എഡിറ്റോറിയല്‍: കേരളത്തിലെ താലിബാനികള്‍

Be Sociable, Share!

• 

ചോദ്യ പേപ്പര്‍ കേസിലെ പ്രതി തൊടുപുഴ ന്യൂമാന്‍ കോളെജ് അധ്യാപകന്‍ റ്റിജെ ജോസഫിന്റെ വലതു കൈപത്തി ഒരു സംഘം അക്രമികള്‍ വെട്ടിമാറ്റിയ സംഭവം മനുഷ്യത്വമുള്ള ആരെയും ഞെട്ടിച്ചിട്ടുണ്ടാകുമെന്നുറപ്പ്. പള്ളിയില്‍ നിന്നും കുര്‍ബാന കഴിഞ്ഞു വീട്ടുകാരോടൊപ്പം തിരിച്ചു പോവുമ്പോഴാണ് വാനിലെത്തിയ ഒരു സംഘം ആയുധങ്ങളുമായി ജോസഫ് മാഷിനെ ആക്രമിച്ചത്. മാഷും കുടുംബവും സഞ്ചരിക്കുകയായിരുന്ന കാര്‍ തടഞ്ഞു നിര്‍ത്തി ഇദ്ദേഹത്തെ പുറത്തേക്ക് വലിച്ചിഴച്ച് കൈപ്പത്തി വെട്ടി മാറ്റി വലിച്ചെറിയുകയായിരുന്നുവെന്ന് റിപോര്‍ട്ടുകള്‍ പറയുന്നു. സംഭവത്തിനു പുറകില്‍ പോപ്പുലര്‍ ഫ്രണ്ട് എന്ന എന്‍ഡിഎഫാണെന്നാണ് പൊലീസ് നിഗമമനം. പോപുലര്‍ ഫ്രണ്ട് വിദ്യാര്‍ത്ഥി വിഭാഗത്തിന്റെ നേതാവ് മേക്കാലടി മുണ്ടേത്ത് അഷറഫ്, കോതമംഗലം ഇരമല്ലൂര്‍ പരിത്തിക്കാട്ടുകുടി ജാഫര്‍ എന്നിവരെ പൊലീസ് അറസ്റ്റു ചെയ്തിട്ടുമുണ്ട്.

മൂന്നു മാസങ്ങള്‍ക്കു മുന്‍പ് ന്യൂമാന്‍ കോളെജില്‍ ബികോം രണ്ടാം സെമസ്റ്റര്‍ വിദ്യാര്‍ത്ഥികളുടെ ഒരു ഇന്റേണല്‍ പരീക്ഷയ്ക്ക് ചോദ്യ പേപ്പര്‍ തെയ്യാറാക്കിയതിനെ തുടര്‍ന്നാണ് ജോസഫ് വിവാദ നായകനാകുന്നത്. ‘മലയാളം ഗദ്യവും രചനയും’ എന്ന ചോദ്യ പേപ്പറിന്റെ പതിനൊന്നാമത്തെ ചോദ്യമാണ് പ്രവാചക നിന്ദയ്ക്കിടയാക്കിയെന്ന ആരോപണമുയര്‍ന്നത്. മുഹമ്മദ് എന്ന പേരുള്ള ഒരാള്‍ ദൈവവുമായി നടത്തുന്ന സംഭാഷണമാണ് വിഷയം. എഴുത്തുകാരനും സംവിധായകനുമായ പിറ്റി കുഞ്ഞുമുഹമ്മദിന്റെ ഒരു ലേഖനത്തിലെ ഒരു ഭാഗമെടുത്ത് ചോദ്യം തെയ്യാറാക്കിയ അധ്യാപകന്‍ അതിലെ കഥാപാത്രത്തിന്റെ പേര് മനപൂര്‍വം മുഹമ്മദ് എന്നു മാറ്റിയെഴുതുകയായിരുന്നു. മനപൂര്‍വം പ്രവാചകനെ അവഹേളിക്കാനാണ് പ്രസ്തുത ചോദ്യത്തില്‍ മുഹമ്മദ് എന്ന പേരു ചേര്‍ത്തതെന്ന് പലരും അഭിപ്രായപ്പെട്ടു. ചോദ്യ പേപ്പര്‍ വിവാദമായതിനെ തുടര്‍ന്ന് ന്യൂമാന്‍ കോളെജില്‍ ആദ്യ പ്രകടനം നടത്തിയത് കെഎസ്യു ആയിരുന്നു. തുടര്‍ന്ന് എന്‍ഡിഎഫ്, യൂത്ത് ലീഗ്, എംഎസ്എഫ് എന്നീ സംഘടനകള്‍ പ്രതിഷേധമേറ്റെടുത്തു. പ്രശ്നം വര്‍ഗീയവത്കരിക്കപ്പെടുന്നു എന്ന ഘട്ടത്തില്‍ ‘പ്രവാചക നിന്ദ’യ്ക്കു കാരണക്കാരനായ അധ്യാപകനെ സസ്പെന്‍ഡ് ചെയ്ത് കോളെജ് മാനേജ്മെന്റ് കൈയൊഴിഞ്ഞു. ജോസഫിനെതിരെ പൊലീസ് ക്രിമിനല്‍ കേസും രജിസ്റ്റര്‍ ചെയ്തു. പിന്നീട് കുറച്ചു നാള്‍ ഒളിവിലായിരുന്ന ജോസഫ് പൊലീസ് പിടിയിലായെങ്കിലും ജാമ്യമെടുത്ത് പുറത്തിറങ്ങുകയായിരുന്നു. ജാമ്യത്തിലിരിക്കുന്ന അധ്യാപകനെയാണ് ജൂലൈ നാലിന് അക്രമികള്‍ വെട്ടി പരിക്കേല്പിച്ചത്.

