്‍ കലത്തിന്റെ/ചട്ടിയുടെ രൂപത്തിലാണ് സ്റ്റേഡിയത്തിന്റെ പുറം ചട്ട. കൂടാതെ തനതു ഗോത്ര-സാംസ്കാരിക പൈതൃകങ്ങളെ കാല്‍പ്പന്തു കളിയില്‍ ഉള്‍ക്കൊള്ളിക്കാനും ദക്ഷിണാഫ്രിക്കക്ക് സാധിച്ചു. ജാബുലാനി, സക്കുമി, വുവുസേല എന്ന പദങ്ങള്‍ ഇന്ന് ഏവരുടെയും ചുണ്ടില്ലുണ്ട്. കാതടപ്പിക്കുന്ന, ആയിരം തേനീച്ചകള്‍ മുഴക്കുന്ന സംഗീതമായാണ് വുവുസേലയെ പലരും ലോക കപ്പില്‍ കണ്ടതും. പലരും, പരാതിപ്പെട്ടെങ്കിലും, ആ ഇരമ്പത്തിനു ഒരീണമുണ്ടായിരുന്നു. വനാന്തരങ്ങളുടെ, സംസ്കാരത്തിന്റെ, സാഹോദര്യത്തിന്റെ, സൗഹൃദയത്തിന്റെ പൊന്നീണം.

***
ഒരു   മാസം നീണ്ട കായിക ഉത്സവത്തിന് തിരശ്ശീല വീഴുമ്പോള്‍, മനസ്സിലേക്കെത്തുന്നത് ചലിക്കുന്ന വിസ്മയ ബിംബങ്ങളാണ്. ഉരുളുന്ന പന്തിന്റെ സംഗീതമാണ്. മതില്‍ക്കെട്ടുകളും, അതിര്‍വരമ്പുകളും താണ്ടി ലോകം ‘സുന്ദരമായ കളിയെ’ പ്രണയിച്ച ഒരു മാസമാണ്. ‘ജോഗോ ബോനിടോയെ’ വാഴ്ത്തി പാടിയ തിമര്‍പ്പിന്റെ ആ മുപ്പതു ദിവസങ്ങള്‍ക്ക് നന്ദി. ഇനി നാലാണ്ടുകള്‍ക്കു ശേഷം ഫുട്ബോളിന്റെ മെക്കയായ ബ്രസീലില്‍ കാണാമെന്ന പ്രതീക്ഷയോടെ…

Be Sociable, Share!

• 

Tags: Brazil, Deigo Forlan, Maradona, PK Anand, South Africa, World Cup 2010