മതനിന്ദയുടെ പേരില്‍ മറുനാടുകളില്‍ ആളുകളെ മൗലികവാദികള്‍ ആക്രമിക്കുകയും കൊലപ്പെടുത്തുകയും ചെയ്യുന്ന സംഭവം മാധ്യമങ്ങളിലൂടെ അറിയാറുള്ള മലയാളിക്ക് സ്വന്തം വീട്ടുമുറ്റത്ത് അത്തരമൊരു അക്രമം നടന്നത് ഒരു ആഘാതം തന്നെയായിരുന്നിരിക്കണം. അപകടകരമാം വിധം മതവത്കരിക്കപ്പെട്ടുകൊണ്ടിരിക്കുകയാണെങ്കിലും, ഇത്തരത്തില്‍ മതത്തിന്റെ പേരിലുള്ള ഒരു ആക്രമണം മലയാളിയുടെ പൊതുബോധം പ്രതീക്ഷിച്ചിരുന്നോ എന്ന് സംശയമാണ്. ഒരു പക്ഷേ, താലിബാന്‍ മോഡലില്‍ നടക്കുന്ന കേരളത്തിലെ ആദ്യ അക്രമസംഭവമായിരിക്കും ജോസഫ് മാഷിനെതിരെ നടന്നത്. അതുകൊണ്ട് തന്നെയാണ് കേരളത്തിലെ അക്രമങ്ങളുടെ ചരിത്രത്തില്‍ നിന്നും വേറിട്ട ഒരു സംഭവമാണ് ഇതെന്ന് പറയേണ്ടി വരുന്നതും.

വര്‍ഗീയസംഘര്‍ഷങ്ങളും, രാഷ്ട്രീയാതിക്രമങ്ങളും കേരളത്തിനു പുതുമയല്ല. പ്രത്യേകിച്ചും സംഘടിത രാഷ്ട്രീയ ശക്തികള്‍ തമ്മിലുള്ള സംഘട്ടനങ്ങള്‍. ഈ രാഷ്ട്രീയ സംഘര്‍ഷങ്ങള്‍ തുടങ്ങുന്നത് ഇന്നോ ഇന്നലെയോ അല്ല. തൊള്ളായിരത്തി എഴുപതുകളില്‍ ജനസംഘത്തിന്റെ കാലം മുതലേ അക്രമ രാഷ്ട്രീയവുമുണ്ട്. പൊതുവെ കേരളത്തില്‍ നടക്കുന്ന സംഘട്ടനങ്ങള്‍ രാഷ്ട്രീയ സംഘടനകളിലെ നേതാക്കളെയോ സജീവ പ്രവര്‍ത്തകരെയോ ആണ് ലക്ഷ്യം വയ്ക്കുക. അതുകൊണ്ട് തന്നെ, രാഷ്ട്രീയ സംഘടനകള്‍ക്കപ്പുറത്തേക്ക് പൊതുജനത്തിന്റെ ജീവിതത്തിനോ, മതേതര സാമൂഹ്യ ഘടനയ്ക്കോ ഇത്തരം അക്രമങ്ങള്‍ നേരിട്ട് ഭീഷണിയുയര്‍ത്തുന്നില്ല. രാഷ്ട്രീയധ്രുവീകരണമാണ് ഇത്തരം അക്രമസംഭവങ്ങള്‍ക്കാധാരം. അല്ലാതെ, മത ധ്രുവീകരണമല്ല. ഒരു പ്രത്യേക മതത്തിലോ സമുദായത്തിലോ പെട്ട മുഴുവന്‍ ആളുകളെയും ഇരകളാക്കി മാറ്റുന്ന ഫാഷിസത്തിന്റെ പ്രത്യയശാസ്ത്രം രാഷ്ട്രീയ സംഘര്‍ഷങ്ങളില്‍ കാണാനൊക്കില്ല.

എന്നാല്‍ ജോസഫ് മാഷ് ഒരു രാഷ്ട്രീയ പാര്‍ടിയുടേയും സജീവ പ്രവര്‍ത്തകനല്ല. ഒരു കൊലപാതക കേസിലും പ്രതിയുമല്ല. തീര്‍ത്തും സ്വകാര്യമായ ജീവിതം ജീവിച്ചു വരുന്ന ഒരാള്‍. അങ്ങിനെയൊരു വ്യക്തിക്കെതിരെ സംഘടിതാക്രമണം നടത്താന്‍ മതഭ്രാന്തന്മാര്‍ തെയ്യാറാവുന്നതെന്തു കൊണ്ട് എന്നതാണ് ചര്‍ച്ചാ വിഷയമാക്കേണ്ടത്. ചോദ്യ പേപ്പറില്‍ അകാരണമായി ജോസഫ് മാഷ് പ്രവാചകന്റെ പേര്‍ തിരുകി കയറ്റിയത് ഗുരുതരമായ തെറ്റാണെന്ന കാര്യത്തില്‍ ഞങ്ങള്‍ക്ക് തെല്ലുമില്ല സംശയം. മതങ്ങളേയും മതനേതാക്കളേയും വിമര്‍ശിക്കാം. പക്ഷേ, അത് അവഹേളനമാവരുത്. പ്രത്യേകിച്ചും, വളരെ മതാത്മകമായ, സെന്‍സിറ്റിവായ ഒരു സമൂഹത്തില്‍. അങ്ങിനെയൊരു തെറ്റു ചെയ്തതിനുള്ള ശിക്ഷയും ജോസഫ് മാഷിനു കിട്ടിയിട്ടുണ്ട്. എന്നാല്‍, തങ്ങളുടെ മതത്തെ നിന്ദിച്ചവനെ സ്റ്റേറ്റ് ശിക്ഷിച്ചാല്‍ പോരെന്നും, അവനുള്ള ശിക്ഷ ഞങ്ങള്‍ തന്നെ നല്‍കുമെന്നുമുള്ള ഫഷിസ്റ്റ് പിടിവാശിയാണ് പിന്നീട് നമ്മള്‍ കാണുന്നത്.

മതവിശ്വാസം മൗലികവാദമാവുന്ന ഘട്ടത്തില്‍ സഹിഷ്ണുതയും, യുക്തിയും മരിച്ചു വീഴുന്നു. തങ്ങളാണ് ശരി, എന്ന ബോധ്യത്തിനപ്പുറത്ത് തങ്ങള്‍ മാത്രമാണ് ശരിയെന്നും, തങ്ങളുടെ ശരികളെ വെല്ലുവിളിക്കുന്നവരൊന്നും സമാധാനത്തോടെ ജീവിക്കേണ്ടെന്നുമുള്ള അപകടകരമായ ഒരവസ്ഥയാണിത്. ഒരു ബഹുസ്വരസമൂഹത്തില്‍ ഇത്തരത്തിലുള്ള അസഹിഷ്ണുതാവാദികള്‍ വരുത്തി വച്ചേക്കാവുന്ന വിന എത്ര വലുതായിരിക്കും? അതുകൊണ്ടാണ് ഇത് പൊതുജനത്തിനു മേലുള്ള മതഫാഷിസത്തിന്റെ ആക്രമണമാണെന്ന് പറയേണ്ടി വരുന്നത്. ഇതിന്റെ ദുരന്തഫലങ്ങള്‍ തിരിച്ചറിയുന്നതിനു പകരം, കേരളത്തിന് അക്രമങ്ങളുടെ ഒരു ചരിത്രമുണ്ടെന്നും, ആ അക്രമ പരമ്പരയിലെ ഒരു കണ്ണി മാത്രമാണ് ഇപ്പോള്‍ നടന്ന സംഭവമെന്നുമുള്ള സാമാന്യ വത്കരണം നമ്മെ എവിടെയുമെത്തിക്കില്ല. വര്‍ഗീയ ഫാഷിസ്റ്റുകള്‍ക്കെതിരെ ജാഗരൂഗരായിരിക്കുന്നതു പോലെ തന്നെ താലിബാനികള്‍ക്കെതിരേയും മതനിരപേക്ഷ കേരളം സുസജ്ജമാവേണ്ടതുണ്ട്. ജോസഫ് മാഷിനെ ആക്രമിച്ചവരാരായാലും അവരെ ഒറ്റപ്പെടുത്താനും, നിയമപരമായി ശിക്ഷിക്കാനും സമാധാനകഅംക്ഷികള്‍ക്കും ഭരണകൂടത്തിനും കഴിയണം.

മതം ശക്തമായി തിരിച്ചു വന്നുകൊണ്ടിരിക്കുന്ന കേരളീയ സമൂഹത്തില്‍ ഇത്തരം സംഭവങ്ങള്‍ ഒരുപക്ഷേ ഇനിയും ആവര്‍ത്തിക്കപ്പെടാം. അമിതമായ മതാത്മകത സമൂഹത്തില്‍ കൂടുതല്‍ അക്രമങ്ങള്‍ക്ക് കാരണമാകും എന്നതിന് ചരിത്രം സാക്ഷി. അത്തരമൊരു സാമൂഹ്യ ഘട്ടത്തിലൂടെയാണ് കേരളവും ഇന്ന് കടന്നു പോയിക്കൊണ്ടിരിക്കുന്നത്. അതുകൊണ്ട് തന്നെ സമാധാന കാംക്ഷികളും മതനിരപേക്ഷരരും കൂടുതല്‍ ജാഗരൂകരായിരിക്കേണ്ടതുണ്ട്. ജോസഫ് മാഷിനെ ഒരു സംഘം മതഭ്രാന്തര്‍ ആക്രമിച്ചത് ഒരു സാമുദായിക ധ്രുവീകരണത്തിലേക്ക് നയിക്കാന്‍ അനുവദിച്ചു കൂടാ. അതുപോലെ തന്നെ, ഈയൊരു സംഭവം കൊണ്ട് ഒരു സമുദായത്തെ മുഴുവനും കരിവാരിത്തേക്കാനുള്ള സാംസ്കാരിക വലതു യുക്തിക്ക് നാം കീഴ്പെടാനും പാടില്ല. ഫാഷിസ്റ്റുകള്‍ പതിയിരിക്കുന്ന ഒരു ഭാവിയാണ് നമ്മെ കാത്തിരിക്കുന്നത്. പ്രബുദ്ധകേരളത്തിന് പിടിപ്പതു ജോലിയുണ്ടെന്ന് ചുരുക്കം.

Be Sociable, Share!

• 

Tags: Editorial, Fundamentalism, Kerala, NDF, TJ Joseph